HOT STORIES OF THE WEEK

Walang masama sa paglalabas ng survey results o paglabag mula sa anumang survey firms kahit na ilang araw na lamang bago ang eleksyon.

Ito ang nilinaw ni COMELEC Spokesman, Dir. James Jimenez, makaraang matanong hinggil sa Section 5.4 ng Fair Elections Act o Republic Act 9006 na nagbabawal dito.

Ayon kay Jimenez, tinanggal na ng Supreme Court ang nasabing probisyon sa RA 9006 dahil sa pagiging unconstitutional.

Paglabag anya sa karapatan sa pamamahayag ang Section 5.4 ng nasabing batas.

Noong Lunes, Mayo 2 inilabas ng Pulse Asia ang huling pre-election survey nito kung saan ipinakitang nangunguna pa rin si presidential candidate Ferdinand “Bongbong” Marcos Junior, kahit pitong araw na lang bago halalan.

Magugunitang naipanalo ng Social Weather Stations ang kaso nito laban sa COMELEC, matapos katigan ng Korte Suprema ang nasabing survey firm.

Aminado ang Philippine Gaming Corporation (PAGCOR) na inaasahan na nilang susulpot ang mga iligal na operasyon ng e-sabong.

Ito’y matapos ipag-utos ni Pangulong Rodrigo Duterte ang pagpapatigil sa operasyon ng nabanggit na sugal.

Ayon kay PAGCOR Vice President Jose “Joey” Tria Junior, dahil wala ng regulatory body na mangangasiwa ay hindi imposibleng maglitawan ang iligal na operasyon ng online talpakan.

Mawawalan din anya ang gobyerno ng 640 million pesos  na kita mula sa e-sabong ngayong buwan.

Bagaman may ibang sources pa namang pinagkukunan ang PAGCOR, naniniwala si Tria na maaaring buhayin ang e-sabong sa susunod na administrasyon.

Nagpositibo sa COVID-19 ang 15 fully vaccinated na turistang dayuhan na bumisita sa Tubataha Reef, Palawan.

Ayon sa Department of Health (DOH), 13 sa mga ito ay asymptomatic habang 2 ang nagpakita ng sintomas mula Abril 27 hanggang 28.

Nananatili sa isolation sa Palawan ang 14 na dayuhan habang naka-admit sa ospital ang isa.

Bagaman hindi pa matukoy kung bagong variant ng COVID-19 ang tumama sa kanila, tiniyak ng DOH na agarang ipadadala sa Philippine Genome Center ang samples ng 15.

Noong Abril 27, na-detect ng DOH sa Pilipinas ang unang kaso ng Omicron sub-variant na BA.2.12.

Mula ito sa 52 anyos na babae sa Baguio City na dumating mula Finland.

Nakapagtala ang Department of Health ng karagdagang 134 na bagong nahawa sa COVID-19 sa bansa kahapon.

Patuloy namang bumababa ang aktibong kaso sa 5, 145 kahapon kumpara sa 5, 303 noong Lunes.

Ang mga rehiyong nanguna sa nakapagtala ng mataas na additional cases sa nakalipas na dalawang linggo ay ang NCR, 1, 075; Region 4-A, 385 at Region 3, 237.

Batay sa huling datos, nasa 3, 686, 216 na ang kabuuang kaso ng COVID-19 sa Pilipinas.

Umabot naman sa 3, 620, 659 ang gumaling at 60, 412 ang nasawi dahil sa COVID-19.

Aabot sa 134 na final testing and sealing ng mga Vote Counting Machine (VCMs) ang inihatid sa 54 na barangay sa Daraga, Albay.

Ayon kay Rodol Ramirez, Comelec Municipal Head ng Daraga, layunin nito na matiyak na tama o accurate ang inilalabas na VCMs base sa iboboto ng mga botante sa kanilang lugar.

Siniguro naman ng opisyal na walang mangyayaring dayaan sa nalalapit na eleksiyon sa Mayo a-9.

Handa na para sa papalapit na national and local elections ang Parish Pastoral Council for Responsible Voting (PPCRV) sa Mayo a-9.

Sa pahayag ng PPCRV legal counsel at spokesman Atty. Van Dela Cruz, halos nasa 100% na silang handa para magbantay sa halalan 2022.

Ayon kay Dela Cruz, patuloy ang kanilang deployment at activation ng nasa 500,000 volunteers sa buong bansa kung saan, ang University of Sto. Tomas ang magiging command center nila ngayong halalan.

Kumpiyansa si Dela Cruz na accurate o tugma ang mga lumalabas na transmitted voting results at sa physical copies ng election returns na ibinibigay sa PPCRV.

Nasa tatlumput dalawang (32) former rebels ang nabigyan ng scholarship ng Technical Education and Skills Development Authority (TESDA) bilang bahagi ng programa kontra terorismo ng PNP sa lalawigan ng Camarines Norte.

Kasabay nito, namahagi din ng foodpacks ang DSWD sa 500 benepisyaryo kasabay ng pagsasagawa ng libreng bunot ng ngipin at libreng gupit na handog ng provincial government at Department of Health (DOH).

Bahagi rin sa naturang programa ang pagtuturo ng livelihood program at info drive ng DepEd, libreng driving theoretical course at info drive naman mula sa lto.

Nagbigay din ng libreng 150 seedlings mula sa PENRO, Business Info Drive mula sa DTI at mga info drives naman sa iba pang mga ahensya ng gobyerno.

Layunin ng programa na mahikayat ang iba pang mga rebelde na sumuko at magbalik loob sa pamahalaan.