HEADLINES

Inihain na ni Las Piñas Rep. Camille Villar ang House Bill 6543 na layuning magbigay ng insurance, benefits at “Tax-Exempted Hazard Pay” sa lahat ng media workers,  regular man, kontraktuwal o freelancer.

Kabilang sa mga matatanggap sakaling maisabatas ang Bill ay Disability Benefit na P350,000 sa lahat ng media workers na magtatamo ng total o partial disability habang nasa trabaho;

P300,000 death benefits para sa mga mamamatay sa trabaho; P200,000 reimbursement ng actual medical costs para sa lahat ng ma o-ospital o kakailanganin ng medical assistance habang nagtratrabaho;

Tax-Exempted Hazard Pay na katumbas o hindi bababa sa 25% na Monthly Gross Basic Salary tuwing ide-deploy sa calamity affected areas, conflict areas, lugar na talamak ang sakit at iba pang peligrosong lugar.

Ilan naman sa ipinagbabawal sa panukala ang pagtanggi o kabiguan ng media entities na magbigay ng karagdagang Insurance Coverage at hazard pay o pag-tanggi ng insurance companies na i-enroll ang mga mamamahayag at empleyado ng mass media entities at freelance journalists.

Samantala, pagmumultahin ng hindi bababa sa P300,000 at maaaring makulong ng isa hanggang anim na taon  ang mga lalabag kapag napatunayang nagkasala.  —sa panulat ni Hannah Oledan

Nagpaabot ng pasasalamat sa pamahalaan si dating Department of National Defense (DND) OIC at Senior Undersecretary General Jose Faustino Jr. matapos maghain ng kanyang irrevocable resignation sa tanggapan ni Pangulong Ferdinand “Bongbong” Marcos Junior.

Ayon kay Faustino, sa kaniyang ilang buwang serbisyo sa institusyon, kaniyang ibinigay ang makakaya para maprotektahan ang mamamayan at mapangalagaan ang panloob at panlabas na seguridad ng Pilipinas.

Sinibi pa ni Faustino na malaki ang pagbabago ng ahensya at napanatili ang pagmamahal, tiwala at respeto ng mga Pilipino na nakatulong sa pagprotekta laban sa mga banta mula sa ibang mga bansa.

Aminado si Faustino, na agad siyang nagbitiw sa kaniyang pwesto makaraang ibinalik sa pwesto ang dating Chief of Staff ng AFP na si Gen. Andres Centino.

Aabot sa 30 station commanders ng National Capital Region Police Office (NCRPO) ang sumailalim sa drug test kahapon bilang bahagi ng internal cleansing ng Philippine National Police (PNP).

Ayon sa NCRPO, nagsagawa sila ng hakbang bilang tugon sa panawagan at kampaniya ng DILG matapos masangkot sa iligal na droga ang mga tauhan ng PNP.

Layunin ng ahensya na mapatunayan na walang kinalaman sa illegal drug trade ang NCRPO.

Iginiit ng ahensya na 100% silang kumpiyansa na malinis ang kanilang hanay laban sa paggamit at pagbebenta ng iligal na droga sa bansa.

Iginiit ng National Telecommunications Commission (NTC), na dapat suyurin ng mga telecommunication company ang mga liblib na lugar sa pagsasagawa ng sim registration.

Kasunod ito ng pahayag ng DICT na nananatili pa ring mababa ang bilang ng mga rehistradong sim cards sa bansa.

Ayon kay NTC OIC-Commissioner Atty. Ella Blanca Lopez, dapat na personal na bisitahin ang mga residenteng nasa malalayong lugar partikular na ang mga hindi inaabot ng internet o yung mga lalawigan na walang signal.

Sinabi ni Lopez na ang mga residenteng nasa liblib na lugar ay hindi naman umano madalas lumabas ng kanilang mga bahay o lugar lalo na kung hindi naman kinakailangan.

Matatandaang sa naging pahayag ng Department of the Interior and Local Government (DILG), nakikipag-ugnayan na ang kanilang ahensya sa mga lokal na pamahalaan para tugunan ang problema sa Sim Registration.

Sa ngayon, nasa 165 na lang ang natitira araw ng para sa deadline ng rehistrasyon pero handa umano ang DICT na palawigin ang araw ng deadline kung kinakailangan.

Ipinauubaya na ni DOH Officer-In-Charge Maria Rosario Vergeire kay Pang. Ferdinand Marcos Jr., kung itatalaga siya nito o hindi bilang kalihim ng nasabing kagawaran.

Ito’y matapos italaga ng Pangulo sina Atty. Cheloy Garafil bilang Presidential Communications Office Secretary at Carlito Galvez, bilang Defense Secretary.

Magugunitang inihayag ni PBBM na magtatalaga ito ng full-time Health secretary kapag naging normal na ang sitwasyon sa bansa sa harap ng Covid-19 pandemic.

Pitong buwan nang bakante ang posisyon ng DOH secretary habang nananatiling OIC ng ahensya si Vergeire. —sa panulat ni Hannah Oledan

Aminado ang Department of Information and Communications Technology (DICT) na halos 70% sa bansa ang walang internet na isa sa mga dahilan kung bakit naaapektuhan ang sim registration.

Ayon kay DICT Undersecretary Anna Mae Lamentillo, sa loob ng 15 araw, mababa pa rin ang bilang ng rehistradong sim card kung saan, mula sa tinatayang 168-M na active sim, mahigit 16-M pa lamang ang mga Pilipinong nagparehistro.

Sinabi ni Lamentillo na plano nilang bisitahin ang mga lugar na may mahinang internet connectivity para sa pagpapatuloy ng rehistrasyon.

Sa kabila nito, iginiit ng opisyal na hindi dapat ika-alarma ang mababang koneksiyon sa internet ng bansa dahil maituturing pa lamang na test period ang dalawang linggong aktibidad.

Dagdag pa ni Lamentillo, na gumagawa na ng hakbang ang pamahalaan, para agad na matugunan ang naturang problema at mapataas ang bilang ng mga registrants.