HOT STORIES OF THE WEEK

Ipinanawagan sa Commission on Election (COMELEC) ang suspension sa pagbabaklas ng malalaking campaign posters sa mga private property.

Ayon sa election lawyer na si Atty. Romulo Macalintal, dapat repasuhin muna ng COMELEC ang mga patakaran hinggil sa Operation Baklas.

Iginiit ni Macalintal na ang nilalaman ng Republic Act 9006 o Fair Election Act kaugnay sa election propaganda materials ay hindi akma sa private persons o non-candidates.

Hinikayat naman ng election lawyer ang publiko na nakaranas, lalo ang mga private property owner na tinarget sa Operation Baklas na maghain ng reklamo sa Korte Suprema.  —sa panulat ni Mara Valle

Ini-imbestigahan na ng Department of the Interior and Local Government (DILG) ang pagbagsak ng helicopter ng Philippine National Police (PNP) sa Infanta, Quezon na ikinasawi ng isa at ikinasugat ng dalawang iba pa.

Ayon kay acting spokesperson at cabinet secretary Karlo Nograles, ini-imbestigahan na ang sanhi ng pagbagsak ng helicopter.

Sa tanong naman kung may pananagutan sa nangyari si PNP chief Dionardo Carlos, hindi muna ito sinagot ni Nograles.

Patungo sanang Balesin sa Quezon ang helicopter para sunduin ang pamilya ni Carlos pero bumagsak ito sa Quezon Province.—sa panulat ni Abby Malanday

HINIMOK ni presidential candidate Ferdinand ‘Bongbong’ Marcos Jr. at ng kanyang running-mate na si Davao City Mayor Inday Sara Duterte ang mga opisyal ng Lalawigan ng Pampanga na magkaisa sa darating na halalan at maging pagkatapos nito.

Pangunahing panauhing pandangal si Marcos at Duterte sa selebrasyon ng kaarawan ni Bise Gobernador ng Pampanga Lilia ‘Nanay’ G. Pineda.

Ginanap ang nasabing selebrasyon sa Bren Z. Guiao Convention Center at Kingsborough International Convention Center, San Fernando, Pampanga na dinaluhan ng mga ibat-ibang lokal na opisyal ng lalawigan, kung saan namataan sa programa ang mga senador at iba pang kilalang politiko.

Maging ang mga opisyal ng barangay, mga barangay health workers at mga barangay workers ay imbitado rin sa programa.

Ayon sa pambato ng Partido Federal ng Pilipinas, ang kanilang kilusang pagkakaisa ay lumalawak na, nagsimula lamang sa isang bulong na ngayon ay nakikita na sa bawat lugar na kanilang pinupuntahan ni Sara.

“Nakakatuwa na ang aming sinisigaw na pagkakaisa ay lumalawak na, nagsimula lamang sa isang bulong na ngayon ay nakikita na sa bawat lugar na aming pinupuntahan ni Mayor Sara,” ayon sa pambato ng PFP.

“Ngayong araw na ito nagsimula na ang pagkakaisa, nakita na sa inyong lalawigan kaya dapat ipagpatuloy natin itong ating nasimulan hindi lamang ngayon, hanggang pagkatapos ng eleksyon,” dagdag pa niya.

Hiniling naman ni Duterte na suportahan ang kanilang adbokasiya sakaling maluklok sila ni Marcos na presidente at bise presidente sa darating na halalan.

“Simulan po natin sa pagbalik ng trabaho na nawala dahil sa pandemya. Pangalawa ang pagpapatuloy ng reporma na nasimulan ni Pangulong Duterte, particularly the Build, Build, Build project o infrastructure development spending ng ating bansa, at ‘yung pagsugpo sa krimen at ilegal na droga sa ating komunidad,” sabi ni Mayor Inday.

“Paano ito masisimulan? Kapag tayo pong lahat ay magkakaisa,” dagdag pa ni Duterte.

Maaari nang ibaba sa Alert level 1 ang COVID-19 restrictions sa Metro Manila pagsapit ng Marso.

Ayon kay OCTA research fellow Dr. Guido David, malayo na ang naitalang positivity rate ng Metro Manila sa rekomendasyon ng World Health Organization (WHO).

Nasa low risk classification na rin ang lahat ng rehiyon sa bansa maliban sa Cordillera.

Habang low risk ang healthcare utilization sa lahat ng rehiyon maliban sa Davao Region.—sa panulat ni Abby Malanday

Bumubuti na ang lagay ng mga overseas Filipino workers (OFWs) na nahawa sa COVID-19 sa Hong Kong kumpara nitong nakalipas na mga araw.

Ito ay matapos i-ulat ni Philippine Consul General Raly Tejada na tatlo sa 10 Pilipinong nagpositibo sa COVID-19 sa Hong Kong, ang pinatulog sa labas ng kanilang mga emloyer.

Ayon kay Eman Villanueva, Vice Chairperson ng Filipino Migrant Workers Union (FMWU), karamihan sa mga Pilipinong ito ay nailipat na sa mga temporary shelters na kanilang pansamantalang matutuluyan.

Tinulungan na rin ng FMWU ang mga ito sa pinansiyal na tulong para sa pagkain at pagsailalim sa RT-PCR test.

Umabot na sa 90% ang capacity ng mga ospital sa Hong Kong kaya limitado na lamang ang kanilang tinatanggap.—sa panulat ni Abby Malanday

Kinumpirma ng Philippine National Police – Public Information Office o PNP-PIO na pumanaw na ang 1 sa 3 sakay ng PNP Helicopter na bumagsak sa bahagi ng Real, Quezon kaninang umaga.

Kinilala ni PNP-PIO Chief, P/BGen. Roderick Alba ang nasawi na si Patrolman Allen Noel Ona na unang napaulat na nasa kritikal na kondisyon na pumanaw habang ini-aalis sa mismong Helicopter.

Habang dinala na sa Kampo Crame mula sa Claro M Recto Hospital sa Infanta, Quezon ang mga piloto na sina P/LtC. Dexter Vitug at P/LtC.Michael Melloria.

Dahil dito, grounded o hindi na muna papayagang makalipad ang buong fleet ng H125 Airbus Police Helicopters ng PNP habang nagpapatuloy ang imbestigasyon sa pakikipag-ugnayan sa Civil Aviation Authority of the Philippines at Department of Transportation.

Bumagsak sa bahagi ng Purok Mayaog, Brgy. Pandan sa Real, Quezon ang isang Helicopter ng Philippine National Police o PNP.

Batay sa inisyal na ulat ng PNP Air Unit, pasado alas-8 ng umaga nang bumagsak ang Airbus H125 single engine light utility helicopter ng PNP na may tail number RP-9710 sakay ang 3 tauhan nito.

Kinilala ng Real Municipal Police Station ang 3 sakay ng Helicopter na sina P/LtCol. Dexter Vitug, P/LtCol. Michael Melloria at Pat. Allen Ona.

Ayon kay P/Col. Vince Bangwa PNP Air Unit, nakatakda sanang sunduin ng naturang Helicopter si PNP Chief P/Gen. Dionardo Carlos sa Balisin Airport nang mangyari ang aksidente.

Rumesponde rin aniya ang mga tauha ng Bureau of Fire Protection o BFP gayundin ang Municipal Action Center ng Real maging ang Philippine Coast Guard para tumulong sa rescue and retrieval operations.

Sinabi pa ni Bangwa na sugatan ang 3 sakay ng Helicopter at dinala na sa CM Recto Hospital sa Infanta ang 2 habang kasalukuyang inaalis ang isa pa.

Nakatakdang talakayin bukas, Pebrero 22 ng Metro Mayors ang desisyon kung ilalagay na sa mas maluwag na Alert level 1 ang National Capital Region.

Ayon kay MMDA Officer-In-Charge Romando Artes, habang wala pang desisyon ay dapat sundin pa rin ng publiko ang mga restriksyon sa ilalim ng Alert level 2  hanggang katapusan ng Pebrero.

Nabatid na sa ilalim ng Alert level 1, papayagan na ang intrazonal at interzonal travel sa kahit anong edad o comorbidity at full operation ng lahat ng negosyo.

Kinuwestyon ng Free Legal Assistance Group (FLAG) ang katotohanan sa likod ng pagkaka-aresto kay Dr. Maria Natividad Castro.

Ayon kay Atty. Wilfred Asis ng FLAG – Caraga, hindi naman lumabas ang pangalan ni Castro sa umano’y arrest warrant.

Dahil dito ay maghahain sila ng kasong kriminal at mosyon at writ of habeas corpus upang ibasura ang kaso laban kay Castro

Magugunitang isinailalim ang doktor sa kustodiya ng PNP at AFP sa barangay San Perfecto, San Juan City dahil sa warrant of arrest na inisyu noong January 30, 2020 ni acting presiding judge Fernando Fudalan ng Bayugan City, Agusan Del Sur RTC Branch 7.

Inakusahan ng pulisya si Castro, na isang lumad advocate, dahil sa pagiging high ranking member umano ng Communist Party of the Philippines at pagkakasangkot sa kidnapping at serious illegal detention.

Planong imbestigahan ng Commission on Human Rights ang posibleng paglabag ng Philippine National Police sa pag-aresto sa isang doktor na inakusahang miyembro ng Communist Party of the Philippines.

Nagpadala na ang CHR ng Quick Response Team sa NCR at Caraga bilang bahagi ng motu proprio investigation sa posibleng paglabag ng PNP sa rules of procedure.

Tinukoy ng komisyon ang pag-aresto ng pulisya kay Dr. Maria Natividad Castro, noong Biyernes sa pamamagitan ng warrant na inisyu ng Regional Trial Court ng Bayugan City, Agusan Del Sur noong January 30, 2020 dahil sa umano’y kidnapping at serious illegal detention.

Samantala, nababahala naman ang grupong free legal assistance group o FLAG sa kinaroroonan ni Castro.

Ayon sa FLAG, humingi sila ng access para makita si Castro sa intelligence group ng PNP sa camp crame kung saan iniulat na dito ito dinala at ikinulong.

Gayunman, kahit anila ang kapatid ng doktor at ang isa pang abogado ay hindi pinayagang makita si Castro.