HOT STORIES OF THE WEEK

Hindi umano dapat gawing sapilitan ang modernisasyon ng public utility vehicles (PUVs).

Ito ang binigyang diin ni Senate President Pro-Tempore Ralph Recto sa public hearing ng Senado hinggil sa PUV modernization.

Ayon kay Recto, dapat ay boluntaryo lamang ang pagbili ng bagong pampasaherong jeepney at huwag obligahing itapon lamang ng mga tsuper ang kanilang lumang pampasada.

Giit pa ng senador, hindi lahat ng PUV operator ay may kakayahang bumili ng bagong jeep lalo aniya ngayon na mahirap ang buhay dahil sa sunod-sunod na pagtaas ng presyo ng mga pangunahing bilihin.

Tukoy na ng pulisya ang pagkakakilanlan ng mga suspek sa pananambang sa mga agent ng Philippine Drug Enforcement Agency (PDEA).

Ayon kay PNP-ARMM Director Senior Supt. Graciano Mijares, siyam ang lahat ng suspek at pawang mga kaanak ng isang opisyal ng lokal na pamahalaan.

Pagganti umano sa pagkakapatay ng isang “high-value target” nuon sa Marawi ang nakikita nilang motibo sa pananambang sa naturang mga tauhan ng PDEA.

Ayon naman kay PDEA-ARMM Operations Chief Cielito Llano, napagkamalan ang mga PDEA agent bilang Provincial Drug Enforcement Unit (PDEU) o local anti-drug enforcement unit ng provincial office.

Limang ahente ng PDEA ang nasawi matapos pagbabarilin habang sakay ng van patungong Marawi City.

Kinuwestyon ni Bayan Muna party-list Rep. Carlos Isagani Zarate ang approval sa committee level ng inihaing draft ng federal constitution ni House Speaker Gloria Macapagal-Arroyo at 21 iba pang kongresista.

Ayon kay Zarate, mabilis at kahina-hinala ang paglusot sa House committee on constitutional amendments ng naturang draft noong Oktubre 2 habang abala sa 2019 budget deliberations.

Inaprubahan aniya sa nabanggit na komite ang panukalang batas nang hindi alam ng ibang kongresista maging ng media dahil hindi ito kabilang sa schedule ng committee hearings sa Kamara.

Ibinabala naman ni Zarate na peligroso ang draft charter ni Arroyo dahil sa oras na aprubahan sa Kongreso ay magreresulta ito sa pagpapaliban ng 2019 elections at sa halip ay itatakda sa taong 2022.

Dumalo pa rin si Presidential Spokesperson Harry Roque sa cabinet meeting ni Pangulong Rodrigo Duterte sa Malakanyang, kagabi.

Ito ay sa kabila nang ulat na opisyal na itong lumiban sa kanyang trabaho bilang tagapagsalita ng pangulo.

Batay sa ipinalabas na larawan ng Malakanyang, makikitang kausap ni Roque sina Special Assistant to the President (SAP) Bong Go at Presidential Political Affairs Adviser Francis Tolentino.

Samantala, sinabi naman ni Department of Justice (DOJ) Secretary Menardo Guevarra na walang inihayag si Roque sa kanilang cabinet meeting hinggil sa posibleng pagbibitiw nito sa pwesto.

Magugunitang, inanunsyo ni Roque noong nakaraang linggo na kanyang pinagiisipan kung mananatili pa sa tungkulin o magbibitiw sa pwesto para tumakbo sa halalan.

Gayundin kung tatanggapin ang alok na panibagong posisyon ni Pangulong Duterte.

Ipinagpaliban ng Land Transportation Franchising and Regulatory Board (LTFRB) ang planong total phase out sa mga lumang pampasaherong jeepney sa Marso ng susunod na taon.

Ito ang tiniyak ni LTFRB Chairman Martin Delgra sa isinagawang pagdinig ng Senate committee on public services.

Ayon kay Senadora Grace Poe, chairman ng nasabing komite, lumitaw kasi sa kanilang pagdinig na hindi pa handa ang gobyerno sa implementasyon ng public utility vehicle (PUV) modernation program.

Wala pa rin aniyang itinakdang malinaw na requirements ang pamahalaan para rito.

“Narinig na natin mismo kay Chairman Delgra na ipagpapaliban nila ‘yon kasi ito muna, hindi pa nga malinaw kung papaano makaka-utang ng pera ‘yung mga drayber para makakuha ng bagong sasakyan. Hindi rin malinaw kung ano ba talaga ang magiging requirement para doon sa sasakyan nila. Sa ngayon, hindi pa handa ang gobyerno, mawawalan ng masasakyan ang ating mga kababayan at mawawalan din ng trabaho ang marami.” Pahayag ni Poe.

Hihintayin muna ng Federation of Jeepney Operators and Drivers Association of the Philippines (FEJODAP) ang magiging aksyon ng LTFRB sa hirit nilang dagdag pasahe.

Ito ang tiniyak ni FEJODAP President Zenny Maranan, bagama’t may banta na silang malawakang tigil pasada

Ayon kay Maranan, oras na walang maging aksyon ang Land Transportation Franchising and Regulatory Board (LTFRB) sa kanilang hirit na fare hike, saka nila ikakasa ang nationwide transport strike lalu’t wala aniya silang kinikita kasunod ng panibago na namang oil price increase ngayong araw.

Kasabay nito, hinimok naman ni Senate committee on public service chairman Grace Poe ang LTFRB na agarang aksyunan at pakinggan ang hinaing ng mga transport group.

Hindi aniya masisisi ang mga transport groups na magsagawa ng tigil pasada lalo na kung hindi naman sila pinakikinggan.

—-

Desidido na si dating Presidential Communications Operations Office (PCOO) Assistant Secretary Mocha Uson na tumakbo sa 2019 midterm elections.

Ito ang naging pahayag ni Uson kasabay ng pagtanggi sa lumabas na balitang sinibak siya sa pwesto ni Pangulong Rodrigo Duterte at hindi nag-resign.

Ayon kay Uson, fake news ang naturang ulat at meron aniya siyang hawak na patunay na nagbitiw siya sa pwesto.

Dagdag ni Uson, dahil sa mga katulad ng tinawag nitong mga kumakalat na fake news ay nagpasiya na siyang tumakbo sa 2019 elections para na rin anito maipagtanggol at mabigyan ng boses ang mga pangkaraniwang mamamayan.

Gayunman tumanggi pa si Uson na tukuyin kung anong posisyon ang kanyang tatakbuhan sa 2019 midterm elections at sinabing kanya munang kukonsultahin si Senate President Vicente “Tito” Sotto III.

(with report from Cely Ortega-Bueno)

Former PCOO asec Uson said she is now decided to run on 2019 election but refused to mention on what position. @dwiz882 pic.twitter.com/DtWmHXU6us

— cely bueno (@blcb) October 8, 2018

Tinawag na “old story” o lumang balita na ang pag-rerecruit ng maka kaliwang grupo ng mga estudyante.

Ayon ito kay CHED Officer-in-Charge Prospero De Vera III kaya’t hindi na sila nagulat sa report ng afp na ilang unibersidad at kolehiyo sa bansa ang umanoy ginagawang recruitment hub ng mga rebeldeng komunista.

Sinabi ni De Vera na hindi lamang ang mga estudyante sa kolehiyo sa Pilipinas ang tina-target ng mga komunista dahil ang mga kabataan ay masyadong idealist at nais ng agarang pagbabago.

Ilan aniya rito ay frustrated na rin at nahihirapan sa pag-aaral kayat madaling mahikayat ng mga rebelde.

Dahil dito, hiniling ni De Vera sa mga professor na bagama’t may academic freedom dapat na maging balanse sila sa paglalahad ng ideology ng gobyerno at mga komunista.

Inamin naman ni De Vera na ilang professor ang galit sa gobyerno at one-sided na dapat aniyang bantayan ng university officials para maiiwas ang mga estudyante na maging miyembro ng mga rebeldeng grupo.

Idinipensa ni Presidential Communications Operations Office (PCOO) Secretary Martin Andanar ang biyahe ng Pangulong Rodrigo Duterte sa Hong Kong nitong weekend.

Ayon kay Andanar, batid niya ang nasabing biyahe ng pangulo at deserving naman ito na magkaruon ng quality time kasama ang kaniyang pamilya.

Sinabi ni Andanar na kitang kita namang mahal na mahal ng pangulo ang kaniyang pamilya at sobra-sobra ang pagtatrabaho nito kaya’t kailangan din niyang makasama ang kanilang pamilya.

Lumabas ang ilang litrato nina Pangulong Duterte, common law wife nitong si Honeylet Avancenia at anak nilang si Kitty habang nasa ilang kalsada ng Hong Kong at nagsa-shopping at kumakain sa isang restaurant.

Haharapin bukas ng Pangulong Rodrigo Duterte ang mga kinatawan ng mga manggagawa sa bansa.

Ayon kay Allan Tanjusay, tapagasalita ng Alliance of Labor Union- Trade Union Congress of the Philippines (ALU-TUCP), nais nilang malaman sa Pangulo kung ano ang programa nito para sa mga manggagawa sa harap ng masyado nang mataas na presyo ng bilihin.

Kasabay ng pulong ng Pangulo at Alyansa ng mga Manggagawa ang pagsasabatas ng Pangulo sa Occupational Safety and Health Law kung saan may katapat na P100,000 kada araw na multa ang employer na lalabag dito.

Sinabi ni Tanjusay na umaasa rin silang bibigyang pansin ng Pangulo ang panukala na bigyan ng subsidy ang mga minimum wage earners.

“Ipaparating namin sa kanya na dapat tawagan nila ang mga Wage Board na i-adjust ‘yung wage rate at higit sa lahat ay aprubahan niya na ‘yung aming proposal sa kanya na magbigay ng subsidiya, walang programa ang gobyerno kung ano ang gagawin natin sa kasalukuyang panahon na ang tindi na ng taas sa presyo, wala eh.” Pahayag ni Tanjusay

(Balitang Todong Lakas Interview)