HOT STORIES OF THE WEEK

Matatapos na ang paglilinis sa listahan ng mga benepisyaryo ng Pantawid Pamilyang Pilipino Program (4Ps) ayon kay DSWD secretary Erwin Tulfo.

Aniya nasa tatlo hanggang limang linggo na lamang ay tapos na ang pag-alis sa mga libo-libong pangalan ng mga hindi kwalipikadong benepisyaryo.

Ito’y upang matiyak aniya na tanging mga karapat-dapat na mga benepisyaro lamang ang makatatanggap ng naturang ayuda.

Matatandang, nauna nang iniulat ng World Bank na 60% lamang ng mga benepisyaryo ng 4Ps noong 2020 ang kabilang sa pinakamahirap o mga kwalipikadong makatanggap mula sa cash subsidy program.

Isinailalim na sa State of Calamity ang Munisipalidad ng Banaue sa Ifugao dahil sa matinding pagbaha.

Ayon kay Banaue Mayor Joel Bungallon, ipinatupad nila ang hakbang para matugunan ang pangangailangan ng mga naapektuhang residente.

Habang layon din nitong magamit ang pondo ng naturang bayan para sa agarang rehabilitasyon.

Batay sa datos ng Department of Social Welfare and Development sa Cordillera Administrarive Region, higit 300 bahay na ang nasira na nakaapekto sa mahigit 300 pamilya.

Wala ring suplay ng tubig sa ilang lugar dahil sa pagkasira ng water system.

Maghihigpit na ang Department of Trade and Industry (DTI) sa paglalagay ng expiration date sa mga produkto sa bansa.

Inanunsiyo ito ni Trade Undersecretary Ruth Castelo matapos ang bilin ni Trade Secretary Alfredo Pascual kasunod nang ulat na ilang manufacturers ang hindi sumusunod sa panuntunan.

Ayon kay Castelo, gagawin nang visible o mabilis makita ang mga marka sa produkto upang malaman kung hanggang kailan ito maaaring ikonsumo.

May mga paninda aniya na sa kahon lang nakalagay ang expiration date pero hindi sa mismong produkto.

Kaya kung mabibili ito ng mga customers, hindi malalaman kung maayos o expired na ang paninda.

Nakapagtala ang Commission on Elections ng kabuuang 487,628 na mga new registered voters, at mahigit sa kalahati nito ang nasa edad 15 hanggang 17, na nakatakda nang bumoto sa para sa Sangguniang Kabataan (SK) election sa Disyembre a-5.

Base sa Nationwide consolidated total ng Comelec as of July 8, 2022, nasa 302,040 sa mga new voters ang 15 to 17 years old; 157,925 ang 18 to 30 year-olds; 27,663 ang 31 year-olds at 27,553 ang mahigit 32-taong gulang.

Iniulat din ni Comelec acting spokesperson John Rex Laudiangco na mayroon din silang naiproseso na mga applications for transfer na aabot sa 661,919.

Sinimulan ng Komisyon ang voter registration noong July 4 at magtatagal hanggang sa July 23, 2022 mula Lunes hanggang Sabado sa ganap na alas 8 ng umaga hanggang ala-5 ng hapon.

Pumalo na sa 13K kaso ang Active Covid-19 cases sa bansa.

Base sa datos ng Department of Health (DOH), lumalabas na umabot na sa kabuang 13,021, ang mga aktibong kaso habang 1,825 naman ang new infections na naitala kahapon.

Mula ito sa dating 12,528 active cases at 1,712 Covid-19 infections.

Dahil sa mga bagong kaso, umabot na sa 3,716,522 ang nationwide tally ng DOH.

Ayon sa ahensya, nakapagtala ang National Capital Region ng 7,228 new cases noong nakalipas na dalawang linggo, sinundan ng CALABARZON na may 3,127, Western Visayas – 1,349, Central Luzon – 1,228, at Central Visayas na may naitalang 645 cases.

Mas maraming bilang naman ang bilang ng mga recovery na umakyat na sa 3,642,862, habang nananatili naman sa 60,639 ang death toll.

Nilinaw ni Department of Transportation Secretary Jaime Bautista  na tanging ang Light Rail Transit (LRT-2) pa lamang ang siguradong magpapatupad ng libreng-sakay sa mga estudyante kapag nagkaroon ng face-to-face classes.

Pero sinabi ni Bautista na irerekomenda rin ng DOTr na magkaroon ng libreng-sakay sa mga estudyante sa Metro Rail Transit (MRT-3) at sa Philippine National Railways (PNR).

Matatandaang, noong Miyerkules ay nag-inspeksyon sa mga tren ng MRT-3 si Bautista kung saan pinadaragdagan niya ng mga medical team sa bawat estasyon at pasilidad para sa mga senior citizen.

Patuloy na lalago ang ekonomiya ng bansa sa huling bahagi ng taon.

Ito’y sa kabila ng pagtaas ng presyo ng produktong petrolyo at mga bilihin at sa bahagyang paggalaw ng Gross Domestic Product (GDP) growth ng bansa.

Ayon kay Department of Budget Management (DBM) Secretary Amenah Pangandaman na lalago ang ekonomiya sa 6.5% hanggang 7.5% ngayong taon at hanggang 8% sa pagsapit ng 2028.

Inaaasahan ng bagong economic managers ang paglago ng ekonomiya at mainam na tax administration sa ilalim ng Marcos administration para makalikom ng kinakailangang pondo.

Ipinanalangin ni Vice President Sara Duterte ang agarang paggaling ni President Ferdinand Bongbong Marcos Jr.

Ito’y matapos magpositibo sa COVID-19 antigen testing ang Punong Ehekutibo kahapon.

Sinabi pa nito na nawa’y  patuloy na biyayaan ng mabuting kalusugan ang Pangulo upang mapamunuan ang bansa ng maayos.

Ayon kay health undersecretary Maria Rosario Vergeire na naka-isolate ngayon si PBBM na tatagal ng pitong araw at nasa doktor na kung isasailalim pa ito sa confirmatory RT-PCR test.

Aniya, kung magiging maayos na ang pakiramdam nito ay maaari nang bumalik sa mga gawain si PBBM.

Handang ipagpatuloy ng pamahalaan ang fuel subsidy program sa mga sektor ng transportasyon.

Ito ang inihayag ni Department of Finance secretary Benjamin Diokno para makatulong sa mga kababayan na lubhang apektado ng sunod-sunod na mataas na singil sa presyo ng produktong petrolyo sa bansa.

Ngunit sinabi rin ni Diokno na inaasahan naman na magiging stable na ang presyuhan ng langis sa world market.

Sa kabilang banda, ipinabatid naman ni Department of Budget and Management secretary Amenah Pangandaman bagama’t sinabi ng pamahalaan na handa itong ipagpatuloy ang fuel subsidy program ay wala pa aniya silang natatanggap na kahilingan mula sa Department of Transportation (DOTr).