HOT STORIES OF THE WEEK

Inaprubahan na ni Pangulong Rodrigo Dutere ang paggamit ng lahat ng 525, 600 na bakuna kontra COVID-19 ng AstraZeneca bilang first dose para sa mga frontline worker.

Batay sa memorandum mula sa office of the executive secretary, iniaatas ang paggamit ng lahat ng AstraZeneca bilang unang dosage.

Ang naturang bakuna ay nakuha ng Pilipinas bilang donasyon mula sa Covax facility.

Una rito, inirekomenda ni Health Sec. Francisco Duque III na gamitin na ang 525, 600 na AstraZeneca dahil tiniyak naman aniya ng World Health Organization ang pagdating ng iba pang suplay ng naturang bakuna.

Na-detect na ng health department ang unang kaso ng variant ng COVID-19 na nauna nang nakita sa Brazil.

Ayon sa Department of Health (DOH), bukod sa unang kaso ng variant mula Brazil, nakapagtala rin ng 59 na panibagong kaso ng UK variant.

Habang 32 naman ang panibagong naitalang kaso ng mga dinapuan ng South African variant.

Nagkasundo ang Metro Manila Mayors sa kanilang pagpupulong kagabi na muling ipasara ang mga sinehan at amusement centers kasunod ng muling pagsirit ng kaso ng COVID-19 sa National Capital Region (NCR).

Ayon kay MMDA Chairman Benhur Abalos, pansamantalang pinsuspende ng mga local chief executives ng Metro Manila ang operasyon ng mga ito upang mapigilan ang tuloy-tuloy na pagsirit ng COVID-19 cases sa NCR.

Pahayag ni Abalos, napakahalaga ngayon na mag-back to basic at sumunod sa minimum health protocols tulad ng palagiang pagsusuot ng face mask at face shield, paghuhugas ng kamay at social distancing.

Nakakaalarma ani Abalos ang pagtaas ng kaso ng COVID-19 sa kamaynilaan sa loob lamang ng nakalipas na dalawang linggo.

Sa katunayan, ayon sa MMDA chairman, nasa 89% na o halos mapupuno na ang quarantine area sa oplan kalinga ng Department of Tourism at MMDA.

Bago pa aniya mahuli ang lahat, dapat nang magpatupad ng mas istriktong health protocols sa Metro Manila.

Dagdag ng opisyal, dapat talaga na may mga safety officers na palagiang umiikot para siguruhing lahat sumusunod sa minimum health standards gaya ng mas, iwas at hugas.

Dumating na sa bansa ang 487,200 doses ng bakunang gawa ng AstraZeneca.

Pasado alas-7 ng gabi nang lumapag sa NAIA ang eroplano ng KLM Royal Dutch Airlines dala-dala ang libu-libong doses ng bakuna kontra COVID-19.

Mababatid na ang naturang bakunang dumating ng bansa ay nagmula sa Covax Facility ng WHO.

Sa ngayon, ito na ang ikalawang batch ng COVID-19 vaccines na dumating sa bansa para sa vaccination program ng pamahalaan.

Nangangamba ang OCTA Research na ang UK at South African coronavirus disease 2019 (COVID-19) variant ang dahilan ng patuloy na pagtaas ng kaso ng COVID-19 na naitatala sa Metro Manila kada araw.

Ayon kay Dr. Guido David ng OCTA Research, hindi malayo na ang dalawang bagong COVID-19 variant ang isa sa dahilan kung bakit mabilis pa rin ang pagtaas ng kaso ng nakahahawang sakit kada araw.

Ito’y makaraang madiskubre ang unang anim na kaso ng South Africa COVID-19 sa bansa.

Gayunman, ani David, kulang pa sa ngayon ang ebidensya para patunayan ang nabanggit na konklusyon.

Kailangan pa umano nilang kumalap ng impormasyon at magsagawa ng genome sequencing sa naturang lugar.

Dagdag ni David, dapat ay magpatupad ang pamahalan ng mas istriktong border control para mapigilan ang pagkalat ng virus.

Pirmado na ni Pangulong Rodrigo Duterte ang dismissal order laban kay Philippine Ambassador to Brazil Marichu Mauro matapos ang nag-trending na video na kita ang pang-mamaltrato nito sa kanyang kasambahay na isang Overseas Filipino Worker (OFW).

Ito mismo ang inanunsyo ng Pangulo sa kanyang talk to the nation, kagabi.

Kasabay ng naturang dismissal order, binawi na rin ng estado ang mga benepisyong dapat sana’y makukuha nito oras na magretiro.

Hindi na rin pinapayagan si Mauro na humawak pa ng anumang posisyon.

Nakarating na sa Pilipinas ang coronavirus variant na unang natukoy sa South Africa o ang B.1.352.

Ayon sa Department of Health (DOH), anim sa naturang variant ang naitala sa bansa.

Sa naturang bilang, tatlo sa mga ito ang local, dalawa naman ang returning Overseas Filipinos, habang tinutukoy pa ang pinanggalingan ng isa pang nalalabing kaso.

Kapwa mga residente naman ng Pasay City ang tatlong naitalang local case ng South African variant; habang dalawa ang nananatiling aktibong kaso, at ang isa naman ay naka-recover na.

Bukod pa rito, nakapagtala rin ng 30 karagdagang kaso ng B.1.1.7 variant o ng UK variant ang DOH, dahilan para sumampa na sa kabuuang 87 ang kaso nito sa bansa.

Samantala, lumalabas naman sa ebidensya na mas nakahahawa ang South African variant na ito dahil mas makapit umano ito sa human cells.

Opisyal nang umarangkada ang pagbabakuna kontra COVID-19 sa Pilipinas.

Gamit ang Coronavac ng Sinovac, si Philippine General Hospital (PGH) Head Gerardo Legaspi ang kauna-unahang nakatanggap ng legal o rehistradong bakuna kontra COVID-19 sa bansa.

Binakunahan si Legaspi ni nurse Sherlock Santos sa PGH kung saan matapos ay tumanggap ito ng certificate bilang patunay na nakatanggap na ito ng bakuna.

Sumunod na nabakunahan si Dr. Edsel Salvana ng Department of Health Technical Advisory Group pati sina food and drug administration director general Eric Domingo at Vaccine Czar Carlito Galvez Jr.

Nabakunahan na rin si National Task Force Deputy Implementer Sec. Vince Dizon kabilang ang ilan pang doktor at healthcare worker sa Dr. Jose N. Rodriguez Memorial Hospital and Santirium sa Caloocan.

Nakatanggap na rin ng bakuna si defense Chief Delfin Lorenzana kasama ang 30 mga sundalo at health worker sa V. Luna Medical Center.

Magugunitang nakatanggap nuon ng bakuna ang ilang opisyal ng gobyerno kabilang ang ilang miyembro ng Presidential Security Group  ngunit naging kontrobersiyal ito dahil sa hindi awtorisado ang ginamit bakuna.

Tulad ng inaasahan, dumating na ang kauna-unahang batch ng mga bakuna kontra COVID-19 na donasyon ng Chinese government sa Pilipinas at gawa ng Sinovac Biotech.

Pasado alas-4 ng hapon nang lumapag sa Villamor Air Base sa lungsod ng Pasay ang cargo plane ng Chinese military kung saan lulan ang nasa 600,000 doses ng CoronaVac.

Pinangunahan ni Pangulong Rodrigo Duterte ang welcome ceremony para sa mga bakuna, kasama ang ilang opisyal ng gobyerno, habang sinalubong naman ito ni Chinese Ambassador to the Philippines Huang Xilian.

Sa kanyang talumpati, sinabi ni Huang na ang pagpapadala ng vaccine donation ng China sa Pilipinas ay bilang pagtupad na rin ni Chinese President Xi Jinping sa pangako nitong tutulong sa pagpuksa sa virus.

Inaasahang sisimulan na ang rollout ng vaccination program bukas, Marso 1.

Ayon kay vaccine czar Secretary Carlito Galvez Jr., ito’y matapos mai-deliver sa bansa ng Chinese government ang 600,000 doses ng bakuna kontra Covid-19 na gawa ng Sinovac Biotech.

Naudlot naman ang delivery ng 525,600 doses ng vaccine ng AstraZeneca at inaasahang dadating ito sa Pilipinas sa mga susunod na araw sa pamamagitan ng COVAX Facility.

Sinabi ni Galvez na nasa prayoridad pa rin na mabigyan ng bakuna ang mga healthcare workers at iba pang medical front-liners.

Matatandaang binigyan na ng Emergency Use Utilization (EUA) ng Food and Drug Administration (FDA) ang mga pharmaceutical firms tulad ng Pfizer, AstraZeneca, at Sinovac.