HEADLINES

Ipinasara ang isang KTV bar sa Pasay City na nagbukas kahit ipinagbabawal sa ilalim ng alert level 4 sa NCR.

Sinalakay ng mga otoridad ang glx “galaxy ktv bar” na nasa sa hobbies of Asia, Macapagal Boulevard, bandang 2:30 ng madaling araw nitong Oktubre 3.

Inaresto ang mga tauhan nito na sina Michael Relampago, 29-anyos, Floor Manager; Elren Pusing, 32-Anyos, Waitress; at mga waiter na sina Mark Anthony Cerbito,27-anyos; Joel Caalim, 26-anyos; Jerry Quartero Jr. 28-anyos; at Arjay Glen Rebulas, 33-anyos.

Pinagmumulta ang mga ito dahil sa paglabag sa ordinansa at sa Republic Act 11332 o non-cooperation of the person or entities identified as having a noticeable disease or affected by the health event of emergency.—sa panulat ni Hyacinth Ludivico

Isinapubliko na ang “Pandora Papers” na naglalaman ng milyun-milyong dokumento kaugnay sa offshore account ng mga world leader, business tycoon at iba pang kilalang personalidad.

Siniyasat ng nasa 600  investigative journalist ang mga dokumento na nagmula sa offshore service providerstulad ng trident trust, commence overseas limited at overseas management company trust limited.

Kabilang sa mga lumitaw na may offshore account sa trident si Transportation Secretary Arthur Tugade at dating COMELEC Chairman Andres Bautista.

Simula noong 2007, si Tugade at kanyang mga anak ang beneficial owners ng solart holdings limited, na isang British virgin islands company, na nilikha para sa kinikita ng family-owned Perry’s group of companies, na kumita umano ng 1.5 milyong dolyar.

Hindi umano naka-deklara ang naturang offshore entity sa listahan ng mga negosyo ni Tugade sa kanyang taunang statement of assets, liabilities and net worth.

Lumitaw din sa trident record si Bautista, bilang Incorporator ng Baumann Enterprises limited, na ini-rehistro rin sa British Virgin islands noong 2010 at ini-re-incorporatenoong 2017.

Noon ding 2017 nadiskubre ng dating asawa ni Bautista, na si Patricia, ang mga passbook at dokumento ng mister na naglalaman ng nasa P1 bilyong undeclared wealth at bago matapos ang taon ay nagbitiw sa pwesto ang poll official.—sa panulat ni Drew Nacino

Nasa bahagi na ng Cuyo at Calamian islands sa Palawan ang bagyong Lannie.

Huling namataan ang bagyo sa layong 90 kilometers hilagang-kanluran ng Cuyo at tinutumbok ang West Philippine Sea.

Taglay nito ang lakas ng hanging aabot sa 45 kilometers per hour at pagbugso na hanggang 55 kilomters per hour.

Kumikilos ang naturang sama ng panahon pa-hilagang kanluran sa bilis na 25 kilomters per hour.

Nakataas pa rin ang public storm signal number 1 sa southwestern portion ng Romblon, Southern Portion ng Oriental Mindoro, Southern Portion ng Occidental Mindoro at Northern portion ng Palawan;

Kabilang din ang Antique, Western portion ng Aklan at Southwestern portion ng Iloilo.—sa panulat ni Drew Nacino

Nahirapan ang mayorya ng netizen sa pag-access sa kani-kanilang social media accounts makaraang makaranas ng major outage ang Facebook maging ang pag-aari nitong Instagram at Whatsapp sa buong mundo.

Pasado alas-11 kagabi, oras sa Pilipinas, nang magsimulang tumigil ang tatlong social media sites at pawang error page ang lumalabas sa Facebook website o message na ang kanilang browser ay walang koneksyon.

Umabot sa pitong oras bago makabalik online ang Facebook, Instagram at Whatsapp.

Ito na sa ngayon ang pinaka-mahabang oras na naka-down ang tatlong social sites.

Tikom naman si Facebook Chief Executive Mark Zuckerberg sa sanhi ng outage.—sa panulat ni Drew Nacino

Umarangkada na ang panibagong bigtime price hike sa mga produktong petrolyo.

Epektibo 12:01 kaninang hatinggabi nang ipatupad ng Caltex ang dagdag P1.45 sentimos sa gasolina habang P2.05 sentimos sa Diesel at Kerosene.

Mamayang ala-6 ng umaga ipatutupad din ng Shell, Petron, Seaoil, Flying V, PTT Philippines at Phoenix ang kahalintulad na price hike habang mamayang alas kwatro uno ng hapon ang Cleanfuel.

Ito na ang ika-6 na sunod na linggong oil price increase bunsod ng paggalaw ng presyo sa international market dahil sa lumalaking demand habang papalapit ang taglamig sa North America, Europe at ilang panig ng Asya.—sa panulat ni Drew Nacino

Naghain na rin ng kani-kanilang Certificates Of Candidacy ang 12 pang presidential at tatlo pang Vice-Presidential aspirants sa harbor garden tent ng Sofitel Philippine Plaza sa Pasay City.

Nanguna sa ika-4 na araw ng filing si Manila Mayor Francisco “Isko Moreno” Domagoso ng aksyon demokratiko; Independent bets na sina Sonny Boy Andrade, Juanita Trocenio, Alfredo Respuesto;

Gabriela Larot, Maria Mercedes Pesigan, Delia Aniñon, Renato Valera, Melchor “Kidlat” Puno, Winston Kayanan; Faisal Mangondato ng Katipunan at Leo Cadion ng Philippine Green Republican Party o PGRP.

Pasok naman sa listahan ng mga naghahangad na maging Bise Presidente sina Dr. Willie Ong, na runningmate ni Domagso; Carlos Serapio ng Katipunan at Princess Sunshine Amirah magdangal ng PGRP.

Batay sa tala ng COMELEC, aabot na sa 20 ang nagfile ng kandidatura sa pagka-Presidente, pito sa pagka-Bise Presidente habang 39 sa pagka-Senador.

Umabot naman sa 48 party-list groups ang naghain din ng COC.—sa panulat ni Drew Nacino

Ikakasa na ni Pangulong Rodrigo Duterte ang kanyang depensa sa pagharap sa International Criminal Court o ICC sa sandaling bumalik sa Davao City.

Sa kanyang talk to the people kagabi, aminado si Pangulong Duterte na isa anyang senyales ng kanyang pagbabalik sa Davao at pagreretiro sa pulitika ang bahagyang pagbaba ng kanyang satisfaction rating.

Sa kabila nito, iginiit ng Punong ehekutibo na hindi pa rin siya makikipag-tulungan sa ICC na nag-i-imbestiga sa drug war ng Pilipinas.

Minaliit din ni Pangulong Duterte ang kapangyarihan ng ICC dahil wala umano itong hurisdiksyon sa judicial system ng Pilipinas.—sa panulat ni Drew Nacino