HOT STORIES OF THE WEEK

Labis na ikinadismaya at pinagtaka ng mga senador matapos mabunyag sa pagdinig ng senado na walang CCTV sa mga sabungan sa Maynila; sta. Cruz, Laguna at Lipa City, Batangas kung saan huling nakita ang mga nawawalang sabungero.

Kinuwestyon ni Senate Committee on Public Order and Dangerous Drugs Chairman Ronald Dela Rosa kung paanong walang CCTV sa mga sabungan ng Lucky 8 Star Quest Incorporated gayong bilyung-bilyong piso ang halagang sangkot sa operasyon.

Ikinatuwiran ni Atty. Angelo Nino Santos, pangulo ng Lucky 8 Star Quest na hindi pa naman tuloy-tuloy ang operasyon ng sabungan dahil sa pandemya pero ngayong nagluwag na ay nagpapalagay na sila ng mga CCTV.

Pagdating naman sa sabungan sa Sta. Cruz, Laguna at Lipa, Batangas, sinabi ni Santos na “under construction” pa ang mga gusali kaya’t hindi pa makapaglagay ng mga CCTV.

Una nang inihayag ni Atty. Santos na dati namang walang  reklamo at insidente ng pagkawala ng mga sabungero kaya wala silang CCTV pero ngayon anya ay nagpapa-install na sila. —sa ulat ni Cely Ortega-Bueno (Patrol 19)

Plano ng pamahalaan na magbigay ng ayuda sa mga residente ng Bangsamoro Region kapalit ang pagpapabakuna ng mga ito kontra COVID-19.

Tinukoy ng  Department of Health (DOH) ang mga hamon na kinakaharap ng rehiyon tulad ng vaccine hesitancy, limitadong manpower, fake news, late submission ng arawang vaccination reports, at ang mahinang suporta ng local chief executives at Barangay Local Government Units (BLGU).

Binabalak rin ng pamahalaan na magkasa ng random checkpoints ng vaccination cards upang mapuksa ang paglaganap ng pekeng vaccination cards.

Hiniling naman ng ahensya ang suporta mula sa municipal mayor, head of offices, at BLGU upang mapataas ang vaccination rate sa rehiyon.

Hindi pa inirerekomenda ng pamahalaan ang pagbibigay ng COVID-19 booster shots sa mga batang edad 12 hanggang 17.

Ayon kay Vaccine Expert Panel Chief Dr. Nina Gloriani, hinihintay pa ng gobyerno ang mga pag-aaral na nagsasabing humihina ang immunity ng naturang age group matapos makatanggap ng primary series.

Aniya, pinaplano na ng ibang mga bansa ang pag-aadminister ng booster shots sa mga immunocompromised individuals na kabilang sa nasabing age group.

Matatandaang noong November 3, 2021 nang simulan ang pagbabakuna kontra COVID-19 sa mga batang edad 12 hanggang 17.

Idadaos sa Marso a-19 ang presidential debate na inorganisa ng Commission on Elections (COMELEC).

Ayon kay COMELEC Spokesperson James Jimenez, lahat ng presidential candidates ay dadalo sa nasabing debate.

Nilinaw ni Jimenez na walang advanced questions na ibibigay sa mga kandidato at hindi rin sila papayagang magdala ng kahit na ano sa kanilang pagtayo sa podium.

Nasa 37 lugar na lang sa Metro Manila ang nasa ilalim ng granular lockdown.

Ayon kay Department of the Interior and Local Government  (DILG) Usec. Jonathan Malaya, matatagpuan ang 37 areas na ito sa lungsod ng Maynila.

Kinailangang ilagay sa granular lockdown ang lugar matapos magpositibo sa Covid-19 ang nasa 45 pamilya o katumbas ng 204 na mga indibidwal.

Sa buong Pilipinas, nasa 343 na lamang ang mga lugar na naka-granular lockdown. —sa panulat ni Abby Malanday

Nanawagan ang Coordinating Council of Private Educational Associations of the Philippines (COCOPEA) na itaas ang matrikula ng mga pribadong paaralan para sa darating na pasukan.

Ayon kay Atty. Joseph Noel Estrada, ilalaan ito sa pagpapasahod ng mga guro at school personnel at sa pag-aayos ng mga pasilidad ng paaralan bilang paghahanda sa limitadong pagbabalik ng face-to-face classes.

Habang tulong din ito sa pagsasaayos ng mga pasilidad at covid-19 testing ng mga empleyado ng paaralan.

Noong Oktubre, unang sinabi ng National Economic and Development Authority (NEDA) na nasa 865 pribadong eskwelahan ang nagsara sa gitna ng Covid-19 pandemic. —sa panulat ni Abby Malanday

Maghahain ng panukala ang Department of Trade and Industry (DTI) sa Inter-Agency Task Force (IATF) para tuluyang tanggalin ang plastic covers at barriers sa loob ng mga establisyemento.

Ayon kay Trade Secretary Ramon Lopez, parte ito ng ipapatupad na Covid-19 protocols sa oras na ibaba na ang Metro Manila sa alert level 1.

Ang plastic barriers ang nagporpotekta sa mga tao upang maiwasan ang pagkahawa sa covid-19 kasabay ng pagsunod sa minimum health protocols. —sa panulat ni Abby Malanday

Nagkaroon ng fundraising ang migrant domestic workers (MDW) kabilang ang mga ofws sa Hong Kong para sa gastusin ng mga kababayan nating nagpositibo sa Covid-19.

Ito ay para matiyak na protektado at na-a-alagaan ang mga ofws sa Hong Kong.

Umaapela rin ang migrante Hong Kong sa Philippine Consulate General na maglaan ng temporary shelters o accommodation para sa mga ofw na nagpopositibo sa Covid-19.

Tatakbo ang online fundraising hanggang March 11, 2022. —sa panulat ni Abby Malanday

Hindi pa rin buo ang suporta ng grupo ng mga doktor sa posibleng pagbaba ng Metro Manila sa alert level 1 pagsapit ng Marso.

Sa panayam sa DWIZ, sinabi ni Dr. Maricar Limpin, presidente ng Philippine College of Physicians na maraming dapat ikonsidera kung tuluyan nang ibababa ang restriksyon sa rehiyon.

Una, kailangang handa ang lahat ng sektor kasama ang edukasyon at transportasyon maging ang pagiging komportable ng health workers.

Pagsubok kasi aniya sa gobyerno kung muling tataas ang kaso ng Covid-19 at marami ang mahahawa. —sa panulat ni Abby Malanday