HOT STORIES OF THE WEEK

Pinawi ni Infectious Diseases expert Dr. Edsel Salvana ang pangamba ng publiko hinggil sa pagtaas ng daily average COVID-19 cases nitong mga nakaraang araw.

Matatandaang pumalo sa halos 1,300 ang naitalang kaso ng COVID-19 noong Linggo, Hulyo a-3 na pinaka mataas na daily tally simula noong Pebrero a-25.

Ayon kay Salvana, hindi dapat mabahala ang publiko sa naitatalang mahigit isang libong kaso ng COVID-19 kada araw dahil mas mahalaga kung pagtutuunan ng pansin ang mga datos na inilalabas ng Department of Health (DOH) kada linggo.

Sinabi ni Salvana na sa pagtaya ng DOH, nakalatag na rin mismo ang kabuuang bilang ng severe at critical cases kada linggo maging ang Healthcare Utilization Rate at   bilang ng mga nasawi dahil sa nakakahawang sakit.

Inirekomenda ng isang mambabatas sa Administrasyong Marcos ang paggawad ng ilang “Special powers” upang makatulong sa mataas na sa presyo ng mga bilihin sa bansa.

Ito ay matapos maitala ang 6.1% na pagbilis ng inflation rate sa buwan ng hunyo na pinakamataas mula noong November 2018.

Ayon kay Albay Representative Joey Salceda, dapat magkaroon ang pamahalaan ng “Anti-hoarding powers” upang mapigilan ang pagkuha ng sobra-sobra sa pangangailangan para sa negosyo, pansarili o kunsumo sa bahay.

Sinabi ni Salceda na dapat ding magkaroon ng kakayahan o kapangyarihan ang Pangulo, na magkaloob ng insentibo sa produksyon ng mga essential products para maging matatag ang presyo at suplay ng mga produkto sa bansa.

Isinusulong din ng kinatawan na magkaroon ng kapangyarihan ang Pangulo para makapagbigay ng loans at guarantees sa mga supplier ng produkto.

Bukod pa dito, kailangan din ng “Anti-price-gouging powers” o yung mataas na pagpapataw ng presyo; “Transport emergency powers” para naman magamit ang mga private road at mapadali ang paggawa at paghahatid ng mga produkto sa Pilipinas.

Samantala, nais din ni Salceda na immobilize ang mga uniformed personnel para mapabilis ang mga proyektong pang-imprastraktura kasabay ng pagkakaroon ng motu proprio powers sa mga ahensya ng gobyerno, upang masilip ang mga posibleng pang aabuso sa merkado partikular na sa energy at essential goods sector.

Inirekomenda na ng National Bureau of Investigation (NBI) ang pagsasampa ng 8 counts of murder laban sa 22 security at medical personnel ng National Capital Regional Police Office (NCRPO).

Kaugnay ito sa kaduda-dudang pagkamatay ng ilang High profile inmate sa New Bilibid Prison, Muntinlupa City noong kasagsagan ng COVID-19 pandemic.

Simula Mayo hanggang Hulyo 2020, 8 high-profile inmate ang namatay sa loob ng Bilibid, kabilang ang mga convicted drug lord na sina amin Boratong at Jaybee Sebastian.

Kasama rin sa namatay ang mga kapwa drug lord na sina Francis Go, Shuli Lim Zhang, Jimmy Ang, Eugene Chua, Benjamin Marcelo, Sherwin Sanchez at Willy Yang.

Ang rekomendasyon ng NBI ay batay na rin sa hawak nitong ebidensya tulad ng testimonya ng mga witness at hindi magkakatugmang record ng Bureau of Corrections, NCRPO at NBP.

Ipinauubaya na ng NBI sa mga prosecutor ng Department of Justice ang pagdetermina sa mga nakalap na ebidensya.

Duda si Pangulong Bongbong Marcos sa ulat ng Philippine Statistics Authority (PSA) na umabot sa 6.1% ang Inflation rate o bilis ng pagtaas ng presyo ng mga bilihin at serbisyo, noong Hunyo.

Ito na ang pinakamabilis na paglobo ng inflation mula noong October 2018 na umabot sa 6.9%.

Wala namang ibinigay na paliwanag si Marcos kung bakit hindi siya kumbinsido sa numerong inilabas ng PSA para sa June inflation.

Gayunman, target anya ng pamahalaan ang 4% na inflation rate.

Samantala, aminado naman si Marcos na sadyang hindi kontrolado ng Pilipinas ang tumataas na presyo ng mga bilihin lalo’t mas umaasa ang bansa sa imported products kaysa locally produced.

Nanindigan naman ang Philippine Statistics Authority (PSA) sa report nito na umakyat sa 6.1% ang inflation rate sa bansa noong Hunyo.

Ito’y sa kabila nang hindi pagsang-ayon ni Pangulong Bongbong Marcos sa nabanggit na ulat.

Ayon kay National Statistician at PSA chief Claire Dennis Mapa, may batayan sila sa paglalabas ng nasabing report.

Ibinabase ng PSA ang inflation sa pamamagitan ng pag-monitor ng Consumer Price Index o galaw ng average retail prices ng “basket of goods and services” na kabilang sa pangangailangan ng bawat pamilya.

Magugunitang inihayag ni Finance secretary at dating Bangko Sentral ng Pilipinas Governor Benjamin Diokno noong isang linggo na maglalaro sa 5.7% hanggang 6.5% ang inflation sa Hunyo.

Itinuturong dahilan nito ang patuloy na pagtaas ng presyo ng mga produktong petrolyo, pagmahal ng singil sa kuryente at mga presyo ng bilihin at paghina ng piso kontra dolyar.

Dapat unawain ng mga commuter at pasahero ang kalagayan ng transport sector sa bansa.

Ito ang sinabi ni Fr. Jerome Secillano, Catholic Bishops Conference of the Philippines (CBCP) – Permanent Committee on Public Affairs kasunod nang pagpayag ng pamahalaan na magtaas ng dalawang piso sa minimum fare mula sa siyam na piso.

Asahan na rin aniya na maraming maaapektuhan sa pagtaas ng presyo ng langis, kasama na ang mga commuters dala na rin ng ipapatupad na pagtaas sa minimum na presyo ng pamasahe sa mga pampublikong sasakyan.

Iminungkahi rin nito sa mga simbahan na tulungan ang mga kawani na maibsan ang pasakit na dulot ng pagtaas ng presyo ng pamasahe sa pamamagitan ng pagbibigay ng transport allowance.

Hinimok pa ni Fr. Secillano ang pamahalaan na muling mamahagi ng fuel subsidy at suspendihin na excise tax sa langis dahil sa patuloy na oil price hike.

Nasa desisyon na ni Pangulong Ferdinand Bongbong Marcos Jr. kung gaano kadalas ang gagawing pagharap nito sa mga mamamahayag.

Ito ang tugon ni Press at Presidential Communications Operations Office (PCOO) Secretary Atty. Trixie Angeles nang tanungin kung gaano kadalas ang posibilidad na makausap at tumanggap ng mga tanong ng media si PBBM.

Ayon kay Secretary Angeles, kung may mga usapin na sa tingin ng punong ehekutibo ay nais niyang direktang pag-usapan o buksan sa media ay gagawin ito ng pangulo.

Sa ngayon aniya, hindi nila masasabing regular na haharap sa media si PBBM.

Maagang inumpisahan ang kauna-unahang cabinet meeting ng Marcos administration na isinagawa  sa  Aguinaldo State dining room ng Malacañang.

Binuksan ang pagpupulong sa pamamagitan ng isang panalangin na pinangunahan ni Vice President Sara Duterte-Carpio.

Sa pagsisimula ng cabinet meeting, agad na inalam ni Pangulong Marcos ang sitwasyon ng kasalukuyang ekonomiya ng bansa, kung saan unang hiningian ng update ang National Economic and Development Authority (NEDA) at Department of Finance (DOF).

Paliwanag ng punong-ehekutibo kailangang iprayoridad ang pagbibigay solusyon sa problema ng ekonomiya kasunod na rin ng mga kinakaharap na krisis ng bansa. —sa ulat ni Jopel Pelenio (Patrol 17)

Inaasahang magiging available pa lamang sa hilagang-bahagi ng bansa ang Starlink Satellite Internet Service na pag-aari ng American Tech Billionaire na si Elon Musk.

Ito ang nilinaw ni Information and Communications secretary Ivan Uy Sa gitna nang inaasahang pagsisimula ng operasyon ng nasabing internet service ngayong taon.

Ayon kay Uy, posibleng matagalan pa bago ma-avail ang serbisyo ng Starlink para sa mga taga-Visayas at Mindanao hangga’t hindi nag-la-launch ng karagdagang satellites.

Nitong Mayo lamang inaprubahan ng National Telecommunications Commission ang registration ng Starlink Internet Services Philippines Incorporated, na subsidiary ng Starlink Satellite Internet Service.

Ang pagpasok anya ng Starlink sa Pilipinas ang magpapalawak sa internet coverage sa bansa, na maaaring makaabot sa mga liblib na lugar.

Ipinaliwanag ni Uy na angkop ang satellite technology ng Starlink para sa bansa, lalo’t nagdadalawang-isip ang ilang Telco na maglagay ng fiber optic o submarine cables dahil kaunti lamang ang mga internet users sa mga lugar na planong lagyan.

Dahil gumagamit ng low earth orbit satellite network, maraming satellites ang kailangang ideploy ng Starlink na planong maglagay ng kabuuang 40,000 satellites pero nasa 2,000 pa lamang ang na-deploy.

Umarangkada na ang big time price rollback ng mga kumpanya ng langis.

Epektibo alas 12:01 kaninang hatinggabi nang ipatupad ng Caltex ang bawas P3 sa kada litro ng diesel at P3.40 sentimos sa kerosene habang walang paggalaw sa presyo ng gasolina.

Ala-6 naman kanina nang ilarga ng Shell, Seaoil, Petro Gazz, Petron, Flying V, Phoenix Petroleum at PTT Philippines ang kahalintulad na price adjustment maliban sa Cleanfuel na mamayang alas-8:01 ng umaga.

Ito ang kauna-unahang rollback sa presyo ng mga oil products ngayong buwan bunsod ng price adjustments sa international market.