HOT STORIES OF THE WEEK

Mahigpit na tinututukan ng Philippine National Police (PNP) ang halos 300 potential private armed groups na posibleng maging aktibo na naman ngayong papalapit na ang eleksyon.

Bukod ito ayon kay PNP Spokesman Chief Supt. Benigno Durana sa 77 aktibong private armed group na tukoy na nila.

Sinabi ni Durana na ang mga aktibong private armed groups ay mayruong 2,060 miyembro at halos 2,000 ang kanilang armas.

Dahil malapit na ang eleksyon, inihayag ni Durana na malaki ang posibilidad na mabuhay ang 266 pang potential private armed group na may mahigit 2,000 miyembro at mahigit 1,000 armas.

Una nang ipinag-utos ni PNP Chief Director General Oscar Albayalde sa regional, provincial at city police directors na tiyakin ang mga hakbangin kontra private armed groups at gun for hire syndicates.

Walo sa kada sampung Pilipino ang naniniwalang may fake news sa social media.

Batay sa ulat sa bayan ng national survey ng Pulse Asia, walumpu’t walong (88) porsyento ng mga Pilipino ang sang-ayon na may fake news sa social media at labing dalawang (12) porsyento naman ang wala umanong alam na fake news.

Nakasaad din sa nasabing survey na pitumpu’t siyam (79) na porsyento ng mga respondents ay naniniwalang laganap ang fake news sa social media samantalang labing dalawang porsyento ang undecided at siyam na porsyento ang hindi sang-ayon.

Sa usapin naman ng awareness level sa fake news sa social media, naitala ang pinakamataas na porsyento sa Metro Manila sa 93% habang 87% sa Luzon at 84% sa Mindanao.

Samantala, sa tanong kung nagbago ba kailanman ang pananaw tungkol sa pulitika at pamahalan o isyung panlipunan dahil sa nakita sa social media o hindi lumabas na 57% ang sumagot ng Yes at 49% naman ang nagsabi ng No.

Isinagawa ang survey sa 1,800 respondents mula September 1 hanggang 7 kung kailan nabalita ang pagbawi ni Pangulong Rodrigo Duterte sa amnesty ni Senador Antonio Trillanes IV at ibinunyag ng Pangulo na hotbed ng droga ang Naga City na hometown ni Vice President Leni Robredo.

Dumami pa ang pamilyang Pilipino na nagsasabing sila ay mahirap.

Ito ay batay sa resulta ng ikatlong bahagi ng survey ng Social Weather Stations (SWS) na isinagawa sa 1,500 Filipino adults sa buong bansa.

Lumabas na nasa 52 porsyento o tinatayang labing 2.2 milyong pamilyang Pilipino ang itinuturing ang kanilang sarili na mahirap.

Kaparehas nito ang resultang lumabas sa self-rated poverty nuong Disyembre 2014 na naitalang pinakamataas din.

Samantala, sa parehas na survey, umakyat din sa 36 na porsyento o 8.5 milyong pilipino ang nagsabing sila ay “food-poor” o salat sa pagkain.

Mas mataas naman ito ng dalawang porsyento sa huling naitalang pinakamataas nuong Hunyo 2018 kung saan pumalo lamang sa 34 na porsyento.

Walang plano ang Communist Party of the Philippines-New People’s Army (CPP-NPA) na ipapatay si dating Presidential Communication Operations Office (PCOO) Assistant Secretary Mocha Uson at Pangulong Rodrigo Duterte.

Ito ang naging reaksyon ni CPP Founding Chairman Jose Maria Sison kasunod ng naging pahayag ni Uson na kapag napatay siya ay walang dapat na sisihin kundi ang NPA.

Ayon kay Sison, malinaw na ginagamit lamang ni Uson ang CPP-NPA para mapag-usapan at mapansin ang kanyang pagtakbo sa eleksyon.

Hindi man aniya kasing sama ni Uson ang kanyang among si Duterte ay siya naman ang responsable sa pagpapakalat ng fake news at pagiging bulgar ng administrasyong Duterte.

Una nang sinabi ni Mocha na ayaw naman talaga niya ng security kahit pa noong nasa Malacañang siya ngunit iginiit ng kanyang chief of staff na kailangan niya ito para sa kanyang seguridad dahil na rin sa ginagawa niyang pagpuna sa mga rebelde sa kanyang blog.

—-

Napili ni Pangulong Rodrigo Duterte si Presidential Legal Counsel Atty. Salvador Panelo na umupo bilang presidential spokesman at press secretary oras na matuloy ang planong pagbuwag sa Presidential Communications Operations Office (PCOO).

Ayon kay Pangulong Duterte, hindi niya na hihintayin pa ang magiging pasiya ni Presidential Spokesperson Harry Roque na una niyang inalok sa nabanggit na posisyon.

Ito aniya ay para maiwasan na ring maparalisa ang takbo ng pamahalaan.

Paliwanag pa ng pangulo, wala pang pinal na desisyon at pabago-bago ang isip ni Roque sa usapin ng pagtakbo nito sa eleksyon sa susunod na taon.

“Total tiga announce mo lang yan si Sal Panelo though sartorial elegance medyo maganda siguro tingnan if I’m going to re-organize Press secretary, kanya lahat. Tignan muna natin kung makakuha ako ng Presidential legal counsel then if he likes the job. Kaya naipit nga si Roque it’s not my fault, actually. Sabi niya tatakbo… tapos hindi tatakbo, tapos tatakbo. Ngayon, kung hindi siya tatakbo, hindi ko alam kung saan siya ilalagay.” Pahayag ni Duterte.

Samantala, inanunsyo rin ni Pangulong Duterte na kanyang gagawing consultant si PCOO Secretary Martin Andanar kapag nabuwag na ang PCOO.

“There are so many things that they have to reconfigure their programs at PTV4. Maraming baguhin diyan siguro to make it more responsive as sounding board of the Republic of the Philippines parang ganoon.” Ani Duterte.

Pinangalanan ni Pangulong Rodrigo Duterte ang ilang mga miyembro ng gabinete na tatakbo sa 2019 midterm elections.

Ayon kay Pangulong Duterte, kabilang dito sina Agrarian Reform Secretary John Castriciones, TESDA Director General Guiling Mamondiong, Presidential Political Adviser Francis Tolentino at Special Assistant to the President Bong Go.

Dagdag ng pangulo, tatakbo rin sa pagka-kongresista sa Taguig City si Foreign Affairs Secretary Alan Peter Cayetano na meron na aniyang kapalit bagama’t hindi siya otorisadong ianunsyo ito.

Sinabi pa ni Pangulong Duterte, malaki rin ang posibilidad sa tuluyang pagtakbo na ni Presidential Spokesperson Harry Roque sa halalan bagamat wala pa itong pinal na desisyon.

Kasunod aniya ito ng nabanggit ni Roque na pagbibitiw sa pwesto matapos na tila malagay sa alanganin nang itanggi ang balitang pagpapa-ospital niya.

“Kasi sabi niya mag-resign siya because he didn’t know that I was in the hospital. So, he was not informed. Hindi naman kailangan sabihin ko lahat eh. There are things which are limited to the immediate members of the family. And of course, if there is something wrong then I would communicate with the cabinet members nothing of that sort happens so para masabi niya hindi ako pumunta hindi naman siya nagtanong. So, he felt that he was placed in a bad light parang he was lying.” Pahayag ni Duterte.

‘Clear of cancer’ o walang cancer ang Pangulong Rodrigo Duterte.

Ito ayon kay Department of Interior and Local Government (DILG) Officer-in-Charge Eduardo Año, ang ipinabatid mismo sa kanila ng Pangulong Duterte sa cabinet meeting kagabi matapos sumalang sa mga tests sa isang pribadong ospital ang Pangulo.

Sinabi ni Año na negative ang resulta ng nasabing test kung saan kumuha sila ng sample mula sa bituka ng Pangulo.

Magugunitang lumutang ang posibleng problema umano sa kalusugan ng Pangulo matapos hindi dumalo ang 73-year-old na si Duterte sa dalawang official events nito nuong isang linggo kabilang ang pulong sa kaniyang gabinete.

(with report from Jopel Pelenio) 

Tiniyak ni Labor Secretary Silvestre Bello III na lalabas na ang wage order para sa mga manggagawa ng Metro Manila bago matapos ang Oktubre.

Ayon kay Bello, naka-isang taon na noong October 5 ang pinakahuling wage adjustment noong isang taon kaya’t puwede nang magpanukala ang wage board ng panibagong wage adjustment.

Gayunman, sinabi ni Bello na wala pang napagkakasunduan kung magkano ang umentong ibibigay ng wage board para sa mga taga-Metro Manila.

Ang sigurado lamang aniya ay hindi ito bababa sa bente pesos (P20).

“Before the end of October magkakaroon tayo ng wage adjustment dito sa NCR ngayon hindi natin alam kung magkano ang ipo-propose nila. Magkakaroon ng wage adjustment ng hindi bababa sa P20, hindi ko sinabing P20.” Ani Bello

Samantala, nilinaw ni Bello na walang nakatakdang diyalogo ang Pangulong Rodrigo Duterte sa labor groups ngayong araw na ito, tulad ng pahayag ng ALU-TUCP.

Ayon kay Bello, imbitado lamang ang labor groups at iba pang sektor para saksihan ang pagsasabatas sa Occupational Safety and Health Bill.

“Hindi po dialogue, pero of course the President will come up with a statement probably to address their concerns, pero hindi sila tinawagan for a dialogue, they were invited to witness a ceremonial signing of a landmark bill.” Pahayag ni Bello

(Ratsada Balita Interview)

Maaari nang maihabol ng Senado ang pagpasa sa dalawang mahalagang panukalang batas bago mag-break ang sesyon ng Kongreso bukas.

Ito ay makaraang sertipikahan ng Pangulong Rodrigo Duterte bilang urgent ang Universal Health Care Bill at Rice Tariffication Bill.

Kaugnay nito, sinabi nina Senate President Tito Sotto at Senate Majority Floorleader Juan Miguel Zubiri na maaari na nilang aprubahan sa 3rd and final reading ngayong araw ang nabanggit na mga panukala ng hindi na kailangang sundin ang 3-day rule.

Kahapon ay nakipagpulong ang liderato ng Senado sa Pangulo kung saan ay kanilang hiniling na sertipikang urgent ang nabanggit na mga mahalagang panukalang batas bagay na agad namang pinagbigyan ng Pangulo.

Ang Universal Health Care Bill na ini-isponsoran at idinidepensa sa plenaryo ni Health Committee Chairman JV Ejercito ay naglalayong matiyak na magkaroon ng access lahat ng mga Pinoy sa mahusay at malawakan na serbisyong pangkalusugan.

Habang ang Rice Tariffication Bill na ini-isponsoran naman ni Senate Committee on Agriculture Chairman Cynthia Villar ay naglalayong matiyak ang pagkakaroon ng sapat na supply ng bigas at abot kayang presyo nito.

Isa ito sa nakikitang paraan para maibsan o mapigilan ang pagtaas ng inflation sa bansa.

Kahapon maraming panukalang batas ang naaprubahan ng Senado sa 3rd and final reading, kabilang dito ang 300 porsyento na dagdag sa monthly old age pansion ng Filipino war veterans kung saan mula sa P5,000 ay magiging P20,000. Pasado na rin ang bill ukol sa PNP rank classification at lusot na rin ang panukalang batas ni Senator Ejercito hinggil sa paglikha ng Department of Housing.

—-

Hindi magiging lider ng bansa ang Bise Presidente batay sa draft na ginawa ng liderato ng Kamara kaugnay sa pagsusulong ng federal form of government.

Ayon kay House Committee on Constitutional Amendments Chairman Vicente Veloso, sa halip na Vice President ay ang Senate President ang kanilang isinunod sa “transitory provision”.

Paliwanag ni Veloso, ito ay dahil wala pa ring pinal na desisyon ang mataas na hukuman kung sino talaga kina Vice President Leni Robredo at dating Senador Bongbong Marcos ang tunay na nakakuha ng maraming boto mula taumbayan bilang Pangalawang Pangulo.

Gayunman, sinabi ni Veloso, na nakasaad sa draft na pagkatapos ng 2022 elections ay ibabalik na sa linya ng transition ang Bise Presidente.

Batay sa saligang batas, awtomatikong hahalili bilang lider ng bansa ang Bise Presidente kung ang Pangulo ay naalis sa puwesto, nagbitiw, namatay o kaya naman ay wala nang kakayahang gampanan ang tungkulin dahil sa karamdaman.

—-