Nakasungkit ng gintong medalya si Pinoy pole vaulter EJ Obiena sa katatapos lamang na Perche En sa Roubaix, France.
Tinalo ni Obiena sa International Elite Indoor Pole Vault Competition ang Chinese pole vaulter na si Yao Jie matapos malagpasan ang 5.75 meters sa unang category.
Nakuha ni EJ ang 5.82 meters dahilan ng kaniyang pagkapanalo.
Samantala, inaasahan namang sasabak din si Obiena sa Kazakhstan para sa Asian Indoor Athletics Championships sa susunod na buwan.
Pagkalat ng mga smuggled na frozen chicken ang itinuturong dahilan nang pagnipis ng supply ng itlog at pagtaas ng presyo nito sa bansa.
Ito ang inihayag ni Albay 2nd District Rep. Joey Salceda sa gitna nang “nangingitlog” na problema sa local poultry industry.
Ayon kay Salceda, ang problema sa itlog ay anak ng problema sa supply ng manok at ang pagkaunti ng mga nag-aalaga nito o populasyon ng manok ang puno’t dulo ng egg shortage at price increase sa bansa.
Una nang inihayag ni Philippine Egg Board President Irwan Ambal na 20% ang ibinaba ng populasyon ng paitluging manok sa Luzon simula noong Enero ng nakaraaang taon dahil sa bird flu outbreak.
Sinabi naman ni Samahang Industriya ng Agrikultura (SINAG) Chairman Rosendo So na aabot na sa P15-B ang nawalang kita sa poultry industry noong 2022 dahil sa pagpasok ng P25.4-B na halaga ng smuggled meat, kabilang ang P4-B na halaga ng frozen chicken.
Dahil dito, hinimok ni So ang gobyerno na buhayin ang Pre-Boarding Inspection Process para sa imported products upang mapigilan ang pagpupuslit ng agricultural products.
Aminado ang LPG Marketers Association (LPGMA) na sadyang walang magagawa ang Pilipinas sa hindi maawat na pagtaas ng presyo ng mga produktong petrolyo, partikular ang LPG.
Inihayag ni LPGMA President Arnel Ty sa DWIZ na nakaasa lamang kasi ang bansa sa oil importation kaya’t tila imposibleng mapababa ang presyo ng mga produktong petrolyo.
Pinayuhan anya sila ng kanilang mga supplier na maaantala ang pagpapadala ng dalawa hanggang tatlong linggo dahil sa pagtaas ng demand pero ang sitwasyon ay kaya namang mapangasiwaan.
Ipinaliwanag naman ni Ty na dahil lumaki ang demand sa Liquified Petroleum Gas, nagbabadya ring sumirit ang presyo nito sa merkado sa Pebrero, kasabay ng pagbubukas ng ekonomiya ng Tsina at Chinese Lunar New Year.
Humihiling ng fuel subsidies mula sa gobyerno ang ilang transport group kasabay ng kanilang paghihintay sa desisyon sa nagpapatuloy na fare hike petitions sa gitna ng walang prenong oil price hike.
Ayon kay Samahan ng mga Tsuper at Operators sa Pilipinas Convenor Danilo Yumul, dapat regular na ibigay ang subsidiya sa mga tsuper, gaya nang ginagawa sa ibang programa ng gobyerno.
Partikular na tinukoy ni Yumul ang 4Ps, senior citizen at TUPAD Program na buwanang nakatatanggap ng pondo.
Sila anyang mga tsuper ay nagtataas lamang ng pasahe tuwing nagmamahal ang krudo kaya’t dapat ipagpatuloy ang fuel subsidies para maging consistent kahit magkano man ang itaas ng presyo ng langis.
Bukas muling ilalarga ng mga kumpanya ng langis ang ikatlong sunod na linggong price hike.
Patuloy ang pagbaba ng presyo ng sibuyas sa ilang pamilihan, gaya sa Metro Manila bunsod nang pagdating ng imported suplay sa bansa.
Batay sa monitoring ng Department of Agriculture (DA), umaabot na ng P170 hanggang P300 na lamang ang kada kilo ng presyo ng ilang uri ng sibuyas sa Metro Manila.
Nasa P240 hanggang P250 naman ang presyo ng local red onions habang P200 hanggang P250 naman ang kada kilo ng imported.
Ayon kay DA Assistant Secretary at Spokesperson Rex Estoperez, sa ngayon ay wala silang nakikitang kakulangan sa suplay ng sibuyas sa bansa dahil sa pagsisimula nang anihan sa unang linggo ng Pebrero.
Magugunitang umabot hanggang P720 ang kada kilo ng sibuyas sa Metro Manila dahil sa kakulangan ng suplay nito noong Disyembre.
Paliit na nang paliit ang kinikita ng mga tsuper ng jeep kasabay ng pagtaas ng presyo ng mga produktong petrolyo.
Ito ang inihayag ni Pinagkaisang Samahan ng mga Tsuper at Operator Nationwide (PISTON) National President Mody Floranda kaugnay sa panibagong serye ng oil price hike na ilalarga bukas.
Ayon kay Floranda, nasa P300 hanggang P400 na lamang ang arawang kita ng mga jeepney driver kumpara sa tinatayang family living wage na P1,100.
Batay anya sa mismong pag-aaral ng Ibon Foundation, dapat ay P1,133 kada araw ang kailangan ng isang pamilya para lamang matugunan ang pangangailangan sa loob ng isang araw, gaya ng pagkain.
Sa oil trading sa nakalipas na limang araw, posibleng tumaas ng 60 hanggang 80 centavos ang kada litro ng diesel habang P1.20 hanggang P1.40 sa gasolina.
Ito na ang ikatlong sunod na linggong magpapatupad ng price increase ang mga kumpanya ng langis ngayong unang buwan ng taon.
Muling pinaalalahanan ng Manila Police District ang mga tauhan nito na panatilihing ligtas at nakatago ang mga service firearms o baril upang hindi maabot o makuha ng kanilang mga anak.
Ito ang panawagan ni MPD Director Police Brigadier General Andre Dizon kasunod ng nangyaring insidente kung saan nasawi ang isang 12 taong gulang na estudyante.
Ito’y matapos dalhin ng bata ang baril ng kanyang ama na isang pulis sa paaralan sa San Jose Del Monte, Bulacan at maiputok sa sarili.
Aniya hindi lamang ito paalala sa MPD personnel kundi maging sa lahat ng may-ari ng baril.
Sinabi pa ni General Dizon, iba na ang pag-iisip ng ilang mga kabataan lalo na’t nauso na ang mga bayolenteng gaming mobile kung saan marami sa kanila ang nakatutok at nahuhumaling sa larong ito.
Binigyang-diin pa ng opisyal, maiging tutukan rin ng mga magulang o guardian ang kanilang mga anak at maiging magkaroon sila ng oras para makausap ang mga ito.
Hindi matatawaran ang kakayahan at naging kontribusyon na ng isang Jon Ibanez sa industriya.
Nagsimula si Jon bilang newswriter, naging reporter at ngayo’y isa nang batikang brodkaster.
Patunay sa mga achievements ng isang Jon Ibanez ang pagkilala sa kanya sa coverage nya sa hostage taking sa Agusan del Sur.
Bukod dito, naipakitang muli ni Jon ang kanyang kalibre bilang reporter sa coverage sa Malakanyang siege, Manila Peninsula siege, Makati bus bombing, Luneta bus hostage taking at Pantranco terminal hostage kung saan ang mobile nya pa mismo ang nagdala sa ospital ng batang biktima.
Bahagi ng tatlong dekada nang pamamayagyag sa media ni Jon ang coverage nya sa Manor Hotel fire kung saan siya ang unang nakasaksi sa napakaraming labing nakahandusay sa gusali.
Umalingawngaw din ang boses ng isang Jon Ibanez sa mga programang Kabayan, Failon at Sanchez, Usapang de Campanilla, Lovelines, Sa Kabukiran at iba pang mga programang gumawa ng ingay sa himpapawid.
Yan si Jon Ibanez, isang alamat sa media industry!
Kinuwestyon ni Senador Ronald “Bato” Dela Rosa ang motibo ng International Criminal Court (ICC) sa panggigiit na maimbestigahan ang Anti Drug War Campaign ng bansa.
Ayon kay Dela Rosa, mayroon talagang agenda ang patuloy na pagsusulong ng ICC ng nasabing imbestigasyon at may nagtutulak dito para gawin ang nasabing hakbang.
Pagod na aniya siya sa naturang usapin lalo na’t pinagbawalan na rin ang ICC investigators na pumasok sa bansa.
Pagkakalooban ng pamahalaan ng value added tax refund ang mga dayuhang bibisita sa bansa simula sa 2024.
Ito’y matapos aprubahan ni Pangulong Ferdinand Marcos Jr. ang pagpapatupad ng VAT program para sa mga ito na layuning mas makahikayat pa ng maraming turista para bumisita sa bansa.
Batay sa programa, ang mga dayuhang turista ay makakakuha ng VAT refund sa mga binibili nilang produkto sa Pilipinas.
Maliban dito, inaprubahan ni PBBM ang paglulunsad ngayong taon ng online visa para sa mga Chinese, Indian, South Korean at Japanese tourists habang aalisin na rin ang One Health Pass (OHP) para sa immigration at customs.
Nabatid na ang VAT Refund Program at e-visa ay bahagi ng “Quick Wins” recommendations ng Private Sector Advisory Council (PSAC) Tourism Sector Group sa Pangulo.
Sinasabing layon ng Quick Wins proposal ng PSAC na mas mapaigting pa ang tourism industry sa bansa.
Samantala, sinabi rin ng PSAC officials kay Pangulong Marcos na pinaplantsa na rin ang pagkakaroon ng mobile app na tatawaging e-Travel kung saan pag-iisahin na ang mga impormasyon sa immigration, customs, health, at quarantine.
Ayon sa PSAC, inaasahang simula sa buwan ng Pebrero ay magagamit na ang nasabing app.
Maaaring mag-fill up ng form ang mga turista sa pamamagitan ng app bago sumakay o habang sakay ng eroplano basta’t mayroon silang internet connection.
Napag-alaman na ang PSAC ay binubuo ng mga business leaders at industry experts na nagbibigay ng technical advice sa Presidente.