HOT STORIES OF THE WEEK

Nakatakdang ihain sa kongreso sa August 22 ng administrasyon ni Pangulong Ferdinand Bongbong Marcos Jr., ang panukalang nasyonal budget para sa 2023.

Ayon kay Amenah Pangandaman, kalihim ng Department of Budget and Management, nagpapasya ang Administrasyong Marcos na i-adopt ang budget ceiling na itinakda ng Administrasyon ni dating Pangulong Rodrigo Duterte.

Dahil dito, susundin ang P5.2 Trillion na panukalang pondo para sa 2023.

Alinsunod sa Section 22 ng Article 7 ng batas, kailangan ipasa ng Pangulo ang panukala nitong budget sa kongreso, 30 araw mula nang buksan ang regular nitong sesyon.

Sa July 25 nakatakdang magbukas ang 19th Congress, na siyang State of the Nation Adress ni PBBM.

Kaya may hanggang August 24 ang mga mambabatas na magpasa ng panukalang pondo para sa 2023.

Ang mga sektor na pagtutuunan sa proposed 2023 National Budget ay ang Agricultural and Food Security, Climate Change Adaptation, Economic Recovery, pagpapabuti sa Healthcare and Education, Imprastruktura at iba pa.

Inihain na ni Senator Alan Peter Cayetano sa Senado ang isa pang bersyon ng panukala na magbibigay tulong pinansiyal sa mga Pilipinong naapektuhan ng pandemya.

Ito ay ang “Sampung Libong Pag-asa Law” na magbibigay ng P10-K kada pamilya o tig-P1-K kada miyembro nito.

Magiging iba ang panukala sa Social Amelioration Program ng Department of Social Welfare and Development pero malilikha pa rin sa ilalim nito.

Prayoridad dito ang pinakamahihirap na pamilya sa bansa kabilang ang mga Senior citizens, PWDs, solo parents, displaced workers, drivers at operators, magsasaka at iba pang kabilang sa vulnerable sector.

Nakiisa si Pangulong Ferdinand Marcos Jr. sa selebrasyon ng Eid’l Adha o Feast of Sacrifice ng mga muslim ngayong araw.

Sa mensahe ng Pangulo sa publiko, sinabi nito na ang okasyon ay paalala na anumang pagsubok ang dumating, basta ay may malalim na pananalig at katapatan sa paniniwala ay malalagpasan ito.

Sagisag din ng okasyon na dapat maging handa sa lahat dahil hindi madali ang tatahaking landas.

Kung lalaban naman para sa tama at para sa kapakanan ng lahat, magreresulta pa ito ng mabuting gawain.

Hinimok naman ni PBBM ang sambayanan na ayusin ang hindi pagkakaintindihan at pagkahati-hati at sa halip ay magkaisa para sa mas matatag na bansa.

Binasura ng Court of Appeals ang apela nina Rappler CEO Maria Ressa at Reynaldo Santos Jr. ang cyberlibel conviction laban sa kanila.

Partikular ang hatol hanggang anim na taong pagkakabilanggo na iginawad ng Manila Regional Trial Court Branch 46 noong June, 2020.

Nagsimula ang kaso sa article ng rappler noong 2012 laban kay businessman Wilfredo Keng kung saan iniuugnay ito kay dating Chief Justice Renato Corona sa kasagsagan ng impeachment case ng dating Punong Mahistrado.

Balak naman ng kampo ni Ressa na iakyat sa Korte Suprema ang hatol laban sa kanila.

Nagpahayag ng suporta ang Department of Health (DOH) sa plano ng Department of Education (DepEd) na ipatupad ang full face-to-face classes sa bansa sa Nobyembre.

Sinabi ni Health Undersecretary Maria Rosario Vergeire, kailangan lamang tiyakin ng DepEd ang kaligtasan ng mga mag-aaral sa oras na ipatupad ito.

Aniya, kung hindi talaga kakayanin ang pagkakaroon ng physical distancing sa mga classroom ay dapat masunod pa rin ang minimum public health standards.

Dagdag pa nito na gawing mandatory rin ang pagsusuot ng face mask maliban na lamang kung may mga aktibidad na kailangan itong tanggalin.

Bagama’t hindi mandatory na dapat bakunado ang mga lalahok na mag-aaral, iginiit naman ni Vergeire na dapat bakunado ang mga guro maging ang mga non-teaching personnel na makakasalamuha ng mga ito.

Nakahanda na ang mga miyembro ng Private Hospitals Association of the Philippines Incorporated (PHAPI) sa posibleng pagdami ng na-a-admit na covid-19 patients, partikular ang mga severe at critical ngayong buwan.

Ayon kay PHAPI President Dr. Jose Rene de Grano, ang tangi nilang limitasyon ay ang posibilidad ng kakulangan ng mga healthcare worker.

Batay sa datos ng OCTA Research Group, pitong lalawigan na ang may mahigit 10% positivity rate at patuloy na tumataas sa iba’t-ibang bahagi ng bansa.

Ito ay ang mga probinsya ng Antique, 20.6%; Laguna, 17.3%; Rizal, 16.5%; Pampanga, 17.3%; Cavite, 13.2%; Batangas, 10.7% at Iloilo, 10.1%.

Sa National Capital Region, lumundag sa 9.8% ang positivity rate noong Martes, Hulyo a – 5 kumpara sa 8.3% noong Hulyo a – 2.

Nakapagtala ang National Capital Region (NCR) ng 533 dengue cases o 16% mula May 22 hanggang June 4.

Batay sa datos ng DOH, naitala ang 458 cases mula May 8 hanggang May 21 kung saan 13 dito ang nasawi sa naturang sakit.

Naitala naman ang pinakamaraming dengue cases sa Quezon City, na sinundan ng Caloocan, Taguig, Valenzuela, at Malabon.

Samantala, nagbabala naman ang DOH sa publiko na posible pang tumaas ang kaso ng dengue bunsod ng pag-ulan.

Naitala ng Department of Health (DOH) ang karagdagang 70 kaso ng Omicron subvariants ng BA.4, BA.5, at BA.2.12.1.

Ayon sa DOH, 43 kaso ng BA.5 ang natukoy, kung saan 42 ang local cases habang isa naman ang Returning Overseas Filipino.

20 naman ang nagpositibo sa BA.2.12.1 habang pito ang naitalang kaso ng BA.4

Sinabi pa ng ahensya na mayroong 190 cases ng Omicron variant of concern mula sa pinakahuling whole genome sequencing na isinagawa mula Hunyo 29 hanggang Hulyo 4.

Sa ngayon ay umabot na sa 7,919 ang kabuuang bilang ng kaso ng Omicron sa Pilipinas.

Samantala, sinabi ni Health Undersecretary Maria Rosario Vergeire na nananatili sa low risk category ang total hospital bed utilization sa buong bansa at wala pang nasasawi mula sa naitalang kaso ng Omicron sub-variants.

Planong mas dalasan ng Administrasyong Marcos ang pagsasagawa ng cabinet meeting sa Malacañang.

Kasunod ito ng hindi natapos na unang cabinet meeting kung saan, marami pang usapin ang kailangang talakayin.

Ayon kay Pangulong Ferdinand “Bongbong” Marcos Jr., sa mga susunod na linggo, posibleng maging dalawa na ang cabinet meeting ng kaniyang gabinete upang ganap na mailatag ang mga plano sa ilalim ng kaniyang administrasyon.

Sinabi pa ni Marcos, na mahalagang maunawaan ng buong gabinete ang kanilang mga ipatutupad, at kung sa papaaanong paraan nila ito isasakatuparan.

Matatandaan na isang beses kada buwan lamang ang pagdaraos ng pulong ng mga miyembro ng gabinete sa Malacañang.