HEADLINES

Nasabat ng mga operatiba ng Criminal Investigation and Detection Group o CIDG ang aabot sa  P32 milyong halaga ng pekeng sigarilyo sa isang warehouse sa Bulacan.

Naaresto sa ikinasang operasyon ang apat na suspek na kinilalang sina Zeng Qiangjian 42 anyos, Lin Shanxiong, 48 anyos, John Bejay Agujar, 25 anyos at Rodolfo Brosas, 25 anyos.

Nakumpiska ang mahigit isang libong karton ng ibat’ ibang brand ng sigarilyo at isang truck.

Nahaharap ang mga suspek sa kasong paglabag sa RA 7394 o ang the Consumer Act of the Philippines, RA 8293 o Intellectual Property Code of the Philippines, at RA 1937 o Revised Tariff and Custom Law of the Philippines.—sa panulat ni Hyacinth Ludivico

Inilatag ng Department Of Health ang listahan ng medical conditions na itinuturing na comorbidities para sa pilot vaccination sa mga edad 12 hanggang 17 anyos.

Kabilang sa mga ito ay ang health conditions tulad ng medical complexity, genetic conditions, neurologic conditions, metabolic/ endocrine, cardiovascular disease, obesity, HIV infection, tuberculosis, chronic respiratory disease, renal disorders at hepatobiliary.

Ayon kay Health Undersecretary Maria Rosario Vergeire,  ang mga batang  babakunahan na may comorbidities ay dapat na may clearance mula sa kanilang doktor.

Dapat din aniya na ma monitor ang mga kabataan matapos maturukan ng bakuna.—sa panulat ni Hyacinth Ludivico

Nadagdagan ang bilang ng mga nasawi dahil sa COVID-19 sa Batanes.

Isang lalaki na 56-anyos at residente ng San Antonio, Basco, ang ikatlong COVID-19 related death sa lalawigan.

Pumanaw noong Sabado ang naturang pasyente dahil sa acute respiratory secondary to pneumonia severe high-risk secondary to critical COVID-19.

Samantala, apat na kritikal na pasyente naman ang dinala sa Cagayan Valley upang mas mabigyan ng atensiyong medikal.

Sa ngayon, mahigit 500 ang aktibong kaso ng COVID-19 sa Batanes.—sa panulat ni Hyacinth Ludivico

Nasa 21,487 inmates sa bansa ang fully vaccinated na kontra COVID-19, ayon sa Department Of Health.

Ayon kay Health Undersecretary Maria Rosario Vergeire,base sa datos mula sa Bureau of Jail Management and Penology at Bureau of Corrections, nasa 37,204 Persons Deprived of Liberty o PDLs ang nakatanggap naman ng first dose ng bakuna.

Aniya, prayoridad din ng ahensya ang pagbabakuna sa mga PDL.

Nanawagan naman ang DOH sa BJMP, Bucor at lokal na pamahalaan na maglaan ng COVID-19 vaccines at iprayoridad rin ang pagbabakuna sa PDLs.—sa panulat ni Hyacinth Ludivico

Inaasahang lalala pa ang COVID-19 surge sa Negros Island.

Ang Corazon Locsin Montelibano Memorial Regional Hospital ang tanging level 3 hospital sa nasabing lugar.

Ayon kay Chief Julius Drilon, Medical Chief ng naturang pagamutan, bagama’t hindi pa nila nakikita ang COVID-19 surge ay posibleng tumama ito sa kalagitnaan ng Oktubre.

Aniya, kung magtutuloy-tuloy ang pagtaas ng COVID-19 cases sa lugar ay posibleng hindi na nila ito kayanin.

Sa ngayon ay 45 mang medical workers nila ang nagpositibo sa COVID-19 habang 75 na iba pa ang naka-quarantine, nasa 85% na rin aniya ang kanilang occupancy rate.

Sinabi pa ni drilon na karamihan o 90 % ng pasyente ay hindi pa nababakunahan kontra COVID-19.—sa panulat ni Hyacinth Ludivico

Aabot sa P3 milyon ang inilaang insentibo ng pamahalaan para sa mga indibidwal na nagpabakuna na kontra COVID-19.

Layunin ng bakunado panalo program na mahikayat ang maraming Pilipino na magpabakuna upang makamit na ang herd immunity.

Ayon kay Presidential Spokesman Secretary Harry Roque, magsisismula ngayong buwan ang monthly draw kung saan 100 winners ang bubunutin.

Sa grand draw, 10 ang bubunutin para sa third prize na tig-100,000 piso, isang entry para sa ₱500,000 sa second prize, at sa first prize ay isang milyong piso ang makukuha ng maswerteng bakunado sa grand draw sa Disyembre.

Ang Department Of Health ang mangangasiwa sa monthly at grand draw.—sa panulat ni Hyacinth Ludivico

Magsisimula ng tumanggap ng commercial domestic flights ang Bicol International Airport o BIA sa Oktubre 7.

Ayon sa Department Of Transportation, ang konstruksyon ng paliparan sa Daraga, Albay ay naantala ng 11 taon.

Sinabi naman ni Civil Aviation Authority of the Philippines Chief-Of-Staff at Airport Projects Team Head Danjun Lucas na inaasahang makakapag-operate na ang BIA ng international flights sa Nobyembre 7.

Kapag naging dully operational na, maaari itong makapag-accomodate ito ng dalawang milyong pasahero kada taon.

Maliban dito, inaasahan ring makalilikha ito ng 1,100 indirect jobs.—sa panulat ni Hyacinth Ludivico

Aabot sa P6.8 milyong halaga ng shabu ang nasabat ng mga otoridad sa ikinasang buy bust operation sa Bongao, Tawi-Tawi.

Ayon sa Philippine Drug Enforcement Agency-Bangsamoro Autonomous Region in Muslim Mindanao, naaresto ang tatlong hinihinalang drug traffickers sa Bagay Street Barangay Poblacion, Bongao.

Nagbenta umano ang mga suspek ng isang kilo ng shabu.

Sa ngayon ay nakakakulong na at nahaharap sa kasong paglabag sa Comprehensive Dangerous Drugs act ang mga suspek.—sa panulat ni Hyacinth Ludivico