HOT STORIES OF THE WEEK

Bubuksan ng Metro Manila Development Authority (MMDA) ang EDSA bus carousel para sa mga truck na maghahatid ng mga bakunang Sinovac.

Inihayag ito sa DWIZ ni MMDA Chairman Benhur Abalos kasunod ng nakatakdang pagdating ng mga nabanggit na bakuna mula China mamayang ala singko ng hapon.

Ayon kay Abalos, isasakay ang nasa 600,000 mga bakuna sa 40 foot container vans mula Villamor Air Base sa Pasay City patungong storage facility sa Marikina City.

Dagdag pa ni Abalos, magiging katuwang nila sa paghahatid ng bakuna ang mga tauhan ng Highway Patrol Group (HPG) ng pulisya para umagapay sa maayos na pagbiyahe ng mga bakuna.

Posibleng magamit pa ‘yan kung hindi naman ay katabi o adjacent rito dahil halos maka-anim na 40 foot container na trucks, malalaki ito, kung kaya’t merong HPG na security, may mga kapulisan ‘yan and of course merong mga MMDA na nakamotorsiklo na nagbabantay dito,” ani Abalos.

Kaya naman may paki-usap si Abalos sa mga motoristang babaybay sa kahabaan ng EDSA na bigyang daan ang mga trak na naghahatid ng mga bakuna patungo sa itinalagang imbakan nito.

Yung mga strategic points nakatalaga na rin yung ating ground enforcers at may mga tow trucks, may mga emergency vehicles na nakalagay na rin ‘yang lahat na ‘yan para mabilis ito, actually hindi lamang natin tinitignan itong mga araw na ito kundi yung mga vaccines pa na darating sa mga susunod na linggo o susunod na araw kaya ako’y nananawagan sa mga nakikinig na kung sakaling makita itong convoy na ito, manggaling na po sa atin na tayo’y tumaba-tabi na, ito’y para sa bansa, para sa bayan natin itong mga vaccines na ito,” ani Abalos.

Agad ilalarga ng pamahalaan ang rollout ng mga bakuna ng Sinovac mula China pagdating nito sa bansa ngayong araw.

Ito ang kinumpirma sa DWIZ ni senate committee on health chairman Sen. Christopher Lawrence “Bong” Go kasunod ng utos ni Pangulong Rodrigo Duterte.

Batay sa natanggap na impormasyon ng DWIZ, sa Philippine General Hospital magpapaturok ng bakuna sina Vaccine Czar Carlito Galvez at Presidential Spokesman Harry Roque.

Sa lung center naman magpapaturok ng bakuna sina DOH Sec. Francisco Duque III, Food and Drug Administrator Eric Domingo at MMDA Chairman Benhur Abalos.

Habang sa PNP general hospital naman sa Kampo Crame magpapaturok ng bakuna si Department of the Interior and Local Government (DILG) officer in charge Usec. Bernardo Florece.

Kasunod nito, tiniyak din ni Sen. Go ang pagsasapubliko ng pagbabakuna nila ni Pangulong Rodrigo Duterte subalit hindi malinaw kung anong bakuna ang ituturok dito.

Ayon kay Go, kailangang maging maingat ng Pangulo lalo pa’t may edad na ito kaya’t susundin lamang ng punong ehekutibo kung ano ang payo ng kaniyang mga doktor.

Hindi na kwestyon kung magpapabakuna kami ni Pangulong Duterte, papabakuna kami in public not because prayoridad kaming mabakunahan but because dapat makuha natin ng kumpiyansa ng bawat Pilipino, ipakita natin. Kadalasan kapag nagtanong ako sa kakaikot ko, wala pang 10% nagtataas ng kamay pero kapag sinabi ko na ‘paano na lang kung si Pangulo at ako ay magpapabakuna?’, dumadami ang nagtataas ng kamay, ibig sabihin parang tinuturo nila na ‘mauna na muna kayo’, iyon lamang ang ating survey,” ani Go.

Malaki na ang posibilidad na ilagay ni Pangulong Rodrigo Duterte sa modified general community quarantine (MGCQ) ang buong bansa.

Ito’y ayon kay senate committee on health chairman Sen. Christopher Lawrence “Bong” Go ay dahil sa pagdating ng mga bakuna kontra COVID-19 sa bansa simula ngayong araw.

Sa panayam ng DWIZ kay Go, binigyang diin nito na nais lamang ng Pangulo na makatiyak na mayroon nang ligtas at maaasahang pananggalang ang mga Pilipino mula sa banta ng COVID-19 bago luwagan ang mga ipinatutupad na restrictions.

Magugunitang inanunsyo kahapon ng Inter-Agency Task Force (IATF) na mananatili sa general community quarantine (GCQ) ang Metro Manila at walong iba pang lugar sa bansa na may mataas pa ring kaso ng virus transmission.

Sundin muna natin yung classification na binigay ng IATF, maaaring pag-usapan muli ‘yan at pwede naman, gaya ng sinabi ng Pangulo pag-aaralan ‘yan ng mabuti, na pwede n’ya luwagan kaunti dahil ang inaantay naman natin ay itong bakuna. Kapag may makita ng rollout ng mga bakuna sa frontliners natin ay pinag-aaralan naman lahat ng IATF ‘yan, one day at a time yung pag-aaral natin dyan,” ani Go.

Inaprubahan na ng pamunuan ng Inter-Agency Task Force (IATF) ang pagkakaroon ng uniform o iisang travel protocols sa mga local government units (LGU).

Sang-ayon sa IATF resolution number 101 o ang uniform travel protocols for land, air, and sea, hindi na kinakailangang ng mga biyahero na magsumite ng RT-PCR test result sa kanilang LGU point of destination, maliban na lamang kung ito’y oobligahin ng naturang LGU.

Mababatid na hindi na rin kinakailangang sumailalim ang mga biyahero sa mandatory quarantine basta’t wala itong anumang sintomas ng COVID-19.

Bukod pa rito, hindi na rin kailangang kumuha ng anumang travel authority na iniisyu ng Joint Task Force COVID-19 shield.

Bagamat niluwagan na ang travel requirements, binigyang diin ng pamahalaan na panatilihin ang mahigpit na pagsunod sa umiiral na health protocols kontra COVID-19.

Mananatiling nasa ilalim ng general community quarantine (GCQ) ang National Capital Region (NCR) sa susunod na buwan sa gitna pa rin ng nagpapatuloy na banta ng COVID-19.

Ayon kay Presidential Spokesperson Secretary Harry Roque, maliban sa NCR nasa ilalim din ng GCQ ang mga sumusunod: Apayao, Baguio City, Kalinga, Mountain Province, Batangas, Tacloban City, Iligan City, Davao City, at Lanao Del Sur.

Habang ang mga nalalabing lugar sa bansa naman ay nasa ilalim ng modified general community quarantine (MGCQ).

Iiral ang naturang quarantine classifications ay magsisimula sa aprimero ng Marso hanggang sa katapusan ng Marso.

Ganap nang batas ang panukalang naglalayong magtatag ng indemnity fund o bayad-pinsala sakaling magkaroon ng negatibong epekto ang bakuna kontra coronavirus disease 2019 (COVID-19) sa mga Pilipino na matuturukan nito.

Ito’y makaraang i-anunsiyo ni Presidential spokesman Harry Roque na nilagdaan na ni Pangulong Rodrigo Duterte ang COVID-19 Vaccination Program Act of 2021 na inaasahang maglalaan ng P500 milyon na indemnity fund at pamamahalaan ng PhilHealth.

Matatandaang naudlot ang delivery ng 117,000 doses ng Pfizer vaccine dahil sa kawalan ng indemnity deal.

Isinusulong din ng gobyerno ang supply agreements sa pitong vaccine makers para sa 148 million doses ng bakuna na sinasabing sapat para sa 70 million adults o mayorya ng 108 milyong populasyon ng Pilipinas.

Inihayag ng Palasyo na darating na sa katapusan ng buwan o ika-28 ng Pebrero ang 600,000 doses ng coronavirus disease 2019 (COVID-19) vaccines na gawa ng Sinovac.

Ayon kay Presidential Spokesperson, Secretary Harry Roque ang mga nabanggit na bakuna ay sasalubungin ng mga opisyal ng pamahalaan sa Ninoy Aquino International Airport.

Mababatid na ang 100,000 doses na bakuna kontra COVID-19 ay donasyon ng China para sa Defense Department.

Nauna rito, inihayag ni vaccine czar Carlito Galvez Jr. na ang mga bakunang darating sa bansa ay isasakay sa isang military aircraft.

Maaari nang mag-advance payment ang mga lokal na pamahalaan para sa pagbili ng COVID-19 vaccines.

Ito’y matapos aprubahan ni Pangulong Rodrigo Duterte ang memorandum order na nagbibigay ng kapangyarihan sa mga LGU na magbayad ng advance payment sa mga vaccine manufacturer upang makakuha ng bakuna.

Ayon kay Vaccine Czar Carlito Galvez Jr., magandang balita ito para magkaroon na ng kakayahan ang mga lgu na makabili ng bakuna para sa kanilang nasasakupan.

Hanggang 15%  ng kabuuang kontrata ang magiging advance payment ng LGU sa manufacturer ng kukunan nilang bakuna.

Ibinasura ng Supreme Court ang electoral protest na inihain ni dating Sen. Ferdinand Marcos Jr. laban kay Vice President Leni Robredo.

Ito’y batay sa naging desisyon ng Supreme Court na tumatayong Presidential Electoral Tribunal kung saan unanimous ang naging desisyon.

Pebrero 16 nang magsagawa ng en banc session ang Supreme Court.

Tumagal ng apat na taon ang pagdinig ng Supreme Court sa electoral protest ni Marcos.

Una nang sinabi ni Robredo na malinaw sa batas ng Presidential Electoral Tribunal na ibabasura ang inihaing election protest kapag hindi nakapagsumite ang indibidwal ng substantial recovery matapos ang inisyal na recount.

Naging isyu kay Marcos ang mga boto ni Robredo mula sa probinsya ng Maguindanao, Lanao Del Sur at Basilan kung saan sinasabi ng dating senador na may bahid umano ng terorismo at pananakot ang eleksyon.

Ibinasura ng Korte Suprema, na syang nagsisilbing Presidential Electoral Tribunal (PET), ang inihaing electoral protest ni dating senador Ferdinand “Bongbong” Marcos Jr. laban kay Vice President Leni Robredo.

Ito ay kaugnay sa resulta ng naging halalan noong taong 2016.

Ayon kay Supreme Court spokesperson Brian Hosaka, ‘unanimous’ ang naging boto ng korte hinggil dito.

BASAHIN: Opisyal na pahayag ng SCPIO hinggil sa pagbasura nito sa Marcos-Robredo electoral protest https://t.co/HHOy7zaafm pic.twitter.com/aBVyURdIiB

— DWIZ Newscenter (@dwiz882) February 16, 2021

Magugunitang Mayo ng taong 2016 nang matalo si Marcos ng 263,472 na boto laban kay Robredo na resulta aniya ng pandaraya. —ulat mula kay Aya Yupangco (Patrol 5)