HOT STORIES OF THE WEEK

Nagpaalala sa mga botante ang Commission on Elections (Comelec)  na mas mainam ang pagdadala ng kodigo sa kanilang pagboto sa mismong araw ng botohan sa Mayo a-9.

Sa pahayag ni Commissioner George Garcia, malaking tulong ang pagdadala ng listahan ng mga kandidatong kanilang iboboto para maiwasan ang kalituhan at mas mapabilis ang gagawing pagboto.

Sinabi ni Garcia, na ilagay nalang sa papel ang mga pangalan na kanilang iboboto sa eleksiyon at huwag sa mismong cellphone at iba pang gadget upang hindi mapaaway sa mga watcher o mga magbabantay sa mga district at polling precinct.

Ipinagbabawal kasi ng komisyon ang pagkuha ng litrato sa mga balota maging ang pag-selfie sa loob ng polling precinct dahil nakaaabala umano ito sa pagboto.

Bukod pa dito, ipinagbabawal din ang pagtambay sa mga presinto dahil nananatili pa rin ang banta ng COVID-19.

Magpapatupad ng oil price rollback ang ilang kumpanya ng langis bukas, araw ng Martes.

Sa abiso ng Pilipinas Shell Petroleum Corp., at Petro Gazz, may bawas na 65-centavos sa kada litro ng gasolina, habang P1.15 naman sa kada litro ng diesel.

Magpapatupad rin ng kaparehong price adjustment ang Cleanfuel at Seaoil Philippines.

Magtatapyas rin ng presyo ang Pilipinas Shell sa kanilang kerosene ng P1.15 kada litro.

Batay sa datos ng Department of Energy, ang year-to-date adjustments ay nasa kabuuang net increase na P15.45 kada litro sa gasolina, P27.35 kada litro sa diesel, at P21.55 kada litro sa kerosene.

Isang linggo bago sumapit ang May 9 elections, inihayag ng Philippine National Police (PNP) na may kabuuang 52 naiulat na insidente ng election-related violence sa bansa.

Ayon kay PNP Spokesperson Police Colonel Jean Fajardo, sa nasabing bilang ay 28 insidente ang kumpirmadong walang kaugnayan sa eleksyon, habang 14 pa ang iniimbestigahan.

Sa ngayon aniya ay 10 lamang sa mga naiulat na insidente ang kumpirmadong may kinalaman sa halalan, kung saan apat ay mula sa Ilocos Region, tatlo mula sa Zamboanga, at tig-isa mula sa Central Luzon, Northern Mindanao, at Cordillera.

Sinabi pa ni Fajardo na magtatalaga ang pnp ng mga tauhan nito sa mga polling center at COMELEC checkpoints para sa seguridad ng Eleksyon 2022.

Nananatili  sa kanilang puwesto sina COMELEC Directors James Jimenez at Frances Arabe.

Ayon ito kay COMELEC Commissioner George Garcia sa kabila ng rekomendasyon ni Commissioner Rey Bulay na sibakin sina Jimenez at Arabe habang iniimbestigahan pa ang nakanselang huling presidential at vice presidentiable townhall debates.

Sinabi ni Garcia na wala pang aksyon si COMELEC Chairman Saidamen Pangarungan sa nasabing rekomendasyon ni Bulay.

Muling tiniyak ni Garcia na hindi makakaapekto ang usapin sa paghahanda ng COMELEC sa May 9 elections o isang linggo na lamang mula ngayon. —sa ulat ni Aya Yupangco (Patrol 5)

Nag-protesta ang ilang militanteng grupo kasabay ng pagdiriwang ng araw ng manggagawa sa ilang bahagi ng Metro Manila kahapon.

Kabilang sa lumahok ang kilusang Mayo Uno, Piston, BPO workers for Leni and Kiko, Migrante International, Peasant Movement of the Philippines, Gabriela Women’s Party, AnakPawis Party-List at Sumilao Farmers.

Ipinapanawagan ng mga naturang grupo na itaas na ang sahod, dagdag-proteksyon sa mga manggagawa, pagwawakas sa kontraktwalisasyon at red-tagging.

Ganito rin ang panawagan ng Filipino Nurses United at National Union of Journalists of the Philippines para isulong ang taas-sahod at proteksyon sa kanila sa gitna ng COVID-19 pandemic.

Pinuri ng Civil Service Commission (CSC) ang lahat ng manggagawa sa Pilipinas, kasabay ng pagdiriwang ng Labor Day nitong linggo.

Ayon kay CSC chairperson Karlo Nograles, ang mga manggagawa ang isa sa pundasyon ng bansa sa pag-unlad.

Saludo rin si Nograles sa mga manggagawa ng gobyerno at binigyang-diin ang kahalagahan ng proteksyon sa kanila.

Ang mga nagtatrabaho anya buong araw sa kabila ng COVID-19 pandemic ang nagsisilbing makina ng gobyerno upang maipagpatuloy ang programa ng pamahalaan.

Inihayag ni acting presidential spokesperson at Presidential Communications Operations Office (PCOO) secretary Martin Andanar, na magiging smooth ang transition patungo sa bagong uupong administrasyon sakaling matapos ang 2022 national and local elections.

Ayon kay Andanar, tiniyak ni Pangulong Rodrigo Duterte na magiging maayos ang paglilipat sa mauupo bilang 17th President of the Philippines sakaling matapos ang kaniyang termino sa Hunyo a-30.

Sinabi ni Andanar na nais ng punong ehekutibo na maging bahagi ng kanyang legacy ang pagkakaroon ng patas at malinis na halalan lalo na ang maayos na paglilipat ng kaniyang kapangyarihan bilang pangulo patungo sa bagong mananalong administrasyon.

Wala pang indikasyon na magkakaroon ng lockdown pagkatapos ng May 9 elections dahil sa posibleng pagtaas ng mga kaso ng COVID-19.

Ito ang nilinaw ni Health Secretary Francisco Duque, III sa gitna ng pinangangambahang pagsirit muli ng COVID-19 cases.

Ayon kay Duque, kung kinakailangan ay magkakaroon lamang ng granular lockdowns at hindi malawakang lockdown.

Kinatigan naman ito ni National Vaccination Operations Center Chairperson, Health Undersecretary Myrna Cabotaje sa pagsasabing hindi pa “significant” ang pagtaas ng kaso.

Gayunman, dapat anyang ipagpatuloy ang pag-iingat laban sa COVID-19, kabilang ang pagsunod sa minimum public health protocols.

Una nang ibinabala ng DOH na posibleng sumipa muli ang COVID-19 cases sa kalagitnaan ng mayo o pagtapos ng halalan kung susuway ang publiko sa minimum health protocols.