HEADLINES

Posibleng magkaroon ng cartel sa mga produktong agrikultura tulad ng bigas, baboy, manok, sibuyas at bawang.

Ito ayon kay AGAP partylist Rep. Nick Briones ay dahil sa sobrang pag-iimport kapag nagkaroon ng kakulangan sa suplay dahilan naman para bumaha ang suplay at bumagsak ang presyo ng lokal na produkto.

Binanggit din sa DWIZ ni Briones na isinusulong nila ang batas kung saan, mapupunta ang pondong makukuha mula sa taripa ng smuggled products ay ibibigay sa mga kaukulang sektor.

Sinabi pa ni Briones, na dapat pondohan ang Anti-Smuggling Task-Force para paigtingin ang paghuli sa mga kawatan na nagpupuslit ng Agri-products. —sa panulat ni Hannah Oledan

Nagtalaga si Pangulong Ferdinand Marcos Jr., ng dalawang opisyal ng Office of the President (OP).

Ayon kay Presidential Communications Office sec. Cheloy Garafil, sina Antonio Paolo Serrano Lim at Peter Anthony Joseph Felarca Felix ang iniluklok ni Pangulong Marcos, bilang bagong Assistant Secretary ng Office of the Senior Deputy Executive Secretary na nasa pamamahala ng OP.

Itinalaga naman si Manuel Lahoz Argel Jr., bilang acting member ng Social Security Commission, na kumakatawan sa employers group.

Maliban sa tatlo, in-appoint din ni PBBM si Lolibeth Ramit-Medrano bilang Commissioner ng Philippine Competition Commission.

Sa ngayon, nanumpa na sa kani-kanilang mga tungkulin ang mga bagong talagang opisyal. —ulat mula kay Gilbert Perdez (Patrol 13)

Natanggap na ng Department of Migrant Workers (DMW)  ang P566M na pondo para sa taong 2023.

Ayon kay Susan Toots Ople, Secretary ng DMW, kauna-unahang bahagi ito ng kanilang pondo para sa unang kwarter ng taon, na nagmula sa kabuuang P15.8B na General Appropriations Act.

Mula sa nasabing halaga, P4.1B ay para sa Office of the Secretary, habang P11.7B ang mapupunta sa Overseas Workers Welfare Administration (OWWA).

Bagaman naitatag at naisabatas ang paglikha ng DMW nitong 2022, hindi na naihabol ang pondo para sa kanila kaya ngayong taon pa lamang sila napaglaanan ng pondo sa ilalim ng 2023 National Budget.

Isang sekyu sa  Ninoy Aquino International Airport (NAIA) ang nagsauli ng isang bag na naglalaman ng P1.5M cash.

Kinilala ang security guard na si Albert Bautista na una na ring nagsauli ng malaking halaga ng pera sa isang dayuhan noong 2017.

Ayon kay Bautista, hindi kailangang angkinin ang hindi naman niya pagmamay-ari, dahil hindi ganoon ang paraan ng pagpapalaki sa kaniya.

Binigyan naman ni Manila International Airport Authority General Manager Cesar Chiong ng commendation letter si Bautista dahil sa katapatan nito.

Maliban sa letter, nakatanggap din ng reward ang sekyu mula sa may-ari ng bag. —ulat mula kay Raoul Esperas (Patrol 45)

Nakapagtala ang Department of Health (DOH) ng 332 bagong nahawa sa Covid-19 kahapon.

Ayon sa DOH, ikatlong araw na itong mababa sa 500.

Bumulusok din sa 11,856 ang active cases, mula sa 12,267 noong Lunes.

Dahil sa bagong kaso, umakyat na sa 4,068,425 ang nationwide Covid-19 tally sa bansa.

Ang National Capital Region pa rin ang nangunguna sa may pinakamaraming kaso sa loob ng dalawang linggo, sinundan ng CALABARZON at Central Luzon.

Maliban sa naturang bilang, umaabot na ngayon sa 3,991,071 ang mga gumaling, habang 65,498 ang mga nasawi dahil sa Covid-19.

Papalo lang sa halos 2M deboto ang lumahok sa pagdaraos ng Pista ng Poong Itim na Nazareno sa Quiapo, Maynila nitong Lunes.

Ayon kay Father Earl Valdez, tagapagsalita ng Quiapo Church, higit na doble ang bilang sa naitala noong 2021, ngunit malayo kumpara sa 5M bilang ng deboto noong bago nagsimula ang pandemya.

Dahilan ng maliit na bilang ang kanselasyon ng ‘’Traslacion’’ dahil sa Covid-19 pandemic.

Ang ‘Walk of Faith’ procession mula sa Quirino Grandstand hanggang Quiapo Church ay kaunti rin ang dumalo, malayo sa tradisyunal na “Traslacion,” kung saan nagkukumpulan ang mga tao sa paligid.

Ngayong 2023 na ang ikatlong taon na sinuspinde ang Traslasyon, na Reenactment ng 1787 Traslacion na nangangahulugang “Solemne Transfer” ng imahe mula sa orihinal nitong dambana sa Bagumbayan, na kasalukuyang Rizal Park, hanggang sa Quiapo Church.

Pumalo na sa mahigit P200M ang pinsalang iniwan sa imprastruktura at agrikultura ng Low Pressure Area (LPA) sa loob ng bansa.

Ayon sa Office of Civil Defense (OCD), nasa P125M ang naitalang pinsala ng lpa sa imprastruktura habang P77M sa agrikultura.

Ang mga lugar na naapektuhan ng sama ng panahon ay ang; Bicol Region, Western At Eastern Visayas, MIMAROPA, Northern Mindanao, Davao, Caraga, at BARMM.

Sa pinakahuling datos pa ng OCD, umaabot na ngayon sa 815 pamilya o katumbas ng 3,387 indibidwal ang nananatili sa evacuation centers.

Pinayuhan naman ng ahensiya ang mga lokal na pamahalaan na tukuyin ang mga lugar na madaling magkaroon ng baha at pagguho ng lupa, upang maiwasan o mabawasan ang pinsala at casualties.

Pumalo na sa 99 na trak ng basura ang nahakot sa Quiapo Church at Quirino Grandstand sa Maynila.

Ito ay matapos ang pagdaraos ng Pista ng Poong Itim na Nazareno, kung saan bumuhos ang bilang ng tao sa naturang lungsod.

Ayon kay Princess Abante, opisyal ng Manila Public Information Office, aabot sa 265 metriko toneladang basura ang kanilang nakolekta, mula Enero 6 hanggang 10.

Mas mataas na ito kumpara sa nakalipas na panahon kung saan noong 2020 ay nakakolekta ng 88 trak, 57 noong 2021 at 34 noong 2022.

Wala pang nakikitang pagtaas sa kaso ng Covid-19 ang Department of Health (DOH) sa kabila ng nagdaang pagtitipon dahil sa holiday season.

Ayon kay Health Officer-in-Charge Maria Rosario Vergeire, patuloy ang pagbaba ng kaso ng Covid-19 maging sa mga probinsya.

Bagaman may nakitang 1% pagtaas, hindi sapat ito para sabihing nagdulot ng surge ang paglabas ng tao nitong holiday.

Sinabi naman ni Vergeire na patuloy nilang imo-monitor Covid-19 case trend sa bansa, lalo’t kakatapos lang ng pagdaraos ng Pista ng Poong Itim na Nazareno.