HEADLINES

Siniguro ng Department of Health (DOH) ang kaligtasan ng mga kabataang edad 12 hanggang 17 na babakunahan.

Ayon sa DOH, hindi magdudulot ng malalang side effect ang mga bakunang gagamitin sa mga menor de edad kung saan, isasagawa ang pagbabakuna sa anim na ospital sa National Capital Region.

Sa pahayag ni Health Undersecretary Myrna Cabotaje, sakit ng ulo, allergy at pananakit lamang ng katawan ang posibleng maramdaman ng mga batang babakunahan kaya’t walang dapat na ikabahala.

Nabatid na ang kumpanyang Moderna at Pfizer Biontech lamang ang nabigyan ng Emergency Use Authorization (EUA) ng Food and Drug Administration (FDA)  gamitin sa mga kabataan. —sa panulat ni Angelica Doctolero

Sa kabila ng bumababang kaso ng COVID-19 sa Quezon City (QC) ay nananatili paring mataas ang occupancy rate ng mga ospital sa lungsod.

Sa datos ng QC Epidemiology and Disease Surveillance Unit (CESU), nasa 3-M doses ng bakuna na ang naiturok sa mga residente bunsod ng nagpapatuloy na COVID-19 vaccination program ng QC LGU.

Sa ngayon nasa 311% pa rin ang occupancy rate o bilang ng mga kwartong okupado sa dalawang ospital sa lungsod para sa mga pasyente ng COVID-19. —sa panulat ni Angelica Doctolero

Inihayag ni Pharmally Executive Krizle Grace Mago na kampante siya sa kaniyang naging pahayag sa isinagawang pagdinig ng House Committee on Good Government and Public Accountability.

Ayon kay Mago mas “confident” siya sa kaniyang naging statement kung ikukumpara sa naging unang pagdinig nito sa Senado.

Sa naganap na pagdinig, nangako si Mago na pawang mga katotohanan lamang ang kaniyang sasabihin pero nang mag simula na ang hearing ay binawi ni Mago ang kaniyang unang naging statement o pag-amin sa Senado.

Sinabi din ni Mago na ang dahilan ng kaniyang paghingi ng proteksiyon sa House of Representative ay dahil wala umano siyang “undue pressure” na nararamdaman.

Sinabi naman ni Mago na kaniyang haharapin ang ano mang kasong isasampa laban sakaniya. —sa panulat ni Angelica Doctolero

Magpapatupad ng “no walk-in policy” ang pamahalaan lokal ng Caloocan para sa libreng COVID-19 swab test ng mga residente.

Ayon sa Caloocan City Government, kailangang munang makipag ugnayan sa Barangay Health Center ang may mga sintomas ng COVID-19 at kailangang maipresenta ang kanilang valid ID.

Ayon sa Caloocan LGU, importante na agad na mai-test ang isang indibidwal na nakakaranas ng sintomas ng nakakahawang sakit upang agad na ma-isolate at mabigyan ng kinakailangang atensyong medikal. —sa panulat ni Angelica Doctolero

Inaprubahan na ng Food and Drug Administration o FDA ang paggamit ng Tocilizumab na gawa ng Chinese firm na Lizvon.

Kaugnay nito, umaasa si FDA Director General Eric Domingo na magkakaroon ng karagdagang suplay ng naturang gamot para sa severe COVID-19 patients.

Mababatid na nagkaroon ng kakapusan sa suplay ng naturang gamot sa mga nakalipas na mga linggo.

Maliban dito, inaprubahan rin ng FDA ang Baricitinib brands na Barinicix at Barinez.—sa panulat ni Hyacinth Ludivico

Nakaalerto na ang Philippine Red Cross (PRC) sa posibleng hagupit ng bagyong Lannie sa ibat-ibang lugar sa bansa partikular na sa Metro Manila.

Ayon sa PRC, nagpaplano na ang ibat-ibat chapter ng kanilang ahensya para sa posibleng maging pinsala ng naturang bagyo.

Layunin ngayon ng PRC na malaman ng publiko ang 4Ps o ang tinatawag na “Predict, Plan, Prepare at Practice” lalo na sa mga may mabababang lugar o mabilis bahain.

Dapat din na magkaroon ang bawat isa ng emergency plan, disaster kit na may lamang mga suplay ng pagkin, tubig, flash light, baterya, first aid kit, gamot at makinig sa mga balita.

Samantala, inaasahan namang lalabas ng Philippine Area of Responsibility (PAR) ang bagyong Lannie sa Huwebes, Oktubre 7, 2021. —sa panulat ni Angelica Doctolero

Mas marami ngayon ang bilang ng mga namamatay sa dengue sa Bayan ng Subic kumpara sa nakalipas na taon.

Batay sa datos ng Municipal Health Office, mula nitong Enero hanggang Setyembre ay umabot na sa 13 ang namamatay sa nasabing sakit na mas mataas kumpara sa walo noong 2019.

Sinabi ni Municipal Health Officer Dr. Nadjimin Ngilay na mayroong gradual increase ng mga tinatamaan ng dengue partikular sa Barangay San Isidro, Pamatawan at Manganvaca.

Pinaalalahanan naman ang mga residente na  panatilihin ang manilis na paligid at agad na magpakonsulta kung may maramdamang sintomas ng sakit.—sa panulat ni Hyacinth Ludivico

Umakyat na sa 38,656 ang kabuuang bilang ng mga tinamaan ng COVID-19 sa Bicol matapos itong madagdagan ng 323 mga bagong kaso.

Pinakamaraming naitalang bagong kaso sa Camarines Sur na may 184; 80 sa Albay; 33 sa Sorsogon; 23 sa Catanduanes, at dalawang bagong mga kaso sa Masbate.

Nakapagtala naman ang rehiyon ng 175 na bagong gumaling mula sa sakit kaya’t umabot na sa 24,690 ang total recoveries.

Nadagdagan naman ng 14 ang bilang ng mga nasawi sa COVID-19 dahilan para sumirit sa 1,157 ang kabuuang bilang nito.—sa panulat ni Hyacinth Ludivico

Matatanggap na ng mga pampublikong guro ang P1,000 cash allowance bilang World Teachers’ Day incentive benefit.

Ayon kay Department of Education Undersecretary Annalyn Sevilla, ire-release na simula ngayong araw ang naturang insentibo para sa halos 90,000 pampublikong guro sa bansa.

Ang World Teachers’ Day incentive benefit ay kumikilala sa mahalagang papel ng mga guro sa pagtugon sa mga hamon ng pandemya, lalo na sa pagtitiyak ng dekalidad na edukasyon sa bansa.—sa panulat ni Hyacinth Ludivico