HOT STORIES OF THE WEEK

Opisyal nang lumiban sa kanyang trabaho bilang Presidential Spokesman si Secretary Harry Roque.

Batay ito sa advisory ng Malacañang na ipinadala sa Malacañang Press Corps.

Pasado alas-8:30 umano ng umaga nang magbigay pa ng pasabi ang tanggapan ni Roque na magkakaroon ito ng press briefing dakong alas-11:00 ng umaga.

Gayunman, makaraan lamang ang limang minuto, isang anunsyo uli ang dumating na nagsasabing kanselado na ang press briefing dahil ‘on leave’ na si Roque.

Una nang nag-anunsyo si Roque na pag-iisipan niya nitong weekend kung babalik pa sa kanyang trabaho dahil pakiramdam niya ay hindi na siya epektibong tagapagsalita ng Pangulo.

Matatandaan na pinagsabihan ng Pangulo si Roque na huwag nang tumakbong senador dahil bibigyan niya ito ng bagong posisyon.

Sinasabing desidido ang Pangulo na buhayin ang Office of the Press Secretary.

—-

Posibleng umabot na sa isang bilyong piso ang premyo sa 6/58 Ultra Lotto ng Philippine Charity Sweepstakes Office o PCSO sa susunod na draw.

Wala pa ring nakatumbok sa winning combination na 45 – 21 – 02 – 30 – 07 – 10 na may jackpot na 954.5 million pesos, sa draw kagabi.

Sabado pa lamang nang magsimula muling humaba ang pila ng mga mananaya ng Lotto sa iba’t ibang panig ng bansa.

Ito na sa ngayon ang pinakamalaking premyo sa kasaysayan ng Lotto sa bansa.

Samantala, wala ring nakatiyempo sa winning combination para sa 6/49 Super Lotto na 13 – 24 – 22 – 30 – 49 – 14 na may premyong 89 million pesos.

—-

Todo-kayod na ang gobyerno upang maibsan ang patuloy na pagtaas ng presyo ng mga pangunahing bilihin o inflation.

Ito ang inihayag ni Presidential Spokesman Harry Roque, matapos ang pagsadsad ng public satisfaction ratings ng administrasyon ni Pangulong Rodrigo Duterte batay sa pinakahuling Social Weather Stations (SWS) survey.

Ayon kay Roque, anuman ang gradong ibinibigay sa administrasyon ay makatitiyak ang publiko na puspusan na ang pagtatrabaho ng pamahalaan upang mapatatag at siguruhing stable ang presyo ng basic goods.

Magugunita noong Setyembre ay sumirit sa 6.7 percent ang inflation rate, ang pinakamabilis na pagtaas ng presyo ng mga pangunahin bilihin simula noong Pebrero 2009.

—-

Opisyal nang idineklara ng AFP o Armed Forces of the Philippines na tapos na ang digmaan sa pagitan nila at ng MILF o Moro Islamic Liberation Front.

Ginawa ni AFP Chief of Staff General Carlito Galvez ang pahayag makaraang tumapak ito sa kauna-unahang pagkakataon sa Camp Darapanan, sa bayan ng Sultan Kudarat sa Maguindanao kahapon.

Ayon sa AFP Chief, panahon na para kilalanin ang mga naging ambag ng Bangsamoro sa lipunan at dapat na igalang ang kapayapaan matapos ang deka-dekadang digmaan kung saan, milyong buhay na ang ibinuwis.

Kasunod nito, inimbitahan din ni Galvez ang mga opisyal ng MILF sa pangunguna ni Al Hajj Murad Ebrahim na bumisita sa Kampo Aguinaldo sa Quezon City bilang pagtugon sa kanilang panawagang kapayapaan.

Magugunitang nagsilbing chairman din si Galvez ng Coordinating Committee on the Cessation of Hostilities bago ito maging commander ng WesMinCom o Western Mindanao Command ng AFP.

“Today I can now declare that the war between the Armed Forces and the MILF is finally over. To my Commanders, let us embrace our brothers and sisters and give them respect and lasting peace that the Moro people deserve” — Pahayag ni General Galvez.

Halos kalahati ng mga Pilipino ang naniniwalang may nararanasang problema sa kalusugan si Pangulong Rodrigo Duterte.

Batay ito sa isinagawang survey ng SWS o Social Weather Stations sa isang libo’t limang daang (1,500) adult respondent mula Setyembre 15 hanggang 23.

Sa resulta ng survey ng SWS, apatnapu’t limang (45) porsyento ng mga respondents ang naniniwalang may health problems ang Pangulo, dalawampu’t anim (26) na porsyento ang hindi naniniwala habang nasa dalawampu’t siyam (29) na porsyento ang undecided.

Pinakamarami namang naniniwalang may sakit ang Pangulo sa metro manila na sinundan ng balance Luzon, Visayas at Mindanao.

Sa kapareho ding survey lumabas na limampu’t limang (55) porsyento ng mga Pilipino ang nag-aalala o nangangambang baka may problema sa kalusugan ang Pangulo.

Labing walong (18) porsyento naman dito ang sobrang nababahala habang tatlumpu’t walong (38) porsyento ang hindi gaanong nabababahala.

Animnapu’t isang (61) prosyento naman ang naniniwalang isang public matter ang usapin ng kalusugan ng Pangulo at kailangang ipaalam ito sa publiko.

Bumisita sa kauna-unahang pagkakataon ang pinakamataas na opisyal ng Armed Forces of the Philippines sa pangunahing kampo ng Moro Islamic Liberation Front o MILF sa Camp Darapan, sa bayan ng Sultan Kudarat, Maguindanao.

Kasabay ng pagbisita, opisyal na idineklara ni AFP Chief of Staff, Gen. Carlito Galvez Jr ang pagtatapos ng digmaan sa pagitan ng AFP at MILF.

Ayon kay Galvez, dapat respetuhin ang kapayapaan sa Mindanao na ilang dekadang pinaghirapan kung saan libu-libo ang nagbuwis ng buhay.

Bago maging division commander at commander ng western mindanao command, nagsilibing chairman ng coordinating committee on the cessation of hostilities ng gobyerno si Galvez.

Samantala, inimbita naman ng pinuno ng hukbong sandatahan si MILF chairman Murad Ebrahim na bumisita sa AFP General Headquarters sa Camp Aguinaldo.

Binigyan ni Presidential Spokesman Harry Roque ang kanyang sarili ng hanggang ngayong weekend para pag-isipan kung magbibitiw siya sa pwesto.

Ito ay kasunod ng naging pahayag ni Roque na nag-day off lamang ang pangulo nuong Miyerkules matapos na hindi makadalo sa ilang opisyal na iskedyul habang umamin namang ang presidente na nagpatingin ito sa ospital.

Ayon kay Roque, hindi siya magiging epektibong tagapagsalita ng pangulo kung hindi niya nalalaman ang mga ginagawa o aktibidad ng punong ehekutibo.

“In my decision on whether not to run, to accept whatever the Office of the President may have, I will consider the fact that in this capacity as spokesperson, I must know everything about the president. I do concede that his going to the diagnostic exam was something I did not know and therefore, I’m inclined to believe that perhaps I’m not in a position to continue with this current function. I was in the dark and now how can people believe me when I just said he had private time and apparently, he had a diagnostic examination. Analyzing what I’ve said, I did say that I had no personal knowledge, he had a private time and even a diagnostic examination is in fact cover a private time.” Pahayag ni Roque.

Samantala, inihayag   din ng kalihim na may ibang posisyon ang iniaalok sa kanya ng pangulo.

Ito ay matapos naman lantarang sabihin ng pangulo na hindi mananalo si Roque sa pagka-senador dahil sa ayaw ng mga sundalo dito.

“Prior to this speech we had a command conference where the President asked me to stay and offered me a position which currently does not exist yet ‘no. While there was no categorical agreement on what to do, I did say I will consider it and I wanted a weekend to think it over. He mentioned it again in the PMA affair, but I think the manner by which he mentioned it was typical Duterte; he cariño brutal if you need to put it, but I think he has sent the message that he prefers that I stay. What would be my response? I need a weekend I need to ponder at this point.” Ani Roque.

Nakitaan ng “growth” sa kaniyang digestive tract si Pangulong Rodrigo Duterte matapos sumailalim sa isang medical examination.

Ito ang kinumpirma ni Presidential Spokesperson Harry Roque batay na rin sa nakuha niyang impormasyon sa isinagawang joint military – police command conference sa Malakanyang noong Huwebes ng gabi.

Ayon kay Roque, inirekomenda sa pangulo ang sumailalim sa endoscopy para masuring mabuti ang nakitang “growth” sa kanyang digestive tract.

Ito aniya ang dahilan kung bakit kinailangang magpunta ni Pangulong Duterte sa Cardinal Santos Medical Center noong Miyerkules.

Magugunita noong Huwebes itinanggi nina Roque at Special Assistant to the President (SAP) Bong Go ang ulat na isinugod sa ospital ang punong ehekutibo…

Pero sa naging talumpati mismo ni Pangulong Duterte kinagihan ay inamin nitong isang oras siyang nanatili sa ospital para sumailalim sa mga medical procedure.

Mariing kinondena ng Philippine Drug Enforcement Agency (PDEA) ang nangyaring pananambang sa kanilang mga tauhan sa Togoloan, Lanao del Sur.

Ayon kay PDEA Director General Aaron Aquino, hindi katanggap tanggap ang sinapit ng mga kawani ng pamahalaan na tumutupad lamang sa kanilang sinumpaang tungkulin.

Kasabay nito, tiniyak ni Aquino ang tulong sa pamilya ng limang nasawing PDEA agents.

Magkakasa rin aniya ng imbestigasyon ang ahensiya at nangakong gagawin ang lahat para madakip ang mga salarin.

Kasunod naman insidente, sinabi ni Aquino na mas lumakas pa ang kanilang loob para durugin ang mga sindikato ng iligal na droga at paiigtingin din ang kampanya kontra dito.

Asahan na ang balasahan sa hanay ng gabinete ni Pangulong Rodrigo Duterte habang papalapit na ang panahon ng eleksyon.

Ayon kay Presidential Spokesperson Harry Roque, posibleng nasa anim na cabinet members ang magpapasiyang tuymakbo sa halalan at maghahain na ng kanilang mga Certificate of Candidacy (COC).

Dahil aniya dito, inaasahang magtatalaga na ng mga bagong miyembro ng gabinete ang pangulo sa susunod na linggo.

Batay sa panuntunan ng Commission on Elections (COMELEC), itinuturing nang nagbitiw sa kanilang mga pwesto ang mga miyembro ng gabinete na maghahain ng kandidatura para sa eleksyon.

Kabilang sa mga sinasabing posibleng tumakbo sa pagka-senador sa 2019 midterm elections sina Roque, Special Assistant to the President (SAP) Bong Go, Presidential Adviser on Political Affairs Francis Tolentino at Cabinet Secretary Leoncio Evasco Jr.