HOT STORIES OF THE WEEK

Umapela sa publiko si Vice President Leni Robredo na huwag nang hayaang makabalik sa kapangyarihan ang mga diktador at opisyal na umaabuso sa kapangyarihan.

Ginawa ni Robredo ang apela sa dinaluhan nitong misa para sa kapayapaan sa De La Salle University (DLSU) sa Maynila na bahagi ng pagalala sa ika-46 na anibersaryo ng deklarasyon ng martial law.

Ayon kay Robredo, nasubukan na ng bansa ang kamay na bakal na pamumuno kung saan dumanak aniya ang dugo at nawasak ang mga institusyon.

Binigyang diin ni Robredo na hindi dapat hayaang makalimutan ang mga nagbuwis ng buhay at ang mga taong nagpahirap sa sambayanan nuong panahon ng batas militar.

Kabi-kabila ang kilos protesta ng iba’t ibang grupo sa paggunita ng ika-46 na anibersaryo ng deklarasyon ng martial law.

Nakiisa sa protesta at maagang nagtipon sa Elliptical Road sa Quezon City ang mga magsasaka mula sa iba’t ibang lalawigan.

Sa University of the Philippines (UP) Diliman naman, nagdaos din ng programa kontra martial law ang mga estudyante at guro.

Libu-libo katao ang nagprotesta sa Luneta para kundenahin ang deklarsyon nuon ng batas militar sa panahon ni dating Pangulong Ferdinand E. Marcos.

Ayon sa organizers, alas sais ng gabi kagabi, aabot sa 15,000 katao ang nakilahok sa kanilang programa na nagmula pa sa iba’t ibang panig ng bansa.

Pero sa tala ng Philippine National Police (PNP), aabot lamang sa 3,000 ang mga nagprotesta kahapon.

Muling tiniyak ng Philippine National Police-National Capital Region Police Office (PNP-NCRPO) ang pagpapatupad ng maximum tolerance sa mga magsasagawa ng demonstrasyon ngayong anibersaryo ng martial law.

Apat na libong (4,000) pulis mula sa NCRPO at Central Luzon ang ipinakalat sa Mendiola, Luneta at iba pang lugar na mayroong pagkilos ngayong araw na ito.

Ayon kay PNP-NCRPO Chief Guillermo Eleazar, nakapaglatag na sila ng mga panuntunan sa pulong nila sa mga convenors ng mga grupong lalahok sa malakihang kilos protesta ngayong araw na ito.

Mayroon na aniya silang nabuong guidelines para hindi magkasalpukan ang mga pro at anti-Duterte groups na magsasagawa ng programa.

“Tayo po ay nakaantabay at sisiguraduhing sila po ay hindi lalabag sa mga pinaiiral na batas dito sa atin, isinama po natin ‘yan sa ating mga contingency at sa ating planning, inaasahan po natin na sila po ay susunod din naman.” Ani Eleazar

Kumpiyansa si Eleazar sa ikinasa nilang seguridad sa harap ng intelligence report na lalahok di umano sa mga rally ang mga New People’s Army (NPA).

Binigyang diin ni Eleazar na libreng lumahok sa mga pagkilos ang kahit na sinong mamamayan basta susunod ang mga ito sa batas tulad na lang ng pagbabawal na magdala ng baril.

“Meron tayong intelligence monitoring, open din ang ating lines of communication, binibiyan natin ng responsibilidad ang mga lider na magsasagawa ng kanilang kilos protesta na bantayan ang kanilang hanay, laging may consequence ang aksyon na ginagawa ng mga opisyal at may batas tayong pinaiiral. We have 4,000 personnel to be deployed all over the place at may dagdag na 1,000 sa bahagi ng Camp Crame, at dito sa Camp Bagong Diwa meron ding naka-standby at may mga augmentation pa tayo.” Pahayag ni Eleazar

(Ratsada Balita Interview)

Kinumpirma ng Malakanyang na nakatanggap si Pangulong Rodrigo Duterte mula sa intelligence officials kaugnay sa malawakang kilos protesta na gagawin ngayong araw kasabay ng paggunita sa ika-apatnaput anim (46^th) na anibersaryo ng deklarasyon ng martial law.

Gayunman hindi na nagbigay pa ng karagdagang detalye ang Malakanyang kaugnay sa nakarating na impormasyon sa pangulo.

Magugunitang inihayag kamakailan ni pangulong duterte na ang umano’y pagsasabwatan ng Liberal Party (LP), Communist Party of the Philippines at Magdalo group para pabagsakin ang kaniyang administrasyon.

Ito umano ay ikinakasa sa pagitan ng buwan ng Setyembre at Oktubre.

Ipinag-utos ni Agriculture Secretary Manny Piñol kay Jason Aquino na bumalik muna sa kaniyang pwesto bilang National Food Authority (NFA) administrator.

Ayon kay Piñol, ito ay dahil wala pang nahahanap na kapalit ni Aquino kaya pinakansela muna niya ang leave o pagbibitiw nito.

Dagdag pa ng kalihim, malaki pa ang papel ni Aquino para sa matagumpay na paglipat ng liderato sa nasabing ahensya.

Magugunitang nagbitiw na sa pwesto si Aquino dahil sa sunod-sunod na kontrobersiya tungkol sa bigas.