HOT STORIES OF THE WEEK

Hindi napigilan ng malakas na ulan ang pangangampanya ni presidential candidate at Senator Manny Pacquiao sa Cebu kahit madaling araw.

Dakong ala una nang madaling araw kahapon nang salubungin si Pacquiao ng kanyang mga supporter sa Balamban Sports Oval, ilang araw bago ang halalan.

Matapos dumalo sa Panel Forum ng comelec na pinutakte ng technical glitches, humataw sa pangangampanya si Pacman sa Minglanilla, Talisay, Naga City, San Fernando, Carcar City, Sibonga, Argao, Toledo at Balamban sa Cebu.

Nagbalik sa naturang lalawigan ang pambansang kamao para sa kanyang three-day political sortie upang humakot ng suporta mula sa nabanggit na Vote-Rich Visayan Province.

Top choice pa rin para sa vice presidential race si Davao City Mayor Sara Duterte – Carpio, base sa pinaka-huling resulta ng “Tugon ng Masa Survey” ng OCTA Research group na isinagawa noong April 22 hanggang 25.

Nakakuha si Mayor Inday ng 56% preference votes kumpara sa 57% noong April 2 hanggang 6 survey.

Pinakamataas na score ang nakuha ni Duterte-Carpio sa Mindanao, 82%; Visayas, 61%; Balanced Luzon, 49% at National Capital Region, 48%.

Pumapangalawa pa rin sa survey si Senate President Vicente “Tito” Sotto III, 22% kumpara sa 23% noong nakaraang survey.

Tumaas naman sa 16% mula sa dating 12% ang kanyang pamangking si Senator Francis “Kiko” Pangilinan; Dr. Willie Ong, 4%; House Deputy Speaker Lito Atienza, 1%;

Manny Lopez, .1%; Dating Congressman Walden Bello, 0.03% at Carlos Serapio, 0.001%.

Samantala, nangunguna pa rin ang broadcaster na si Raffy Tulfo sa senatorial survey ng OCTA, na mayroong 63%.

Itinuturing ng Commission on Elections (COMELEC) na ‘game changers’ ang mga bagong rehistrong botante sa Halalan 2022.

Ayon kay COMELEC Commissioner George Garcia, mayroong 7 million new voters para sa nabanggit na eleksyon.

Aniya, malaking bagay na ang nasabing bilang ng mga bagong botante sakaling makaboto ito.

Nabatid na nasa 67.4 million ang botanteng Pilipino kung saan 84,000 ang local absentee voters at 1 point 679 million ang overseas voters.

Inihayag ng Manila Police District o MPD na naka-full alert na ang kanilang ahensya at nag-umpisa na ring magdeploy ng kapulisan sa mga areas concern.

Ayon kay Mobile Force Battalion Commander na si Police Colonel Julius Añonuevo, nagkaroon ng inspeksyon ang mga pulis sa Quirino Grandstand upang siguraduhing magagampanan nito ang kanilang tungkulin para sa maayos na botohan sa Maynila.

Sinabi pa ni Añonuevo na handa na rin ang mga kagamitan ng MPD tulad ng mobility support kung saan ilan sa mga tungkulin ng ahenysa ang pagtulong sa paghahatid ng mga tao at matiyak ang kaayusan ng vote counting machines (VCMs) sa mga presinto.

Samantala, nasa 5,000 mga pulis ang itinalaga sa lungsod ng Maynila para sa naturang halalan.

Nanawagan ang Commission on Elections (COMELEC) sa mga botante na kung maaari ay huwag nang makipag-marites o chismisan pagkatapos bumoto sa May 9 elections.

Ayon kay COMELEC Commissioner George Garcia, mapapansin kasi base sa mga nakaraang halalan na may mga botante na pagala-gala sa loob ng polling place habang ang iba ay nakikipag-chismisan pa.

Ang paki-usap aniya’y dahil mayroon pa ring COVID-19 sa bansa na posibleng makapang-hawa.

Sinabi pa ni Garcia na mas magandang makaboto at maka-uwi ng ligtas ang lahat.

Samantala, mula ala-6 ng umaga hanggang alas-syete ng gabi bukas ang mga presinto sa naturang araw ng botohan.

Nakamit na ng pamahalaan ang target nitong makapagbigay ng 1 milyong trabaho noong nakaraang taon bilang bahagi ng employment recovery plan dahil sa Covid-19 pandemic.

Ayon kay Trade and Industry Secretary Ramon Lopez, pinaka-malaking ambag ng nagpapatuloy na “build, build, build” program na nakalikha na ng nasa pitundaanlibong trabaho sa sektor pa lamang ng construction.

Umabot naman sa 200,000 job opportunities ang nilikha sa ilalim ng student employment program ng Department of Labor and Employment at ang livelihood package nito hindi pa kasama ang mga trabahong nilikha sa sektor ng turismo.

Magugunitang nilagdaan ni Pangulong Rodrigo Duterte noong isang taon ang executive order na nag-adopt sa national employment recovery strategy na layong lumikha ng mga livelihood at training opportunities.

Samantala, sa datos na inilabas ng Philippine Statistics Authority, tumaas sa 3.13 million ang bilang ng mga pilipinong walang trabaho noong Pebrero kumpara sa 2.93 million na noong Enero.

Aabot sa 900K accounts ang naka-block ngayon sa financial application na GCash na sangkot umano sa fraudulent activities.

Ayon sa GCash, ginawa ang nasabing hakbang sa loob ng unang tatlong buwan ng 2022 sa tulong ng National Bureau of Investigation at Philippine National Police, na layong protektahan ang mga customer laban sa panloloko o scam gamit ang kanilang platform.

Pinaalalahanan naman ni GCash president and Chief Executive Officer Martha Sazon ang publiko na mag-ingat sa mga online scam.

Hinimok rin nito ang mga user ng app na huwag i-share ang kanilang MPIN o one-time password.

Patay matapos mahulog sa tricycle ang bagong silang na sanggol sa Malabon.

Ayon sa mga otoridad, sakay ng tricycle ang ina ng sanggol na dadalhin sana sa ospital.

Pero hindi namalayan ng driver na nanganak na pala ang ginang kaya tuloy-tuloy lang ang takbo nito.

Nabatid na butas pala ang kumot na pangsalo sa sanggol maging ang sahig ng traysikel.

Nagkagulo naman ang mga tao dahil may pusod pa nang makita ang sanggol sa ibabaw ng Tinajeros Bridge.

Samantala, nasa maayos nang kalagayan ang ina ng baby habang patuloy ang imbestigasyon kung ang pagkahulog ng sanggol ang sanhi ng pagkamatay nito.

Wala pa ring kuryente ang daan-daang pamilya sa Tondo, Maynila matapos bumagsak ang isang poste noong Sabado.

Ayon kay Danilo Fayton, kagawad sa Barangay 82, nakakonekta sa poste angsangkaterbang kable na may habang 200 metro.

Una na ring nag-overload ang poste noong Enero dahil sa dami ng kable at nakasandal na sa gilid.

Tiniyak naman ng MERALCO ang agad na pagbabalik ng suplay ng kuryente sa nasabing lugar.