HEALTH

Mainitin ba ang inyong ulo o madalas kang magalit?

Kung madalas kang manigaw, hindi mamansin ng mga tao, makipag-away, manira ng mga gamit, at saktan ang sarili, narito ang ilang tips upang makontrol ang iyong anger problems:

Una, huminto. Pag-isipan nang mabuti ang gagawing reaksyon sa pamamagitan ng mabagal na pagbibilang mula isa hanggang sampu.

Pangalawa, lumayo. Huminga muna nang malalim at hintaying kumalma ang sarili bago magbitiw ng mga salita at gumawa ng aksyon.

At pangatlo, unawain ang dahilan ng iyong pagkagalit.

—sa panulat ni John Riz Calata

Naranasan mo na bang paulit-ulit na pag-ihi na may kasamang hapdi? Baka urinary tract infection o UTI na ‘yan.

Ayon sa urologist, karaniwang sanhi ng UTI ang pagpasok ng bacteria, gaya ng E. coli, sa urinary tract o daanan ng ihi. Madalas itong nangyayari kapag kulang sa pag-inom ng tubig, pinipigilan ang pag-ihi, o hindi tamang paraan ng paghuhugas matapos dumumi.

Mas mataas din ang posibilidad ng UTI sa mga babae dahil mas maikli ang kanilang urethra, kaya mas madaling makapasok ang bacteria.

Maaari rin itong makuha sa hindi malinis na pakikipagtalik at paggamit ng maruming banyo.

Kaya paalala ng mga eksperto, ugaliing uminom ng maraming tubig, huwag pigilan ang pag-ihi, at panatilihing malinis ang ari. Sa ganitong paraan, maiiwasan mo ang sakit at abalang dulot ng UTI.

Kumakain ka ba ng itlog na maalat?

Alam niyo bang hindi lang pang-partner sa kamatis at sinangag ang itlog na maalat o salted egg… may taglay din pala itong sustansya!

Ayon sa mga eksperto, puno ito ng lutein, calcium, potassium, at choline na nakatutulong sa mata, buto, balat, at utak ng tao.

Ngunit, hinay-hinay lang sa pagkain nito dahil mataas sa sodium content ang salted egg na maaaring magdulot ng sakit sa puso at pagtaas ng blood pressure.

Kaya’t mga kababayan, enjoy sa pagkain ng itlog na maalat sa tamang dami lang dahil kahit ito’y masarap lahat ng sobra ay nakasasama sa ating kalusugan!

Alam mo ba na may makukuhang benepisyo sa pag-inom ng maligamgam at sapat na tubig araw-araw?

Mabuti ang maligamgam na tubig sa tiyan para sa maayos na pagtunaw ng ating kinain at makapasok ang sustansya sa ating katawan.

Maaari ring makapagpa-buka ng blood vessel ang maligamgam na tubig para dumaloy nang mas maayos ang dugo at sustansya.

Kahit ang isang tasang maligamgam na tubig ay nakakatulong din para mabawasan ang stress at anxiety ng tao.

Maliban dito, ayon sa research, ay magkakaroon din ng mas maayos na tulog ang sinumang iinom ng isang tasang maligamgam na tubig, at makakatulong din para maiwasan ang magising sa madaling-araw at makakuha ng sapat na lakas sa susunod na umaga.

Alam mo ba na maaaring magdulot ng malubhang sakit sa katawan ang sobrang galit?

Ayon sa mga eksperto, ang matinding galit ay nagdudulot ng biglaang pagtaas ng blood pressure na maaaring humantong sa stroke o atake sa puso.

Bukod dito, ang madalas na pagkagalit ay nakakahina sa immune system kaya mas madaling magkasakit ang isang tao.

Nakapagdudulot din ang galit ng problema sa pagtulog, dahil sa tensyon at iniisip na dulot nito.

Apektado rin ang sistema ng pagtunaw ng pagkain, na posibleng magresulta sa pananakit ng tiyan o ulcer.

Higit pa rito, ang galit ay nagpapalabas ng stress hormones na maaaring magpahina sa kalusugan ng puso, kaya’t mahalagang matutunan ng bawat isa ang tamang paraan ng pagpapatawad at pagpapakalma upang mapanatili ang kalusugan.

Sabi nga ni Mark Twain, “Ang galit ay parang asido, mas sinisira nito ang lalagyan kaysa sa pinagbuhusan.” —sa panulat ni Daniela De Guzman

Mahilig ka rin bang mag-diet at iniisip mong alisin na lang ang kanin para mas mapabilis ang pagpayat?

Ayon sa mga nutritionist, ang kanin ay pangunahing pinagkukunan ng carbohydrates na nagbibigay ng enerhiya sa katawan. Kapag bigla itong tinanggal sa diet, maaaring makaramdam ng panghihina, pagkahilo, at pagiging iritable, dahil bumababa ang glucose na ginagamit ng utak at kalamnan.

Kapag tuluyang walang carbohydrate sa diet, maaaring tumaas ang ketones sa dugo, na posibleng magdulot ng fatigue o keto flu.

Dagdag pa rito, maaari ring magkaroon ng nutrient imbalance kung puro protina at taba ang kinakain at kulang sa fiber, vitamins, at minerals.

Ayon sa mga eksperto, hindi kailangang tuluyang alisin ang kanin. Mas mainam na bawasan lang ang dami o palitan ng mas masustansyang uri tulad ng brown rice o red rice.

Napapansin mo rin ba na kung minsan, nagiging kulay grayish o greenish at hindi kulay yellow ang egg yolk ng niluluto mong hard-boiled egg?

Paliwanag ni University of Illinois Food Science and Human Nutrition Associate Professor, Dawn Bohn, mula sa init ang dahilan ng pagkakaroon ng discoloration sa egg yolk, na tinatawag ding denaturation ng mga scientists.

Batay sa mga report, hindi lang ito nangyayari sa mga nilagang itlog, dahil kapag malakas ang apoy ng iyong pagluluto, nagkakaroon din ng grey color ang scrambled eggs at omelet.

Samantala, nilinaw naman ng University of Nebraska na ligtas pa ring kainin ang mga hard-cooked egg kahit na nag-iiba ito ng kulay.

Madalas ka bang nakatutok sa cellphone o computer buong araw? Ingat, dahil maaari itong magdulot ng tinatawag na digital eye strain.

Ayon sa mga eksperto, ang sobrang paggamit ng gadgets ay nakakaapekto sa kalusugan ng mata na nagdudulot ng digital eye strain.

Karanasan ang panlalabo ng paningin, pangangati o pamumula ng mata, at madalas na pananakit ng ulo ang sintomas ng nasabing sakit.

Dagdag pa ng mga doktor na dahil sa matagal na pagtutok sa screen, bumababa ang ating pagkukurap, kaya natutuyo ang mga mata.

Kung pababayaan, maaari itong magdulot ng mas malalang problema sa paningin at makaapekto pa sa productivity sa trabaho o pag-aaral.

Kaya’t paalala ng mga eksperto, sundin ang 20-20-20 rule kung saan tuwing kada dalawampung minuto, tumingin sa bagay na dalawampung talampakan ang layo sa loob ng dalawampung segundo.

—Sa panulat ni Jem Arguel

Minsan, hindi natin namamalayan na sobra na tayong naaapektuhan ng nakikita at nababasa sa social media. Kaya mahalaga rin ang “detox” mula sa tinatawag na doomscrolling.

Ayon sa mga eksperto, magandang simulan ito sa paglalagay ng digital curfew o oras kung kailan hindi na dapat ginagamit ang cellphone. Mainam din kung gagamit ng built-in time limit feature sa apps, o pansamantalang i-uninstall ang mga madalas pag-scroll-an.

Bilang alternatibo, subukan ang offline activities tulad ng paglalakad, pag-eehersisyo, pagdalo sa social gatherings, o simpleng pakikipag-usap sa kaibigan.

Nais mo bang magbawas ng timbang? Narito ang ilang tips na maaari mong gawin tuwing pagkagising ayon kay Dr. Winston Tiwaquen, mas kilala bilang Dr. Kilimanguru, isang general practitioner:

Mag-stretch muna – Nakakatulong itong magising ang katawan at maiwasan ang pananakit ng muscles.

Maglaan ng kahit 10 minuto para sa aerobic exercise – Para mapaganda ang sirkulasyon ng dugo at makapagbigay ng dagdag-enerhiya bago pumasok sa trabaho o klase.

Huwag laktawan ang almusal – Siguraduhing 50% fiber, 25% protein, at 25% carbohydrates ang laman ng iyong plato tuwing kakain.

Sa ganitong paraan, mas magiging busog ka nang mas matagal at makakaiwas sa binge eating.

Kaya bago mag-social media, bigyan muna ng oras ang katawan — stretch, galaw, at kumain nang tama.