Binabarat ang mga health workers.
Ito ayon kay Robert Mendoza, Pangulo ng Alliance of Health Workers ang nangyayari dahil mayruon namang pondo na para sa kanilang sektor subalit nagagamit sa ibang bagay.
Kaya nga aniya hindi na rin napipigilan ang maraming health workers na mangibang bansa.
May bago nang tagapagsalita si Vice President-elect Sara Duterte-Carpio.
Ito ayon sa kampo ni Duterte ay sa katauhan ni Atty. Reynold Munsayac na papalitan si incoming Tourism Secretary Christina Frasco.
Ipinabatid ng kampo ni Duterte na magka klase sa law school ang Bise Presidente at si Munsayac na siya ring umalalay sa presidential daughter sa pagtatayo ng tapang at malasakit nuong 2017.
Nuong isang taon nagbitiw si Munsayac bilang PCGG Commissioner at Acting Chairman para tumulong sa kampanya ni Duterte.
Kasabay nito, nagpasalamat si Duterte kay Frasco sa pagtulong sa kanyang maipaabot sa mga Pilipino ang kanyang mensahe sa pamamagitan ng media.
Dalawang motibo ang tinututukan ng mga otoridad sa Amerika kaugnay sa pagkakapaslang kay Pinoy Lawyer Atty John Albert “Jal” Laylo.
Kabilang sa mga motibong ito, ayon kay New York Consul General Elmer Cato ay Mistaken Identity kung saan posibleng nagkamali ang gunman sa pinaputukang sasakyan na maaaring kapareho ng sinasakyan ni Laylo.
Bukod pa ito sa anggulong random shooting.
Isang pulong na ang hiniling ni Cato kay Philadelphia Mayor Jim Kenney at Police Commissioner Daniella Outlaw kaugnay sa estado ng imbestigasyon sa krimen.
Kasabay nito, tinawag namang heinous at senseless ni Kenney ang nangyari kay Laylo matapos ipaabot ang pakikiramay sa buong pamilya.
Binigyang diin ni Kenney na ang krimen ay resulta ng maluwag na pagdadala ng mga armas sa kanilang lungsod na hindi na talaga aniya katanggap tanggap.
All set na ang ipatutupad na seguridad ng National Capital Region Police Office (NCRPO) sa nalalapit na inagurasyon ni President-elect Ferdinand “Bongbong” Marcos Jr.
Gaganapin ito sa National Museum of the Philippines sa darating na Hunyo 30.
Ayon kay NCRPO chief, Maj. Gen. Felipe Natividad, naisapinal na nila ang security preparation para matiyak ang zero casualty at posibleng untoward incident.
Wala pa namang namo-monitor na banta ang NCRPO pero tiniyak nilang patuloy ang kanilang monitoring at koordinasyon sa kanilang mga counterparts.
Ang otorisado lamang na magdala ng baril sa event ay ang mga police, military at ilang law enforcers na mayroong official duties.
Samantala, muli namang ipinaalala ni NCRPO Public Information Officer, Lt. Col. Jenny Tecson na hindi papayagan ang mga backpack sa lahat ng VIP areas para masiguro ang kaligtasan ng bawat isa.
Umabot sa 521 ang karagdagang COVID-19 cases ang naitala ng Department of Health nitong Lunes, na mas mababa kumpara sa 612 cases na naitala noong linggo.
Dahil dito, bahagya pang umakyat sa 4,740 ang aktibong kaso ng COVID-19 sa bansa.
Pumalo naman sa 3, 696, 793 ang nationwide COVID-19 caseload, 3, 631, 586 recoveries at 60,467 deaths.
Nangunguna pa rin ang National Capital Region sa may pinaka-mataas na bagong kaso na 2,365 sa nakalipas na dalawang linggo na sinundan ng CALABARZON, 726; at Western Visayas na may 396.
Sa Metro Manila, ang Quezon City ang may pinakamaraming naitalang kaso na may 544, Maynila na may 303; at Makati na may 292 cases.
Umaasa si Vice President-elect Sara Duterte-Carpio na magiging priority sa susunod na administrasyon ang pagbabalik ng mandatory Reserve Officer Training Corps (ROTC).
Ayon kay Duterte-Carpio, ang Presidente at kongreso ang nagdedesisyon sa mga executive at legislative agenda.
Kaya hiling ni Duterte-Carpio na maisama sa legislative agenda ang ROTC lalo’t maraming pending bills ang may kaugnayan dito.
Noong Enero, una nang sinabi ni Duterte-Carpio na sa oras na manalong bise-presidente ay isusulong niya ang mandatoryong military service para sa lahat ng kabataang Pilipino na tutuntong sa edad na 18, babae man o lalaki.
Ang mga panukala sa pagbuhay ng ROTC ay kailangang ihain muli sa 19th congress at sumailalim sa proseso ng paggawa ang batas.
Posibleng luwagan pa sa susunod na School Year ang ipinatutupad na social distancing measures sa mga paaralang nasa ilalim ng Alert level 1 at 2.
Ayon kay Department of Education (DepEd) undersecretary Nepomuceno Malaluan, inaasahan na nila ito sa bagong guidelines ng kagawaran tungo sa new normal sa darating na School Year 2022-2023.
Lahat ng detalye sa implementasyon ng face-to-face classes ngayong Agosto ay lalamanin nang isinasapinal nilang guidelines para sa recovery at pagpapatuloy ng school year.
Samantala, bukas naman ang DepEd na iprisinta sa bagong administrasyon ang gawain.
Posibleng umabot sa P100 kada litro ang presyo ng produktong langis kada araw sa Pilipinas.
Ito ay kung patuloy na tataas ang presyo nito sa pandaigdigang merkado resulta ng nagpapatuloy na giyera sa pagitan ng Russia at Ukraine.
Ayon kay Gerardo Erguiza Jr., undersecretary ng Department of Energy (DOE), magiging posible ang pagtataya kung magiging sunod-sunod ang taas-presyo sa langis.
Gayunman, nilinaw ng opisyal na hindi naman biglaang mangyayari ang isandaang pisong kada litrong presyo ng langis, kung isang beses lamang ang oil price hike.
Matatandaang una rito, sinabi ni Erguiza na imposibleng tumaas sa 100 piso ang presyo ng langis sa bansa dahil aniya, sapat naman ang ating suplay ng krudo.
Planong ihain ng grupo ng Transport Network Vehicle Service (TNVS) ang P10 hanggang P20 na dagdag sa flagdown rate bunsod ng pagsirit ng presyo ng produktong petrolyo.
Aminado ang naturang grupo na kumonti na ang bilang ng mga nagmamaneho sa kalsada kung saan, hirap silang pabalikin ang ilang mga tsuper na umalis na at naghanap nalang ng ibang pagkakakitaan.
Layunin ng naturang petisyon na mahikayat ang mga humintong drivers at bumalik sa kanilang pamamasada.
Sakaling maaprubahan ang hiling ng naturang grupo, para sa mga nagmamaneho ng sedan type, ang dating flagdown rate na P40 na may dalawang piso na dagdag kada minuto, gagawin na itong P55 na mayroong tatlong piso kada minuto.
Sa mga nagmamaneho naman ng SUV type, mula sa dating flagdown rate na P50 na may dalawang piso na dagdag kada minuto ay magiging P70 naman na may dagdag na tatlong piso kada minuto.
Ang dati namang P30 na flagdown rate sa mga hatchback na may dalawang piso na dagdag kada minuto ay magiging P40 na at tatlong piso ang magiging dagdag sa kada minuto.
Sa ngayon, umaasa ang naturang grupo na matutugunan ang kanilang hiling sa ilalim ng bagong administrasyon.
Umaasa ang Department of Tourism (DOT) na mas tataas pa ang bilang ng mga Pilipinong mabibigyan ng trabaho dahil sa mas maluwag na restriksyon sa bansa.
Ayon sa DOT, sa tulong na rin ng Tourism-related Industries at pag-alis ng Test-before-Travel, unti-unti nang bumabangon ang turismo sa Pilipinas.
Sinabi ng ahensya na nananatiling prayoridad ang panunumbalik ng kabuhayan ng tourism workers at pagpapanatili sa pagdami ng mga dayuhang turista ngayong taon.
Sa datos ng DOT, nasa upward trend pa rin ang tourist arrivals kung saan 682,949 ang naitala sa kalagitnaan ng buwan ng Hunyo habang umabot naman sa 5.2% ang kontribusyon ng Tourism Direct Gross Value added sa GDP ng bansa noong 2021 base sa naging datos ng Philippine Statistics Authority (PSA).
Kumpiyansa naman ang DOT na magpapatuloy ang pagsigla ng industriya ng turismo sa gitna ng pandemya.