HOT STORIES OF THE WEEK

Inihayag ni Department of Health (DOH) secretary Francisco Duque III na tukoy na niya ang mga pinagpipiliang ipapalit sa kanyang puwesto.

Ipinabatid ni Duque na lahat umano ito ay mahuhusay, kwalipikado at may magandang track record sa serbisyong publiko.

Ipinabatid na rin ni Duque sa susunod na administrasyon ang mga hamon na posibleng kaharapin at kailangan bigyan ng solusyon.

Ani Duque, binigyan na rin niya ng ilang payo ang papasok na susunod na administrasyon kaugnay sa sitwasyon ng COVID-19 sa Pilipinas.

Ipinauubaya na ng Malakanyang sa Department of Health (DOH) ang anumang ipalalabas na kalatas hinggil sa inilbas na Executive Order No. 16 ng pamahalaang Cebu.

Ito ang kauutusang “rationalizing the wearing of face masks within Cebu” na nilagdaan.

Batay sa ilalim ng nasabing direktiba, hindi na obligado ang pagsusuot ng face mask sa mga open spaces.

Ipinabatid ni acting presidential spokesperson secretary Martin Andanar, bahala na umano ang DOH na magbigay ng komento hinggil sa nasabing EO na inisyu ng Cebu government.

Magugunitang, sa mga nakaraang pahayag ni Pangulong Rodrigo Duterte partikular sa regular na Talk to the People nito ay nababanggit ng Presidente na dapat panatilihin ang pagsusuot ng face mask.

Titiyakin aniya niya na hanggang sa matapos ang kanyang termino ay dapat nakasuot ng proteksyon ang mga Pilipino laban sa COVID-19 sa pamamagitan ng face mask.

Kinundena ng COMELEC ang pagpatay sa isang election officer sa Zamboanga Del Norte.

Kaugnay nito, tiniyak ni COMELEC Acting Chairperson Socorro Inting ang hustisya para sa pamilya nang pinaslang na si Engineer Maricel Peralta.

Sinabi ni Inting na nakikipag ugnayan na sila sa PNP at magbibigay ng update lalo na sa pamilya ni Peralta hinggil sa itinatakbo ng imbestigasyon.

Limang ambassador mula sa Europe ang nag courtesy call kay President Elect Ferdinand Marcos, Jr. sa gitna na rin nang paghahanda sa pormal na pagpasok ng bagong administrasyon.

Kabilang sa mga diplomat na nagtungo sa BBM headquarters para makipagkita ng personal sa bagong pangulo ng bansa sina UN Representative Ambassador Gustavo Gonzales, Swedish Ambassador Annika Thunborg, Papal Nuncio Archbishop Charles Brown, Irish Ambassador William Carlos at Swiss Ambassador Alain Gaschen.

Ang nasabing courtesy call ay bahagi na ng tradisyon para sa mga bagong halal na opisyal.

Una nang nag courtesy call kay Marcos ang UN Deputy Secretary of State gayundin ang mga diplomat mula sa Germany, Italy at ASEAN.

Tanggap naman ng mga mangagagawa ang pagtaas ng piso na dagdag pasahe sa mga jeep sa National Capital Region, Region 3 at Region 4.

Matatandaang inilbas ng Land Tranportation Franchising and Regulatory Board (LTFRB) ang desisyon na dagdagan ng 1 peso ang pasahe sa mga jeep na bumibyahe sa mga nabanggit na rehiyon.

Inihayag ng labor group na Trade Union Congress of the Philippines (TUCP) na naiintindihan ng mga obrero kung bakit kailangan magdagdag ng pasahe sa mga public utility jeepney.

Ayon kay TUCP Spokesperson Alan Tanjusay, kahit na mabigat sa kanila ang dagdag pasahe ay tinanggap na lamang ito at inuunawa bilang tulong na rin sa mga jeepney driver.

Dagdag ni Tanjusay na ang mga jeepney driver ay kabilang sa pinakamatinding naapektuhan ng pandemya at pagtaas ng presyo ng petrolyo.

Kung ito aniya ang makatutulong upang gumaan ang pasanin ng mga jeepney driver kaya’t hindi tutol ang mga manggagawa rito.

Mataas na bilang ng engagements at followers ang gagamiting basehan para mabigyan ng accreditation ang isang blogger sa Malakanyang.

Ayon ito kay Incoming PCOO Secretary Trixie Cruz-Angeles na nagsabi ring nirerepaso na nila ang Blogger Accreditation Policy ng palasyo na una nang naisantabi sa ilalim ng Duterte administration.

Ipinabatid ni Angeles na sa ilalim ng lumang polisiya, nasa 20,000 ang minimum followers na kailangang malampasan para makunsider o mabigyan ng palace accreditation.

Bukod dito, inihayag ni Angeles na tinitingnan nila ang engagements o yung pagtugon ng mga tao sa isinulat o ipinakita mo sa panig ng vloggers o kung gaano sila ka interesado sa sinasabi.

Binigyang diin ni Angeles na tinututukan nila sa pag repaso ng polisiya ay kung papayagan o hindi na dumalo sa regular na Palace briefings ang mga vloggers.

Kontra si Incoming National Security Adviser Clarita Carlos sa pagre-red tag na wala aniyang magandang resulta.

Sa halip, binigyang diin ni Carlos na pagtutuunan nila ng pansin ang pag resolba sa ugat ng insurgency.

Sinabi ni Carlos na hindi tamang gumamit ng kung anu-anong label at akusahan ang kung sinu-sinong personalidad na komunista dahil tutugunan aniya ng Marcos administration ang mga usapin ng kakulangan ng oportunidad at kawalang katarungan na siyang nagreresulta sa insurgency.

Ayon pa kay Carlos, hindi lamang sa economic life ng bansa nakatutok ang Natinal Security kundi dapat ding makunsider dito ang human, food, energy at water security.

Determinado si Incoming National Security Adviser Clarita Carlos ang pagsusulong ng critical engagement sa China kaugnay sa usapin ng West Philippine Sea.

Ito ayon kay Carlos ay matapos nilang pag usapan ni President Elect Ferdinand Bongbong Marcos, Jr. ang relasyon ng Pilipinas sa China.

Sinabi ni Carlos na tututukan niya ang pakikipag ugnayan sa China at ipinag-utos na rin aniya ni Marcos ang pagpapalakas nito sa lahat ng antas at aspeto.

May Go- Signal na ang ilang establisyimento para sa 100% capacity operation nito.

Ito ayon kay PCOO Secretary Martin Andanar ay matapos baguhin ng IATF ang guidelines sa implementasyon ng COVID-19 alert system.

Gayunman, sinabi ni Andanar na kailangang hingan ng proof of full vaccination ng mga establishment ang mga kasali sa mass gathering kapag 100% na ang operasyon ng mga ito.

Maging ang public transportation ay pinayagan na rin ng 100% full capacity sa Alert level 1.

Inalmahan din ni Kusug Tausug Rep. Shernee Tan-Tambut ang lumabas na storya ni South China Morning Post Correspondent Raissa Robles na hindi umano “Safe” ang mindanao para sa mga turista.

Ayon kay Tambut, nakatawag-pansin sa kanilang mga taga-Sulu at iba pang taga-Mindanao ang panunuya ni Robles.

Hindi rin nagustuhan ng kongresista ang pahayag ni Robles na lantad ang mga turista sa Mindanao sa mga kidnapper at iba pang kriminal at patutsadang dapat ng maghanda si Incoming Tourism Recretary Christina Frasco para sa ransom negotiations sa Abu Sayyaf.

Mariin anya nilang ipino-protesta ang pangit na paglalarawan ng nasabing journalist sa Mindanao, partikular ang Muslim provinces, bilang balwarte ng mga kidnapper at bandido.

Iginiit ni Tambut na hindi naman lahat ng bahagi ng Mindanao ay pangit, bagkus gumagawa ng paraan ang mga mamamayan, lalo ang mga Muslim province na mapanatili ang kapayapaan at pagiging progresisbo bilang ambag sa pag-unlad ng bansa.