HOT STORIES OF THE WEEK

Hindi tututulan ng Malakanyang anuman ang maging desisyon ng Ombudsman kaugnay sa kasong kinakaharap ni Communications Assistant Secretary Mocha Uson hinggil sa kontrobersyal nitong sign language video kasama ang blogger na si Drew Olivar.

Ito ang inihayag ni Presidential Spokesperson Harry Roque matapos magsampa ng kaso laban kay Uson at Olivar ang Philippine Federation of the Deaf at iba pang person with disabilities.

Ayon kay Roque, hindi nila pakikielaman ang magiging hatol ng ombudsman kay Uson maging ang resulta man nito ay ang pagkasibak sa kaniyang pwesto.

“Well, let us wait for the decision of the Ombudsman dahil mayroon nanaman ganyan complaint. The Ombudsman can already order the dismissal of anyone in the government. Because it is both an administrative and a criminal case. Igagalang po ng Palasyo ang proseso pag sinabi po ng Ombudsman sibakin hindi po natin tutulan yan.” Pahayag ni Roque.

Mula religious groups hanggang sa mga militante at human rights groups ang magtitipon-tipon bukas para gunitain ang deklarasyon ng martial law.

Magaganap ito sa Luneta dakong alas-4:00 ng hapon at tinaguriang United People’s Action.

Ang iba’t ibang grupo mula sa simbahan tulad ng Association of Major Religious Superiors of the Philippines, Promotion of Church and People’s Rights, Sangguniang Laiko at Religious Discernment Group ay magkakaroon muna ng isang misa pasado alas-2:00 ng hapon sa San Agustin Church bago magmartsa patungo ng Luneta.

Inaasahan sa program ang mga salaysay hinggil sa mga kahindik-hindik nilang karanasan sa martial law.

Layon ng rally na tiyakin din na hinding-hindi na muli maisasailalim sa martial law ang bansa.

Security preparations

Samantala, kasado na ang seguridad na ipatutupad ng Philippine National Police (PNP) para sa demonstrasyon sa Luneta bukas, bilang paggunita sa deklarasyon ng martial law.

Ayon kay Chief Supterintendent Gulllermo Eleazar, hepe ng PNP, nakipagpulong na sila sa convenors ng rally at naglatag sila ng mga panuntunan upang maiwasan ang kaguluhan.

Ipinaalam aniya ng convenors na gagawin ang kanilang programa sa Luneta sa may bahagi ng Roxas Blvd at sa pagitan ng P. Burgos at TM Kalaw Streets.

Nakipag-ugnayan na rin sila sa Metro Manila Development Authority (MMDA) para sa ruta o kung may isasarang kalsada.

—-

Inirekomenda ng Department of Justice (DOJ) panel of investigator ang pagsasampa ng anim na kaso ng homicide laban kay Chief Inspector Jovie Espenido, hepe ng Ozamiz PNP at iba pa.

Kaugnay ito sa pagkakapatay ng pulisya sa mga di umano;y residente lamang ng Ozamiz City nang paulanan di umano sila ng bala sa isang birthday party noong Hunyo ng nakaraang taon.

Ang grupo ni Franciso Manzano, isa sa mga napatay ay sinasabing pinadapa at saka niratrat ng grupo ng mga pulis sa pangunguna ni Espenido.

Matatandaan na matapos mapatay ay inilatag pa nina Espenido ang katawan ng mga napatay sa kalsada ng Ozamiz.

Una nang iginiit ni Espenido na lehitimong police operations ang kanilang ginawa laban sa mga pinaghihinalaang robbery suspects.

Samantala, ibinasura naman ng DOJ panel ang murder at arbitrary detention laban sa grupo ni Espenido.

(Ulat ni Bert Mozo)

Naganganganib tumaas ang presyo ng processed meat tulad ng hotdog, siomai at luncheon meat.

Ito, ayon sa grupong Philippine Association of Meat Processors Incorporation (PAMPI) at Meat Importers and Traders Association (MITA) sa oras na isabatas ang revised Agricultural Tariffication Act o kilala bilang Rice Tariffication Bill.

Sa ilalim ng bill, aalisin ang mga hadlang sa pag-angkat ng bigas o quantitative restrictions upang dumami ang supply at bumaba ang presyo nito.

Ang mga imported na karne anila ang ginagamit sa paggawa ng hotdog, sausage, luncheon meat at iba pang giniling na karne.

Inihayag ni PAMPI Executive Director Francisco Buencamino na maaaring tumaas ng 12 hanggang 17 porsyento ang presyo ng processed meat depende sa kategorya ng produkto.

Katumbas ito ng siyete (7) hanggang 20 pesos na dagdag presyo sa kada kalahating kilo ng hotdog habang ang longganisa at iba pang sausage ay maaaring tumaas nang hanggang bente sais (6) pesos.

—-

Lumarga sa Kamara kahapon ang plenary debates sa proposed P3. 757 trillion national budget para sa susunod na taon matapos ang dalawang araw na delay.

Inisponsaran ni House committee on appropriations vice chairperson Maria Carmen Zamora ang House Bill 8169 o General Appropriations Bill (GAB) para sa 2^nd reading approval sa plenaryo.

Sa kanyang speech, inihayag ni Zamora na plano ng administrasyon ni pangulong rodrigo duterte na pondohan ang 2019 budget sa pamamagitan ng tax at non-tax revenues maging ng local at international resources.

Karaniwang iniisponsaran ang proposed national budget ng chairman ng kumite na kasalukuyang pinamumunuan ni Davao City 1st District Rep. Karlo Nograles.

Gayunman, nawala sa hurisdiksyon ni Nograles ang GAB noong martes makaraang mag-convene ang House leadership bilang committee of the whole na nag-realign sa P51.79 bilyon na mula sa pondo ng Department of Public Works and Highways (DPWH).

Naganap ito matapos madiskubre ng liderato ng Kamara ang mahigit P50 bilyon na halaga umano ng “misplaced” funds sa susunod na taon.

(Ulat ni Jill Resontoc)

Tuloy na talaga ngayon araw sa Kongreso ang deliberation ng 2019 budget proposal -Andaya @dwiz882

— Jill Resontoc – DWIZ -882 AM radio (@JILLRESONTOC) September 19, 2018

Si Cong.Maria Carmen Zamora at hindi si Cong.Karlo Nograles nagsagawa ng sponsorship speech ng 2019 GAA/Budget proposal @dwiz882

— Jill Resontoc – DWIZ -882 AM radio (@JILLRESONTOC) September 19, 2018

Ibinalik na ni Pangulong Rodrigo Duterte ang pamamahala ng National Food Authority (NFA) at dalawang iba pang ahensya sa Department of Agriculture (DA) na una ng isinailalim sa Office of the President.

Sa ilalim ng Executive Order (EO) No. 62 na nag-aamyenda sa kanyang unang EO noong 2016, ibinalik din ni Pangulong Duterte sa DA ang pamamahala sa Philippine Coconut Authority (PCA) at Fertilizer and Pesticide Authority (FPA) mula sa cabinet secretary.

Ito’y sa gitna ng sinasabing rice crisis sa ilang bahagi ng bansa na nagtulak kay dating NFA Administrator Jason Aquino na magbitiw sa pwesto.

Isasailalim naman sa pamamahala ng pangulo ang Housing and Urban Development Coordinating Council (HUDCC) na pangunahing mandato ay tiyakin ang ugnayan ng mga government housing agency sa National Shelter Program (NSP).

Muling sinampahan ng kasong libel ni Presidential Son Paolo Duterte si Senador Antonio Trillanes IV.

Kaugnay ito sa pagdawit ni Trillanes kay Duterte sa P6.4 billion na halaga ng shabu na ipinuslit mula China, noong Mayo ng isang taon.

Inihain ng dating bise alkalde ng Davao City ang reklamo sa city prosecutors’ office.

Intensyon aniya ng senador na sirain ang reputasyon, ang kanyang pangalan lalo’t siya ang panganay na anak ni Pangulong Rodrigo Duterte.