HEADLINES

Inihayag ni Department of the Interior and Local Government (DILG) Sec. Benhur Abalos Jr., na katumbas ng P7-B halaga ng iligal na droga ang umano’y kinasasangkutan ng ilang pulis sa bansa.

Kasunod ito ng pagkakadiskubre na may ilang mga tauhan ng PNP ang sangkot sa illegal drug trade kabilang na ang matataas na opisyal ng ahensya.

Matatandaang hinamon ni Abalos na magsumite ng courtesy resignation ang mga tauhan ng PNP kung saan, nasa 60% na o katumbas ng mahigit 500 pulis ang nakapagsumite na ng kanilang resignation.

Iginiit ni Abalos na habang iniimbestigahan ang mahigit 900 mga opisyal na kasama sa courtesy resignation, mananatili pa rin ang mga ito sa kani-kanilang mga puwesto at patuloy na gagampanan ang kani-kanilang mga tungkulin.

Una nang sinabi ni PNP Chief Gen. Rodolfo Azurin Jr., na ang pagpasa ng resignation call ng matataas na opisyal ay bilang bahagi ng internal cleansing para patunayan na hindi tinatanggap ng kanilang ahensya ang ganitong uri ng katiwalian at bilang direktiba narin sa apela ni Interior Secretary Benjamin Abalos Jr.

Ipipresenta na ng Department of Education (DepEd) ang kanilang Basic Education Report (BER) sa Enero 30.

Layon ng BER 2023 na ipakita ang kalagayan ng basic education sa bansa, maging ang mga plano at inisyatibo ng kagawaran.

Target din ng DepEd na magbigay ng mas malawak na ulat hinggil sa education sector, maglunsad ng education agenda at magbigay ng update sa nagpapatuloy na review ng K-to-12 curriculum.

Samantala, sinabi ni Malacañan Press Briefer Daphne Paez na inilahad ni Vice President at Education Secretary Sara Duterte ang mga plano nito para sa inclusive learning, pagsuporta sa mga guro at pagpapabuti ng curriculum. —sa panulat ni Hannah Oledan

Namahagi ng Cash at In-kind donation sina House Speaker Martin Romualdez, Tingog Party-list Representatives Yedda Marie Romualdez at Jude Acidre sa mga residente ng Davao del Norte na apektado ng pagbaha.

Maliban sa P1M cash aid, ipinamahagi rin ang nasa 1,600 food packs sa mga residente ng Tagum City at mga Bayan ng New Corella, Asuncion, Kapalong, Carmen, at Braulio Dujali.

Tiniyak naman ni Romualdez na maka-aasa ang mga Pilipino sa mabilis na pagtugon at pagpapaabot ng tulong ng Kamara sa mga lugar na apektado ng kalamidad.

Magugunitang nakaranas ng flashfloods ang ilang bahagi ng Mindanao bunsod ng malakas na pag-ulan dala ng shearline noong Disyembre. —sa panulat ni Hannah Oledan

Sisimulan na ngayong araw ang Nationwide Simultaneous Special Satellite Registration ng Commission on Elections (COMELEC) para sa mga bilanggo sa lahat ng pasilidad ng Bureau of Jail Management and Penology (BJMP) maging sa Bureau of Corrections (BuCor).

Isasagawa ang ceremonial kick off ng Special Registration sa New Bilibid Prisons Compound sa Muntinlupa City.

Inaasahan naman ng COMELEC na makikiisa ang mahigit 3,000 Persons Deprived of Liberty sa naturang aktibidad.

Bahagi pa rin ito ng patuloy na paghahanda ng poll body para sa Barangay at Sangguniang Kabataan Elections ngayong taon.—sa panulat ni Hannah Oledan

Tumanggap ng Service Recognition Incentive (SRI) ang nasa 220K uniformed at non-uniformed personnel ng PNP.

Batay sa ulat ng PNP Finance Service, tinanggap ng mga kawani ng pambansang pulisya na nakapaglingkod na ng mahigit apat na buwan ang P7,000 na SRI.

Ang SRI ay ipinatupad alinsunod sa Executive Order 1 ni Pangulong Ferdinand Marcos Jr., bilang pagkilala sa serbisyo ng mga tauhan ng pamahalaan, partikular na noong kasagsagan ng Covid-19 pandemic. —sa panulat ni Hannah Oledan

Handa umano si Civil Aviation Authority of the Philippines (CAAP) Director General Manuel Antonio Tamayo na maghain ng Leave of Absence sakaling pagdudahan ng investigating team hinggil sa aberya sa Air Traffic Management System (ATMS).

Sa gitna ito ng panawagan ni Cagayan de Oro Rep. Rufus Rodriguez na lumiban muna si Tamayo kasama ng ibang opisyal ng CAAP na may kinalaman sa operasyon at pamamahala ng NAIA, partikular sa sumablay nitong ATMS.

Ayon kay Tamayo, kung kailangang mag-leave siya ay kanya itong gagawin upang hindi maimpluwensyahan ang isinasagawang imbestigasyon.

Kakausapin rin aniya ng opisyal si Transportation secretary Jaime Bautista kaugnay sa kanyang Leave of Absence.  —sa panulat ni Hannah Oledan

Siniguro ng Department of Education (DepEd) na mananatiling prayoridad ng ahensya ang pagtatatag ng “Safe Spaces” para sa mga mag-aaral, teaching at non-teaching personnel.

Ayon sa DepEd, handang tumugon ang Learners Telesafe Contact Center helpline sa mga isyung may kinalaman sa pang-aabuso.

Binigyang-diin ng ahensya na hindi dapat mag-alinlangan na magsumbong sa naturang helpline ang mga mag-aaral o sinuman na nakararanas ng pang-aabuso.

Ayon kay Vice President at DepEd secretary Sara Duterte ay may kabuuang 1,871 child abuse cases nang naitala ang Learner Rights and Protection Office (LRPO) mula 2019 hanggang 2020.

Samantala, ang sinumang makararanas ng pang-aabuso ay maaaring makipag-ugnayan sa DepEd LRPO sa numerong 0945-175-9777 o sa (02) 8632-1372 at sa email address na weprotectlearners@deped.gov.ph. —sa panulat ni Hannah Oledan