HOT STORIES OF THE WEEK

Walang inconsistency sa magkaibang pahayag nina Pangulong Rodrigo Duterte at AFP Chief of Staff Carlito Galvez Jr. hinggil sa Red October plot.

Ito ayon kay Presidential Spokesman Harry Roque ay dahil mismong sa bibig ni Senador Antonio Trillanes IV nanggaling ang panawagan nitong magbitiw sa pwesto ang pangulo.

Sa pagdinig ng Senado, inihayag ni Galvez na walang kinalaman sina Trillanes at Liberal Party sa planong pagpapatalsok sa pangulo taliwas sa akusasyon ni Duterte.

Sinabi ni Roque na maaaring walang pormal na alyansa o memorandum of agreement ang grupo nina Trillanes, LP at Communist Party of the Philippines (CPP) subalit maaaring magkakasabwat ang mga ito sa plano.

Wala rin aniya sa mga kritiko ang aamin subalit malinaw sa intelligence information na valid ang pahayag ng pangulo na siyang patalsikin sa puwesto.

Kinontra ng Malakanyang ang pag-amin ni Armed Forces of the Philippines (AFP) chief-of-staff Gen. Carlito Galvez Jr. na nag-apply ng amnesty si Senador Antonio Trillanes IV batay na rin sa opisyal na nangasiwa sa panunumpa ng senador.

Ayon kay Presidential Spokesman Harry Roque, wala pa ring maipakita si Trillanes na orihinal na kopya ng kaniyang amnesty application kaya’t idineklarang void ng Pangulong Rodrigo Duterte ang amnesty nito sa pamamagitan ng Proclamation 572.

Sinabi ni Roque na dalawang branch na ng Makati court ang nag desisyon laban sa paggigiit ni Trillanes na nakumpleto niya ang amnesty requirements.

Hindi aniya abogado si Galvez kayat hindi nito talaga batid ang mga ebidensyang dapat na magpatunay sa amnesty ni Trillanes.

Nagsimula nang mangalap ng isang milyong lagda ang Katipunan ng Demokratikong Pilipino para hilingin sa Pangulong Rodrigo Duterte na suspindihin na ang EPIRA o Electric Power Industry Reform Act.

Ayon kay KBP Chairman Butch Valdez, ito lamang ang nakikita nilang paraan upang maibsan naman ang paghihirap ng mga Pilipino.

Dalawampu’t apat na porsyento aniya ng buwanang sahod ng isang pamilya ang napupunta lamang sa hindi makatarungang presyo ng kuryente.

Sinabi ni Valdez na doble ang presyo ng kuryente sa Pilipinas kumpara sa Estados Unidos dahil sa EPIRA Law.

Taong 1991 nang isabatas ang EPIRA Law kung saan isinapribado ang power transmission at generation assets ng pamahalaan.

 (Ulat ni Aya Yupangco)

Nilinis ng Armed Forces of the Philippines (AFP) sina opposition senators Antonio Trillanes IV at Francis Pangilinan sa di umano’y planong pagpapatalsik kay Pangulong Rodrigo Duterte na tinagurian nilang ‘Red October’.

Sa budget hearing ng Senate Committee on Finance, direktang tinanong ni Trillanes si AFP Chief of Staff General Carlito Galvez kung sangkot siya at si Pangilinan sa Red October.

Ayon kay Galvez, nakikita nilang ang intensyon ng CPP-NPA na makipag-koalisyon sa oposisyon kaya’t nais ng militar na protektahan ang lehitimong oposisyon.

Nang iginiit ni Trillanes kung nakipag-koalisyon ba sila sa NPA, sinagot ito ni Galvez ng hindi.

Binigyang diin ni Trillanes na iniimpluwensyahan niya ang oposisyon na lumayo sa NPA.

Dahil hanggat pumapatay aniya ng sundalo ang mga NPA, para silang langis at tubig na kahit kelan ay hindi puwedeng maghalo.

—-

Babalik na sa dalawa hanggang apat na porsyento ang inflation rate pagpasok ng 2019.

Ito ang pagtayang ginawa ni Budget Secretary Benjamin Diokno sa harap ng patuloy pa ring pagtaas ng presyo ng pangunahing bilihin sa bansa.

Ayon kay Diokno, makikita na ang epekto sa inflation ng mga hakbang na ginawa ng pamahalaan para masawata ang pagtaas ng bilihin.

Isa aniya rito ang paglagda ng Pangulong Rodrigo Duterte sa Administrative Order No. 13 kung saan tinatanggaol ang non tarrif barriers o mas pinabilis at pinadali na ang pag-angkat ng mga produkto.

Ang pang mahabaang solusyon naman aniya sa mataas na inflation ay ang rice tariffication na ipapasa na ng Kongreso sa lalong madaling panahon.

Una rito, batay sa pagtaya ng Bangko Sentral, papalo pa sa 6.8 percent ang inflation rate sa susunod na mga buwan.

—-

Kumbinsido sina Magdalo party-list Rep. Gary Alejano at dating Bayan Muna party-list Rep. Satur Ocampo na kathang isip lamang ng gobyerno ang umano’y planong pagpapatalsik sa pwesto kay Pangulong Rodrigo Duterte ngayong Oktubre.

Ayon kay Ocampo, hindi naman na nakagugulat ang pahayag ni Pangulong Duterte dahil matagal nang layunin ng CPP-NPA na pabagsakin ang gobyerno.

Nagbabala rin ang dating kongresista na maaaring mauwi sa authoritarian rule ang bansa kung ipagpapatuloy ng pangulo ang pag-atake sa oposisyon.

Naniniwala naman si Alejano na kinokondisyon na ng pamahalaan ang isip ng publiko upang makumbinse na mayroong ouster plot. Itinanggi rin ng dating rebeldeng sundalo na kabilang ang kanilang grupo sa mga nagbabalak na magpatalsik sa pwesto kay Pangulong Duterte.

Iginiit ng Department of Finance (DOF) na wala pa ring ipatutupad na automatic suspension ng fuel excise tax sa ilalim ng Tax Reform for Acceleration and Inclusion (TRAIN) kahit pa pumalo na sa $83 per barrel ang presyo ng krudo sa international market.

Ayon kay Finance Assistant Secretary Antonio Lambino, ang suspensyon ng buwis sa produktong petrolyo ay may kaakibat na mga kondisyon.

Sakali anyang manatili sa $80 level ang presyo ng krudo sa international market sa tatlong sunod na buwan ay tsaka lamang anya ipatutupad ang oil excise suspension mechanism bago ang susunod na increase.

Nakatakda ang susunod na increase sa excise tax sa langis sa Enero ng susunod na taon at sa panahong ito ay kabuuang P4.50 na ang buwis sa diesel.

Tiniyak naman ni Lambino sa publiko na gumagawa na ng paraan ang gobyerno upang maibsan ang epekto sa mga mahirap ng patuloy na pagsirit ng presyo ng mga produktong petrolyo.

Handa na ang shortlist ng Judicial and Bar Council (JBC) nang pagpipilian ng papalit kay dating Associate Justice Samuel Martires na una nang itinalagang Ombudsman.

Ayon kay JBC ex officio member at ngayo’y Department of Justice (DOJ) Secretary Menardo Guevarra, kasama sa shortlist sina Court Administrator Jose Midas Marquez, Court of Appeals (CA) justices Japar Dimaampao, Ramon Garcia, Manuel Barrios, Apolinario Bruselas, Rosmari Carandang, Edgardo Delos Santos, Ramon Paul Hernando at Amy Lazaro-Javier.

Mula sa nasabing shortlist ay pipili ang Pangulong Rodrigo Duterte ng bagong mahistrado at mayruon siyang 90 na araw para magtalaga ng bagong miyembro ng high tribunal mula nang mabakante ang posisyon.

—-

Nais pahabain sa syamnapung (90) araw ang pagkulong sa isang hinihinalang terorista habang iniimbestigahan.

Ito ang mungkahing amyenda ng security officials sa Human Security Act o Anti-Terrorism Law upang magkaroon ito ng ngipin sa paglaban sa terorismo.

Ayon kay Defense Secretary Delfin Lorenzana, kung may sapat na ngipin ang batas, magiging huling hakbang na lamang ang pagpapatupad ng martial law para labanan ang terorismo.

Sinabi naman ni AFP Chief of Staff General Carlito Galvez, batay sa kanyang karanasan, hindi nakukuha sa isa hanggang tatlong linggo ang magandang resulta ng imbestigasyon.

Binigyang diin naman ni National Intelligence Coordinating Agency o NICA Chief Alex Paul Monteagudo makakagawa pa ng mga follow operations ang awtoridad para mapigilan ang mga tangkang pag-atake kung mas mahabang panahon makukulong ang isang hinihinalang terorista.

(Ulat ni Cely Bueno)