HOT STORIES OF THE WEEK

Pinagtibay na ng bicameral conference committee ng senado at kongreso ang panukalang pambansang pondo para sa susunod na taon.

Mababatid na malaki ang maitutulong ng pambansang pondo para ginagawang pagtugon ng pamahalaan kontra coronavirus disease 2019 (COVID-19).

Nauna rito, sinabi ni House Appropriations Chair Eric Yap, na sa bersyon ng bicam, kasama ang alokasyon para may ipambili ng mga bakuna; pagpapabuti ng mga health facilities sa bansa, maging ang pondo para sa ipamimigay na ayuda sa mga mahihirap.

Bukod pa rito, naglaan din ng pondo para sa mga lugar na pinadapa ng nagdaang mga bagyo.

Kasunod nito, inaasahan nang raratipikahan ng dalawang kapulungan bago ito ibigay sa punong ehekutibo. —ulat mula kay Cely Ortega-Bueno (Patrol 19)

Humingi ng paumanhin sa mga motoristang naapektuhan ng ipinatutupad na cashless transaction ang pamunuan ng Toll Regulatory Board (TRB).

Ito’y makaraang magdulot ng masikip na daloy ng trapiko sa North Luzon Expressway (NLEX) dahil sa aberyang idinudulot ng pagpapatupad ng cashless transaction gamit ang radio-frequency identification (RFID) .

Sa panayam ng DWIZ kay Julius Corpuz, tagapagsalita ng TRB, sinabi nito na batid nila na may nangyayaring problema sa pagpapatupad nito.

Kung kaya’t binigyang diin ni Corpuz na ginagawa na nila ang lahat ng kanilang makakaya para gumawa ng agaran at pangmatagalang solusyon para hindi na makaabala sa mga bumbyaheng motorista.

We apologize sa mga technical difficulties na naranasan at nararanasan pa rin sa RFID nila. Nakatuon po ang pansin namin sa bawat problema pong natatanggap namin, nakikita namin ay aming idinudulog at pinag-uusapan para maayos kaagad o malagyan ng mga intervention measures na maayos naman ang problema gaya nang hindi pagbasa ng tag, mga ganoon, hindi umaakyat ‘yung barrier, ‘yung load na na-accredit o kaya ay na-overcharged,” ani Corpuz.

Una rito, pinasuspinde ni Valenzuela City Mayor Rex Gatchalian ang business permit ng NLEX, dahilan para hindi ito makapag-operate at makapaningil sa ilan nilang tollgates.

Sa huli, iginiit ni Corpuz na dapat matugunan ang hinaing ng pamahalaang lungsod ng Valenzuela sa naturang isyu, habang sa panig ng NLEX ay nararapat lamang aniya na magkaroon ng konkretong solusyon sa aberya.

Unang-una matugunan ng maayos ‘yung mga hinaing ng taga-Valenzuela City dahil itong si Mayor Rex. At ang NLEX naman, syempre, ang hangad din naman namin ay maging maayos din naman ang operations sa buong NLEX,” ani Corpuz. —sa panayam ng Balitang Todong Lakas

Mariing pinabulanan ni Presidential Spokesperson Harry Roque ang kumakalat na balitang isasailalim sa nationwide lockdown ang buong Pilipinas sa kasagsagan ng holiday season.

Ayon kay Roque, fake news ang naturang kumakalat na balita sa text messages kung sinasabing magkakaroon ng lockdown sa buong Pilipinas mula Disyembre 23 hanggang Enero 3.

Aniya, walang batayan para magdeklara ng nationwide lockdown si Pangulong Rodrigo Duterte.

Una na ring hinimok ni Cabinet Secreatry Karlo Nograles ang mga Filipino na iwasan ang pagpapakalat ng mga hindi beripikadong impormasyon lalu na sa kasalukuyang panahon ng pandemiya.

Pinalalahanan naman ni National Task Force against COVID-19 Spokesperson Restituto Padilla Jr. ang publiko na tiyakin at ipa-verify sa mga kinauukulan ang katotohanan sa mga natatanggap na impormasyon bago ipasa sa iba.

Bumilis ang pagtaas sa presyo ng pangunahing bilihin at serbisyo noong buwan ng Nobyembre.

Ayon sa Philippine Statistics Authority (PSA), nasa 3.3% ang inflation rate sa naturang buwan.

Higit na mabilis ito kumpara sa 2.5% noong Oktubre ngayong taon, at sa 1.3% na naitala noong Nobyembre ng taong 2019.

Ito rin ang pinakamataas na naitala mula noong Abril ng taong 2019 kung saan naitala ang 3% inflation rate.

Ang headline inflation o ang pagtaas ng presyo ng mga produkto at serbisyo sa bansa ay tumaas sa antas na 3.3 percent nitong buwan ng Nobyembre 2020. Ito ang pinakamataas na inflation na naitala sa bansa mula noong Abril 2019. #PHCPI #Inflation @mapa_dennis

— PSAgovPH (@PSAgovph) December 4, 2020

Sinasabing ang inflation ay dahil sa mas mabilis na pagtaas ng presyo ng pagkain at non-alcoholic beverages.

Pinayagan na ng pamahalaan ang pagdaraos ng mga workshops, trainings, at mga seminars sa mga lugar na nakasailalim sa general community quarantine (GCQ), kabilang na ang Metro Manila.

Ito, ayon kay Presidential Spokesperson Harry Roque, ay batay na rin sa napagkasunduan ng Inter-Agency Task Force (IATF) kung saan, hanggang 30% lamang ang papayagang venue capacity nito.

Kabilang din sa mga pinapayagan nang isagawa ay mga conferences, congresses, board meetings, colloquia, conclaves, symposia at consumer trade shows, basta sa itinakda lamang na 30% venue capacity.

Bukod naman sa Metro Manila, nakasailalim din sa GCQ hanggang sa katapusan ng Disyembre ngayong taon ang Batangas, Iloilo City, Tacloban City, Lanao del Sur, Iligan, at Davao City, habang umiiral naman ang modified GCQ sa nalalabing bahagi ng bansa.

Samantala, inatasan naman ng IATF ang Department of Tourism at Department of Trade and Industry na maglabas ng mga panuntunan hinggil dito.

Pinalawig pa ni Pangulong Rodrigo Duterte ang pagpapatupad ng general community quarantine (GCQ) sa National Capital Region hanggang sa katapusan Disyembre ng kasalukuyang taon.

Ito ang inanunsyo ng pangulo sa kanyang lingguhang ulat sa bayan kasama ang mga Inter-Agency Task Force on the Management of Emerging Infectious Diseases (IATF).

Maliban sa Metro Manila, mananatili rin sa GCQ ang Batangas, Iloilo City, Tacloban City, Lanao Del Sur, Iligan City, Davao City at Davao Del Norte.

Habang nasa modified GCQ ang nalalabi pang mga lugar sa bansa.

Layunin pa rin nitong mapigilan ang pagkalat ng COVID-19 sa bansa kasabay ng pagdiriwang ng Kapaskuhan.

Inirekomenda ng Metro Manila mayors sa Inter-Agency Task Force (IATF) ang pagpapanatili ng general community quarantine status sa Metro Manila haggang ika-31 ng Disyembre.

Ito, ayon kay Parañaque City Mayor Edwin Olivarez, pinuno ng Metro Manila Council (MMC), ang resulta ng kanilang pulong kasama ang mga miyembro ng IATF kagabi.

Sinabi ni Olivarez na layon ng rekomendasyon nila na maiwasan ang pagtaas ng kaso ng coronavirus disease 2019 (COVID-19) pagkakaroon ng second wave dahil sa holiday season.

Maliban sa Metro Manila, umiiral din ang general community quarantine (GCQ) sa Batangas, Iloilo City, Bacolod City, Tacloban City, Iligan City, Lanao Del Sur at Davao City, samantalang ang ilang bahagi  ng bansa ay nasa modified GCQ status.

Nagtakda na ang gobyerno ng price range para sa coronavirus disease 2019 (COVID-19) swab tests.

Batay sa anunsyo ng Department of Health (DOH) nagkakahalaga ito ng P3,800 hanggang P5,000.

Ayon kay Health Secretary Francisco Duque III, napagkasunduan ng ahensya at ng Department of Trade and Industry ang flat rate na P3,800 sa mga public testing facilities, habang naglalaro naman sa P4,500 hanggang P5,000 para sa mga pribadong pasilidad.

Epektibo umano ito sa oras na mailabas sa mga pahayagan.

Magugunitang noong Setyembre nang ihayag ng DOH na target nitong maglabas ng price cap sa mga PCR test matapos mapag-alamang naniningil ng P10,000 o mahigit pa ang ilang testing facilities.

Mayorya ng mga Pilipino ang nakahandang magpabakuna kontra Coronavirus Disease (COVID-19) kung available na ito sa kasalukuyan.

Batay ito sa isinagawang survey ng Social Weather Station (SWS) sa pamamagitan ng mobile phone at computer-assisted telephone interviews sa may 1,249 na respondents.

Ayon sa SWS, 66% ng mga respondents ang nagsabing handa silang magpabakuna kontra COVID-19 habang 31% naman ang ayaw.

Lumabas din sa survey, na may maraming Pilipino ang mas gugustuhing magpabakuna kontra COVID-19 kaysa turukan ng kontrobersiyal na anti-dengue vaccine na dengavaxia.

Samantala, mas maraming lalaki naman ang handang magpagbakuna kontra COVID-19 na 71% kumpara sa mga kababaihan na 60%.

Payag si Pangulong Rodrigo Duterte na magkaroon ng paunang kasunduan sa suplay, gayundin ng bayad sa mga manufacturers, ng bakuna kontra coronavirus disease 2019 (COVID-19).

Ito ang inihayag ni Presidential Spokesperson Harry Roque, matapos tanggapin ni Pangulong Duterte ang panukala ni vaccine czar Carlito Galvez.

Ayon kay Roque, kinakailangang pahintulutan ng ang advance na pagbabayad para hindi mapag-iwanan ang Pilipinas sa pagkuha ng bakuna.

Dagdag ni Roque, inaprubahan din ng pangulo ang mungkahing bigyan ng emergency use authorization sa bakuna ang Food and Drug Administration.

Batay sa panukala ni Glavez, maagang papasok ang Pilipinas sa isang kasunduan sa mga pribadong dayuhang developer ng mga bakuna, gayundin ang pagbibigay ng advance na bayad.

Layunin nitong matiyak na makakakuha ng doses ng bakuna ang Pilipinas oras na ganap nang maaprubahan ang paggamit nito sa buong mundo.