HEADLINES

Gumaganda na ang contact tracing ratio sa Metro Manila.

Ito’y ayon kay Metropolitan Manila Development Authority Chairperson Benhur Abalos at sinabing sa ngayon ay nasa 1:19 na ang ratio ng contact tracing sa rehiyon.

Aniya, maituturing itong excellent, lalo at una nang sinabi ng Department Of Health na angkop na ang average na 1:15 ratio.

Sinabi pa ni Abalos na nagpapatuloy ang Metro Manila Council at Local Government Units sa ginagawang paghihigpit at pinaigting na contact tracing.—sa panulat ni Hyacinth Ludivico

Nasabat ng mga tauhan ng Bureau of Customs ang nasa anim na shipment ng mga chinese medicine na walang kaukulang dokumento mula sa Hongkong.

Ayon sa mga otoridad, nagkakahalaga ng P29-M ang mga kargamento na wala umanong clearance o kaukulang dokumento mula sa Food and Drug Administration (FDA).

Sa ngayon nagkasa na ng operasyon ang mga tauhan ng customs matapos makatanggap ng impormasyon hinggil sa naturang kargamento. —sa panulat ni Angelica Doctolero

Karagdagang 21 kaso ng delta variant ang na-detect ng Department Of Health dahilan para umakyat ito sa 3,387.

Sinabi ni Health Undersecretary Maria Rosario Vergeire sa kabuuan ay may 749 samples mula noong april hanggang june ang isinailalim sa sequencing.

Sa nasabing bilang, 288 ang Alpha variant, 309 cases ang Beta variant, habang 21 cases naman ang delta variant.

Ani Vergeire, kung mapapansin sa datos, lumalabas na sa mga panahong ito ay hindi pa masyadong nakakalat ang Delta variant sa bansa.

Gayunman, nananatiling mas maraming naitatalang kaso ng delta variant sa National Capital Region na sinundan ng region 3, region 4-A, region 6, region 9, region 11.

Binatikos ni Presidential Spokesperson Harry Roque ang mayayamang bansa na nagdo-donate ng COVID-19 vaccine sa COVAX facility.

Ayon kay Roque, nagsisilbi lang aniyang tugon ito sa kanilang konsensya dahil sa pagkuha nila ng maraming bakuna kontra COVID-19.

Sinabi ni Roque, dahil mino-monopolyo ng mayayamang bansa ang suplay ng bakuna kontra COVID-19, at dahil kinailangang tugunan ang “guilty conscience ng mga ito kaya namimigay ng kaunting bahagi ng bakuna sa mga mahihirap na bansa.

Giit ni Roque, hindi ito ang solusyon sa pandemya dahil gaya ng sinasabi ng World Health Organization, hindi magiging ligtas ang sinoman kung hindi magiging ligtas ang lahat.

Aniya, kinakailangan ng lahat ng bansa ng pantay na suplay ng bakuna.

Dagdag pa ni Roque, kaya aniya siya ang ni-nominate ng gobyerno sa International Law Commission ay para isulong ang isang kasunduan na kikilala sa ligal na obligasyon ng lahat ng bansa para magkaroon ng pantay na access sa COVID-19 vaccines.—sa panulat ni Hyacinth Ludivico

Marami umanong kandidato ang may mali sa ipinasang Certificate Of Candidacy o COC ayon sa Commission on Elections O COMELEC.

Ayon kay COMELEC Spokesperson James Jimenez, ang form na ipinapasa ng mga kandidato ay nada-download sa COMELEC website at kailangan nila itong i-print ng back-to-back.

Ngunit sa halip aniya ang ginawa ng mga kandidato ay pinag-hiwa-hiwalay ang print ng naturang form.

Dahil umano rito ay napapatagal ang kanilang pagproseso.

Sianbi pa ni Jimenez na nasa dalawa o tatlo ng kahalintulad na problema ang kanilang naobserbahan at malaking bilang umano ito kung ang pag-uusapan ay ang kabuuan ng kanilang sistema.—sa panulat ni Hyacinth Ludivico

Pinangunahan ni Bureau of Immigration (BI) Acting Port Operations Chief Atty. Carlos Capulong, ang ikinasang balasahan sa mga tauhan ng BI sa Ninoy Aquino International Airport (NAIA).

Aabot sa 341 personnel ang kasama sa reshuffling na may layuning maiwasan ang korapsiyon sa bansa partikular sa kanilang hanay.

Bukod sa mga tauhan ng BI personnel na nagtatrabaho sa immigration counters ng NAIA, babalasahin din ang 77 immigration supervisors.

Samantala, mayroon namang 99 na mga bagong immigration inspector ang dineploy para isailalim sa on-the-job training na ipakakalat sa major ports ng bansa sakaling makumpleto ang kanilang pagsasanay. —sa panulat ni Angelica Doctolero

Inihayag ni Vaccine Czar Carlito Galvez Jr., na malabo nang maabot ang target na bilang ng mababakunahan kontra COVID-19 ngayong taon.

Gayunman, maaabot naman aniya ang 50%  ng target na bilang kung makakapagbakuna ng 600,000 hanggang 800,000 indibidwal kada araw.

Sa ngayon, aabot sa 350,000 hanggang 400,000 doses lamang ang naituturok kada araw.

Ngunit kung magagawa naman aniyang makapagbakuna ng isang milyong indibidwal kada araw hanggang sa pagtatapos ng taon ay posible pa ring makamit ang 60 hanggang 70% ng target.—sa panulat ni Hyacinth Ludivico