HOT STORIES OF THE WEEK

Sumampa na sa 8.3% ang COVID-19 positivity rate sa National Capital Region mula sa dating 7.5% noong June 29.

Gayunman, nilinaw ni OCTA fellow, Professor Guido David na ang nasabing bilang ay hindi gaanong kataas kumpara sa itinatakda ng Department of Health na 6%.

Ayon kay David, sa ibang lugar sa Metro Manila ay umaabot na sa mahigit 6% ang Average Daily Attack Rate (ADAR).

Dahil anya sa mabagal na growth rate, posibleng bumaba ang kaso ng COVID-19 sa National Capital Region sa loob ng isa hanggang dalawang linggo.

Sa kasalukuyan ay nasa 50% ang growth rate sa NCR habang nasa 1.5% hanggang 1.6% ang reproductive number at tinaya sa 3.6 per 100,000 population ang ADAR.

Sa kabila nito, bahagyang nadaragdagan ang mga kaso sa Cavite, Laguna, Rizal, Batangas, Pampanga, Benguet at Western Visayas, subalit hindi naman mataas.

Ilan sa mga dahilan nang nito ang Omicron subvariants BA.4 at BA.5 at humihinang immunity sa ilang rehiyon.

Inatasan na ni Pangulong Bongbong Marcos ang Land Transportation Franchising and Regulatory Board na tutukan ang mga problema ng mga driver at commuter, maging ang mga prosesong nakasasagabal sa LTFRB.

Tiniyak naman ni LTFRB chairperson Cheloy Garafil, sa kanyang opisyal na pag-upo sa ahensya na kanilang ipupursige ang “balance at win-win solutions” upang ayusin ang transport system ng bansa.

Mayroon anyang tatlong direktiba si Pangulong Marcos, una ay padaliin ang proseso sa LTFRB, tiyakin ang maayos na serbisyo sa mga Public Utility Vehicle drivers at panatilihing prayoridad ang kapakanan ng commuters.

Bagaman hindi pa inilalatag ng Marcos Administration ang transport agenda nito, tiniyak ni Garafil na tututukan ng LTFRB ang pagsasaayos sa public transport system.

Palaisipan pa para sa Philippine National Railways (PNR) kung saan hahagilapin ang pondo para sa krudo sa oras na umarangkada na ang “libreng sakay” program para sa mga estudyante sa susunod na buwan.

Ayon kay PNR assistant manager Celeste Lauta, aabot sa P8 million hanggang P9 million kada buwan ang mawawalang kita ng PNR sa implementasyon ng nasabing programa.

Nilinaw ni Lauta na hindi sila katulad ng MRT na may garantisadong subsidiya galing sa gobyerno dahil mismong ang PNR ang naglalabas ng pondo para sa pampasahod, operational cost at mga pambili ng mga piyesa na wala sa General Appropriations Act.

Nagmumula anya ito sa kinikita ng PNR, partikular sa mga Non-Railway Revenue gaya ng pagpaparenta sa mga lupain ng nasabing railway transit.

Una nang inanunsyo ng Department of Transportation na ipagpapatuloy ng Marcos Administration ang “Libreng Sakay Program” sa EDSA Bus Carousel hanggang December 2022.

Magtatapos naman ang libreng sakay ng MRT-3, LRT-2 at PNR para sa mga estudyante sa Nobyembre.

Bagaman magiging available lamang sa mga piling oras ang libreng sakay sa tatlong railway transit, nangangamba naman si LRTA spokesman, Atty. Hernando Cabrera na gamitin ang nasabing programa kahit wala ng pasok o kahit late na sa pag-uwi.

Tiniyak ni Interior Secretary Benhur Abalos na magpapatuloy ang drug war sa ilalim ng administrasyon ni Pangulong Ferdinand “Bongbong” Marcos Junior.

Ayon kay Abalos, magiging kasing igting ng mga pagsisikap ng nakaraang administrasyon ang giyera kontra droga alinsunod sa konstitusyon.

Gayunman, aminado ang kalihim na hindi pa natatalakay ang posibleng partisipasyon ng Department of Interior and Local Government (DILG) sa imbestigasyon ng International Criminal Court (ICC) hinggil sa drug war sa ilalim ng Duterte administration.

Dismayado naman si Abalos sa mga ibinasurang drug cases dahil sa technicalities tulad ng hindi pagdalo ng mga witness sa imbentaryo ng mga operasyon.

Sa ilalim ng Section 21 ng Comprehensive Dangerous Drugs Act of 2002, kailangang lumagda ng Elected Public Official at kinatawan ng National Prosecution Service o Media sa kopya ng inventory.

Hinikayat din ng DILG Chief ang Local Government Units (LGU) na magtalaga ng isang tauhan mula sa National Prosecution Service para rito.

Idineklarang ‘Cleanup’ Day ng pamahalaang Lokal ng Maynila ang araw ng Biyernes sa pangunguna ni Mayor Honey Lacuna.

Sa nilagdaang Executive Order no. 6, inatasan na ang lahat ng departments, offices, at bureaus sa ilalim ng manila local government na maglinis sa kani-kanilang nasasakupan tuwing araw ng Biyernes.

Layunin ng naturang panukala na maipakita ang kooperasyon at pagkakaisa ng bawat isa at matiyak ang kalinisan at kaayusan ng tanggapan, maging ang lahat ng corridor sa harapan ng mga opisina at sa lahat ng sulok ng city hall.

Hinikayat din ng Alkalde ang lahat ng mga Barangay at mga hepe ng mga istasyon ng pulis na panatilihing malinis ang kanilang nasasakupan.

Nilinaw naman ni Lacuna na wala silang ipinaiiral na “zero vendor policy” sa lungsod dahil pinapayagan nila ang mga tindero na magtinda pero dapat ay nasusunod ang mga umiiral na polisiya.

Samantala, pinasalamatan naman ni Lacuna ang mga boluntaryong naglinis ng kanilang kapaligiran bago pa man siya nag-ikot sa lungsod partikular na sa City Hall.

Inatasan na ni Pangulong Ferdinand “Bongbong” Marcos Jr. ang Department of Transportation (DOTr) na ipagpatuloy ang mga proyektong sinimulan ng nakaraang administrasyon sa ilalim ng pamumuno ni dating Pangulong Rodrigo Duterte.

Ayon kay Marcos Jr., dapat mapabilis pa ang konstruksiyon ng mga proyekto kabilang na dito ang Metro Manila Subway, Metro Rail Transit Line 7 (MRT-7), common station at iba pa.

Ayon kay DOTr undersecretary Cesar Chavez, target ng kanilang ahensya na matapos ang MRT-7 mula North Avenue, Quezon City hanggang sa San Jose Del Monte, Bulacan sa loob ng dalawa hanggang tatlong taon.

Bukod pa dito, target ding makumpleto ang Manila to Malolos Train Project sa pagitan ng 2024 hanggang 2025 habang paiiralin din ngayong taon ang common station para sa Light Rail Transit Line 1 (LRT-1) at MRT-3.

Matatandaan na ang Build, Build, Build Program ay isa sa mga legasiya ni dating Pangulong Duterte na malaking tulong ngayon sa mga mamamayan.

Minamadali na ng Department of Social Welfare and Development (DSWD) ang pamamahagi ng cash assistance para sa mga benepisyaryo.

Ayon kay DSWD secretary Erwin Tulfo, dapat ay mailabas na ora mismo ang cash assistance sa mga nangangailangang pamilya.

Sinabi ni Tulfo na nagsimula kahapon ang pamamahagi ng ayuda na tatagal ng lima hanggang anim na araw bago ito maideposito sa cash cards ng mga benepisyaryo.

Ayon sa kalihim, malaking tulong ang P6.2 billion na pondong inilaan para sa mga kababayan na mahihirap lalo’t patuloy pa ring tumataas ang presyo ng mga pangunahing bilihin dahil na rin sa krisis na kinahaharap ng buong mundo.

Sakop ng naturang programa ang Pantawid Pamilyang Pilipino Program (4Ps), 6 milyong pamilya mula sa Non-4Ps at 2.4 milyong mahihirap na pamilya mula naman sa datos ng kagawaran.

Dumadaing na sa liit ng kanilang kinikita ang mga nagtitinda ng school supplies sa Divisoria, Maynila.

Ito ay sa kabila ng papalapit na face-to-face classes sa mga pampubliko at pribadong paaralan sa Agosto.

Ayon sa mga vendor, matumal parin ang bentahan ng school supplies partikular na ang mga uniporme at mga gamit sa pag-aaral ng mga estudyante.

Nabatid na naglalaro sa P260 hanggang P300 ang bentahan ng mga polo na panlalaki habang P220 hanggang P250 naman para sa mga blouse.

Naglalaro naman sa P150 hanggang P260 ang palda habang P180 sa mga short.

Nasa P250 hanggang P350 naman ang presyo ng mga bag habang P200 hanggang P350 ang school shoes.

Sa ngayon, umaasa ang mga nagtitinda na mas lalakas pa ang kanilang benta habang papalapit ang pasukan sa susunod na buwan.

Suportado ng National Economic and Development Authority (NEDA) ang full resumption ng face-to-face classes sa buwan ng Agosto.

Ayon kay NEDA secretary Arsenio Balisacan, kanilang itataguyod ang tuluyang pagbabalik ng face-to-face classes ngayong school year 2022-2023.

Layunin nitong matugunan ang COVID-induced education crisis sa kabila ng gumagandang COVID risk management na nakita sa mababang hospitalization rate sa kasalukuyan.

Iginiit ng kalihim na kung hindi matutugunan ang edukasyon sa bansa, malaki ang posibilidad na maapektuhan ang competitiveness ng labor force sa hinaharap.

Matatandaang una nang sinabi ng NEDA na sakaling mailagay sa Alert level 1 ang buong bansa at maipatupad na ang full resumption ng face-to-face classes ay tuluyan nang makakarekober ang ekonomiya ng bansa.