HOT STORIES OF THE WEEK

Naniniwala si Senador Francis Tolentino na tatanggapin ni Vice President Leni Robredo ang appointment bilang co-chairperson ng Inter-agency Committee na tututok sa ‘war on drugs’ ng pamahalaan.

Aniya, isang mahalagang tungkulin ang pagiging co-chair ng naturang ahensya at kailangan ay mayroong dahilan ang bise presidente kung hindi nito tatanggapin ang posisyon.

Kailangan may mas mahalagang dahilan po siya doon na mas mataas pa sa pangangailangan ng ating sambayanan, pero naniniwala ako na tatanggapin niya ‘yan dahil nakapahalagang tungkulin ‘yan,” ani Tolentino.

Dagdag pa ni Tolentino, ang naturang appointment ay paraan ng pagpapakita ng pangulo ng kaniyang sinseridad at pangangailangan ng pagtutulungan para masugpo ang ilegal na droga sa bansa.

Nagpapakita po ito ng sinseridad ng ating mahal na pangulo at nagpapakita rin po siguro na talagang kailangan lahat ang kamay, kailangan lahat ang kooperasyon para masalungat, malabanan itong giyera kontra droga,” ani Tolentino.  —sa panayam ng Ratsada Balita

Itinanggi ng tagapagsalita ng Malacañang na ‘nonexistent’ ang posisyong drug czar na iniaalok ng Pangulong Rodrigo Duterte kay Vice President Leni Robredo.

Ayon kay Presidential Spokesman Salvador Panelo, kabilang lamang ito sa napakaraming mga palusot at demands ng kampo ni Robredo.

Matatandaan na sinabi ni Atty. Barry Gutierrez, tagapagsalita ni Robredo, na wala namang magiging tunay na kapangyarihan ang co-chair ng Inter-Agency Committee on Anti-Illegal Drugs (ICAD), base na rin sa executive order na bumuo sa naturang grupo.

Sinabi ni Panelo na hindi na kailangan pang amyendahan ang ICAD dahil mayroong kontrol ang pangulo sa lahat ng tanggapan at ng mga opisyal ng ehekutibo.

Ipinaliwanag ni Panelo na ang nais lamang ng pangulo na maging bukas sa mga suhestyon mula sa isang kritiko ng drug war kaya nya itinalaga si Robredo sa ICAD.

Naniniwala aniya ang pangulo na tanging si Robredo rin ang makapagpapatupad ng maayos sa lahat ng kanyang magiging suhestyon.

Itinalaga ni Pangulong Rodrigo Duterte ang Pangalawang Pangulo na si Leni Robredo bilang co-chair ng Inter-Agency Committee on Anti-Illegal Drugs.

TINGNAN: Pangulong Rodrigo Duterte, itinalaga si Vice President Leni Robredo bilang co-chairperson ng Inter-Agency Committee on Anti-Illegal Drugs pic.twitter.com/ROZpOWMKTf

— DWIZ Newscenter (@dwiz882) November 5, 2019

Ito mismo ang kinumpirma ni Presidential Spokesman Salvador Panelo kung saan, binibigyang-kapangyarihan aniya ng naturang posisyon si Robredo na pangasiwaan ang mga drug enforcement agencies at mga tanggapan, kabilang na ang Philippine Drug Enforcement Agency (PDEA), Dangerous Drugs Board (DDB) at ang Philippine National Police (PNP) hanggang sa matapos ang kanyang termino sa ika-30 ng Hunyo sa taong 2022.

Umaasa aniya ang Malacañang na makita ng mga kritiko ng Administrasyong Duterte na sinsero ang pangulo sa kanyang alok kay Robredo.

Samantala, wala pang komento rito si Robredo kung saan nakabinbin pa rin ang opisyal na sulat mula sa Palasyo kaugnay sa alok ng pangulo.

Dagdag pa ni Panelo, maaari aniyang tanggihan ng pangalawang pangulo ang pagtatalaga sa kanya bilang co-chair ng Inter-Agency Committee on Anti-Illegal Drugs kung kanyang nanaisin.

Tiniyak ng Department of Agriculture (DA) na may mananagot sa paglabas sa merkado ng processed food products na may African Swine Fever (ASF).

Inaantay na ng Food and Drug Administration (FDA) ang paliwanag ng Mekeni Food Corporation matapos magpositibo ang kanilang hotdog at skinless longganisa sa ASF.

Ayon kay Assistant Secretary Noel Reyes, spokesman ng DA, inaalam na rin ng FDA kung sinu-sino ang mga nagsu-suplay ng raw materials sa Mekeni upang matukoy ang pinagmulan ng ASF.

Posible aniyang local supplier ang pinagmulan dahil nagnegatibo sa ASF ang mga sinuri nilang imported na raw materials ng Mekeni mula sa U.S., France at Canada.

Kakasuhan po ‘yan, malamang, kasi bawal po ‘yan. Ang violators po ng gumagamit ng mga may sakit na baboy, kahit na anumang hayop na kinatay na may sakit ay punishable by law,” ani Reyes.

Samantala, binibilisan na ng DA ang National Zoning Plan upang mas makontrol ang pagbiyahe ng mga baboy at hindi na makalabas pa ang virus sa mga lugar na apektado na sa ngayon.

Sinabi ni Reyes na sa ngayon ay nasa Rizal, Bulacan at Pampanga pa lamang naman ang ASF.

Nagkakaroon na po tayo ng culling operation, cleaning and disinfection, kaya nga po nananawagan kami sa mga ASF-declared area na huwag nang itago ang baboy nila, issurender po,” ani Reyes. —sa panayam ng Ratsada Balita

Bumagal pa ang inflation o pagtaas ng presyo ng mga pangunahing bilihin sa bansa nitong Oktubre.

JUST IN: Inflation, naitala sa 0.8% nitong Oktubre 2019 —mas mababa ito kumpara sa 0.9% na naitala noong Setyembre | via @PSAgovph pic.twitter.com/fmzq7o1pOW

— DWIZ Newscenter (@dwiz882) November 5, 2019

Batay sa ipinalabas na datos ng Philippine Statistics Authority (PSA), bumagsak pa sa 0.8% ang inflation nitong Oktubre, mas mabagal ito kumpara sa 0.9% inflation rate na naitala noong nakaraang Setyembre.

Ito na ang pinakamababang inflation rate na naitala mula noong May 2016 kung saan naitala ang 0.9% inflation rate. Dahil dito, nasa 2.9% na ang inflation rate mula Enero hanggang Oktubre o para sa kabuuan ng 2019. Ang October inflation rate ay mahigit sa 5% mas mababa sa 6.7% inflation rate na naitala noong October 2018. Partikular na naging dahilan ng mababang inflation rate ang bumababang presyo ng pagkain at non-alcoholic beverages kabilang ang bigas, mais, asukal at gulay.

The downtrend in the inflation in October 2019 was primarily due to the annual drop in the index of the heavily-weighted food and non-alcoholic beverages. #PHCPI #Inflation

— @PSAgovph (@PSAgovph) November 5, 2019

Binuksan ni Pangulong Rodrigo Duterte ang isyu ng pagtatapon ng basura ng mga mayayamang bansa sa mga umuunlad na bansa sa Asya sa harap ng iba ng leaders na dumalo sa Association of Southeast Asian Nations (ASEAN) summit.

Sa special lunch on sustainable development sa ASEAN summit sa Thailand, binigyang diin ng pangulo na dapat nang itigil ang pagpapadala ng mga basura sa developing asian countries na may markang ‘recyclables’.

Ibinida ng pangulo ang ginawa nya sa 2,000-tonelada ng basura ng Canada na ipinasauli nya sa naturang bansa.

Sinabi ng pangulo na isang magandang pagkakataon ang pulong upang iparating sa mga mayayamang bansa na maging maingat sa pagtrato sa mga papaunlad na mga bansa.

Lubos na pasasalamat ang naging mensahe ng Pangulong Rodrigo Duterte kay Japanese Prime Minister Shinzo Abe sa kanilang bilateral meeting.

Nagpasalamat ang pangulo sa pondong ibinigay ng Japan para sa road network development project na nagdudugtong sa Bangsamoro Autonomous Region in Muslim Mindanao (BARMM) at sa iba pang trade centers na sumusuporta sa kabuuang pag-unlad ng BARMM.

Lubos rin ang pasasalamat ng pangulo sa tulong ng Japan para magkaroon ng subway sa bansa gayundin sa mga air assets at iba pang military assistance na nagmula sa naturang bansa.

Umabot sa halos 90 volcanic earthquake ang naitala ng Philippine Institute of Volcanology and Seismology o PHIVOLCS sa Bulkang Taal.

Ayon sa PHIVOLCS, naitala ang magkasunod na intensity 1 at intensity 2 kaninang pasado alas 3:00 at alas 4:00 ng madaling araw kanina sa ilang bayan sa Talisay, Batangas.

Nanatiling nakataas sa alert level 1 ang bulkan bunsod ng patuloy na aktibidad nito.

Kaugnay nito, pinayuhan ang publiko na off – limits muna ang main crater ng bulkan dahil sa posibleng steam explosions.

Hinikayat ni Pangulong Rodrigo Duterte ang taumbayan na huwag iboboto si Vice President Leni Robredo kapag tumakbong pangulo ito sa halalan sa 2022.

Ginawa ng pangulo ang apela  matapos alukin ng cabinet position si Robredo kapag tinanggap ang pagiging drug czar.

Matatandaang hinamon ng pangulo si Robredo na pangunahan ang kampanya laban sa illegal drugs matapos batikusin ang drug war ng gobyerno at sabihing bigo ito.

Binigyang diin ng pangulo na namumulitika lamang si Robredo at wala itong alam sa batas kaya’t hindi ito karapat dapat maging presidente.