HOT STORIES OF THE WEEK

Tuluyan nang ipatitigil ng Department of the Interior and Local Government (DILG) ngayong araw ang iba’t ibang klase ng operasyon ng online sabong.

Ito’y makaraang ipag-utos ni Pangulong Rodrigo Duterte na ihinto na ang nasabing sugal dahil sa masamang dulot nito, tulad ng pagkakalulong at pagkakabaon sa utang ng ilang pinoy.

Ayon kay DILG Undersecretary Jonathan Malaya, kasama sa mga ipatitigil ang live show at mga betting station ng e-sabong.

Kabilang umano ang buwis sa online talpak sa mga dahilan ng pagtanggap ng gobyerno sa e-sabong kaya natagalan ang desisyon ni Pangulong Duterte.

Bukod dito ay mahigit 30 sabungero naman ang nawawala, kung saan ilang pulis ang sangkot sa pagdukot.

Apatnapu’t isang porsyento (41%) na ng mga botante sa Pilipinas ang mayroong kumpletong listahan ng kanilang ibobotong kandidato sa pagkasenador sa halalan 2022.

Batay sa survey ng Pulse Asia noong Abril 16 hanggang 21, nagmula sa Visayas ang mayorya ng mga Pilipinong mayroon nang kodigo na nasa 58%.

Sinundan ito ng Mindanao at Class E voters na pawang may 55% habang 26% lamang sa Luzon.

2.4K ang lumahok sa survey sa pamamagitan ng face-to-face interview.

Matatandaang sa kaparehong survey rin muling nanguna si presidential aspirant Ferdinand ‘Bongbong’ Marcos na nakakuha ng 56% at sinundan ni Vice President Leni Robredo na may 23% na boto.

Opisyal nang inendorso ng Iglesia ni Cristo (INC) ang kandidatura nina presidential candidate Ferdinand “Bongbong” Marcos Junior at running mate nitong si Davao City Mayor Sara Duterte – Carpio.

Nagpahayag din ng suporta ang INC sa ilang senatorial candidate na sina Senators Sherwin Gatchalian, Joel Villanueva, Juan Miguel Zubiri, dating senador Jinggoy Estrada, JV Ejercito, Antique Rep. Loren Legarda;

Taguig-Pateros Rep. Alan Peter Cayetano, Sorsogon Governor Chiz Escudero; dating vice president Jejomar Binay, dating DPWH Secretary Mark Villar, dating PNP Chief Guillermo Eleazar at aktor na si Robin Padilla.

Noong 2016, inendorso rin ng Iglesia ni Cristo si Marcos sa pagka-bise presidente at sa pagka-pangulo naman si Pangulong Rodrigo Duterte.

Sa pinakahuling datos ng Philippine Statistic Authority hanggang noong 2015, ang INC na kilala sa kanilang bloc-voting practice ay mayroong 2.6 million members.

Aminado si former Metropolitan Manila Development Authority (MMDA) General Manager Tim Orbos na nahihirapan na ang mga commuter sa pagsunod sa ipinatutupad na batas trapiko ng gobyerno sa bansa.

Sa naging panayam ng DWIZ, sinabi ni Orbos na kailangang magkaroon ng pagkakaisa sa pagitan ng LTFRB at MMDA pagdating sa pagda-dagdag ng mga biyahe at ruta upang maiwasan ang mabigat na daloy ng trapiko sa bansa.

Sinabi ni Orbos na mas lalo pang bibigat ang daloy ng trapiko dahil sa papalapit na eleksiyon sa Mayo a-9 kung saan, marami ang maaapektuhang pasahero.

Maglalabas ng resolusyon ang Inter-Agency Task Force (IATF) para hikayatin ang mga pribadong paaralan na lumahok sa umiiral na face-to-face classes.

Ayon kay Testing Czar, Secretary Vince Dizon, panahon na upang magbalik sa normal ang lahat kabilang ang paaralan.

Bagaman mayroong magulang na nag-aalinlangan pa rin para sa kanilang mga anak, iginiit ni Dizon na para naman sa ikabubuti ng lahat ang plano.

Samantala, umaasa ang kalihim na isusulong ng susunod na administrasyon ang kumpletong face-to-face classes sa susunod na taon.

Hindi dapat mangamba ang publiko sa pagtaas ng  reproduction rate o bilis ng hawaan ng COVID-19 sa Metro Manila.

Ayon kay Dr. Butch Ong ng OCTA research team, bagama’t pumalo sa .7 ang reproduction number, hindi sapat ito para maalarma ang ilan.

Nananatili anyang mababa ang naitatalang arawang kaso na nasa 200.

Maliban sa NCR, ang mga lugar na mahigpit na binabantayan sa posibleng pagtaas ng kaso ay ang Cavite, Rizal, Cotabato, Zamboanga at Batangas.

Bawal nang mangampanya sa May 8 at maging sa mismong araw ng eleksyon.

Iginiit ito sa DWIZ ni COMELEC Commissioner George Garcia sa gitna na rin nang patuloy na paghahanda ng komisyon sa eleksyon.

Ipinaalala ni Garcia ang mahigpit na pagbabawal nila sa pagsusuot ng t-shirt at face mask na mayroong mukha ng kandidato.

Naipamahagi na ng COMELEC ang halos 100% na ng vote counting machines (VCMs) na gagamitin sa May 9 elections.

Sinabi ni COMELEC commissioner george garcia na naipamahagi na ang VCMs na sumakto naman sa final testing at sealing ng VCMs mula May 2 hanggang 7.

Kaugnay nito, hinimok ni Garcia ang publiko, poll watchers at kinatawan ng mga political parties na magtungo sa mga presinto sa buong bansa para personal na masaksihan ang testing ng VCMs na magpi-print ng zero receipt na nangangahulugang wala itong laman.

Ipinaalala ng COMELEC sa mga kandidato na posibleng ma-disqualify kapag napatunayang nagbayad ng permit to campaign at permit to win fees sa CPP NPA NDF.

Ito ay matapos aprubahan ng COMELEC ang hiling ng AFP na maglabas ng resolusyon hinggil sa mga parusang maaaring ipataw sa mga kandidatong nagbabayad ng mga naturang fee.

Maituturing na paglabag sa Section 261 ng Omnibus Election Code ang pagbabnayad ng mga nasabing fee na maihahalintulad saa pagbebenta ng boto, pananakot, intimidation, terorismo, paggamit ng fraudulent devices at iba pa na maaaring kasuhan ng COMELEC at iba pang ahensya ng gobyerno.

Ang paniningil ng NPA sa mga kandidato ay paglabag din umano sa Republic Act 10168 o The Terrorism Financing Prevention and Suprression Act of 2012 at maging ng Anti Terrorism Act.

Welcome para sa isang infectious diseases expert sa mga proposal na maglagay ng mga vaccination site sa mga polling place sa May 9 elections upang mapataas ang COVID-19 vaccine at booster coverage sa bansa.

Ayon kay Dr. Edsel Salvana, miyembro ng DOH – Technical Advisory Group, mas konbinyente kung mababakunahan malapit sa mga polling precinct ang mga botante, partikular ang mga wala pang primary dose.

Ito’y upang mabawasan anya ang peligrong hatid ng COVID-19 lalo’t inaasahang daragsain ng mahigit 65M botante ang iba’t ibang paaralan na pagdarausan ng eleksyon.

Sa ngayon ay nasa 67.9M individuals o 75.45% na ng target population ang fully vaccinated laban sa COVID-19 habang 13.2M ang naturukan na ng booster.

Una nang inihayag ng Commission on Elections na ang mga botanteng COVID-19 positive o makikitaan ng mga sintomas ay papayagan pa ring makaboto pero sa mga isolation polling places.