HOT STORIES OF THE WEEK

Hinamon ni Senate Minority Leader Franklin Drilon si Presidential Spokesperson Harry Roque na kasuhan ang mga sinasabing miyembro ng Liberal Party (LP) na sangkot sa umano’y Red October plot laban sa administrasyong Duterte.

Ito’y matapos igiit ni Roque na may LP members ang nakikipag alyansa sa Communist Party of the Phillippines (CPP) upang patalsikin si Pangulong Rodrigo Duterte.

Ayon kay Drilon mismong pinuno na ng Armed Forces of the Philippines (AFP) ang naglinis sa LP sa pagkakadawit nito sa nasabing destabilasasyon ngunit patuloy pa rin ang pangdadawit ni Roque sa nasabing partido.

Dahil dito, sinabi ni Drilon na kung talagang may nalalaman si Roque kaugnay sa pagkakasangkot ng LP, dapat umanong niyang kasuhan ang mga sinasabi nitong miyembro ng naturang partido.

Pinaiimbestigahan ng Makabayan bloc sa Kamara ang Red October plot na sinasabi ng Malakanyang na planong pagpapatalsik sa Pangulong Rodrigo Duterte.

Ayon sa Makabayan bloc, nangangamba silang ang Red October ay paraan ng gobyerno para magsagawa ng crackdown laban sa oposisyon.

Mismong ang matataas na opisyal pa anila ng militar ang nag media hopping para isapubliko ang Duterte ouster plot na isasagawa ngayong buwan.

Sinabi pa ng Makabayan bloc na halatang halat rin ang pagpapaigiting ng gobyerno sa red tagging sa mga progresibong grupo na pilit idinadawit sa walang basehan Red October.

(with report from Jill Resontoc)

Makabayan bloc Solons file a resolution to investigate Red October Oust Duterte plot @dwiz882 pic.twitter.com/3qWBGeJjYi

— Jill Resontoc – DWIZ -882 AM radio (@JILLRESONTOC) October 2, 2018

Mayroong ilang unibersidad at kolehiyo sa Metro Manila ang inoorganisa di umano ng komunistang grupo na sumali at makiisa sa ikinakasang “Red October” plot na naglalayong mapatalsik sa puwesto si Pangulong Duterte.

Ito ang naging pahayag ni Armed Forces of the Phillipines o AFP Chief of Staff Carlito Galvez sa naganap na Senate budget hearing kamakailan.

Sa katunayan nitong hapon lamang ay tinukoy ng AFP ang mga unibersidad at kolehiyo kung saan umano nagre-recruit ang CPP-NPA.

Ito ay ang mga sumusunod:

• UP Diliman
• UP Manila
• PUP Sta. Mesa
• Ateneo de Manila University
• De La Salle University
• UST
• Adamson
• FEU
• UE Recto
• UE Caloocan
• Adamson
• Emilio Aguinaldo College
• Earist-Eulogio Amang Rodriguez
• San Beda
• Lyceum
• University of Makati
• Caloocan City College
• University of Manila
• Philippine Normal University

Matatandaan na tinawag ng Communist Party of the Philippines (CPP) na kathang isip lamang ng militar at pamahalaan ang umano’y “Red October”.

Sa ipinalabas na pahayag ng CPP, kanilang mariing na kinondena ang Armed Forces of the Philippines (AFP) sa anila’y pagiimbento ng sitwasyon na may malinaw na layuning magpatupad ng mararahas na aksyon laban sa taumbayan

Nag-resign na bilang assistant secretary ng Presidential Communications Operations Office (PCOO) si Mocha Uson.

Ginawa ni Uson ang anunsyo sa kanyang pagharap sa budget hearing ng ahensya sa Senado ngayong umaga.

Ayon kay Uson matagal na niyang pinag-iisipan ang pagbibitiw sa puwesto dahil sa kabi-kabilang batikos na kanyang tinatanggap.

Pero sinabi ni Uson na ang talagang nagtulak sa kanya upang magbitiw ay ang umano’y panggigipit ng ilang mambabatas sa budget ng PCOO at ang aniya’y paggamit ng mga posisyon nito para takutin ang mga opisyal ng mga ahensya na hindi sumasang-ayon sa kanilang plano.

“Ako na ang magsasakripisyo para maipasa na ang budget ng PCOO. Ako po ay nag-desisyon na mag-resign na po.” Ani Uson

Giit ni Uson hindi siya nagbitiw sa puwesto dahil sa takot sa kanyang mga kritiko kundi dahil nais lamang niyang lumaban ng patas para sa mga walang boses sa lipunan.

Sinabi pa ni Uson na ngayong wala na siya sa gobyerno at isa nang ordinaryong Pilipino ay mas handa na siyang harapin ang mga nag-aakusa sa kanya.

“Basta ako malaya na ako uling makipaglaban.” Dagdag ni Uson

Nagpasalamat din si Uson kay Pangulong Duterte sa pagkakataon aniyang ibinigay sa kanya upang magsilbi sa bayan. —AR

(May ulat mula kay Cely Bueno)

Sinibak na ni Pangulong Rodrigo Duterte si Labor Underscreatary Joel Maglunsod.

Inanunsyo ito ng Pangulo sa kanyang talumpati kagabi sa Camp Juan Ponce Sumuroy sa Catarman, Northern Samar.

Hindi naman nagbigay ang Pangulo ng dahilan sa pagsibak nito kay Maglunsod.

Gayunman, nabanggit sa talumpati ng Pangulo ang problema ng patuloy na pagsasagawa ng strike ng mga manggagawa na nakakaapekto sa ekonomiya.

Si Maglunsod ay dating kinatawan sa Kongreso ng makakaliwang grupong Anakpawis.

Magugunitang nawala na rin sa gabinete ang mga miyemnbro ng makakaliwang sina dating DSWD Secretary Judy Taguiwalo at dating Agrarian Reform Secretary Rafael Mariano matapos na hindi makumpirma ng Commission on Appointments (CA).

Sinibak naman sa puwesto si Terry Ridon bilang Chairperson Presidential Commission for the Urban Poor habang nagbitiw naman si Liza Maza sa National Anti-Poverty Commission.

(Ulat ni Jopel Pelenio)

Nagsimula nang magtaas ang presyo ng tinapay sa ilang supermarket.

Limampung sentimos (P0.50) hanggang uno singkwenta (P1.50) ang itinaas ng kada pakete ng tasty at pandesal.

Una rito sinabi Philippine Association of Flour Millers Executive Director Ric Pinca, mahigpit ang supplay ngayon ng wheat o trigo sa world market.

Dahil dito ay nagmahal aniya ang harina na pangunahing sangkap sa paggawa ng tinapay.

Samantala, dagdag piso (P1.00) naman sa kada pakete ng Pinoy tasty at limampung sentimos (P0.50) sa kada pakete ng Pinoy pandesal ang hiling ng mga panadero sa katapusan ng Oktubre.

Ayon sa mga panadero bukod sa harina, tumataas din ang presyo ng LPG, asukal at iba pang sangkap sa paggawa ng tinapay.

—-

Magpapatupad ng “price setting” ang Department of Trade and Industry (DTI) sa inaangkat na bigas at asukal bago matapos ang buwan.

Ito umano ay para matiyak na may murang bigas at asukal sa merkado.

Ayon sa DTI, tatlumpu’t walong piso (P38) ang kanilang itinakdang presyo sa kada kilo ng well-milled rice habang limampung piso (P50) naman sa kada kilo ng imported na puting asukal.

Samantala, hihigpitan na ng Department of Agriculture (DA) at National Food Authority (NFA) ang pagsusuring gagawin sa mga bigas na inaangkat mula sa ibang bansa.

Ito umano ay para maiwasan na ang pagkakaroon bukbok sa bigas.

Ikinatuwa naman ito ng grupong Bantay Bigas na anila’y tama lang na suriin ang kanilang inaangkat na mga produkto.

Gayunman sinabi ng grupo na mas makakabuti pa rin kung wala nang pag-aangkat ng bigas sa ibang bansa at sa mga lokal na magsasaka na lang mismo bibili ng bigas.

NFA ipagbabawal ang pag-aangkat ng mga mamahaling commercial rice

Pagbabawalan na ng National Food Authority (NFA) ang pag-aangkat ng mamahaling commercial rice.

Ayon kay Department of Agriculture (DA) Secretary Manny Piñol, ito ay para tugunan ang mataas na presyo ng bigas.

Paliwanag ni Piñol, magiging daan ito para mahila ng pababa ang presyo ng ibang commercial rice dahil wala ng mahal na bigas.

Naglalaro aniya kasi sa P50 hanggang P60 kada kilo ang mga bigas na “Class A” o iyong limang porsyentong broken rice mula sa Thailand at Vietnam.

Dahil dito tanging 25 porsyentong broken rice na lamang ang pwedeng angkatin ng gobyerno at mga rice trader.

—-

Nag-uwian na umano sa Mindanao ang mga Filipino-ISIS fighters mula Syria at Iraq batay sa report ng Washington-based Center for Strategic and International Studies (CSIS).

Ito, ayon sa CSIS, ay bunsod ng unti-unting pag-atras at pagkatalo ng Islamic State sa Iraq at Syria bunsod ng walang humpay na pag-atake ng mga US coalition forces, Syrian at Russian forces.

Mas marami anilang mga kapanalig ang ISIS sa Southeast Asia lalo mula sa mga armadong grupo sa Autonomous Region in Muslim Mindanao (ARMM) kumpara sa mga nakasagupa ng US forces sa Afghanistan at Iraq.

Sa nakalap namang impormasyon ng US state at defense departments, planong magtatag ng sariling caliphate sa kani-kanilang bansa ang mga foreign ISIS fighter.

Samantala, pasok din ang Pilipinas sa listahan ng US State Department ng mga bansang may mataas na terorrist activity noong isang taon na kinabibilangan din ng Afghanistan, India, Iraq at Pakistan.

Pamahalaan handang sugpuin ang ISIS

Handa ang gobyerno na sugpuin ang banta ng Islamic State sa gitna ng ulat na may ilang Filipinong miyembro ng ISIS ang nag-uwian na mula sa Middle East.

Ayon kay Presidential Spokesman Harry Roque, makatitiyak ang publiko na ligtas sila sa banta ng teroristang grupo.

Nagkaroon na aniya ang Pilipinas ng improvement sa counter-terrorism capabilities matapos ang digmaan sa Marawi City, Lanao Del Sur.

Sa nasabing ulat, pasok din ang Pilipinas sa limang bansang may mataas na terorrist activity noong isang taon.

Tila lumalabo nang bumalik sa peace negotiations ang gobyerno at National Democratic Front of the Philippines (NDFP).

Ito’y makaraang ipag-utos na ni Pangulong Rodrigo Duterte ang pagpuksa sa mga rebeldeng komunista sa buong bansa.

Sa kanyang pagharap sa mga sundalo mula sa 803^rd Infantry Brigade ng Army sa Catarman, Northern Samar, inihayag ni Pangulong Duterte na ang pagpatay sa mga rebelde na lamang ang paraan upang makamit ang kapayapaan.

“We are not into a crime prevention pati yang pulis kasali na. It’s neutralization ang atin. Then, we can solve the problem. Neutralization na tayo ngayon, there is no crime prevention because the crime is being perpetrated 24 hours a day. ” Pahayag ni Duterte.

Hindi na aniya dapat mag-issue ng warrant of arrest laban sa mga rebelde dahil lalo lamang tatagal at posibleng makatakas pa ang mga ito.

Inatasan din ng Punong Ehekutibo na pag-ibayuhin ang pangangalap ng mga impormasyon sa mga hinihinalang rebeldeng komunista.

“Kung may dala kang baril, Sparrow ka, you can be neutralized. Huwag mo na akong bigyan ng warrant, warrant, warrant buti sana kung nagnakaw yan patapos…iba nanaman ninakaw. Pero an NPA when starts to join, babae o lalaki may dalang armas, diretso diretso  na yan, they are committing the crime of rebellion 24 hours a day naghahanap lang ng engkuwentro. So I do not want to give that advice to my soldiers.” Ani Duterte.

Kasabay nito, muling pinayuhan ni Pangulong Duterte ang mga sundalo na huwag magpapahuli ng buhay sa mga kalabang terorista at rebelde.

Aniya, hindi katanggap-tanggap na mapapatay sa maruming paraan ang mga sundalo.

—-

Kakasuhan ng Presidential Anti-Corruption Commission (PACC) si Senador Antonio Trillanes IV.

Dahil sa ito sa iligal na paggamit umano ni Trillanes sa kaniyang Disbursement Acceleration Program (DAP) para pondohan ang hindi maanomalyang lamp post project.

Ayon kay PACC Executive Director Eduardo Bringas, inihahanda na nila ang reklamo laban kay Trillanes at anumang araw ngayong linggo ay isasampa na nila ito sa Ombudsman.

Ito ay bagamat nakasaad sa Executive Order 43 na tanging mga presidential appointee lamang sa executive branch at anuman sa mga ahensya nito na may posisyong assistant regional director o katumbas na ranggo o mas mataas pa na nasa salary grade 26 at mataas ang maaari lamang nilang imbestigahan sa usapin ng korupsyon.

Gayunman, iginiit ni Bringas na hindi mapipigilan ang PACC na imbestigahan at magsagawa ng lifestyle check laban sa mga elected official at mambabatas tulad ni Trillanes.