HOT STORIES OF THE WEEK

Isinulong ni Senate President Vicente Tito Sotto III ang panukalang ma-renew ang prangkisa ng ABS-CBN corporation.

Sa pamamagitan ito ng Senate Bill 1967 na naglalayong ma-renew ang naipagkaloob na prangkisa sa ABS-CBN sa ilalim ng Republic Act 7966 o ‘an act granting ABS-CBN broadcasting corporation a franchise to construct, install, operate and maintain television and radio broadcasting stations in the Philippines’.

Sinabi ni Sotto na sa ilalim ng liderato ni bagong House Speaker Lord Allan Velasco at mga bagong opisyal ng Kamara maaaring mayroong mas magandang tsansang ma-renew ang prangkisa ng ABS-CBN.

Ayon kay Sotto napansin niyang sa mga TV stations ngayon na pinapalitan ng anime ang mga news program na indikasyong nawawala ang kumpetisyon dahil sa pagkawala ng malakas na competitor tulad ng ABS-CBN.

Samantala ipinabatid ni Congresswoman Vilma Santos-Recto na maghahain siya ng kaparehong panukala sa susunod na linggo.

Inihayag ni Recto na ito ang tamang gawin para bumalik sa sirkulasyon ang media giant.

Si Recto ay isa sa mga kongresistang bumoto laban sa pagbasura ng house panel sa franchise renewal ng ABS-CBN sa susunod na 25 taon.

LOOK: Copy of the proposed bill for the renewal of franchise of ABS CBN filed by SP Sotto | via @OBueno https://t.co/70xgwzt12O

— DWIZ Newscenter (@dwiz882) January 4, 2021

Vineto ni Pangulong Rodrigo Duterte ang isang special provision sa national budget para sa susunod na taon na naglalayong ipahinto ang operasyon ng forensic laboratory ng Public Attorney’s Office (PAO).

Sa kanyang veto message, tinukoy ni Pangulong Duterte ang naturang probisyon bilanng inappropriate o hindi naaangkop.

Ito ay dahil wala naman aniya itong kaugnayan sa anumang partikular na appropriation o paggugulan sa budget.

Dagdag ni Pangulong Duterte, hindi rin aniya maaaring gamitin ng lehislatura ang kapangyarihan nito para higpitan ang panukalang budget sa pamamagitan ng paglalagay ng tinatawag na veto-proof logrolling measures”.

Gayundin ng isang probisyon na may espesyal na interes.

Nilinaw ng Palasyo na hindi ito nag-isyu ng karagdagang mga lugar o bansang kabilang sa ban papunta ng Pilipinas sa gitna ng banta ng bagong strain ng coronavirus disease 2019 (COVID-19) maliban sa United Kingdom (UK).

Ayon kay Presidential Spokesperson Secretary Harry Roque, ang pinalawak na sakop ng mga lugar na kabilang sa travel ban ay isa lamang rekomendasyon ng kagawaran ng kalusugan at ng Inter-Agency Task Force (IATF).

Dahil dito, ani Roque, maghintay na lang sa alituntunin o guidelines na posibleng ilabas ng Office of the President anumang sandali ngayon.

Nauna rito, nagpost ang Manila International Airport Authority (MIAA) hinggil sa tala ng mga karagdagang bansa na kabilang sa pinalawak na travel ban gaya ng: Denmark, Italy, Spain, Korea, at Australia.

Pero matapos ang ilang oras, ay kaagad na tinake-down o binura ng miaa ang kanilang post hinggil sa travel ban.

Sa huli, iginiit ni Roque na gaya ng sabi ni Pangulong Rodrigo Duterte ang lahat ng mga Pilipinong gustong makauwi ng bansa ay dapat makauwi.

Simula mamayang hatinggabi ay ipatutupad na ang travel ban sa 20 mga bansa na may natuklasang bagong strain o uri ng coronavirus disease 2019 (COVID-19).

Sa inilabas na abiso ng Manila International Airport Authority (MIAA), sakop ng naturang ban ang mga sumusunod na bansa: Switzerland, Denmark, Hong Kong, Ireland, Japan, Australia, South Africa, Israel, Canada, Netherlands, France, Korea, Germany, South Korea, Singapore, Iceland, Italy, Spain, Lebanon at Sweden.

Ibig sabihin, ang lahat ng mga pasaherong manggagaling sa mga nabanggit na bansa, ay hindi papayagang makapasok ng bansa.

Ito’y bilang pag-iingat o precautionary measure ayon sa Inter-Agency Task Force (IATF).

Sa kabilang nito, ang mga pasaherong nasa biyahe na papuntang Pilipinas, at darating bago mag ika-30 ng Disyembre ay papayagan pang makapasok ng bansa.

Pero ang mga ito ay sasailalim sa mahigpit na quaratine at testing protocols.

Giit naman ng mga awtoridad, kahit pa magnegatibo sa COVID-19 result ang mga pasahero, kinakailangang tapusin ng mga ito ang 14-day quarantine. —ulat mula kay Raoul Esperas (Patrol 45)

Nilagdaan na ni Pangulong Rodrigo Duterte ang panukalang 2021 national budget.

Nagkakahalaga ito ng P4.5-T kung saan nakatuon sa pagbangon ng Pilipinas mula sa naging epekto ng pandemya bunsod ng COVID-19 at pagpapalakas ng ekonomiya ng bansa.

Sinabi ng Pangulo sa kaniyang talumpati na pinatutunayan lamang nito ang maigting na koordinasyon sa pagitan ng ehekutibo at lehislatura alang-alang sa kalusugan at kapakanan ng mga Pilipino.

The prompt ratification of the 2021 national budget is a testament of our commitment to set aside divisive parties and politics, indeed that is crucial junction in our history, we can no longer acquire to engage in politics of division here and finger pointing,” ani Duterte.

Ipinunto rin ng Pangulo ang kahalagahan ng mahigit P72-B inilaan sa pagbili, pag-iimbak at distribusyon ng COVID-19 vaccine.

Kasabay nito tiniyak ng Pangulo na gagamitin ng administrasyon sa tama ang lahat ng resources nito para matugunan ang epekto ng pandemya sa bansa.

As we look forward with the hope for the coming year let me assure the public, that this administration will ensure the efficient use of resources, resound fiscal policy that will enable us to overcome the debility effects of the pandemic on public and economy,” ani Duterte.

Samantala, pinakamalakaking bahagi ng pondo ay inilaan para sa edukasyon, sinundan ng imprastraktura habang ikatlo naman ang kagawaran ng kalusugan.

Nabakunahan na kontra coronavirus disease 2019 (COVID-19) ang ilang miyembro sa hanay ng Armed Forces of the Philippines (AFP).

Ito mismo ang kinumpirma ni Philippine Army chief Lieutenant General Cirilito Sobejana sa DWIZ, kasunod nang pagsiwalat ni Pangulong Rodrigo Duterte na marami na umanong sundalo ang naturukan na ng Sinopharm COVID-19 vaccine.

Hindi ko maibigay ‘yung accurate number, but I confirm na some of our members ay nabakunahan,” ani Sobejana.

Ani Sobejana, mayroon nang nabakunahan ng COVID-19 vaccine sa hanay ng militar, ngunit hindi nito tinukoy ang eksaktong bilang ng mga ito, maging kung anong bakuna ang itinurok.

Dagdag pa nito, hindi sya kabilang sa mga nabakunahan na kontra sa virus.

Samantala, positibo naman si Sobejana na magiging epektibo ang bakuna sa kanilang hanay upang mas makapagserbisyo aniya sila sa taumbayan.

We’re optimistic na ang nabigay na vaccine sa ating mga sundalo ay maging epektibo para mas makapagserbisyo tayo sa ating taongbayan,” ani Sobejana. —sa panayam ng Santos at Lima sa 882

Pabor ang liderato ng Department of the Interior and Local Government (DILG) na patawan ng parusang kamatayan o death penalty ang mga pulis na makagagawa ng karumal-dumal na krimen o ‘yung mga heinous crimes.

Ito ang naging pahayag ni DILG Secretary Eduardo Año sa gitna ng pamamaril ni Police Senior Master Sergeant Jonel Nuezca sa mag-inang sina Sonya Gregorio at Frank Anthony Gregorio.

Dagdag pa ni Año, kung sa kasalukuyan ay may parusang kamatayan, gusto nito na parusang kamatayan ang ipataw kay Nuezca.

Sa huli, iginiit pa ni Año na karapat-dapat lang na death penalty ang ipataw na parusa sa mga men-in-uniform na siyang makagagawa ng heinous crimes gaya ng pagpatay.

Inaprubahan na ng punong ehekutibo ang pansamantalang pagsuspinde o pagpapatigil ng lahat ng biyahe na galing sa United Kingdom (UK).

Ayon sa Presidential Spokesperson Secretary Harry Roque, ang naturang hakbang ay kasabay ng natuklasang bagong strain ng coronavirus disease 2019 (COVID-19) sa naturang bansa.

Mababatid na magiging epektibo ang kautusan simula 12:01 a.m. ng ika-24 ng Disyembre at magtatagal hanggang sa ika-31, 2020.

Paliwanag ni Roque, ang mga biyaherong nanggaling sa UK sa loob ng 14-araw na planong pumunta ng Pilipinas ay pansamantalang hihigpitang makapasok ng bansa; habang ang mga biyaherong nasa biyahe na at darating bago sumapit ang 12:01 a.m. ng ika-24 ng Disyembre ay isasailalim naman sa 14-day quarantine sa New Clark City sa Pampanga at itetest sa COVID-19, bago tuluyang payagang makapasok ng Pilipinas.

Kung ang biyahero naman na mula sa Pilipinas at gustong bumiyahe papuntang UK, kinakailangan nitong dumaan sa ‘existing exit protocols’ ng dalawang bansa.

Kasunod nito, ang mga flights mula Europa ang ida-divert naman sa Clark International Airport.

Top 5 sa Philippine trends sa Twitter ang mga ‘hashtag’ na may kaugnayan sa pagpatay ng isang pulis Parañaque sa isang mag-ina sa Paniqui, Tarlac.

Mag-aalas-8 ng umaga nang mag-number 1 trending sa Philippine trends sa Twitter ang #StopTheKillingsPH at sinundan ng mga #PulisAngTerorista, #EndPoliceBrutality, #JusticeForSonyaGregorio at #MyFatherIsAPoliceMan.

Ang mag-inang Sonya Gregorio, 52-taong gulang at Anthony Gregorio, 25-anyos ay nasawi matapos barilin ng pulis na si Senior Master Sergeant Jonel Nuezca, 46-taong gulang.

Si Nuezca na aktibong pulis at nakatalaga sa Parañaque City Crime Laboratory ay sumuko rin kagabi sa Chief of Police ng Rosales Police Station sa Pangasinan.

Iniutos ng pamunuan ng Inter-Agency Task Force (IATF) ang pagsusuot ng face mask at face shield sa pampublikong lugar sa bansa.

Ayon kay Presidential Spokesperson Sec. Harry Roque, ito’y sang-ayon sa bagong polisiyang napagkasunduan ng IATF.

Nauna rito, ginawa ring mandatory ang pagsusuot ng face shield sa iba’t ibang establisyimento gaya ng mga shopping malls.

Iginiit naman ni Roque na sa paraang ito ay makasisiguro ang bawat isa na makadaragdag ito ng proteksyon laban sa virus.

Halos lahat naman tayo meron na tayong face shield, e. Kasi hindi ka makapagtrabaho, hindi ka makapunta sa mall nang walang face shield. Reyalidad, lahat tayo meron nang face shield, ang bagong rule nalang is isuot kapag lalabas ng bahay,” ani Roque.