HOT STORIES OF THE WEEK

Nabunyag ang isa pang umano’y hazing incident sangkot naman ang mga estudyante ng University of the Philippines (UP).

Viral ngayon sa social media ang screenshots ng hinihinalang fraternity related hazing na kinasasangkutan ng UP Sigma Rho.

Ang nasabing hazing incident ay nangyari, dalawang taon na ang nakakalipas.

Sa group chat, makikita ang usapan hinggil sa panggugulpi na tinawag na ‘pegul’ at larawan ng isang lalaki na puro pasa dahil sa pambubugbog.

Mayroon ding lalaki na makikitang may hawak ng mahabang paddle.

Nag trending sa twitter ang #EndFRV o panawagang wakasan na ang mga Fraternity Related Violence (FRV).

Sa pahayag ng student organizations at student governments partikular ang UP Diliman University Student Council, sinabi nito na bagamat hindi naveverify ang screenshots, kinokondena nila ang lahat ng uri ng karahasan sa loob at labas ng pamantasan.

Kailangan na anilang mahinto ang macho-feudal culture sa lipunan.

Panawagan naman ng UP Alyansa sa UP Administration, dapat ay mahigpit na ipatupad ang Anti-Hazing Act of 2018 para mabigyan ng hustisya ang humahabang listahan ng mga biktima ng FRV sa pamantasan.

Diphtheria ang ikinasawi ng isang 10-taong gulang na mag-aaaral sa Pandacan sa Maynila.

Ito ang kinumpirma ni Department of Health (DOH) Undersecretary Eric Domingo batay aniya sa resulta ng isinagawang pagsusuri sa Research Institute for Tropical Medicine (RITM).

Magugunitang una nang pinaghinalaang diphtheria ang ikinasawi ng naturang estudyante kaya’t agad na ipinasuri ito sa RITM.

Ang diphtheria ay isang sakit na dulot ng impeksiyon ng bacteria sa ilong at lalamunan kung saan ang pagkaranas ng sore throat, lagnat at panghihina ang biktima ang sintomas nito.

Dalawa pang upperclassmen ng Philippine Military Academy (PMA) ang kinilalang suspek sa nangyaring hazing na ikinasawi ni Fourth Class Cadet Darwin Dormitorio sa loob ng akademya.

Ayon kay Baguio City Police Colonel Allen Ray Co, dalawang Third Class cadets ang kumpirmadong may direktang partisipasyon sa nangyaring pangmamaltrato kay Dormitorio.

Natunton aniya ang dalawang hindi pa pinapangalanang kadete sa pamamagitan ng pakikipagtulungan ng tactical officers ng PMA.

Mabilis din aniya ang pagtugon ng pamunuan ng PMA sa kanilang kahilingang i-isolate o ihiwalay muna ang mga naturang suspek.

Mahaharap naman, ani Co, sa charges ang dalawang mga suspek kasama ang tatlo pang kadete na nauna nang natukoy bilang mga suspek din sa hazing dahil sa paglabag sa Anti-Hazing Law.

Posibleng tangkaing muli ng China na ariin ang Scarborough Shoal bago magtapos ang termino ng Pangulong Rodrigo Duterte.

Ayon kay Supreme Court Senior Associate Justice Antonio Carpio, gagawin ito ng China sa panahon ng Duterte administration dahil malinaw ang posisyon ng pangulo na hindi nya kayang pigilan ang China.

Tinangka na anya ito noong 2016 ng China subalit napigilan sila ni U.S. President Barack Obama.

Kasabay nito, ibinabala rin ni Carpio na posibleng magsilbing patibong o ‘trap’ sa Pilipinas ang binubuo nitong ‘Code of Conduct in the South China Sea’.

Hindi anya malayong maipit ang Pilipinas at sumunod sa code of conduct na pabor sa China samantalang ang iba pang claimants sa South China Sea ay sumusunod sa United Nations Convention on the Law of the Sea (UNCLOS).

Sinabi ni Carpio na posibleng hinihila ng China ang Pilipinas para ipalit sa UNCLOS settlement mechanism ang code of conduct.

Kinumpirma ng Bureau of Immigration (BI) ang paglabas sa bansa ng tinaguriang ‘drug queen’ na si Guia Gomez Castro.

Si Castro ang sinasabing buyer ng mga nirerecycle na illegal drugs ng tinatawag na ‘ninja cops’.

Batay sa datos ng Immigration, umalis noong September 21 si Castro patungo ng Bangkok, Thailand.

Sinabi ni Immigration Spokesperson Dana Sandoval na pinayagang makalabas ng bansa si Castro dahil wala naman itong masamang record na nakatala sa ahensya.

Si Castro ay una nang napag-alamang halal na barangay chairman ng Barangay 484 Zone 48 subalit nagpasyang huwag manumpa sa tungkulin para takasan ang otoridad.

Mapapatawan na ngayon ng mas mabigat na parusa ang mga sangkot sa bank hacking at skimming ng mga Automated Teller Machine (ATM) cards.

Nakasaad sa Republic Act No. 11449, maituturing nang heinous crime ang paggamit ng access devices upang makapanloko at kailangan nang mapatawan ng habambuhay na pagkakabilanggo at pagbabayad ng P5-million.

Ayon sa R.A. 11449, malinaw na isang economic sabotage ang mga kaso ng bank hacking at ATM card skimming at dapat lamang na mapatawan ng pinakamataas na parusa.

Maari namang mabilanggo ng hindi bababa sa anim na taon hanggang 20 taon ang sinumang masasangkot sa  credit cards fraud at iba pang access devices at babayaran nito ng doble ang ninakaw nitong halaga.

Nilagdaan ni Pangulong Duterte ang panukalang batas noong Agosto 28 at magiging epektibo matapos ang 15 araw na official publication nito.

Nilagdaan na ni Pangulong Rodrigo Duterte ang panukalang batas na layong mas mabigyan ng proteksyon ang mga nasa broadcast media kabilang ang cable television, wire service organizations, at electronic mass media.

Base sa Republic Act No. 11458, hindi maaaring pilitin ang sinumang mamamahayag na ibunyag ang kanilang mga confidential sources hanggat walang kautusan mula sa Korte Suprema, Kamara, Senado o anumang congress committee.

Sakop ng batas na ito ang mga accredited journalist, publisher, writer, reporter, contributor, opinion writer, editor, columnist, manager, at media practitioner na kasama sa pagsusulat, pag-eedit, pagpo-produce at paglalahad ng balita sa publiko sa broadcast media, wire organizations at electronic mass media.

Inamyendahan ng R.A. 11458 ang R.A. No. 53 o mas kilala bilang ‘Sotto Law’ na naisabatas higit 70 taon na ang nakararaan at nagbibigay proteksyon lamang sa print media.

Nilagdaan ni Pangulong Duterte ang inamyendahang batas noong Agosto 30 at magiging epektibo makalipas ang 15 days official publication.

Inamin ng Armed Forces of the Philippines (AFP) na pinag-uusapan na ang hinggil sa posibleng pagpapalit ng liderato ng Philippine Military Academy (PMA).

Inihayag ito ni Brig. Gen. Edgard Arevalo, spokesman ng AFP, sa harap ng mga panawagang magbitiw sa puwesto si PMA Supt. Ronnie Evangelista.

Nag-ugat ang panawagan sa pagbibitiw ni Evangelista ang pagkamata ng isang kadete at pagka-ospital ng dalawang iba pa dahil sa hazing.

Ayon kay Arevalo, sa ngayon ay inirelieved na sa kanilang puwesto ang senior tactical officer at company tactical officer na sya dapat nangangalaga sa kanilang mga kadete.

Posibleng magrollback din ng halos P2.00 ang presyo ng produktong petrolyo sa susunod na linggo.

Inihayag ito ni Senador Sherwin Gatchalian, chairman ng Senate Committee on Energy, matapos ang kanilang emergency meeting sa mga kumpanya ng langis.

Ipinatawag ang meeting kasunod ng halos P2.00 dagdag sa presyo ng produktong petrolyo na ipinatupad ng oil companies.

Ayon kay Gatchalian, inaasahan na ang pagdagsa ng bagong suplay ng langis sa bansa matapos na maiayos ang planta na nasira sa pag-atake sa Saudi Arabia.

Ang aming estimate at sa estimate din ng DOE, almost the same, hindi man iyan isang bugso but bababa din siya sa halos the same level. So, ang presyo ng langis ngayon ay malaro dahil nga dito sa insidente na ito, pero ang pinakamahalaga dito nagmomonitor an gating komite, ang DOE, at nagmomonitor din tayo sa mga umaabuso sa sitwasyon,” ani Gatchalian. — sa panayam ng Ratsada Balita