HOT STORIES OF THE WEEK

Kapwa nanguna sina Broadcast Journalist Raffy Tulfo at Antique Lone District Rep. Loren Legarda sa Pulse Asia Survey para sa senatorial race.

Sa isinagawang survey noong April 16 hanggang 21 sa 2,400 respondents, nakakuha si Tulfo ng 50.4% habang 49.4% si Legarda may statistical ranking na 1^st at 2^nd places.

Pangatlo si Actor Robin Padilla na mayroong 42.9%, sunod si Taguig City-Pateros Rep. Alan Peter Cayetano, 42.3%; Sorsogon Governor Francis Escudero, 38.6%;

Re-electionists Sherwin Gatchalian at Juan Miguel Zubiri, na kapwa may 37%; dating DPWH Secretary Mark Villar, 35.9%; dating Senator Jv Ejercito, 34.3%;

Dating Vice President Jejomar Binay, 32.5%; re-electionist Risa Hontiveros at dating Senator Jinggoy Estrada na kapwa may 32.3%.

Nasa 46M Voter’s Information Sheets (VIS) na ang ipinamahagi ng Comelec sa iba’t ibang bahagi ng bansa, anim na araw bago ang halalan.

Bahagi ito 70% ng kabuuang 65.7 million voter’s information sheets na naglalaman ng pangalan, address, polling center, at precinct number ng botante.

Ayon kay Comelec Commissioner George Garcia, sa National Capital Region, 56% ng mga rehistradong botante ang nakatanggap na ng kanilang mga VIS.

Tanging ang Cordillera Administrative at Ilocos regions anya ang nakakumpleto ng pamamahagi ng Voter’s Information Sheet.

Sa datos ng poll body, mayroong kabuuang 65, 709, 572 individuals ang rehistrado sa bansa at 1, 697, 215 ang Overseas Filipinos ang nagparehistro rin para sa May 9 elections.

Hindi rin natibag ang running mate ni dating senador Bongbong Marcos na si Davao City Mayor Sara Duterte-Carpio sa vice presidential survey ng Pulse Asia.

Nakakuha si Duterte-Carpio ng 55% rating sa April 16 to 21 Pulse Asia Survey kumpara sa 54% noong March survey.

Pangalawa pa rin si Senate President Vicente Sotto III, 18% na sinundan ng pamangkin niyang si Francis “Kiko” Pangilinan, 16%.

Pang-apat naman si Dr. Willie Ong, na mayroong 3%, Manny Lopez, 1% makaraang maungusan si Buhay Partylist Rep. Lito Atienza.

Nasa 2,400 ang respondents sa Pulse Asia Survey na pawang edad 18 pataas at rehistradong botante.

Nananatili si dating senador Ferdinand “Bongbong” Marcos Jr. bilang frontrunner sa May 9 presidential race, batay sa pinaka-huling survey na isinagawa ng Pulse Asia.

Sa April 16 to 21 Pulse Asia Survey sa 2,400 respondents, napanatili ni Marcos ang kanyang March survey rating na 56%.

Pangalawa pa rin si Vice President Leni Robredo na mayroong 23% o isang puntos ang ibinaba kumpara sa March rating.

Umakyat naman si Senador Manny Pacquiao sa pangatlong pwesto bitbit ang 7% at naungusan si Manila Mayor Francisco “Isko Moreno” Domagoso, na may 4% habang 2% para kay Senador Panfilo Lacson.

Nadagdagan ng 1 percentage point si Pacquiao sa nakalipas na buwan habang nalagasan ng 4 points si Moreno.

Nanawagan ang ilang militanteng mambabatas sa kamara na tuluyang imbestigahan “In aid of legislation” ang biglaang pagkawala ng isa sa mga supporter ni presidential candidate at Vice President Leni Robredo sa lalawigan ng Quezon.

Batay ito sa inihaing House Resolution 2565 nina Bayan Muna Representatives Eufemia Cullamat, Carlos Zarate at Ferdinand Gaite.

Abril a – 23 nang mapaulat na nawawala si Dante Gatdula, dating chairman ng Akbayan-Candelaria na kasalukuyang chairperson ng Robredo People’s Council (RPC) na nagkakampanya para kay VP Leni sa bayan ng Candelaria.

Pupunta lang noon si Gatdula sa pulong ng RPC bago ang campaign rally ni Robredo at natandaan ng kanyang asawang si betsie na may kinompronta ang kanyang mister sa telepono bago ito nawala.

Nanininwala ang Makabayan Congressmen na bagaman iniimbestigahan na ng PNP Regional Office 4-A ang insidente, nangangamba sila maging si betsie na mayroong mas peligrosong nangyari sa kanyang mister.

Na-i-deposito na sa Bangko Sentral ng Pilipinas (BSP) ang huling source code ng transmission router na gagamitin para sa May 9 elections.

Ang transmission router ang magpapadala ng resulta mula sa polling precints patungong main server, backup server at transparency server.

Nanguna sa turnover sina COMELEC chairman Saidamen Pangarungan at BSP Governor Benjamin Diokno na tiniyak ang pagiging protektado ng vault.

Noong Pebrero, unang ipinadala ng COMELEC sa BSP ang Automated Election System AES source codes.

Aminado ang Department of Labor and Employment (DOLE) na hirap ang kanilang ahensya na pataasin ang sahod ng mga manggagawa sa Bicol region.

Ayon kay Regional Director Ma. Zenith Angara-Campita ng DOLE-Bicol, hindi madali ang pagpapataw ng umento sa sahod sa kanilang lugar dahil patuloy parin nila itong pinag-aaralan.

Iginiit ni Angara-Campita na karamihan sa mga nagne-negosyo sa rehiyon ay maliliit lamang kumpara sa ibang rehiyon na may malalaking manufacturer.

Sa ngayon, patuloy pang binabalanse ng ahensya ang wage increase ng mga empleyado sa nabanggit na rehiyon.

Inihayag ni Health Undersecretary Maria Rosario Vergeire na posibleng ilabas pagkatapos ng halalan ang guidelines o rekomendasyon para sa mga senior citizen na tatanggap ng 2nd booster shots.

Ayon kay Vergeire, ang mga immunocompromised sector pa lang ang pinapayagan para sa ika-apat na bakuna kaya posibleng abutin pa ng isang linggo bago maisapinal ang guidelines mula sa Health Technology Assessment Council (HTAC) para sa mga senior citizen.

Samantala, muli namang nanawagan sa publiko ang health official na magpa-booster na dahil hanggang sa ngayon ay mababa pa rin ang turnout ng vaccination para sa booster shots.

Siniguro ng Philippine National Police (PNP) na tatalima ang kanilang ahensya sa nais ni Pangulong Rodrigo Duterte hinggil sa isyu ng E-sabong.

Ayon kay PNP Chief Gen. Dionardo Carlos, anuman ang magiging desisyon at kautusan ng pangulo sa usapin ng E-sabong ay kanilang susundin at mahigpit na pag-aaralan.

Sinabi pa ni Carlos na ang kanilang pagtalima ay nakabase rin sa rekomendasyon mula sa iba’t-ibang grupo.

Sa ngayon, patuloy paring pinaghahanap ng PNP ang mga nawawalang sabungero.

Tiniyak ng Commisison on Elections o Comelec na magiging transparent o pantay-pantay ang halalan sa Mayo a-nueve.

Ayon kay Commissioner George Garcia, gagawin ng kanilang ahensya ang lahat ng hakbang at nakikipagtulungan narin sila sa Department of Information and Communications Technology (DICT) upang maiwasan ang anomalya sa mismong araw ng eleksiyon.

Sinabi ni Garcia na magiging bukas sa publiko ang lahat ng mga steps sa pagbibilang ng boto at canvassing at magkakaroon ng live-stream sa mga server upang makita ng publiko kung sino ang lalabas at papasok sa bawat pasilidad.

Nanawagan din si Garcia sa mga botante na bumoto at pumili ng lider na nararapat na maupo sa posisyon bilang pangulo dahil nasa kamay  ng mga botante ang kapalaran ng magiging hinaharap ng mga susunod na henerasyon at para mapabuti ang ating bansa.