HOT STORIES OF THE WEEK

Ilalabas na ng Commission on Elections ang opisyal na talaan ng mga kandidato sa 2019 elections sa Disyembre.

Ayon kay Director James Jimenez, spokesman ng COMELEC, base sa kalendaryo nila para sa eleksyon, kalagitnaan ng Disyembre matatapos ang pagsala sa mga kandidato kasabay rin ng pagpapa imprenta na nila ng mga balota.

Matapos masimulan ang pagpapa imprenta ng balota sa Disyembre, magsisimula naman ang election period sa January 13 at magtatapos ng June 12 o isang buwan matapos ang eleksyon sa May 13, 2019.

Nanguna si Senadora Cynthia Villar sa senatorial election survey ng Social Weather Station (SWS).

Sa naturang survey na kinomisyon ni Presidential Adviser on Political Affairs Secretary Francis Tolentino, nakakuha si Villar ng 53 percent na voters preference.

Kapwa nasa ikalawa at ikatlong pwesto naman sina Senadora Grace Poe at Congresswoman Pia Cayetano na nakakuha ng 43 percent.

Sumunod naman sina Senador Koko Pimentel at Lito Lapid habang nakuha naman ni dating Senador Jinggoy Estrada ang ika-anim na pwesto.

Nasungkit naman ni dating Senador Mar Roxas ang ika-pitong pwesto, tie naman sina Senador Nancy Binay at Senador Sonny Angara sa ika-walo at ika-siyam na pwesto.

Pang sampu naman si BuCor Chief Ronald Dela Rosa at kinumkumpleto naman nina dating Senador Serge Osmeña at Ilocos Norte Gov Imee Marcos ang top 12.

Isinagawa ang survey nuong Setyembre 15 hanngang 23 sa 1,500 respondents.

Itinalaga ni Pangulong Rodrigo Duterte si Teodoro “Boy” Locsin bilang susunod na Department of Foreign Affairs (DFA) Secretary.

Ito ang inanunsyo mismo ng Pangulo sa kaniyang pagdating sa bansa mula sa pagdalo sa ASEAN Leaders’ Gathering sa Indonesia.

Ayon kay Pangulong Duterte, si Locsin ang kaniyang napiling pumalit kay Secretary Alan Peter Cayetano na nakatakda namang tumakbo bilang congressman ng Taguig City.

Kasunod nito, tinanggap na ni Ambassador to UN Teddy Boy Locsin ang posisyon bilang bagong kalihim ng Department of Foreign Affairs (DFA).

Sa kanyang Twitter account, kinumpirma ni Locsin na inialok sa kanya ng Pangulong Rodrigo Duterte ang posisyon.

Hindi aniya siya tumanggi sa Pangulo tulad ng hindi niya pagtanggi nang italaga siyang kinatawan ng bansa sa United Nations.

—-

Nakabalik na ng bansa si Pangulong Rodrigo Duterte mula sa kaniyang pagdalo sa ASEAN Leaders’ Gathering sa Indonesia.

Pasado alas dose ng hating gabi ng dumating ang pangulo sa Davao International Airport.

Sa kaniyang arrival speech, sinabi ng pangulo na kaniyang binigyang diin sa nasabing pagpupulong ang kahalagahan ng pagkakaisa ng ASEAN bloc.

Kasabay nito nangako aniya ang Pilipinas na mananatili ang commitment nito sa ASEAN.

Ipinarating din umano ng   pangulo ang pakikiramay at pagtulong sa mga biktima ng lindol at tsunami sa Indonesia.

“The Philippines condolences to Indonesian people who suffered successive earthquakes and tsunami. In times of need, Indonesia was ready to help now we are giving back, that’s the Asian way. That’s our duty as brothers and neighbor.” Pahayag ni Duterte.

Umabot sa 18 party-list ang naghain ng kandidatura sa unang araw ng filing ng certificate of candidacy (COC).

Nangunguna ang Kabayan Party-list sa nagtungo sa Commission on Elections (COMELEC) upang mag-file ng kanilang COC.

Ayon kay Kabayan Party-list Rep. Ron Salo, nais nilang makabalik sa Kamara upang maipagpatuloy ang kanilang mga isinusulong na panukalang batas gaya ng pagkakaloob ng mga kumpaniya ng 14^th month pay sa kanilang mga empleyado at ang national minimum wage.

Naghain din ng kanilang COC ang mga partidong nabigo nuong nakaraang halalan gaya ng Partido ng Masa ang Bida (PBB) na ipaglalaban umano ang usapin sa pabahay.

Nagsama-sama naman sa ilalim ng Partido Lakas Masa (PLM) ang mga dating natanggalan ng accreditation matapos matalo sa dalawang sunod na halalan.

Kinumpirma ng Palasyo na si Chief Presidential Legal Counsel Atty. Salvador Panelo ang tatayong bagong tagapagsalita ni Pangulong Rodrigo Duterte simula Lunes, Oktubre 15.

Ito ang kinumpirma ni Special Assistant to the President Christopher “Bong” Go matapos ihayag ng Punong Ehekutibo na si Panelo ang kanyang nais na maging susunod na spokesman na posibleng mamuno rin sa ibabalik na Office of the Press Secretary.

Wala pa namang impormasyon kung alam na ni Atty. Harry Roque ang nasabing ulat.

Matatandaan na hanggang sa ngayon ay hindi pa nakakapagdesisyon si Roque kung itutuloy niya ang pagtakbo sa darating na 2019 midterm elections.

Ulat ni Jopel Pelenio (Patrol 17)

Umarangkada na ang unang araw ng pahahain ng certificate of candidacy (COC) ng mga tatakbo sa midterm elections sa Mayo ng 2019.

Nangunguna sa paghain ng kanilang COC ang mga kandidato ng PDP-Laban na sina re-electionist Senator Koko Pimentel at singer Freddie Aguilar.

LOOK: Senator Aquilono “Koko” Pimentel III is the first filer for Senatoriables in the Filing of COC for #NLE2019. pic.twitter.com/TAm1ud0lQO

— COMELEC (@COMELEC) October 10, 2018

Ang iba pang kilalang pangalan na naunang naghain ng kanilang COC ay sina dating Pagsanjan Laguna Mayor at dating pulis na si Abner Afuang at Dr. Willie Ong, isang doktor na may sampung milyong followers sa internet.

Sa kabila ng panawagan ng COMELEC na iwasang gawing circus ang paghahain ng mga kandidato ng kanilang COC ay dumagsa pa rin ang mga supporters ng iba’t ibang kandidato sa COMELEC sa Intramuros.

Sa party-list, kabilang sa mga nangunang maghain ng COC ang Partido ng Bayan ang Bida (PBB), Kabayan, Abono, Butil, Manila Teachers at PBA.

—-

Magpapatupad ng balasahan ang Philippine National Police (PNP) mula provincial hanggang station level.

Ayon kay PNP Chief Director General Oscar Albayalde, ito ay bilang paghahanda rin sa nalalapit na may 2019 midterm elections.

Sinabi ni Albayalde na partikular nilang ililipat ng pwesto ang mga police commander na may kaanak na kandidato sa lugar na kanilang nasasakupan.

Samantala, ang mga pulis naman umano na sasabak sa eleksyon ay “deemed resigned” sa sandaling makapaghain na sila ng kanilang Certificate of Candidacy (COC).

Dumating na si Pangulong Rodrigo Duterte sa Indonesia para dumalo sa Association of South East Asian Nations (ASEAN) leader’s gathering.

Lulan ang pangulo ng Bombardier Challenger Class private jet na lumapag sa Bali International Airport ganap na alas-9:09 kagabi.

Sa pagdating ng Pangulo sa Indonesia, naiabot na ang pangakong tulong ng Pilipinas para sa mga nasalanta ng lindol at tsunami roon.

Kalakalan at paglaban sa terorismo ang pangunahing usapin na tatalakayin nina Duterte at Indonesian President Joko Widodo sa nasabing pulong.

Ayon kay Philippine Ambassador to Indonesia Leehiong Tan Wee, ang naturang dalawang usapin ay ilan lamang sa maraming isyung kinakaharap ng Pilipinas at Indonesia.

Batay naman sa ipinalabas na pahayag ng Malacañang, ang pangangailangan na mapanatili ang paglagi at pag-unlad ng isang matatag na rehiyon ang isa sa bibigyang diin ni Pangulong Duterte sa kaniyang magiging talumpati sa ASEAN meeting.

Kabilang din dito umano ang pagsusulong ng pandaigdigang kooperasyon.

Tatagal ng isang araw lamang ang Pangulo sa Indonesia at agad ding babalik sa bansa.

Samantala, anim sa miyembro ng gabinete ng Pangulo ang kabilang sa kaniyang opisyal na delegasyon.

Ito ay kinabibilangan nina Department of Foreign Affairs (DFA) Secretary Alan Cayetano, Department of Finance (DoF) Secretary Carlos Dominguez, Department of Budget and Management Secretary Benjamin Diokno, Socioeconmic Ernesto Pernia, Special Assistant to the President (SAP) Christopher “Bong” Go at Presidential Communications Office Operations (PCOO) Secretary Martin Andanar.

Relief goods para sa mga biktima ng lindol at tsunami sa Indonesia nakarating na

Bukod sa pinansyal na tulong nagpadala ang Pilipinas ng mga relief goods mga nabiktima ng lindol at tsunami sa Central Sulawesi, Indonesia.

Ayon kay Department of National Defense (DND) Secretary Delfin Lorenzana, nakarating na ang mga relief goods na isinakay sa C-130 na lumipad kahapon patungong Indonesia.

Babalik din aniya ito sa Oktubre 15 sa naturang bansa upang makatulong naman sa pag byahe ng iba pang pangangailangan ng mga biktima.

Natagalan lamang umano ng kaunti ang pagpapadala ng tulong ng Pilipinas dahil sa kalamidad din na tumama sa bansa.

—-