HOT STORIES OF THE WEEK

Hinatulang makulong si dating Isabela governor at dating COMELEC Commissioner Grace Padaca dahil sa kasong katiwalian at malversation of public funds.

Ang kaso ay nag-ugat sa di umano’y pagpapautang ni Padaca ng P25 million sa asosasyon ng mga magsasaka nang hindi dumadaan sa public bidding noong gobernador pa ito ng Isabela.

Sa desisyon ng Sandiganbayan, anim (6) hanggang 10 taong pagkakulong ang hatol kay Padaca sa kasong graft samantalang 10 hanggang 18 taon para sa malversation.

Hindi na rin kwalipikado si Padaca na humawak ng kahit anong posisyon sa pamahalaan.

Samantala, inatasan ng Sandiganbayan si Padaca na magbayad ng P140,000 piyansa para sa kanyang pansamantalang paglaya habang ini-aapela ang hatol.

Bahagyang lumakas ang Tropical Storm Ramon habang kumikilos pa hilaga.

Ang sentro ng bagyong Ramon ay pinakahuling namataan sa layong 445 kilometro silangan hilagang-silangan ng Casiguran, Aurora.

Taglay nito ang pinakamalakas na hanging umaabot sa 75 km/h (kilometro kada oras) malapit sa gitna at may pagbugso na umaabot sa 90 km/h.

Ang bagyong Ramon ay kumikilos pa hilaga sa bilis na 15 km/h.

Ang Tropical Cyclone Wind Signal (TCWS) No. 1 ay nakataas pa rin sa timog silangang bahagi ng Cagayan, silangang bahagi ng Isabela, Northern Aurora, at Polillo Islands.

Inalis na ang signal No. 1 sa Catanduanes.

Nakipagpulong ang Bise Presidente Leni Robredo sa mga opisyal ng United States (US) kaugnay sa kung papaano mababawasan ang demand ng ilegal na droga sa Pilipinas, ngayong araw ng Miyerkules.

Ito’y makaraang hilingin ni Robredo ang naturang pagpupulong bilang co-chairperson ng Inter-Agency Committee on Anti-Illegal Drugs (ICAD) ng pamahalaan.

Ayon sa pahayag ng US Embassy, kabilang sa mga dumalo sa nabanggit na pagpupulong ang mga kinatawan ng US Federal Bureau of Investigation, Drug Enforcement Agency, Department of State, at United States Agency for International Development.

Dagdag pa ng embahada, nagbigay ng briefing ang mga opisyal ng US hinggil sa kanilang mga programa na posibleng ma-asistihan ang mga hakbang ng gobyerno ng Pilipinas sa pagpapababa ng drug demand.

Magugunitang una ng sinabi ni Robredo na plano niyang humingi ng tulong mula sa US Embassy kung papaano pa mapapaigting ang kampanya kontra ilegal na droga ng Pilipinas at mapanagot ang mga big-time drug syndicates.

Una na ring nakipagpulong si Robredo sa mga kinatawan ng UN Office on Drugs and Crime (UNODC) kaugnay din sa problema sa ilegal na dorga.

Samantala, isa si Robredo sa kritiko ng kampanya kontra ilegal na droga ng Administrasyon Duterte.

Pumanaw na ang Presidente ng PAL Holdings at head coach ng University of the East Red Warriors na si Lucio “Bong” Tan Jr., sa edad na 53.

Ito mismo ang kinumpira ng kanyang kapatid na si Vivienne Tan.

Ayon kay Vivienne Tan pumanaw si Tan Jr. kaninang 8:48 ng umaga, Lunes, Nobyembre 11 dahil sa brain herniation.

“It is with deep sorrow that I announce the passing of my brother, Lucio “Bong” Tan Jr. this morning, November 11, 2019. He was 53. His untimely passing leaves a big void in our hearts and our Group’s management team which would be very hard to fill,” nakasaad sa statement.

Magugunitang dinala si Tan Jr. sa Cardinal Santos Medical Center matapos mawalan ng malay habang naglalaro ng basketball noong Sabado, Nobyembre 9.

Si Tan ang anak ng business tycoon billionaire na si Lucio Tan Sr.

Pinagbigyan ng Korte Suprema ang kahilingan ng hukom na may hawak sa Maguindanao Massacre case na isang buwang extension para desisyunan ang kaso.

Naniniwala si Supreme Court Chief Justice Diosdado Peralta na bahagi ang dagdag na panahon upang matiyak na maibibigay ang tamang hustisya.

Ayon kay Peralta, tiwala s’yang ginawa ni Judge Jocelyn Solis – Reyes ang lahat upang mabigyan ng hutisya ang pamilya ng mga biktima ng Maguindanao Massacre nang hindi sinisikil ang due process para naman sa mga akusado.

Una nang hiniling ni Reyes ang dagdag na isang buwan para makapagpalabas ng desisyon sa 10 taon nang kaso dahil sa dami ng dokumento na kelangang pag-aralan.

Tinanggap na ni Vice President Leni Robredo ang alok ni Pangulong Rodrigo Duterte na maging co-chairperson ng Inter-agency Committee on Anti-illegal Drugs (ICAD).

Sa pulong-balitaan mismo ng Bise Pangulo, sinabi nito na handa siyang makiisa sa Administrasyong Duterte kaugnay sa makontrobersiyal na giyera kontra ilegal na droga ng pamahalaan.

Handa akong tiisin ang lahat ng ito dahil kung meron akong maililigtas na kahit na isang inosenteng buhay, ang sinasabi ng prinsipyo ko ay kailangan ko itong subukan,” ani Robredo.

Ipinabatid din ni Robredo ang kanyang kagustuhang tulungan ang Pangulong Duterte sa nalalabing dalawa at kalahating taon nito sa panunungkulan.

Mr. President, 2.5 taon na lang ang naiiwan sa administrasyon. Hindi pa huli ang lahat, pwede pa nating pagtulungan ito,” ani Robredo.

Samantala, magugunitang ipinahayag ni Philippine Drug Enforcement Agency (PDEA) Director General Aaron Aquino sa DWIZ, na naguguluhan siya kaugnay sa naturang pagtatalaga kay Robredo.

Kung ibabatay kasi aniya sa pahayag ng Pangulong Duterte, nais nyang ibalik sa gabinete ang pangalawang pangulo bilang ‘drug czar’, ngunit hindi naman aniya cabinet position ang pagiging pinuno ng ICAD dahil ang tanging trabaho nito ay makipag-ugnayan sa 45 ahensya ng pamahalaan na miyembro ng komite.

Gayunman,  sinabi ni Aquino na –bagay ibigay na responsibilidad kay Robredo ang adbokasiya na isinusulong ng ICAD dahil naaayon ito sa kanyang mga ibinigay na kritisismo sa ‘drug war’ ng administrasyon.

Magugunita ring sinabi ni PNP Spokesperson Police Brigadier General Bernard Banac sa DWIZ, na suportado ng PNP ang hakbang na ito ng pangulo.

Hindi rin aniya hadlang pagiging babae ni Robredo upang pangunahan ang kampanya kontra ilegal na droga sa bansa.

Hindi rin nabigo ang PNP sa kanilang inaasahan na tatanggapin ng pangalawang pangulo ang pagkakatalaga sa kanya bilang drug czar.

Taliwas naman sa inaasahan dahil din una nang tinawag na ‘problematic’ at kaduda-duda ng kampo ni Robredo pagkakatalaga sa kaniya bilang co-chairperson ng ICAD, ay matapang namang tinanggap ni Robredo ang una’y tila hamon ng Pangulong Duterte sa kanya kaugnay sa giyera kontra ilegal na droga.

ICYMI: Pulong-balitaan ni Vice President Leni Robredo kaugnay sa kanyang pagkakatalaga bilang co-chairman ng Inter-agency Committee on Anti-illegal Drugs (ICAD) https://t.co/wSDVbpbaHo pic.twitter.com/Hr1hFj7i9V

— DWIZ Newscenter (@dwiz882) November 6, 2019

Aminado si Philippine Drug Enforcement Agency (PDEA) Director General Aaron Aquino na naguguluhan sya sa pagkakatalaga kay Vice President Leni Robredo bilang co-chairman nya sa Inter-agency Committee on Anti-illegal Drugs (ICAD).

Ayon kay Aquino, kung ibabatay kasi sa pahayag ng Pangulong Rodrigo Duterte, nais nyang ibalik sa gabinete ang pangalawang pangulo bilang ‘drug czar’.

Gayunman, sinabi ni Aquino na hindi naman cabinet position ang pagiging pinuno ng ICAD dahil ang tanging trabaho nito ay makipag-ugnayan sa 45 ahensya ng pamahalaan na miyembro ng komite.

Maliban dito, hindi rin itinago ni Aquino na posibleng mailang syang katrabaho si Robredo dahil sa posisyon nito bilang bise presidente.

Parang medyo na-ano nga ako –kasi ang assumption ko no’n, parang bibigyan siya ng cabinet position, and then ‘yung opisina ko naman, magke-create ng opisina; so, the PNP, PDEA and other law enforcement agencies under this office, parang drug czar nga ang dating. Medyo nacoconfuse lang ako siguro kung papaano ang magiging setup, kasi ang rank ko lang naman is undersecretary, so, talagang medyo nakakailang,” ani Aquino.

Sa kabila nito,  sinabi ni Aquino na –bagay ibigay na responsibilidad kay Robredo ang adbokasiya na isinusulong ng ICAD dahil naaayon ito sa kanyang mga ibinigay na kritisismo sa ‘drug war’ ng administrasyon.

Tumutukoy anya ito sa edukasyon at rehabilitasyon na bahagi ng kampanya para masugpo ang illegal drugs sa bansa.

Sakaling tanggapin niya, imumungkahi ko na ‘yun ang focus niya do’n sa advocacy kasi kailangan nating turuan ang mga kababayan natin, especially ‘yung mga estudyante natin, sa barangay, ng effects ng drugs,” ani Aquino.

Nakahandang maghain ng diplomatic protest ang Department of Foreign Affairs (DFA) kung makukumpirma ang panibagong alegasyon laban sa China.

Kaugnay ito sa di umano’y pagpapaputok ng China ng warning flares sa mga barko ng Pilipinas na nagpapatrulya sa West Philippine Sea mula noong Enero hanggang Hunyo ng taong ito.

Sa kanyang Twitter account, sinabi ni Foreign Affairs Secretary Teddy Boy Locsin na kailangan pa nya ng kumpirmasyon mula sa National Intelligence Coordinating Agency (NICA).

Ayon kay Locsin, wala syang tiwala sa civilian sources at ang Armed Forces lamang anya ang dapat pagkatiwalian sa mga ganitong bagay.