HOT STORIES OF THE WEEK

Ipinababalik ng Commission on Audit (COA) ang nasa P260.5-million na incentives na ipinamahagi ng Government Service Insurance System (GSIS) sa kanilang mga empleyado.

Batay sa 2018 annual audit ng COA, maituturing na iligal na paggasta ang pagkakaloob ng GSIS ng tig-P100,000 sa kanilang 2,615 empleyado bilang pagkilala sa mahusay na serbisyo ng mga ito.

Ito ay dahil wala itong opisyal na pahintulot at rekomendasyon mula sa Department of Budget and Management (DBM) at tanggapan ng pangulo.

Bukod dito, mali rin anila ang pagkuwenta ng GSIS sa ipinamigay na insentibo na dapat ay nakabatay sa savings ng kumpanya mula sa pinakamahusay na performance nito dahil sa pagiging bukod tanging institusyon.

Samantala, tutol naman ang pamunuan ng GSIS sa kautusan ng COA na i-refund ang ipinamigay na insentibo dahil nagpapakita anila ito ng good faith lalo’t inaprubahan naman ito ng Civil Service Commission.

Diretsahang tinawag na “boba’ ni Foreign Affairs Secretary Teodoro Locsin Jr si Vice President Leni Robredo.

Kasunod ito ng pagbatikos ni Robredo sa ginawa ng DFA na pagkansela sa mga diplomatic passport matapos na magka aberya si dating foreign affairs sec Albert Del Rosario sa pagpasok nito sa Hong Kong.

Sa Twitter, sinabi pa ni Locsin na ginawa niya ang pagkansela sa lahat ng diplomatic passport upang hindi maitsupwera si Del Rosario.

Nanawagan pa ito na sana ay bigyan ng utak ang pangalawang pangulo.

Kinalaunan ay nagsorry din si Locsin sa kanyang naging pahayag at inaming hindi ito ang maginoong pakikipag usap sa isang babae.

Sa huli ay sinabi nitong hindi niya nais na bastusin ang vice president ngunit sadyang may mga bagay na kinakailangan ng malalimang pag iisip kaya sa susunod ay dapat na tanungin muna siya nito.

Robredo warns against cancellation of diplomatic passports of former gov’t officials HEY, BOBA, THAT IS PRECISELY WHY I HAVE ORDERED THE CANCELLATION OF ALL COURTESY DIPLOMATIC PASSPORTS BECAUSE I REFUSE TO SINGLE OUT DEL ROSARIO. https://t.co/5VIXUMjlCs via @manilabulletin

— Teddy Locsin Jr. (@teddyboylocsin) June 24, 2019

I don’t mean to be disrespectful Ma’am. You are just a missing heartbeat away from the Presidency. I respect you for that accident of fortune. But there are things that require a measure of study & thought. Please ask me next time. At your service, Ma’am. https://t.co/ghTHGtwKeg

— Teddy Locsin Jr. (@teddyboylocsin) June 24, 2019

Nag-sorry kay Pangulong Rodrigo Duterte ang kapitan ng bangkang pangisda na binangga ng Chinese vessel sa Recto Bank.

Sa harap ito ng nag-viral na isyu hinggil sa pagtanggi nya sa imbitasyon ng Malacañang na magkita sila ng Pangulong Rodrigo Duterte.

Ayon kay Kapitan Junel Insigne, nagkamali sila ng interpretasyon sa imbitasyon na galing pala kay Agriculture secretary Manny Piñol at hindi sya sa Malacañang pinapupunta kundi sa tanggapan nito sa Department of Agriculture.

Inulit naman ni Insigne ang panawagan nito sa pangulo na papanagutin ang kapitan ng Chinese vessel na bumangga sa kanila.

Si Insigne ay humarap sa isang press conference kasama si Agriculture secretary Manny Piñol na syang nagbukas sa nasabing usapin.

Humihingi po ako ng paumanhin sa ating mahal na Presidente (Duterte) na hindi po pala ako pinatawag kundi po si Secretary Piñol ang nagpatawag sa ‘kin. Hindi po ako nakatuloy, umatras po ako dahil masama po ‘yung pakiramdam ko. ‘Yun nga po, humihiling po ako sa ating mahal na Presidente na sana po ma-ano po ‘yung demanda po sa amin na, gusto kop o mapanagot po ‘yung kapitan po. ‘Yung lang po ang hinihiling ko sa ating mahal na Presidente,” ani Insigne.

Tuloy ang paglilitis ng Sandiganbayan 5th Division sa kasong plunder laban kina dating Senador Jinggoy Estrada at Janet Napoles.

Ibinasura na ng Sandiganbayan ang demurer to evidence na inihain nina Estrada at Napoles.

Sa inilabas na resolusyon ng Sandiganbayan 5th Division, sinasabing kumbinsido ang mga mahistrado na mayroong sapat na ebidensya ang prosekusyon para mapagtibay ang koneksyon nina Estrada at Napoles.

Kaugnay ito sa di umano’y paggamit ng Priority Development Assistance Fund (PDAF) ni Estrada noong senador pa sya sa mga bogus NGOs ni Napoles.

Kinumpirma ni Foreign Secretary Teodoro Locsin na nakapaghain na siya ng diplomatic protest hinggil sa nangyaring banggaan sa Recto Bank sa West Philippine Sea kung saan tinamaan ng barko ng China ang bangkang pangisda ng Pilipinas.

Nakasaad sa Twitter post ni Locsin na nag-‘fired off’ na siya ng diplomatic protest, kahapon, Hunyo 12.

Samantala, tinawag namang “barbaric” at “uncivilized” ni Presidential spokesman Salvador Panelo ang naturang pagkilos ng mga tao ng China.

Magugunitang sinabi rin ni Armed Forces of the Philippines Western Command spokesman Lieutenant Colonel Stephen Penetrante na posibleng sinadya ang naturang banggaan… kung aksidente aniya ito ay dapat na tinulungan sana ng mga Chinese crew ang mga mangingisdang Pilipino.

Aminado ang Department of Health (DOH) na matagal nang nangyayari ang mga pekeng claims sa PhilHealth.

Sa katunayan, sinabi ni Health secretary Francisco Duque III na mahigit sa 20,000 na ang naisampa nilang kaso hinggil sa fraudulent claims mula noong 2013.

Ayon kay Duque, ang ganitong klase ng scam o pandaraya ay nangyayari rin sa iba pang health insurance sa buong mundo.

Talagang kahit na anong gawin namin, mukhang talagang meron at merong nangyayari. ‘Yung mga multiple filing of claims, ‘yun bang parehong claim pina-file ng ilang beses para lang makasingin ng mas malaki. Pangalawa, ‘yung tinatawag na ghost patients or phantom claims. Ito na nga ‘yung nangyari sa WellMed Dialysis Center, silang nag-file ng mga case para sa mga pasyenteng di umano’y patay na. Tapos pangatlo ‘yung mga gaining, up casing ng mga ospital na para lang gusting lumaki ang kita ay dinadaya ‘yung sistema,” ani Duque.

Sinabi ni Duque na malinaw na hindi sapat ang ipinatupad nilang safeguards matapos mabunyag ang ghost dialysis sa WellMed Dialysis Center.

Dahil dito, humingi na anya sila ng technical assistance sa Asian Development Bank kung anong modelo ng accreditation sa buong mundo ang pinaka matagumpay.

Which accreditation models are available worldwide na talagang subok na na tagumpay. Para pwede ng gamitin ng PhilHealth. Dito kasi nakikita ko sa nangyari sa accreditation process ang malaking nagka-diperensya. So, ang reporma, ifofocus muna natin, itatarget muna natin ditto sa accreditation process at palagay ko kung maayos ito ay talagang maraming masosolusyonang problema,’ dagdag pa ni Duque.

Ratsada Balita Interview

Umapela si Senador Francis Pangilinan sa gobyerno na maghain ng diplomatic protest laban sa China kasunod ng pagbangga at pagpapalubog ng Chinese vessel sa isang Filipino fishing vessel sa Benham Rise.

Ayon kay Pangilinan, ang pang-iiwan pa ng naturang Chinese vessel sa mga biktimang Pilipino ay iligal at walang anumang bansa sa mundo ang mananahimik sa ganitong kalupitan.

Aniya, panahon na para pag-isipan at baguhin ng gobyerno ang polisiya nito na pabor sa China gayong ganito naman ang pagtrato sa mga Pilipino.

Mahigit 20 mga mangingisdang Pilipino ang pinabayaan ng Chinese vessel sa dagat at maswerte namang sinaklolohan ng mga mangingisdang Vietnamese na nasa lugar.

DFA sa panawagang maghain ng diplomatic protest vs. China

Hihintayin muna ng Department of Foreign Affairs (DFA) ang ulat ng West Philippine Task Force kaugnay sa banggaan ng barkong pangisda ng mga Filipino at Chinese.

Ayon kay Foreign Affairs sec. Teodoro Locsin Jr., bagama’t nakarating na sa kaniyang kaalaman ay ibabatay niya ang kaniyang susunod na hakbang sa magiging ulat ng task force.

Ito ang naging tugon ng kalihim kasunod ng mga panawagan na maghain na ng diplomatic protest laban sa China.

Giit naman ni Locsin, marapat lamang na kondenahin ang ginawang pang-iiwan ng mga Chinese sa mga Pilipinong mangingisda lulan ng bangkang kanilang nabangga.

Sa panulat ni Jennelyn Valencia

Naniniwala ang militar na sinadya ang banggaan sa Recto Bank sa West Philippine Sea kung saan tinamaan ng barko ng China ang bangkang pangisda ng Pilipinas kaya’t ito ay lumubog.

Ayon kay Western Command spokesperson Lt. Col. Stephen Penetrante, hindi tumigil ang barko ng China kaya’t malayo itong ituring na aksidente.

Inihalintulad pa ni Penetrante ang insidente sa “hit and run” na nangyayari sa kalsada batay na rin sa mga salaysay ng mga mangingisda.

Dahil dito, tiniyak ng militar ang pagsasagawa ng masusing imbestigasyon para malaman kung ano ang tunay na nangyari sa Recto Bank na nasa loob ng exclusive economic zone (EEZ) ng Pilipinas.

Una rito, kinondena ni Defense sec. Delfin Lorenzana ang insidente kung saan pinabayaan ng mga Chinese ang mga Pilipino sakay ng bangkang kanilang binangga.

Inatasan ni Pangulong Rodrigo Duterte ang National Bureau of Investigation o NBI na imbestigahan ang nabunyag na anomalya sa pondo ng Philippine Health Insurance Corporation o Philhealth.

Ayon kay Sen. Elect Bong Go, matinding pagkadismaya ang nararamdaman ng pangulo sa nangyaring katiwalian sa ahensya.

Kaugnay nito, nais umano ng pangulo na malinis muli ang Philhealth kaya’t pansamantala aniya itong pamumunuan ng mga may plantilla positions.

Una rito, pinagbibitiw ni Pangulong Futerte ang lahat ng board members ng Philhealth.

Itinanggi ng Philippine Veterans Affairs Office (PVAO) na nagbayad sila ng mahigit sa P70-M sa mahigit 5,000 pensioners na patay na.

Ayon kay PVAO administrator Ernesto Carolina, hindi nawala ang pondo dahil naka-hold pa ito sa mga bangko.

Aminado ang PVAO na naipasok ang pondo sa accounts ng mga pensyonadong patay na subalit inipit ng bangko dahil agad rin itong hinahabol ng PVAO.

Halos kalahati anya ng P70-M ay nabawi na ng PVAO samantalang mahigit pa sa P33-M ang nananatili sa bangko.

Ghost claims hindi nangyayari sa PVAO – PVAO admin

Tiniyak ng Philippine Veterans Affairs Office (PVAO) na hindi nangyayari sa kanila ang ghost claims na tulad ng nangyari sa PhilHealth.

Ayon kay PVAO administrator Ernesto Carolina, mayroon silang nakalatag na mga panuntunan upang matiyak na hindi makakalusot ang pagbabayad ng pensyon sa mga beteranong patay na o kaya ay muling nagpakasal.

Sinabi ni Carolina na mayroon silang mga extension office na ang pangunahing trabaho ay makipag-ugnayan sa mga local registrar at vetarans organizations.

Kailangan ring magpakita sa kanilang tanggapan ang pensyonado tuwing ika-anim na buwan, taunang pagsusumite ng larawan na may kasamang newspaper kung saan makikita ang date ng publication at biglaang mga pagbisita ng PVAO.

Una nang sinita ng Commission on Audit ang PVAO dahil sa di umano’y pagbabayad ng mahigit sa P70-M sa mahigit 5,000 patay nang pensioners.