HOT STORIES OF THE WEEK

Magkakasa na ng dalawang linggong travel ban ang gobyerno sa lahat ng mga biyaherong manggagaling sa India o mayroong travel history sa nasabing bansa.

Ito ayon kay Presidential Spokesman Harry Roque ay para na rin sa kaligtasan ng lahat sa gitna nang patuloy na pagsirit ng kaso ng COVID-19 sa India kung saan daan daang libo ang naitatalang bagong kaso nito araw-araw.

Ang nasabing temporary travel ban ay epektibo bukas, ika-29 ng Abril hanggang ika-14 ng Mayo.

Una nang inirekomenda ni DFA Secretary Teodoro Locsin, Jr. ang pansamantalang pagbabawal na makapasok sa bansa ang mga biyahero mula sa India.

Samantala ang gobyerno ay nakapagtala na ng 659 B117 o UK variant cases, 695 B1351 o South African variant cases, dalawang P1 o Brazil variant case at 148 cases ng P3 variant na unang na detect sa central Visayas.

Patay ang dalawang Pilipino sa India dahil sa coronavirus disease 2019 (COVID-19).

Ayon kay Philippine Ambassador to India Ramon Bagatsing, Jr., ang mga nasabing Pinoy ay nagpositibo sa COVID-19 noong ika-23 ng Abril at nasawi makalipas ang tatlong araw, sa gitna na rin nang pagsipa ng kaso ng virus sa India na pumapalo na sa mahigit 1-milyong bagong kaso, hindi pa man natatapos ang linggong ito.

Sinabi ni Bagatsing na napakabilis ng mga pangyayari at sadyang traydor ang nasabing virus na tinatawag aniyang double mutant strain.

Tumanggi namang kilalanin ni Bagatsing ang mga nasabing Pinoy na pawang nasa managerial level ang trabaho sa India bilang respeto na rin sa pamilya ng mga ito.

Kasabay nito, ipinabatid ni Bagatsing na 20 iba pang Pilipino sa India ang infected din ng COVID-19.

Sumampa na sa mahigit isang milyon o 1,006,428 ang kumpirmadong kaso ng COVID-19 sa bansa matapos maitala ang 8, 929 na mga bagong kaso ng virus.

Dahil sa mga bagong kaso ng COVID-19 ipinabatid ng DOH na naitala sa 74, 623 ang active cases kung saan 95. 4% ang mild, 1.4% ang asymptomatic, 1.3% ang severe at 1% ang critical condition.

Samantala, patuloy naman ang pag akyat ng bilang ng mga gumagaling sa COVID-19 na ngayo’y nasa 914, 952 na  matapos madagdag ang 11,333 na mga bagong gumaling sa naturang virus.

Sumirit naman sa 16,853 ang total deaths nang madagdag ang pitumpung bagong nasawi sa COVID-19.

Una nang inihayag ng OCTA research group ang pagkakaroon ng mahigit isang milyong kaso ng COVID-19 bago matapos ang buwang ito dahil sa patuloy na pagsipa pa ng mga apektado ng impeksyon.

Labing-apat (14) na Chinese militia vessels ang namataan sa Julian Felipe Reef sa West Philippine Sea.

Ito’y batay sa datos ng Asia Maritime Transparency Initiative (AMTS).

Ayon kay Carlo Schuster, retired US Navy Captain at ngayo’y propesor ng Diplomacy at Military Science, nakita rin doon na nagpapatrolya ang Pilipinas kung saan kasing dami rin nito ang barko ng China.

Ani Schuster, tila sinusubukan ng Beijing na magkaroon ng kontrol sa naturang lugar sa pamamagitan ng pagpapadala ng kanilang mga barko.

Umaasa rin aniya sila na sa pagpapadala ng mga barko ay maitataboy nila ang mga Pilipinong mangingisda para tuluyang makontrol ang bahagi ng isla.

Sakali kasi aniyang hindi na magtungo doon ang mga Pilipinong mangingisda, maging Coast Guard o Navy, madali na nila itong makokontrol at maaari na nilang tuluyang makamkam.

Kanya-kanyang interpretasyon na ang lumabas matapos ihalintulad ni Lt. Gen. Antonio Parlade ang istorya sa bibliya ni Eba at ng mansanas sa organizer ng Maginhawa Community Pantry.

Binigyang diin ito sa DWIZ ni Parlade matapos linawin na hindi niya ikinukumpara kay “Satanas” si Anna Patricia Non.

Nagugulat na lamang aniya siya sa mga lumulutang na iba’t iba’t interpretasyon sa nasabing pahayag niya.

Hindi [totoo ‘yan], mali, interpretation nila ‘yan. Ako, nagsa-cite lang ako ng example. Sabi ko, let’s not belittle an act of one, of one person, I’m not saying si Ana Patricia ito. I’m just saying na ‘yung mga ganyang bagay sa pandemya, nagsisimula lang sa isang maliit na maliit na bagay. I cited nga si Eve atsaka ‘yung mansanas, dun lang nagsimula ‘yon, e, of course, bibigyan nila ng magandang twist ‘yan para maging controversial, para alam mo na, d’yan sila magaling,” ani Parlade.

Inihalimbawa ni Parlade ang naging takbo nang dagsa ng kanyang media interviews nitong nakalipas na mga araw na nagmula sa umano’y pag-amin niyang isinasailalim nila sa profiling ang mga organizer ng community pantries sa bansa dahil sa posibleng paggamit dito ng New People’s Army (NPA).

Tinawagan pa aniya siya mismo ni Defense Secretary Delfin Lorenzana para kumpirmahin kung talagang binanggit niya ang pagpo-profiling sa mga organizers ng community pantries.

In fact, may statement ako sa Twitter at Facebook, pinakalat ko ‘yan. Kasi ‘yung Inquirer, ‘yan magaling ‘yan mag-twist, I’m sorry sa mga kasama natin sa media, but alam mo, minsan para lang bumenta, kung anu-anong words ang iniimbento nila para maging controversial,” ani Parlade. —sa panayam ng IZ sa Alas Sais

Iniulat ng Department of Health (DOH) na aabot sa 170 UK variant cases, 192 South Africa variant cases, 19 Philippine variant cases, at isang Brazil variant case ang kanilang nakita o na-detect sa pinakahuling COVID-19 sample sequencing.

Sa 170 UK variant cases, walo dito ang mula sa mga returning overseas Filipinos o mga balikbayan, 119 ang local cases, at 43 naman ang kasalukuyan paring biniberipika ng mga eksperto.

Base sa case line list, dalawa sa mga COVID patients na ito ang pumanaw at 168 ang nakarekober.

Sa 192 naman na South Africa variant cases, isa dito ang Returning Overseas Filipino (ROF), 143  ang local cases, at 48 ang patuloy paring inaalam kung ROF o local cases.

Dalawa sa mga kasong ito ang aktibo, tatlo ang nasawi at 187 ang gumaling.

Isang ROF naman ang naitalang single Brazil variant case na galing sa Brazil at naninirahan sa SOCCSKSARGEN.

Habang ang dalawa naman sa 19 na additional Philippine variant cases, ang pawang ROF, 10 dito ang local cases, at pito ang patuloy paring biniberipika.

Pahayag ng DOH, lahat ng naitalang Philippine variant cases ay pawang nakarekober mula sa COVID-19.

Namataan ang mga variant cases na ito sa dalawang batch ng 25 samples na isinailalim sa sequencing noong March 28, kungsaan umabot na sa kabuuang 1,336 samples ang na-sequence simula noong March 28 hanggang April 8.

Dahil sa patuloy na pagtaas ng variant cases, muling ipinaalala ng DOH na ang strikto at tuloy-tuloy na pagsunod sa minimum public health standards at mariing pagsuporta sa vaccination program ng pamahalaan ang tanging mabisang paraan upang mapigilan ang pagkalat ng virus.

Pinayagan na ng Food and Drug Administration (FDA) ang “compassionate use” ng anti-parasitic drug na Ivermectin para sa mga coronavirus disease 2019 (COVID-19) patient.

Ayon kay FDA Dir. Gen. Eric Domingo, nabigyan ng special permit ang isang ospital na nagsumite ng aplikasyon para sa compassionate use ng Ivermectin.

Gayunman, nilinaw ni Domingo na magkaiba ang naturang permit na ibinagay sa ospital na iyon kumpara sa pending application ng dalawang local manufacturers  na nag-a-apply para sa product registration ng Ivermectin.

Aniya, sa oras kasi na mabigyan na ito ng certificate para sa product registration, ibig sabihin ay maaari ng ibenta ang naturang gamot, commercially.

Magugunitang naging kontrobersiyal ang Ivermectin matapos ilang mambabatas ang nagrerekomenda o nanghihikayat na gamitin ito bilang pang laban sa COVID-19.

I-aanunsyo ni Pangulong Rodrigo Duterte mamayang gabi ang paiiraling quarantine status mula Abril 5 hanggang sa katapusan ng Abril.

Ayon kay Presidential Spokesperson Secretary Harry Roque, ito’y sa pamamagitan ng Talk to the nation ng Pangulo.

Giit ni roque, sa gagawing pagharap ng Pangulo sa publiko ay mabibigyang kasagutan na rin ang tanong ng nakararami hinggil sa pinansyal na tulong o ayuda na pwedeng ibigay ng pamahalaan sa publiko sa gitna ng umiiral na enhanced community quarantine (ECQ).

Kasunod nito, nilinaw ni Roque na hindi wala siyang ideya kung palalawigin ba ng Pangulo ang umiiral na mahigpit na quarantine status.

Kalat na sa buong National Capital Region (NCR) ang United Kingdom at South African variant ng COVID-19 ayon sa Department of Health (DOH).

Sinabi ni health Undersecretary Maria Rosario Vergeire, hindi maitatanggi na nagdulot na ito ng epekto sa pagkalat ng sakit sa Metro Manila.

May mga lugar aniya kung saan natukoy ang UK variant habang may mga lungsod din na mayroong South African variant.

Ang masaklap pa umano nito ay mayroon ding mga lugar kung saan nakapagtala ng parehas na variant.

Gayunman, iginiit pa rin ni Vergeire sa publiko ang kahalagahan ng patuloy na pagsunod sa mga health protocols para mapigilan ang pagkalat ng COVID-19.