HOT STORIES OF THE WEEK

Gaya ng inaasahan, hindi pinalampas ng Malakanyang ang panibago na namang patutsada ni Senador Antonio Trillanes IV na banat sa senatorial candidate ng administrasyon.

Sabi kasi ni Trillanes, tiyak daw na magdurusa ang mga tatakbong kandidato ng administrasyon sa mataas na Kapulungan dahil sa inflation at pagbawi sa kanyang amnestiya.

Buwelta ni Presidential Spokesman Harry Roque kay Trillanes, tiyak na walang epekto sa mga senatorial candidate nila ang binawing amnestiya sa Oakwood mutineer ni Pangulong Rodrigo Duterte.

Sa kabilang dako’y tiyak na maipapakita ani Roque sa panahon ng eleksiyon sa taumbayan na ginagawa ng pamahalan ang lahat upang maibaba ang inflation.

Samantala, hinamon ni Roque si Trillanes na lumabas sa Senado para manumpa sa piskalya kasunod ng inisyung subpoena ng Davao City Prosecutor’s Office laban dito.

Sinabi ni Roque na sa kanyang pagkaka-alam, kailangang lumabas ng Senado at manumpa sa isang piskal si Trillanes kahit na hindi na sa Davao City Prosecutor’s Office.

Sentimyento ng mayorya hinggil sa pananatili ni Trillanes sa Senado inunawa ng Palasyo

Nauunawaan ng Malakanyang ang sentimyento o pagkainis na ng mayorya ng mga senador hinggil sa napakatagal nang pananatili ni sen. Antonio trillanes IV sa gusali ng Senado.

Ayon kay Presidential Spokesperson Harry Roque, hindi talaga maiiwasan na mag-reklamo na ang mga kapwa senador ni Trillanes dahil halos ginawa nya nang libreng hotel ang senate building, na maging ang bayarin sa tubig, kuryente at overtime pay ng mga gwardya doon, ay sagot na ng gobyerno.

Laos na aniya ang telenobelang palabas na ito ng senador dahil wala nang pumapansin sa kanya sa loob ng gusali ng Senado.

Muling ipinaalala ng Palace spokesman Kay Trillanes, na tanging ang presidente lang ang may probisyon para sa libreng board and lodging at wala aniyang ganyang pribilehiyo ang mga senador.

Naiintindihan naman aniya na bahain ang bahay ni Trillanes kayat posibleng naisip nito na manatili muna sa Senado ngunit ngayong tapos na aniya ang Bagyong Ompong, dapat nang makaramdam ng hiya ang senador at umuwi na sa kanyang bahay.

Sinopla ngayon ng Malakanyang si dating Department of Interior and Local Government (DILG) Secretary Manuel “Mar” Roxas II kaugnay ng naging suhestiyon nito kay Pangulong Rodrigo Duterte na magkaruon muna ng political ceasefire na pinadaan nito sa kanyang Facebook post.

Hirit ni Roxas para kay Pangulong Duterte, time out muna sa pulitika at ang dapat aniyang gawin ay pagtuunan muna ng pansin ang mas mabigat na isyu gaya ng usapin sa bigas.

Pero buwelta ng Malanyang sa pamamagitan ni Presidential Spokesperson Harry Roque, mas maiging manahimik na lang si Roxas.

Punto ni Roque, kung susukatin aniya kasi ang naging karanasan ng dating kalihim nuon sa Leyte partikular nuong matapos na ang pananalasa ng Bagyong Yolanda nuong 2013, makabubuting muli na lang aniyang manahimik ang dating DILG chief kaysa magbigay ng suhestiyon sa administrasyon.

Matapos ang matagal na pananahimik kasunod ng pagkatalo sa 2016 presidential election, muling nagparamdam si Roxas kahapon sa pamamagitan ng FB post na nagbibigay ng suhestiyon na dapat gawin ng pamahalaan tungkol sa isyu ng bigas, TRAIN law at conditional cash transfer.

Iginagalang ng pamahalaan ang unsolicited advice ni dating DILG Secretary Manuel “Mar” Roxas II kaugnay sa pagtugon ng pamahalaang Duterte sa inflation at kakulangan sa suplay ng bigas.

Sinabi ni Special Assistant to the President (SAP) Bong Go, karapatan ni Roxas ang maghayag ng kanyang saloobin dahil sa umiiral na demokrasya sa bansa pero batid naman aniya ng pamahalaan ang sitwasyon.

Pinagtutuunan na aniya ng mga economic manager ng pamahalaan ang inflation at ginagawan na ito ng paraan.

Binigyang diin ni Go, na maging si Pangulong Rodrigo Duterte ay batid ang sitwasyon kaya nakapagpalabas na ito ng kautusan  sa kanyang economic team at mga kinauukulang ahensya.

Matatandaan na isa sa mga ibinabatong isyu sa administrasyon ni Pangulong Rodrigo Duterte ay ang inflation at ang suplay ng bigas na siniguro naman ng pangulo na kumikilos ang gobyerno at hindi naman talaga nagpapabaya.

Pumalag si Mayor Victorio Palangdan ng Itogon Benguet sa akusasyon na sadyang hinayaan niyang magpatuloy ang operasyon ng illegal small scale mining sa kanilang bayan dahil pagbili ng ginto ang negosyo ng kanyang asawa.

Ayon kay Palangdan, unang buwan pa lamang ng 2018 ay itinigil na ng kanyang asawa ang negosyo dahil tumigil na rin ang mga minero sa pagbebenta sa kanya ng ginto.

Nag-ugat aniya ito sa pulong ng Bureau of Internal Revenue (BIR), National Bureau of Investigation (NBI) at Bangko Sentral ng Pilipinas (BSP) sa mga minero kung saan inatasan silang ibenta ang kanilang ginto nang direkta sa pamahalaan.

Inamin ni Palangdan na pinagsabihan siya ng mga opisyal na ipahihinto nila sa militar ang operasyon ng small scale mining kapag hindi sila nagbenta ng ginto sa bangko sentral.

Iginiit rin ni Palangdan na sapilitan nilang pinapaalis ang mga minero sa minahan bago pa tumama ang bagyong Ompong subalit pinili ng mga minero na manatili sa lugar.

Hindi bababa sa limampu (50) ang nalibing matapos magkaroon ng landslide sa isang minahan sa Itogon Benguet sa kasagsagan ng bagyong Ompong.

—-

Bukas ang Department of Trade and Industry (DTI) sa panukalang deklarasyon ng nationwide state of calamity upang matugunan ang patuloy na pagtaas ng presyo ng bilihin.

Ayon kay DTI Secretary Ramon Lopez, makakatulong ang pag-kontrol ng pamahalaan sa presyo ng bilihin sa ilalim ng state of calamity.

Gayunman, sinabi ni Lopez na sa ikukunsidera lamang nila ang price control o price ceiling kapag nabigo ang mga inilatag nilang solusyon sa mataas na presyo ng bilihin tulad ng pagpapadami ng supply sa merkado.

Una nang inirekomenda ni Finance Secretary Carlos Dominguez ang nationwide declaration ng state of calamity dahil sa lawak ng pinsalang dala ng bagyong Ompong.

—-

Umaasa ang Malakanyang na hindi palalalain ng mga tinamong pinsala sa agrikultura dahil sa Bagyong Ompong ang inflation.

Ayon kay Presidential Spokesperson Harry Roque, hindi makakailang sobrang laking kawalan sa sektor ng agrikultura ang mahigit P14 bilyong pinsala dulot ng Bagyong Ompong.

Gayunman iginiit ni Roque, may mga hakbang nang ginagawa ang pamahalaan na makatutulong para makontrol ang inflation tulad ng pagbibigay pahintulot sa importasyon ng mga produktong pagkain.

Magugunitang sinabi ng National Economic and Development Authority (NEDA) na 2.4 percent sa naitalang 6.4 percent inflation rate noong Agosto ay dahil sa mataas na presyo ng bigas, karne, isda, seafood at mga gulay.

Ikinasa na ng European Union (EU) ang kanilang €2 million o P125 million emergency aid package bilang tulong sa mga biktima ng Bagyong Ompong.

Ayon kay EU Commissioner for Humanitarian Aid and Crisis Management Christos Stylianides, saklaw ng donasyon ang pagpapatayo ng shelter, pamamahagi ng emergency relief items, water and sanitation at food security.

Para ito sa mga nawalan ng bahay dahil sa malakas na hangin, malawakang pagbaha at landslides dulot ng bagyo.

Nagdeploy na rin ang EU ng humanitarian expert sa disaster area upang alamin kung ano pa ang kailangan ng mga biktima.

Samantala, handa na rin ang Japan na magpadala ng tulong sa Pilipinas.

Posibleng umutang ang Pilipinas ng $500 milyon sa World Bank upang mapondohan ang recovery at reconstruction sa mga lugar na napinsala ng Bagyong Ompong.

Ito, ayon kay Finance Secretary Carlos Dominguez III, ay sa oras na magdeklara ng state of national calamity si Pangulong Rodrigo Duterte.

Inirekomenda na aniya ng mga disaster-monitoring agency ng bansa kay Pangulong Duterte ang deklarasyon ng state of national calamity upang magkaroon ng access ang Pilipinas sa $500 milyon loan na may paborableng interest rate.

Batay sa datos ng National Disaster Risk Reduction and Management Council (NDRRMC), tinatayang pitumpu na ang namatay sa pananalasa ng bagyo habang nasa isang milyong katao na ang apektado at mahigit P14 bilyon ang halaga ng pinsala sa agrikultura pa lamang.