HEADLINES

Itinuturing nang dead on arrival ng isang mambabatas ang kontrobersyal na House Bill 10171 o ang UP Security Bill na nagbabawal sa mga Sundalo at Pulis na pumasok sa University of the Philippines.

Ito’y ayon kay Senior Deputy Majority Leader ng House Committee on Rules at Cavite 7th District Representative Jesus Crispin “Boying” Remulla sa lingguhang virtual press conference ng National Task Force to End Local Terrorist Armed Conflict o NTF-ELCAC.

Ayon kay Remulla, hindi na uusad ang hakbang matapos ang nagkakaisang pagsang-ayon ng plenaryo sa inihain niyang motion for reconsideration hinggil sa naturang panukala noong Setyembre 30.

Paliwanag ng mambabatas, dahil dito aniya’y babalik sa komite ang naturang panukala at duon sila magpapasya kung may pag-asa pa itong mabuhay muli para talakayin

Pagbubunyag pa ni Remulla, isiningit ng Makabayan Bloc sa kamara ang nasabing panukala sa panahong abala sa budgetary process ang lahat ng mambabatas sa kani-kanilang distrito kaya’t muntik na itong nakalusot.

Subalit napigilan ito ani Remulla sabay giit na kalokohan lamang ang panukala dahil nilalabag nito ang “equal protection clause” ng batas at pumapabor lamang ito sa mga maka-kaliwang mambabatas.—ulat mula kay Jaymark Dagala (Patrol 9)

Umabot sa halos 200,000 mga violator ang nahuli ng Philippine National Police (PNP) sa ilalim ng ipinatupad na alert level system sa Metro Manila.

Ayon sa PNP, 53 sa mga nahuli ay na-warningan lamang habang 41% ang pinagmulta, at 6% naman ang pinarusahan.

Sa ngayon nasa 141,714 violators ang lumabag sa health protocols habang nasa 55,571 naman ang lumabag sa curfew hour. —sa panulat ni Angelica Doctolero

Nagpaalala ang National Disaster Risk Reduction and Management Council (NDRRMC) mga LGUs partikular sa mga residenteng nakatira sa mababang lugar na mabilis bahain at mga lugar na malapit sa baybaying dagat.

Ayon kay NDRRMC Executive Director Undersecretary Ricardo Jalad, panatilihing maging alerto at huwag magpakampante sa lagay ng bagyo.

Natukoy kasi ng Mines and Geosciences Bureau ng Department of Environment and Natural Resources (DENR) ang aabot sa 3,076 na mga barangay ang malapit sa landslide at flood prone areas.

Siniguro naman ni Jalad na patuloy silang magpapadala ng text warning sa publiko para mapanatili ang kaligtasan ng bawat isa. —sa panulat ni Angelica Doctolero

Isinailalim sa lockdown ang 49 na lugar sa Quezon City matapos tumaas ang kaso ng COVID-19.

Ayon sa pamahalaang lokal ng Quezon City, posible pang magbago ang kaso ng COVID-19 dahil sa isinasagawang community-based testing.

Nabatid na nasa 9,089 na ang active COVID-19 cases sa lungsod habang tinatapos naman ng mga residente ang mandatory 14-day quarantine.

Sa ngayon, patuloy pang minomonitor ng City Epidemiology and Disease Surveillance Unit ang kaso ng COVID-19 sa lungsod. —sa panulat ni Angelica Doctolero

Marami nang pangalan ang naglabasan na nais mapabilang sa listahan ng mga kakandidato para sa darating na halalan.

Dahil dito, pormal nading naghain ng kaniyang Certificate of Candidacy (COC) ang isang marino na kinilalang si Melchor Juno para tumakbo sa 2022 National Election.

Ayon kay Juno, nais niyang magkaroon ng boses ang mga mahihirap at magkaroon ng Rule of Law sa bansa.

Sa ngayon 18 kandidato na ang nais tumakbo bilang pangulo ng bansa sa 2022 habang pito naman sa pagka-Bise Presidente at 37 naman para sa pagka-Senador. —sa panulat ni Angelica Doctolero

Inihayag ni Health Secretary Francisco Duque III na bumaba na ang COVID-19 testing sa bansa.

Nabatid na nabawasan ng mahigit tatlumput pitong libong bilang ng COVID-19 test ang National Capital Region.

Dahil dito, hinihikayat ni Duque ang mga rehiyon na mas palawigin pa ang active case finding at contact tracing initiatives upang mapigilan ang hawahan ng COVID-19.

Nanawagan din si Duque sa mga departamento ng kagawaran ng kalusugan at mga lgus na tiyaking nasusunod ang panuntunan laban sa COVID-19. —sa panulat ni Angelica Doctolero

Hinikayat ng Department of Health (DOH) ang mga Local Government Unit (LGU) na madaliin ang pagpapadala ng mga kaso at close contacts ng COVID-19 sa mga quarantine at isolation facilities.

Ayon kay Health Secretary Francisco Duque III, bumababa na ngayon ang bilang ng COVID-19 cases sa Metro Manila at sa iba pang lugar sa bansa.

Bukod pa dito, hinihikayat din ng DOH ang mga local vaccinations operations centers na palawigin pa ang pagbabakuna upang maabot ang 70% full vaccination para sa target na vaccination population.

Ikinatuwa naman ni Duque ang magandang pakikipag tulungan ng mga LGUs maging ng publiko para mapababa ang kaso ng COVID-19 sa bansa. —sa panulat ni Angelica Doctolero