HOT STORIES OF THE WEEK

Nanindigan si Senador Panfilo Lacson sa karapatan niyang magsalita sa usapin hinggil sa visiting forces agreement (VFA) sa pagitan ng Pilipinas at Amerika.

Sinabi ni Lacson na hindi man siya abogado tulad ng Pangulong Rodrigo Duterte, subalit sa huling basa niya sa konstitusyon, malinaw na ang isang senador ay may kinalaman sa international agreements na pinapasok ng gobyerno.

Ayon kay Lacson, dapat i-“refresh” ng pangulo ang kanyang memorya sa pamamagitan nang pagbasa sa Article VII, Section 21 ng 1987 Constitution kung saan nakasaad na walang anumang tratado o international agreement ang magiging valid at epektibo maliban na lamang kung niratipikahan o inaprubahan ito ng two thirds ng lahat ng miyembro ng senado.

Binigyang diin ni Lacson na kahit ang ordinaryong Pilipino na sa pakiramdam niya ay napahiya sa masakit at undiplomatic remarks ng pangulo ay mayroong karapatan sa ilalim ng batas na maghayag ng kanyang opinyon.

“Mr. President, read the 1987 Constitution.”

Ito ang sagot ni Sen. Lacson kay Pang. Duterte kasunod ng pahayag nito na tanging presidente lang ang may kapangyarihan sa ilalim ng 1987 Constitution na magpasya sa pakikipag-ugnayan ng Pinas sa ibang bansa. https://t.co/HHOy7zaafm pic.twitter.com/dISZSJOxRd

— DWIZ Newscenter (@dwiz882) February 16, 2021

Wala aniyang sinuman kahit pa ang pangulo ng bansa ang maaaring kitilin ang nasabing basic right ng publiko.

Una nang sinabihan ng pangulo si Lacson na wala itng kinalaman sa isyu ng gobyerno sa VFA kaya mas mabuti anitong kumunsulta sa kanyang abogado bago magsalita at gumamit ng lengguwaheng makapagpo-promote sa pagkatao nito. —ulat mula kay Cely Ortega-Bueno (Patrol 19)

Sa Marso na sisimulan ang muling pagbubukas ng mga tradisyonal na sinehan sa mga lugar na nasa ilalim ng general community quarantine (GCQ).

Ito ang inanunsyo ni Presidential Spokesperson Harry Roque, isang araw matapos umapela ang mga alkalde sa Metro Manila na muling irekonsidera ang naging desisyon ng Inter-Agency Task Force (IATF).

Ayon kay Roque,  kinakailangan pang ipagpatuloy ang isinasagawang mga konsultasyon bago ito ganap na maipatupad.

Mabibigyan din aniya ng panahon ang mga lokal na pamahalaan na makabuo ng guidelines para sa muling pagbubukas ng mga sinehan.

Dagdag ni Roque, nakapaloob na sa naturang guidelines ang kapasidad na papayagan sa mga sinehan.

Ang pagbubukas ng sinehan is subject to LGU’s issuance of guidelines. So, kung yung mga LGUs ay nag-issue na ng mga guidelines wala nang hadlang para sila ay magbukas, ang mga tumututol ngayon ay mayroon ng further consultations ang the mayors of Metro Manila,” ani Roque.

Inihayag ng Palasyo na luluwagan na nito ang ilang umiiral na paghihigpit o restrictions sa gitna ng pag-iingat kontra COVID-19.

Sa isang virtual briefing, sinabi ni Presidential Spokesperson Secretary Harry Roque, na alinsunod sa Inter-Agency Task Force (IATF), tinaasan na nito sa 50% ang pupwedeng dumalo sa religious gatherings sa mga lugar na nasa ilalim ng general community quarantine (GCQ) simula sa ika-15 ng Pebrero.

Simula Lunes, ika-15 ng Pebrero. Pinapayagan na sa mga lugar na nasa GCQ ang religious service na hanggang 50% na seating o venue capacity,” ani Roque.

Mababatid kasi na sa ngayon, tanging 30% lang ng venue capacity ang pinapayagang makadalo sa mga religious gatherings.

Bukod dito, pinayagan na rin ng IATF ang muling pagbubukas sa 50% venue capacity ang mga tradisyonal na sinehan, mga park at iba’t-iba pang mga pasayalan sa mga nasa GCQ areas gaya ng Metro Manila.

Inaprubahan ang muling pagbubukas o pagpapalawak ng mga sumusunod na negosyo o industriya:

-Driving school; mga sinehan; video at game arcades; libraries, archives, museums at cultural centers; meetings, incentives, conferences, and exhibitions at limitadong social events at accredited establishments ng Department of Tourism. Tourist attractions tulad ng mga parks theme parks, natural sites and historical landmarks,” ani Roque.

Paliwanag ni Roque, ang naturang pagluluwag sa umiiral na paghihigpit ay dahil sa walang naitatalang pagsipa ng COVID-19 attack rate, gayundin ang pagsisikap ng pamahalaan na muling bumangon ang ekonomiya ng bansa.

Sa huli, binigyang diin ni Secretary Roque na bagamat pinayagan na ang pagbubukas ng ilang establisyimento at itinaas na rin ang venue capacity nito, dapat pa rin aniyang sumunod sa health protocols kontra COVID-19.

Nakatakda nang dumating sa bansa ang mahigit kalahating milyong doses ng COVID-19 vaccine ng Chinese pharmaceutical firm na Sinovac ngayong buwan ng Pebrero.

Sa anunsyo ng Malacañang, nasa 600,000 doses ng bakuna ang inaasahang lalapag sa bansa sa ika-23 ng Pebrero, kabilang na ang 100,000 na binigay ng gobyerno ng China sa Department of National Defense.

Magugunitang wala pang ini-issue na emergency use authorization (EUA) ang Food and Drug Administration para sa Sinovac.

Sa pamamagitan kasi ng EUA ay pinapayagan ng pamahalaan ang paggamit ng isang underdeveloped o hindi pa tapos na produkto dahil sa pandemya.

Ang bakuna po ng Sinovac na galing China, nakaukit na po sa bato ang pagdating. Ito po ang ay sa 23 ng Pebrero, 23 February po darating ang Sinovac,” ani Roque.

Ipinag-utos na ni Pangulong Rodrigo Duterte ang pagpapataw ng price cap sa karneng baboy at manok sa loob ng 60-araw sa Metro Manila.

Ito ay makaraang aprubahan ng pangulo ang Executive Order 124 kasunod na rin sa hiling ng Department of Agriculture (DA) hinggil dito.

Nakasaad sa naturang kautusan na hindi dapat lalagpas sa P270 ang presyo ng kada kilo ng kasim at pigue.

Ipinako naman sa P300 ang price ceiling para sa liempo, habang P160 naman para sa manok.

Maaari ding palawigin ang pagpataw ng naturang price ceiling kung magkakaroon ng rekomendasyon nito mula sa DA at kung aprubado ng Pangulong Duterte.

Samantala, magugunitang isinisi ni DA Secretary William Dar sa mga mapanamantalang negosyante at wholesalers ang pagtaas ng presyo ng karne sa gitna na rin ng African swine fever (ASF) outbreak.

Inanunsyo na ng Palasyo ang panibagong quarantine status na iiral sa unang araw ng Pebrero.

Sa isang pahayag, sinabi Presidential Spokesperson Secretary Harry Roque na mananatiling nasa ilalim ng general community quarantine (GCQ) ang Metro Manila, Cordillera Administrative Region.

Bukod pa rito, nasa ilalim na rin ng GCQ ang Batangas, Tacloban City, Davao City, Davao Del Norte, Lanao Del Sur, at Iligan City.

Habang ang nalalabing lugar sa bansa ay sasailalim naman sa modified general community quarantine (MGCQ).

Paliwanag ni Roque, ang panibagong quarantine status sa mga nabanggit na lugar ay alinsunod sa inaprubahan ng punong ehekutibo. —ulat mula kay Jopel Pelenio (Patrol 17)

Pwede nang makalabas ng kani-kanilang kabahayan ang mga indibidwal na edad 10 hanggang 65 taon, sa mga lugar na nasa ilalim ng modified general community quarantine (MGCQ).

Ayon kay Presidential Spokesperson Secretary Harry Roque, magiging epektibo ang kautusan ng Inter-Agency Task Force (IATF) sa aprimero ng Pebrero.

Mababatid na ang naturang hakbang ay bilang pagtugon sa kahilingan ng Department of Trade and Industry (DTI) na muling palakasin ang ekonomiya ng bansa sa gitna ng nagpapatuloy na banta ng COVID-19 pandemic.

Kaugnay nito, ayon kay Roque hinihikayat nila ang mga lungsod na nasa ilalim ng general community quarantine (GCQ), na i-adopt din ang kaparehong kautusan bagama’t nasa kanila na ang desisyon kung anong mga edad ang isasama rito.

Inaprubahan na ng Pilipinas ang emergency use authorization (EUA) ng bakuna kontra COVID-19 ng Pfizer-BioNTech.

Ito ang inianunsyo ni Food and Drug Administration (FDA) Director General Eric Domingo makaraan aniya ang masusi nilang pag-aaral sa bakuna.

Lumalabas kasi aniya sa pag-aaral na 95% ang efficacy rate o bisa nito sa nasa 92% ng populasyon.

Dagdag pa ni Domingo, maaari ding bakunahan sa COVID-19 vaccine ng Pfizer-BioNTech ang mga edad 16, pataas.

Aniya, mild hanggang moderate lamang ang side effects nito, na kagaya lamang sa mga pangkaraniwang bakuna.

Gayunman, kinakailangan pa rin aniya ng monitoring matapos magpabakuna.

Nilinaw naman ni Domingo na ang EUA ay hindi katumbas ng certificate of product registration kaya’t hindi pa ito maaaring ibenta sa merkado.

Samantala, nasa 5-bilyong katao naman na ang naturukan ng COVID-19 vaccine ng Pfizer-BioNTech sa buong mundo.

Isinama ng ang People’s Republic of China (PRC) sa mga bansang sakop ng travel restriction sa gitna ng banta ng bagong variant ng coronavirus disease 2019 (COVID-19).

Bukod pa riyan, kabilang din ang mga bansang Pakistan, Jamaica, Oman, at Luxembourg.

Ayon kay Presidential Spokesperson Secretary Harry Roque, epektibo ang naturang kautusan pagsapit ng hatinggabi ng ika-13 hanggang ika-15 ng Enero, taong 2021.

Kasunod nito, sinabi naman ni Roque na papayagan pa ring makapasok ng bansa ang mga Pilipino pero kakailanganin ng mga ito na sumailalim sa 14-day quarantine. —ulat mula kay Jopel Pelenio (Patrol 17)

Sinibak na ng pamunuan ng Department of Public Works and Highways (DPWH) ang 14 na mga district engineers matapos ang ginawang imbestigasyon ng DPWH Task Force Against Corruption.

Ito ang inanunsyo ni DPWH Secretary Mark Villar sa Laging Handa Press Briefing.

Bukod sibakan sa pwesto, ani Villar, magkakaroon din ng balasahan sa ahensya sa mga susunod na araw.

Magkakaroon rin kami ng rigodon sa loob ng department and marami ang magiging pagbabago. Tuloy-tuloy naman ang laban sa corruption,” ani Villar.

Paliwanag ni Villar, ito’y dahil nagpapatuloy ang imbestigasyon ng DPWH Task Force sa iba pang mga sangkot sa katiwalian.

Kasunod nito, nanawagan ng tulong si Villar sa iba pang ahensya ng gobyerno para aniya’y magkaroon ng case build up sa naturang reklamo.

Oras namang matapos ang mga reklamong ito, naniniwala si Villar na makatutugon ito sa kautusan ng punong ehukutibo na magtino ang mga district engineers.

Sa huli, tiniyak naman ni Villar na hindi makakaapekto sa mga programang ginagawa ng ahensya ang nangyaring sibakan, dahil may matitino pa aniyang mga district engineers sa ahensya.