HOT STORIES OF THE WEEK

Hindi muna maaaring ibenta sa merkado ang limang brand ng suka na natukoy ng Food and Drug Administration (FDA) na gumagamit ng synthetic acetic acid sa paggawa ng suka.

Ayon kay Health undersecretary at  FDA officer-in-charge Eric Domingo, pag-aaralan pa ng  ahensya kung ano ang mga naging pagkukulang o paglabag ng mga manufacturer ng Surebuy Cane Vinegar, Tentay Pinoy Style Vinegar, Tentay Premium Vinegar, Tentay Sukang Tunay na Asim at Chef’s Flavor Vinegar.

Kailangan pong i-recall nila lahat ito at hindi po maaaring ibenta sa merkado at wala po dapat access ang ating mga kababayan sa mga produktong ito,” pahayag ni Domingo.

Ipinaliwanag ni Domingo na bagamat walang idinudulot na masama sa  kalusugan ang paggamit ng mga artipisyal na pampaasim, natural na proseso lamang sa paggawa ng suka ang  pinapayagan sa Pilipinas.

Opo, wala naman pong health hazard, hindi naman po sya nakaka-cause ng kung anumang sakit at katulad din naman po siya ng acetic acid na galing po na galing po sa natural na fermentation. ‘Yun nga lang po, dito sa Pilipinas po kasi, pag sinabi nating suka, kailangan po nanggaling sya sa natural product tyaka natural fermentation. ‘Yun po ang ating standards for vinegar,’ paglilinaw ni Domingo.

Tiniyak naman ni Domingo na tuloy-tuloy  ang gagawing pagsusuri para sa  iba pang mga brand ng suka para alamin kung hindi dumaan sa natural na proseso  ang paggawa sa mga ito.

So, kung wala naman po sa listahan d’yan, wag po naman silang mangamba at sa mga susunod na araw magte-test pa naman po tayo ng iba pang mga produkto para malaman at kung may maidadagdag naman po tayong makikita nating ganon na synthetic din ang ginagamit, magdadagdag naman po tayo sa listahan.” dagdag pa ni Domingo.

Ratsada Balita Interview

Nahaharap sa isang bilyong pisong cyber libel complaint si Peter Joemel Advincula alias Bikoy gayundin sa social media platform na Facebook Philippines at search engine na Google.

Ayon kay Elizaldy Co, may-ari ng Misibis Bay Resort, ang mga kasong paglabag sa Cybercrime Prevention Act ng revised penal code ay isinampa niya sa Legazpi City Prosecutor’s Office matapos mabanggit ang pangalan ng kaniyang kumpanya sa isa sa mga “Ang Totoong Narco-list” videos.

Sinabi ni Co na umamin na si Bikoy na lahat ng nilalaman ng video series na nag uugnay sa kaniya, sa kaniyang negosyo at sa iba pang personalidad ay gawa gawa lamang kayat dapat itong managot, ang Facebook at maging ang Google.

Inireklamo rin ni Co si Rodel Jayme, ang administrator ng metrobalita.net na nag share umano ng videos.

—–

Mariing itinanggi ni Senador Antonio Yrillanes ang akusasyon laban sa kanya ni alyas ‘Bikoy’ at iba pang miyembro ng oposisyon.

Matatandaang ibinulgar ni alyas ‘Bikoy’ na si Trillanes at iba pang miyembro ng oposisyon ang siyang nasa likod ng kontrobersiyal na video laban sa ilang miyembro ng pamilya ni Pangulong Rodrigo Duterte.

Ayon kay Trillanes, panibagong aksyon na naman ito ng administrasyon para i – harass ang oposisyon.

Pinag aaralan na aniya ng kanyang mga abogado ang pagsasampa ng kaso laban sa mga kasinungalingan ni alyas ‘Bikoy’.

Hindi kinagat ng Palasyo ang mga isiniwalat ni Jhomel Advincula alias ‘Bikoy’ sa ginawang pagharap nito sa media matapos na sumuko sa Philippine National Police.

Dito ay itinuro ni alyas ‘Bikoy’ ang oposisyon bilang mga nasa likod ng “Ang Totoong Narcolist” videos at ‘Operation Sodoma’ na naglalayong mapatalsik sa pwesto si Pangulong Rodrigo Duterte.

Ayon kay Presidential Communications Operations Office Secretary Martin Andanar, tila ang mga mismong nasa likod ng kontrobersiyal na video ang nag aaway away na.

Aniya, mistulang kontrahan sa mga salita ang idinawit na personalidad gaya ni Bikoy, Senador Antonio Trillanes at Partido Liberal.

Dahil aniya sa pagbaliktad ni alyas ‘Bikoy’, nagiging mas kaabang abang na mga susunod na kabanata.

Mariing pinabulaanan ni Magdalo Partylist Group Rep. Gary Alejano ang mga naging pagbubunyag ni alyas ‘Bikoy’ sa naging paglutang nito sa Philippine National Police.

Una nang tinukoy ni Bikoy na nakipagpulong siya sa mga kandidato ng Otso Diretso at ilan pang opposition senators para sa planong pagpapabagsak sa administrasyong Duterte.

Ayon kay Alejano, itinuturing niyang ridiculous o katawa – tawa ang mga naging pagbubunyag ni alyas ‘Bikoy’.

Aniya, hindi sila tumakbo para lamang sirain o pabagsakin ang gobyerno kundi para maglingkod sa taong bayan.

Sinabi pa ni Alejano na kukunsultahin niya ang kanyang mga kasama sa Otso Diretso para sa planong pagsasampa ng kaso laban kay alyas ‘Bikoy’ sa pagsira sa kanilang reputasyon.

Tila napikon si PNP Chief Police General Oscar Albayalde nang tanungin kung hindi ba maituturing na pulitika ang pagprisinta nila kay Peter Advincula alias ‘Bikoy’.

Binigyang diin ni Albayalde na bahagi ng demokrasya na mabigyan ng pagkakataon si alias ‘Bikoy’ para ilahad ang para sa kanya ay katotohanan hinggil sa “Ang Narco list Videos”.

Hindi anya ito nangangahulugan na pinaniniwalaan ng PNP ang lahat ng inilahad ni Bikoy.

Una rito, itinuro ni Bikoy ang oposisyon sa pangunguna ni Senador Antonio Trillanes na nasa likod ng “Ang Narco List Videos” at “Project Sodomo” na naglalayong pabagsakin ang Duterte administration.

Matatandaan na inakusahan noon ni Solicitor General Jose Calida ang Integrated Bar of the Philippines ng pakikilahok sa pulitika makaraang payagan nila sa kanilang tanggapan magsagawa ng press conference si alias ‘Bikoy’ noong una itong lumutang.

“What is political on this?! Tell me! Ang nagsalita dun, hindi kami. We are a police officer! He’s asking for a custody! Nag surrender po siya sa amin! This is not a political exercise! This is part of freedom of speech of anybody! Bakit?! Pinipili na natin dapat kung kanino magsalita at kung kanino lang dapat magsalita?! We are a police force! We protect and serve everybody! That is the truth according to him! Not according to me! Hindi galing sakin yun, sa kanya galing yun! I’m not saying that what he all says here is the gospel truth!”

Sumuko na sa Philippine National Police (PNP) si Peter Advincula o alyas Bikoy ang lalaking nasa serye ng viral video na “Ang Totoong Narco-list” na nag-uugnay sa pamilya ni Pangulong Rodrigo Duterte sa operasyon ng iligal na droga.

Sa kanyang muling paglantad, may bagong pasabog si alyas Bikoy kung saan sinabi nitong scripted ang   lahat ng kanyang mga naging alegasyon sa mga isinangkot sa naturang video.

Layon aniya ng pagpapalutang ng “Ang Totoong Narco-list” na siraan ang administrasyon upang maiangat ang kandidatura ng mga miyembro ng Otso Diretso.

“Siyam na buwan pinagplanuhan kung paano gumawa ng ingay ngayong darating na halalan. At hindi lang yung sa akin na pagsasalita ang plano para doon maraming nauna kasama yun doon sa script nung grupo para umingay ma-divert yung tao sa talagang totoong nangyayari sa bayan. Ito nga yung pagputok nung kay Bikoy para madiscredit si Senator-elect Bong Go, yung iba pang mga sangkot na pulitiko na wala naman talaga… hindi totoo ‘yun…wala naman katotohanan ‘yun.” Pahayag ni Advincula.

Tahasang itinuro ni Bikoy si Senador Antonio Trillanes IV at iba pang taga Liberal Party (LP) na utak umano sa pagbuo ng mapanirang video.

Ginagawa aniya ang kanilang mga tagong pagpupulong sa De La Salle University (DLSU) at Ateneo De Manila University (ADMU).

“Hindi totoo, walang katotohanan. Pawang orchestrated lamang ng Liberal Party under the handling of Senator Antonio Trillanes,” Dagdag ni Advincula.

Kwento ni Bikoy, pinangakuan siya ng kampo ni Trillanes na babayaran ng P500,000 kung magtatagumpay sila sa planong sirain ang administrasyon.

“Sa isa sa mga pari na direktang nakakakilala kay Sen. Trillanes siya ang nagdala sa akin, a certain Fr. Alejo.” Sabi ni Advincula.

Sinabi ni Bikoy na ramdam na niyang ilalaglag siya ng grupo ni Trillanes matapos na mapakinabangan.

Ngunit maliban dito, iginiit ni Bikoy na nais na  niyang maitama ang kanyang mga pagkakamali at nangangamba na siya para sa kaligtasan ng kanilang pamilya kaya’t siya ay sumuko na.

Nilinaw naman ni Bikoy na walang nagbayad sa kanya para bumaligtad at idawit naman ngayon ang mga taga oposisyon.

“Higit po sa lahat yung konsensya…yung matulog ka sa gabi na wala nang bigat sa isip mo na tahimik na isip mo na naisiwalat mo na yung katotohanan higit pa a pera ‘yun.” Ani Advincula.

Mga isiniwalat ni Advincula matagal nang plano

Isiniwalat ngayon ni Peter Advincula o alyas Bikoy na matagal nang plano ng oposisyon na pabagsakin si Pangulong Rodrigo Duterte.

Ito aniya ay sa ilalim ng “Project Sodoma” na layong mapatalsik sa puwesto si Pangulong Duterte upang maiupo naman bilang pangulo si Vice President Leni Robredo.

Sinabi ni Bikoy na hinahabol itong maisakatuparan ni Senador Antonio Trillanes IV bago matapos ang kanyang termino bilang senador.

“Kapag napabagsak si Presidente Duterte, the VP will appoint a certain congressman or senator to be the Vice President, and Sonny (Trillanes) was in the line to become VP. Yung ang pinakaplano ng ‘Ang Totoong Narco-List.” Sabi ni Advincula.

Inamin ni Bikoy na maliban sa pera ay pinangakuan siyang bibigyan ng pardon para sa lahat ng kanyang mga kaso.

“Pagkatapos ng proyekto, ang pangako, bibigyan ako ng pera, ‘pag nakaupo na si Robredo, ia-absolute pardon ako sa lahat ng kaso ko at bibigyan daw ako ng posisyon sa gobyerno.” Ani Advincula.

with report from Jill Resontoc (Patrol 7)

—–

Pinapurihan ng Trade Union Congress of the Philippines (TUCP) Party-list ang pag-apruba ng Senado sa ikatlo at huling pagbasa sa security of tenure bill o tatapos umano sa end of contract (ENDO).

Ayon kay TUCP Party-list Rep. Raymond Democrito Mendoza, tagumpay para sa mga manggagawa ang paglusot sa mataas na kapulungan ng kongreso ang anti-endo bill.

Pero mas magiging masaya aniya ang mga orbrero lalo ang mga kumikita ng minimum at below minimum sa oras na tuluyang isabatas ang nasabing panukala.

“This time we thank the President and of course the Senate and Congress tingnan natin may bicam pa eh di kailangan pa din mag-tugma yung provisions sa Congress and also sa Senate. But we have to do it fast we only have until June 7.” Pahayag ni Rep. Mendoza.

interview from Ratsada Balita

—–

Tiniyak ng mga bagong halal na senador na kaalyado ng administrasyon na hindi sila magiging rubber stamp o sunod-sunuran sa kagustuhan ni Pangulong Rodrigo Duterte.

Ayon kay Senator-elect Francis Tolentino, dating political affairs adviser ng pangulo, dapat tingnan ng publiko ang pagiging independyente ng Senado sa pamamagitan ng mga indibidwal nitong miyembro at hindi ng kabuuan nito.

Sa panig ni Senator-elect Bong Go, suportado niya ang mga legislative agenda ng pangulo maging ang giyera kontra kriminalidad, katiwalian at illegal drugs maging ang panukalang ibalik ang death penalty para sa mga heinous crime at drug trafficking.

Inihayag naman ni Senator-elect Ronald Dela Rosa na nirerespeto ni Pangulong Duterte ang opinyon ng kanyang mga kaalyado at laging bukas sa mga suhestyon.

—–

Iprinoklama na ng COMELEC ang 51 party list groups na nanalo sa nakalipas na midterm elections.

Ang nasabing party list groups ay o-okupa sa 61 seat sa Kamara.

Nangunguna sa mga nanalong party list group ang ACT-CIS na nakakuha ng 2.6 million votes at sinundan ng Bayan Muna na nakakuha naman ng 1.1 million votes at kapwa nakakuha ng tatlong seat sa pagpasok ng 18th congress sa July 1.

Nasa ikatlo at ika walong puwesto naman at mayroong tig dalawang seat ang mga party list groups na Ako Bicol, Cibac, Ang Probinsyano, 1-Pacman, Marino at Probinsyano Ako.

Tig isang seat naman ang nakuha ng iba pang nanalong party list groups na Senior Citizens, Magsasaka, APEC, Gabriela, An Waray, COOP-NATTCO, Alliance of Concerned Teachers, PHILRECA, Ako Bisaya, Tingog Sinirangan, Abono, Buhay, Duterte Youth, Kalinga, Puwersa ng Bayaning Atleta, Alona, Recoboda, Bagong Henerasyon, Bahay at CWS.

Bukod pa ito sa Abang Lingkod, A-Teachers, BHW, Sagip, Trade Union Congress of the Philippines, Magdalo, GP, Manila Teachers, RAM, Anakalusugan, Ako Padayon, Aambis-owa, Kusug Tausug, Dumper PTDA, TGP, Patrol, AMIN, Agricultural Sector Alliance of the Philippines, LPGMA, OFW Family, Kabayan, Diwa at Kabataan.

29 sa mga nasabing party list group ay incumbent at naihalal sa panibagong termino.

Uubra namang makakuha ng slot ang mga party list group na hindi umabot sa two percent threshold dahil nakasaad sa party list law na 20 porsyento ng mga miyembro ng Kamara ay dapat magmula sa party list rank.