HEADLINES

Mayroon nang rekomendasyon ang mga eksperto kung sino ang prayoridad na turukan ng Covid-19 bivalent vaccines, sa oras na maging available ito sa bansa.

Ayon kay Department of Health Officer-in-Charge Maria Rosario Vergeire, batay sa pinag-usapan ng mga eksperto, may inisyal nang rekomendasyon ang mga ito kung anong sektor ang unang mabibigyan ng bakuna.

Gayunman, hindi pa ito isasapubliko dahil kailangan pang isapinal ang bilang ng bakunang matatanggap.

Sinabi naman ni Vergeire na ibabase nila sa syensya at ebidensiya ang ilalabas na guidelines sa pagtuturok ng bivalent vaccines, na ginawa na rin noong unang bahagi ng Covid-19 vaccination program.

Sa kasalukuyan, nakikipag-usap na ang DOH sa mga gumagawa ng bakuna para sa pagbili ng bansa dito.

Target ng Department of Information and Communications Technology (DICT) na makapagrehistro ng isang milyong sim cards kada araw.

Kasabay ito ng implementasyon ng  Sim Card Registration Law, kung saan mayroong 80 araw, o anim na buwan ang mga subscribers para makapagparehistro ng kanilang pre-paid at post-paid sim card upang hindi ito ma-deactivate sa susunod na taon.

Ayon kay DICT Undersecretary Anna Mae Lamentillo, kasalukuyan nang nasa ‘On track’ ang gobyerno sa pag-abot sa nasabing bilang.

Gayunman, maaari pa ring magkaroon ng pagbaba sa bilang ng nagpaparehistro sa mga darating na araw, at pagkatapos ay tataas kapag malapit na ang deadline.

Sa huling datos ng DICT hanggang nitong Lunes, Enero 9 ay pumalo na sa 16M ang nairehistrong sim cards sa bansa, na malayo sa target na 170 milyon.

Ipinawalang bisa ng Korte Suprema ang Joint Marine Seismic Undertaking (JMSU) sa pagitan ng Pilipinas, China at Vietnam.

Sa botong 12-2-1, inihayag ng Supreme Court en banc na labag sa batas ang nabanggit na kasunduan dahil pinayagan nitong lumahok ang 100% na foreign corporations para sa paghahanap ng likas na yaman nang hindi tumatalima sa safeguards na inilaan ng 1987 Constitution ng Pilipinas.

Ang JMSU ang kasunduan sa pagitan ng Philippine National Oil Company, China National Offshore Oil Corporation at Vietnam Oil Gas Corporation, para sa Oil explorations sa West Philippine Sea.

Nakasaad sa isang clause ng kasunduan ang pagsasagawa ng joint research kung may langis sa naturang lugar.

Gayunman, nanindigan ang SC na malinaw na nilabag ng JMSU ang Section 2, Article 12 ng saligang batas na nagsasaad na ang mga Exploration, Development at Utilization ng Natural Resources ay dapat nasa ilalim ng kontrol at pangangasiwa ng estado.

Nag-ugat ang kaso sa Petition for Certiorari and Prohibition na inihain nina dating Bayan Muna Partylist Representatives Satur Ocampo at Teddy Casiño.

Pinagpapaliwanag ng Land Transportation Franchising and Regulatory Board ang ride-hailing company na Grab Philippines kung paano ang computation nito ng pasahe at surge rates.

Sa muling pag-arangkada ng pagdinig kahapon, inatasan ni LTFRB Board Member, Atty. Mercy Paras-Leynes ang Grab na maglabas ng mas detalyadong eksplanasyon.

Ipinunto naman ni Grab Legal Counsel, Atty. Jason Arteche na ipinatutupad ang surge fare kapag walang gaanong mga sasakyang mag-a-accommodate ng malaking bilang ng mga pasahero.

Una nang inireklamo ng Lawyers for Commuter Safety and Protection sa LTFRB na naaabuso ang surge rates kaya’t dapat magkaroon ng malinaw na patakaran upang hindi malagay sa alanganin ang mga pasahero.

Dapat bigyan ng ride-hailing company na Grab ang mga pasahero ng partikular na mga oras kung kailan dapat ipatupad ang surge charge.

ito ang panawagan ng grupong lawyers for commuter safety and protection (LCSP) kasabay ng muling pag-arangkada ng pagdinig ng Land Transportation Franchising and Regulatory Board sa issue kahapon.

Ayon kay LCSP President, Atty. Ariel inton, kahit hindi Pasko ay laging may pasahero at mayroong traffic congestion at rush hour kaya’t dapat maging malinaw ang pagpapataw ng surge rate ng Grab.

Pinapatawan din anya ng P85 ng Grab ang short trips o mga biyaheng wala pang apat na kilometro na isang paglabag sa fare matrix ng LTFRB.

Ibinabala naman ni Inton na may katapat na multang P5,000 ang bawat overcharge ng Grab kaya’t dapat lamang nitong ipaliwanag nang maigi ang issue sa kanilang surge rate.

Gayunman, nilinaw ng Grab na wala umano silang control sa surge charge dahil otomatiko itong ipinapataw ng kanilang app.

Aarangkada na ang buena manong dagdag-singil ng MERALCO ngayong taon.

Ito, ayon sa Meralco, ay makaraang sumipa ang generation charge ng P33.16 per kilowatt hour dahil nagmahal ang singil ng independent power producers, partikular ang First Gas Sta. Rita at San Lorenzo.

Dahil ito sa mas mahal na binibiling panggatong ng mga nasabing power producer bunsod ng kakulangan ng suplay ng natural gas mula sa malampaya.

Nagmahal din ang kuryente sa wholesale electricity spot market ng P68.8 per kilowatt hour dahil sa kakulangan ng suplay at tatlong araw nagdeklara ng yellow alert noong Disyembre.

Nadagdagan din ang kinukuhang kuryente sa WESM matapos suspendihin ng Court of Appeals ang power supply agreement ng South Premier Power Corporation sa MERALCO.

Humuhugot naman ng Kuryente ang Meralco sa GNPOWER dinginin limited pero hanggang january 25 lamang at mas mahal ito sa hinihinging increase ng s.p.p.c.

Para sa mga kumokonsumo ng 200 kilowatt per hour, madaragdagan ng P124 ang singil; P196 para sa 300 kilowatt per hour; P248 para sa 400 kilowatt hour at P310 para sa 500 kilowatt hour.

Maaaring bumaba sa P100 hanggang P150 ang presyo ng kada kilo ng sibuyas matapos aprubahan ni Pangulong Bongbong Marcos ang importasyon ng karagdagang 22,000 metric tons ng nasabing produkto.

Ayon kay Department of Agriculture Deputy Spokesperson Rex Estoperez, inaasahang darating ang imported onions bago o sa mismong Enero 27.

Ito’y upang hindi masabay sa kasagsagan ng anihan ng lokal na sibuyas sa Pebrero.

Kailangan anya nilang magbigay din ng limitasyon kung kailan at gaano karaming volume ang aangkatin para ma-protektahan ang mga lokal na magsisibuyas.

Hindi rin dapat bumaba sa production cost ng mga magsasaka ang presyo kaya’t masasabing tama lamang ang P100 hanggang P150 pesos na kada kilo.