HOT STORIES OF THE WEEK

Makikipag-ugnayan ang Armed Forces of the Philippines (AFP) sa Commission on Higher Education (CHED) para hadlangan ang plano ng CPP-NPA na tuluyang pasukin ang mga pamantasan para manghikayat ng mga mag-aaral na mag-aklas sa pamahalaan.

Ayon kay AFP Spokeman Brig.Gen. Egard Arevalo, desperado na ang komunistang grupo kaya’t puspusan na ang kanilang panghihikayat sa mga mag-aaral para punan ang kanilang hanay.

Batay sa datos mula sa AFP mula nuong Oktubre 13, aabot na sa mahigit 10,000 mga regular NPA at sympathizers nito ang nalansag na ng pamahalaan.

Kabilang dito ang 639 na regular fighters ng NPA na sumuko at 104 na napatay naman sa mga enkwentro.

Nanindigan naman si Arevalo na talamak ang recruitment ng NPA sa ilang mga paaralang kabilang sa listahan na una na nilang ipinalabas.

Modus aniya ng NPA ay impluwensyahan muna ang mga estudyante na maging aktibista, saka i-mobilisa bilang militante, at pagkatapos ay tuluyang i-recruit sa komunistang grupo.

(with report from Jaymark Dagala)

(Updated)

Anim PDEA-ARMM agents at isang non-uniformed personnel ng Tagoloan Municipal Police Station ang napatay ng mga hindi pa natukoy na suspek sa Barangay Malna, Kapai, Lanao del Sur.

Kinilala ang mga napatay na PDEA agents na sina Kenneth Tabulo, Kristine Mae Torlao, Lores Joy Amar, Binzo Dipolla at Diobel Pacinio na nasawi habang ginagamot sa Amai-Pakpak Medical Center sa Marawi City gayundin si Rachel Gentapanan.

Mariing namang kinundena ng PDEA o Philippine Drug Enforcement Agency ang nangyaring pananambang.

Sa isang pahayag, sinabi ni PDEA Dir/Gen. Aaron Aquino, hindi katanggap-tanggap ang sinapit ng mga kawani ng pamahalaan na tumutupad lamang sa kanilang sinumpaang tungkulin sa taumbayan.

Tiniyak ni Aquino ang tulong na ipaaabot nila sa pamilya ng anim na nasawing PDEA agents at magkakasa sila ng imbestigasyon para matukoy ang mga nasa likod ng nasabing insidente.

Gagamitin din ng PDEA ang buong resources nito para sa ganap na ikahuhuli ng mga salarin at lalo pa nilang paiigtingin ang kanilang kampaniya kontra iligal na droga.

Dahil dito, sinabi ni Aquino na lalo pang lumalakas ang kanilang loob na durugin ang mga sindikato ng iligal na droga at hindi kailanman sila magpapatalo sa mga ito.

Kami po ay taos-pusong nakikiramay sa pamilya ng mga kasamahan nating nabiktima ng karahasang ito. Lalo lamang pong pagpapatunay ito na ang ating ginagawang pagbabantay kontra droga ay nararamdaman ng mga kriminal na ito. Pahayag ni Aquino

Anggulong paghihiganti, tinututukan na ng awtoridad

Anggulong paghihiganti ang tinututukan ng mga awtoridad sa pagkamatay ng anim na ahente ng PDEA sa nangyaring pananambang sa Barangay Malna, Kapai, Lanao del Sur.

Ayon kay PNP-ARMM Regional Director Chief Supt. Graciano Mejares, sakay ng PNP mobile ang mga tauhan ng PDEA kasama ang non-uniformed personnel ng Tagoloan Police Station mula sa isang drug symposium nang tambahgan sila ng mga hindi pa tukoy na armadong kalalakihan.

Kinilala ni Mejares ang mga nasawi na sina Kenneth Tabulo, Kristine Mae Torlao, Lores Joy Amar, Binzo Dipolla, Diobel Pacinio at Rachel Gentapanan.

Sinabi ni Mejares na hindi nila isinasantabi ang anggulong paghihiganti ang nangyari sa anim na PDEA agents lalo pat malalaking suspected drug personalities ang natimbog ng mga awtoridad sa rehiyon.

Sanib puwersa naman ang PDEA, PNP at AFP para tugisin ang mga suspek na nasa likod ng naturang ambush.

Pinag-aaralan na ni Presidential spokesman Harry Roque ang magbitiw sa kanyang tungkulin bilang tagapagsalita ng Pangulo.

Ayon kay Roque, pakiramdam niya ay hindi siya magiging epektibong tagapagsalita kung hindi naman nila nalalaman ang mga ginagawa o aktibidad ng Pangulo.

I am inclined to believe that perhaps I am not in the position to continue with this current function, as you can see I cannot be effective as a spokesperson unless I know everything about the President. Now people think I lied. I’m telling the nation I did not. I did not know. Pahayag ni Roque

Tinukoy ni Roque ang mariing pagtanggi niya na naospital ang Pangulo pero mismong ang Pangulo ang umaming nagpa check up ito sa ospital.

Sinabi ni Roque na kailangan niya ang weekend na ito upang magnilay nilay kung ano ang kanyang gagawing hakbang.

Orihinal naman aniyang plano talaga na manatili lamang siyang isang taon bilang tagapagsalita habang naghahanda sa pagtakbo sa eleksyon.

Kasama aniya sa kanyang pinag-iisipan ang alok sa kanya ng Pangulo na bagong trabaho sa Malakanyang.

Una rito, sinabi ng Pangulo na hindi mananalong senador si Roque kaya’t bibigyan na lamang nya ito ng ibang trabaho.

Roque, tinawag na fake news ang balita na iniugnay ng Pangulo sa mayamang drug pusher si Chinese Ambassador Zhao Jianhua

Tinawag na fake news ni Presidential Spokesman Harry Roque ang balita na iniugnay ng Pangulong Rodrigo Duterte sa mayamang drug pusher si Chinese Ambassador Zhao Jianhua.

Ayon kay Roque, kabaliktaran ng lumabas sa balita ang sinabi ng Pangulo.

Sa pagsasalita aniya ng Pangulo, kinuwestyon nito kung paano magiging drug lord ang negosyanteng si Michael Yang, gayung sa bahay pa nito natutulog ang Chinese ambassador at mga tsino pa ang nagbibigay ng impormasyon sa Pilipinas.

Dahil dito, hiniling ni Roque sa Rappler na siyang naglathala ng ulat na itama ang kanilang pagkakamali.

Pumalo pa sa 6.7 percent ang inflation o bilis ng pagtaas ng presyo ng mga bilihin at serbisyo sa bansa nitong Setyembre sa ika-siyam na sunod-sunod na buwan.

Kumpara ito sa 6.4 percent na naitala naman noong Agosto.

Ayon sa Philippine Statistics Authority (PSA) ito na ang pinakamabilis na naitalang pagtaas sa nakalipas na siyam na taon.

Ipinaliwanang ng PSA na maituturing na top contributor sa pagbilis ng September inflation ang pagkain, non-alcoholic beverages, housing, water, electricity, gas, at transportasyon.

—-

Tiniyak ng Malacañang na hindi maaapektuhan ang trabaho ng gabinete kahit pa halos walong miyembro nito ang magbibitiw sa puwesto para sumabak sa 2019 midterm elections.

Ayon kay Presidential Spokesperson Harry Roque, hindi magiging problema para kay Pangulong Rodrigo Duterte ang magtalaga ng kapalit ng mga magbibitiw na opisyal.

Sa katunayan aniya sa isang posisyon nababakante ay may 100 katao ang interesado dito.

Sinabi rin ni Roque na kahit may mabakanteng posisyon ay awtomatiko namang may itinatalagang officer-in-charge upang hindi masakripisyo ang mga iiwang trabaho.

Ilan sa mga napaulat na magbibitiw sa puwesto para maghanda ang kanilang pagtakbo sa local position ay sina Cabinet Secretary Jun Evasco, TESDA Director Guiling Mamondiong, Special Envoy Abdullah Mama-o.

—-

Ganito isinalarawan ni Pangulong Rodrigo Duterte si Vice President Leni Robredo.

Sa kanyang pahayag sa harap ng mga miyembro ng Philippine Military Academy Alumni Association, Inc. (PMAAAI) sinabi ng pangulo na ang bise presidente ang nakasaad sa konstitusyon na humalili sa kaniya sakaling hindi niya matapos ang kaniyang termino hanggang 2022.

Ngunit ayon sa pangulo mahina sa diskarte si Robredo maging ang kaniya umanong mga ginagawang pahayag sa publiko.

Nilinaw naman ng pangulo na hindi niya intesyon na ma-offend si Robredo.

“Sa totoo lang, even her public statements I don’t mean to offend the lady, she’s very good, she’s gentle, pero mahina talaga si Leni. Mali mali ang medyo mahina ang hindi mahina ang utak, pumasa ng bar eh. Mahina sa diskarte.” Pahayag ni Duterte.

Walang dapat ipangamba ang mga estudyante sa pagpapalabas ng listahan ng Armed Forces of the Philippines (AFP) ng mga unibersidad at kolehiyo kung saan aktibo umanong nag-rerecruit ang Communist Party of the Philippines-New People’s Army CPP-NPA.

Ito ang tiniyak ng Malacañang kasunod ng pag-alma ng ilang mga unibersidad at kolehiyo na napabilang sa nasabing listahan ng AFP.

Ayon kay Presidential Spokesperson Harry Roque, walang nakakaalarma sa ipinalabas na report ng AFP dahil bahagi naman ito ng kanilang tungkulin.

Hindi na rin aniya bago at kagulat-gulat ito pero tiwala naman aniya ang pamahalaan na hindi sinusuportahan ng mga eskwelahan ang anumang aktibidad ng CPP-NPA.

“None of the schools I think will openly endorse such a recruitment. And of course, this recruitment is undertaking in a secret manner so it’s not as if they will have a booth for students to enlist to become members of KM or CPP-NPA. But let’s face it, they are recruiting it is not a cause of worry it’s just a statement of fact but we have no doubts that none of the schools are openly supportive in such initiatives.” Pahayag ni Roque.

Tiniyak din ni Roque na hindi magkakaron paglabag sa karapatan ng mga estudyante dahil sa pagpapalabas ng nasabing listahan.

“Dalawang taon na po ang presidente wala naman pong pinapaaresto kahit sinong estudyante pa no, so pabayaan niyo sila. Ang presidente nga po napakataas ng tolerance sa freedom of expression. I think we have to give credit to the president, he’s not bothered. Ang ayaw lang niya yung mga dayuhan yung nag cicriticize sa kanya, yun nagagalit siya.” Ani Roque.

---

—-

Kinumpirma mismo ni Pangulong Rodrigo Duterte na nagtungo siya sa Cardinal Santos Medical Center para magpatangin sa doktor noong Miyerkules.

Sa kanyang naging talumpati sa hapunan kasama ang mga miyembro ng Philippine Military Academy Alumni Association, Incorporated (PMAAAI) sa Malakanyang, sinabi ni Pangulong Duterte na isang oras siyang nanatili sa nabanggit na ospital.

Kwento ng pangulo, nakatakda sana siyang magsagawa ng cabinet meeting pero sinabihan aniya siya na kailangang kumuhang muli ng samples ang kanyang doktor at magsagawa ng mga karagdagang test.

Sinabi pa ni Pangulong Duterte, sa ngayon ay wala pang resulta ang mga isinagawang test sa kanya.

Gayunman, pagtitiyak ng pangulo na agad niyang ipaaalam sa publiko sakaling lumabas na cancer ang kanyang sakit at kung nasa stage 3 na ay hindi na rin siya magpapagamot para hindi na rin aniya magtagal ang paghihirap ngtanggapan.

Nasa pito hanggang walong cabinet members ng Duterte administration ang nakatakdang magbitiw sa puwesto.

Ayon kay Presidential Communications Secretary Martin Andanar, ang mga ito ay nagbabalak na tumakbo sa 2019 midterm elections.

Sinabi ni Andanar na marami sa mga ito ang tatakbo sa lokal na posisyon gaya ng pagka-kongresista.

Samantala, hindi naman na nagbigay pa ng ibang detalye si Andanar sa kung sino ang mga miyembro ng gabinete na nakatakdang magbitiw sa puwesto.

Wala ring ideya ang kalihim kung kasama sa naturang bilang si Presidential Spokesperson Harry Roque na sigurado aniyang tatakbo naman bilang senador.

—-