HOT STORIES OF THE WEEK

Nag-negatibo sa COVID-19 ang anim sa 44 na local contacts ng babaeng Finnish na nagpositibo sa bagong variant ng Omicron na BA.2.12.

Ayon sa Department of Health (DOH), tatlo sa local contacts ay kasama ng nagpositibong babae sa eroplano nang patungo ito ng Maynila.

Hindi na isinailalim sa testing ang iba pang nakasalamuha ng babae dahil sa asymptomatic naman ang mga ito.

Bagaman wala nang ibang contacts na natukoy ang DOH, nagpapatuloy naman ang kanilang beripikasyon at updates sa kaso.

Noong Abril, natukoy ng DOH ang bagong kaso na isang 52- anyos na babae sa Baguio na dumating mula sa Finland noong Abril a-2.

Umabot na sa 756, 083 poll workers ang itinalaga ng Department of Education (DepEd) upang i-monitor ang pagsasagawa ng halalan sa Lunes, Mayo a-9.

Ayon kay Education Undersecretary Alain Pascua, 647, 812 ito ng kabuuang bilang ng kanilang personnel o 90% ng kanilang empleyado.

Sa nasabing bilang ng DepEd personnel, 319, 317 ang Electoral Boards (EB); 200, 627 ang EB support staff; 38, 989 ang DepEd Supervisor Officials (DESO); 87, 162 ang DESO support staff; at 1, 717 ang Board of Canvassers.

Ang Commission on Elections (COMELEC) ang kumakatawan sa poll workers na ito.

Magsisimula ang operation ng mga poll workers sa iba’t ibang rehiyon at division sa bansa sa linggo, Mayo a-8 hanggang sa Martes, Mayo a-10.

Umabot na sa 24 na bayan at 4 na siyudad sa Pilipinas ang isinailalim sa kontrol ng Commission on Election (COMELEC).

Ayon kay Philippine National Police (PNP) spokesperson Jean Fajardo, kinabibilangan ito ng mga sumusunod;

• ang Pilar, Abra
• sa Maguindanao; ang Buluan, Datu Odin Sinsuat, Datu Piang, Mangudadatu, Pandag at Sultan Kudarat
• sa Lanao del Sur; ang Marawi City, Maguing, Tubaran, Malabang
• sa Misamis Occidental, ang; Calamba, Concepcion, Don Victoriano Chiongbian (o Don Mariano Marcos), Lopez Jaena, Aloran, Baliangao, Bonifacio, Clarin, Jimenez, Panaon, Plaridel, Sapang Dalaga, Sinacaban, Tudela, Ozamiz City, Tangub City at Oroquieta City.

Ang mga nabanggit na lugar ay mahigpit na babantayan ng PNP, AFP at PCG sa darating na halalan 2022.

Nakapagtala ang Philippine National Police (PNP) ng mas mababang election related violence ngayong taon na nasa 56.

Ayon kay PNP spokesperson Col. Jean Fajardo, mas mababa ito noong 2016 national elections na may 130, maging noong 2019 midterm elections na may 60 election related violence.

Sa bilang naitalang 56 ngayong 2022, 14 ang kumpirmado at validated, 30 ang walang kaugnayan sa halalan at 12 ang iniimbestigahan pa.

Sa 14 na confirmed election related violence, lima ang mula sa Central Luzon, apat sa Ilocos Region, tatlo sa Region 9 at tig-isa sa Region 10 at Cordillera Administrative Region.

Ipinanawagan ng Kabataan Partylist na gawing 100% ligtas ang pagbabalik ng face-to-face classes kasabay ng pagbubukas ng school year 2022-2023.

Ayon sa Kabataan Partylist, bagama’t nasa Alert level 1 ang halos lahat ng siyudad at munisipalidad at higit kalahati ang pinayagang magsagawa ng face-to-face classes, maaari pa ring mahawa sa COVID-19 ang mga mag-aaral.

Umaasa naman ang grupo na magkakaroon ng regular mass testing sa mga school personnel, dagdag pondo para sa pasilidad at iba pang pangangailangan.

Pormal nang nagretiro sa Philippine National Police (PNP) Chief, PGEN Dionardo Carlos.

Nanguna sa pagbibigay-parangal kay Carlos si Department of the Interior and Local Government (DILG) Sec. Eduardo Año bilang kinatawan ni Pangulong Rodrigo Duterte.

Nagpasalamat naman si Carlos sa pangulo at sa buong hanay ng PNP dahil sa tiwalang ibinigay sa kaniya.

Ang pagkilalang iginawad kay Carlos ay ang; presidential legion of honors, iba’t ibang parangal at mga memento bilang pabaon ng PNP.

Epektibo ang retirement ni Carlos sa Mayo a-8 kung saan awtomatiko namang uupo si Deputy Chief for Operations P/LT. -Gen. Vicente Danao.

Kasado na rin ang mga contingency measure ng Meralco sa gitna ng mga agam-agam ng National Grid Corporation of the Philippines (NGCP) na kapusin ang supply ng kuryente sa mismong araw ng eleksyon.

Tiniyak ni Meralco Spokesman Joe Zaldarriaga na naka-pwesto na ang kanilang mga generator set at flood light .

Ginarantiyahan na rin ng Department of Energy (DOE) sa COMELEC na sasapat ang supply ng kuryente sa Lunes.

Nakiusap naman ang Meralco sa mga guro at mamamahala sa halalan na iwasang magdala ng ibang appliance upang hindi magkaroon ng overload sa kuryente.

Samantala, kinumpirma ni Zaldarriaga ang kanilang pagtalima sa kautusan ng Energy Regulatory Commission na i-refund ang 7.7 billion pesos na sobrang singil nila sa kanilang mga customer.

Inatasan na ng National Telecommunications Commission (NTC) ang lahat ng telecommunications companies at iba pang concerned service providers na suspendehin ang lahat ng kanilang repair at maintenance mula May 4 hanggang 14.

Sa April 25 memorandum ng NTC, binigyang-diin ng NTC ang mahalagang papel na gagampanan ng mga telco at support infrastructure nila sa May 9 elections.

Alinsunod sa inamyendahang Republic Act 8436, dapat electronically transmitted ang election results ng automated election system sa Lunes.

Sa panahong ito inaasahang bubuhos ang mga resulta sa pakikipag-tulungan ng iba’t ibang government agencies, accredited citizens’ arms, volunteers, poll watchers at mga kandidato.

Sakali namang hindi maiwasan at magkaroon ng emergency repair at maintenance, dapat ipagbigay-alam agad ito ng mga telco sa NTC.

Nagdaos naman ng misa para sa maaayos na pamamahala ang mga miyembro ng Archdiocese of Cebu at lay volunteers para kina Vice President Leni Robredo at Senator Francis “Kiko” Pangilinan.

Isinagawa ang misa sa Archdiocesan Shrine of Our Lady of Guadalupe sa Cebu City bilang suporta sa kandidatura sa pagka-presidente ni Robredo at pagka-bise presidente ni Pangilinan.

Kabilang sa mga dumalo ang anak ni VP Leni na si Dr. Tricia Robredo na personal na tumanggap ng statement of support mula sa halos 100 pari, mahigit 160 madre, religious leaders at consecrated persons ng archdiocese.

Naniniwala ang mga miyembro ng Archdiocese of Cebu at volunteers sa kakayahan ng dalawang kandidato dahil sa kanilang integridad at malasakit sa marginalized sector, na adbokasiya ng simbahang katolika.

“All Systems Go” na ang COMELEC para sa May 9 National at Local Elections.

Ito ang tiniyak ni COMELEC Commissioner Marlon Casquejo kasabay ng pagsasabing hinihintay na lamang nila ang mismong araw ng halalan.

Ayon kay Casquejo, nakapagsagawa na sila ng final testing at sealing at natugunan na rin lahat ng problema.

Nasa isanlibo isandaan anya ang contingency vote counting machines at nakapaglagay na rin ng walong repair hubs sa iba’t ibang bahagi ng bansa sakaling pumalya ang mga nasabing makina.

Ang mga ito ay nasa Davao City, Cagayan De Oro City at Zamboanga para sa Mindanao; Cebu at Tacloban para sa Visayas; Sta. Rosa City, Laguna, National Capital Region maging sa Region 1 para naman sa Luzon.