HOT STORIES OF THE WEEK

Kumpiyansa si Pangulong Rodrigo Duterte na tuluyan nang magwawakas ang communist insurgency sa susunod na taon.

Sa kanyang talumpati sa Camp Melchor Dela Cruz Sa Gamu, Isabela, inihayag ni Pangulong Duterte na ang patuloy na pagsuko ng mga miyembro ng New People’s Army (NPA) sa iba’t ibang bansa ang rason nang pagtatapos ng rebelyon.

Naniniwala rin ang punong ehekutibo na unti-onti nang nananalo sa digmaan ang pamahalaan lalo sa Mindanao kung saan maraming rebelde na ang sumuko.

Pinapurihan naman ni Pangulong Duterte ang 5^th infantry division ng Philippine Army sa pakikipag-laban sa mga banta sa seguridad gaya ng NPA.

“Itong mga NPA, they are losing very fast. They are losing grounds sa Mindanao I’m happy to report you there are so many fronts na wala na or are in the throes of death. Kasi marami, malaki na ang nag surrender at pinagtuturo na sila. We are happy in this development kasi yung pagka yung mga political officers na matataas na they know everything.” Pahayag ni Duterte.

Nagkasundo ang iba’t ibang grupo ng mga militante, religious group at pulisya para sa mapayapang paggunita sa deklarasyon ng martial law sa Biyernes, Setyembre 21.

Sa ginanap na diyalogo sa Club Intramuros, inilatag ng mga pulisya ang paghahanda sa seguridad at kaayusan, deployment ng police personnel at iba pa.

Inirekomenda rin ng mpd ang aktibidad sa Quirino Grandstand habang sa burnham green na lamang ang mga Pro Duterte group.

Magpapakalat ng 4,000 pulis kasama na ang augmentation at force multipliers.

Tiniyak ni NCRPO Director Guillermo Eleazar ang pagpapairal ng maximum tolerance.

Siniguro naman ni Teddy Casiño ng Bayan Muna na tatalima sila sa napagkasunduan tulad nang pagkuha ng permit sa venue ng rally mula sa lokal na pamahalaan ng Maynila.

Ilalaban ni retired Major General Jovito Palparan Jr. hanggang sa Korte Suprema ang apela nito laban sa hatol na guilty sa kaniya kaugnay sa pagdukot sa dalawang University of the Philippines (UP) students.

Ayon kay Jc Palparan, anak ng retiradong heneral, i-aakyat nila sa Court of Appeals (CA) ang desisyon ni Malolos RTC Judge Alexander Tamayo na habambuhay na pagkabilanggo laban sa kaniyang ama.

Iginiit ng pamilya Palparan na inosente at walang matibay na ebidensya ang prosecution na magpapatunay sa akusasyon laban sa retired general.

Nanindigan ang pamilya ni Palparan sa kanilang depensa at sinabing hindi isusuko ang kaso ng ama.

Una nang naghain ng apela ang kampo ni Palparan para hindi muna ito mailipat sa New Bilibid Prison (NBP) dahil may nakabinbin pa silang kaso sa korte.

Tutol si Kabataan Party-list Representative Sarah Elago sa pagtatalaga sa magreretirong army chief bilang bagong National Food Authority (NFA) administrator.

Ayon kay Elago, kritikal ang nasabing posisyon kaya’t hindi dapat ipaubaya sa kamay ng isang sundalo ang problema sa supply ng bigas.

Ang mga sundalo aniya ay karaniwang kalaban ng mga magsasaka at katutubo sa mga kanayunan na siya ring utak ng militarisasyon at food blockade sa mga lalawigan.

Dahil dito, Sinabi ni Elago na hindi solusyon sa kakulangan sa supply ng bigas ang pagtatalaga kay Army Chief Lt. Gen Roland Jose Bautista na una nang inalok ng Pangulong Rodrigo Duterte bilang NFA administrator kapag nagretiro na.

Iniimbestigahan na ng Department of Interior and Local Government (DILG) ang 10 alkalde na di umano’y absent sa kanilang bayan nuong panahon ng Bagyong Ompong.

Ayon kay DILG Usec. for peace and order Bernardo Florece Jr., hawak na nila ang pangalan ng naturang mga mayor na mula sa Region 2 at Cordillera Administrative Region (CAR).

Sa oras aniya na mapatunayan na absent ang naturang mga lokal na opisyal sa kanilang mga nasasakupan nuong panahon ng bagyo ay bibigyan sila ng show cause order para pagpaliwanagin.

Ayon kay Bureau of Local Government Supervision Director Atty. Odilon Pasaraba, sakaling mapatunayang nagkasala ay posibleng ma-dismiss ang mag ito pwesto at sampahan ng kasong kriminal.