HEADLINES

Tinuldukan na ng House Committee on Good Government and Public Accountability ang imbestigasyon sa overpriced umanong medical supplies na binili ng gobyerno sa Pharmally Pharmaceutical Corporation.

Ito’y makaraang humarap si Krizel Mago ng Pharmally sa pinakahuling araw ng Motu-Propio Investigation ng naturang kumite na pinamumunuan ni Diwa Partylist Rep. Michael Edgar Aglipay.

Sumentro ang imbestigasyon sa 2020 annual audit report ng Commission On Audit sa inilipat na pondo ng DOH sa procurement service ng DBM upang ipambili ng pandemic supplies.

Ayon kay Aglipay, patuloy ang pagsusulong ng mga mambabatas sa hustisya at kalayaan ng pamamahayag nang walang halong bullying at pananakot.

Sa kaniyang pagharap sa komite, inamin ni mago na humingi siya ng proteksyon sa mababang kapulungan ng kongreso dahil sa maayos na pagtatanong ng mga kongresista nang walang “undue influence.”

Binawi rin ni Mago ang naunang pahayag nito sa Senate Blue Ribbon Committee na niloko ng Pharmally ang gobyerno dahil natakot lamang siya na ipakulong ng mga senador.—sa panulat ni Drew Nacino

Lumobo na sa 2,604,040 ang bilang ng tinamaan ng COVID-19 sa bansa.

Ito’ymatapos bumulusok kahapon sa 10,748 ang additional cases, ang pinaka-mababang daily case na naitala sa nakalipas na dalawang linggo.

Sa datos ng Department Of Health, sumadsad pa sa 106,160 ang aktibong kaso ng COVID-19 habang nasa 16,523 ang mga bagong gumaling kaya’t umabot na sa 2,459,052 ang total recoveries.

Kaunti naman ang naitalang namatay kahapon sa animnapu’t isa dahilan upang pumalo sa 38,828 ang total death toll.

Nadagdagan naman ng 21 ang kaso ng mas nakahahawang delta variant ng COVID-19 na nanggaling pa sa mga samples noong Abril hanggang Hunyo.

Ipinaliwanag ni Health Undersecretary Maria Rosario Vergeire na mababa ang bilang ng delta infections dahil kaunti lamang ito noong mga nakaraang buwan.—sa panulat ni Drew Nacino

Nahirapan ang mayorya ng netizen sa pag-access sa kani-kanilang social media accounts makaraang makaranas ng major outage ang Facebook maging ang pag-aari nitong instagram at whatsapp sa buong mundo.

Pasado alas-11 kagabi, oras sa Pilipinas, nang magsimulang tumigil ang tatlong social media sites at pawang error page ang lumalabas sa Facebook website o message na ang kanilang browser ay walang koneksyon.

Hanggang ngayon ay hindi pa rin naibabalik sa normal ang tatlong social media sites.

Ito na sa ngayon ang pinaka mahabang oras na nananatiling naka-down ang Facebook.

Tikom naman si Facebook Chief Executive Mark Zuckerberg sa sanhi ng outage.—sa panulat ni Drew Nacino

Hindi pinaniwalaan ni Senate Minority Leader Franklin Drilon ang sinabi ni Pharmally Pharmaceutical Corp. Executive Krizel Grace Mago na under pressure siya nang aminin nito sa pagdinig ng senado na ginantso nila ang gobyerno.

Ito’y matapos ihayag ni Mago na pinapalitan nila ang production date ng mga ibinebentang face shields sa gobyerno.

Kinuwestiyon ni Drilon kung papaanong na pressure si Mago gayong spontaneous o kusa ang kaniyang naging pag-amin.

Nasa video anya ang naging pahayag ni Mago kung saan under oath ng aminin nya ang pagpapalit ng expirty day ng mga face shields at pagsasabing naniniwala siya na ginantso nila ang gobyerno.

Giit ni Drilon, self-serving ang sinabi ni Mago na wala sa maayos na kondisyon ang kanyang pag-iisip noon para malinaw na makapag-isip. Wala anya itong value at hindi maaaring i-corroborate.

Naghain ng Certificate of Nomination and Acceptance (CONA) para sa 2022 election ang Gabriela Party-List.

Isinumite ito ni Incumbent Representative Arlene Brosas na sinundan ng kaniyang talumpati kung saan tiniyak nito na patuloy na mabibigyan ng atensyon ang kapakanan ng mga kababaihan.

Ani ni Brosas, gaya ng dati, hindi mag-aatubili ang partido na magsilbing boses para tutulan ang mga pinaniniwalaan nitong hindi kaayon-ayon sa hindi lamang sa mga kababaihan kundi maging sa taumbayan.

Maliban kay Brosas, ilan pa sa nominado ng Gabriela ay sina Dr. Jean Lindo, isang medical doctor at environmentalist at Lucy Francisco na isang consumer rights defender.

Suportado ng Department of Tourism (DOT) ang panukalang paikliin ang quarantine period sa mga fully vaccinated na byahero.

Kinilala ni Tourism Secretary Berna Romulo-Puyat na isang itong malaking hakbang tungo sa pagbangon ng ekonomiya ng bansa.

Ani ni Puyat, napakahalaga nito sa ating mga kababayan na napakatagal nang naghihintay na makapiling ang kaniyang pamilya lalo na ngayong malapit na ang holiday season.

Batay sa bagong guidelines na inilabas ng COVID Task Force, ang mga manggagaling sa Yellow Risk Jurisdiction, fully vaccinate man o hindi ay kailangang sumailalim sa 10-day facility based quarantine at 4-day home quarantine.

Karagdagang 21 kaso ng Delta variant ang na-detect ng Department of Health (DOH) dahilan para umakyat ito sa 3,387.

Sinabi ni Health Undersecretary Maria Rosario Vergeire sa kabuuan ay may 749 samples mula noong April hanggang June ang isinailalim sa sequencing.

Sa nasabing bilang, 288 ang Alpha variant, 309 cases ang Beta variant, habang 21 cases naman ang Delta Variant.

Ani ni Vergeire, kung mapapansin sa datos, lumalabas na sa mga panahong ito ay hindi pa masyadong nakakalat ang Delta variant sa bansa.

Gayunman, nananatiling mas maraming naitatalang kaso ng Delta variant sa National Capital Region na sinundan ng Region 3, Region 4-A, Region 6, Region 9, Region 11.

Naghain ng Certificate of Candidacy si dating pangulong Gloria Macapagal Arroyo para sa ika-apat na termino bilang mambabatas ng 2nd District ng Pampanga.

Sa pamamagitan ng kaniyang anak na si Incumbent Representative Juan Miguel Mikey Arroyo, isinumite nito ang kaniyang kandidatura.

Ani ni Mikey pinili ng kaniyang ina maging proxy siya sa paghahain ng COC bilang pag-iingat na rin sa COVID-19.

Gayunman, tiniyak ni Mikey na malakas pa ang kaniyang ina na ngayon ay sitenta’y kwatro anyos na at tiwala siyang kayang-kaya pa nito na magserbisyo sakaling palaring manalo.

Plano ng Pilipinas na bumili ng hanggang 100 milyong COVID-19 vaccine sa susunod na taon.

Ayon kay Vaccine Czar Carlito Galvez Jr., nakikipag-ugnayan na ang mga awtoridad sa apat na drug manufacturers na target pagkuhanan ng mga bakuna.

Nakatakda na rin aniyang lumagda ang gobyerno ng kontrata sa Johnson&Johnson para sa anim na milyong shots ng single dose ng kanilang COVID-19 vaccine na ide-deliver sa January 2022.

Sa kasalukuyan ay pinaghahandaan ng gobyerno ang pagbabakuna sa General Adult Population at mga batang edad dose hanggang disi-syete anyos ngayong buwan.

Binatikos ni Presidential Spokesperson Harry Roque ang mayayamang bansa nagdo-donate ng COVID-19 vaccine sa Covax Facility.

Ayon kay Roque, nagsisilbi lang aniyang tugon ito sa kanilang konsensya dahil sa pagkuha nila ng maraming bakuna kontra COVID-19.

Sinabi ni Roque, dahil mino-monopolyo ng mayayamang bansa ang suplay ng bakuna kontra COVID-19, at dahil kinailangang tugunan ang “guilty conscience ng mga ito…kaya namimigay ng kaunting bahagi ng bakuna sa mga mahihirap na bansa.”

Giit ni Roque, hindi ito ang solusyon sa pandemya dahil gaya ng sinasabi ng World Health Organization, hindi magiging ligtas ang sinoman kung hindi magiging ligtas ang lahat.

Kaya aniya kinakailangan ng lahat ng bansa ng pantay na suplay ng bakuna.

Dagdag ni Roque, kaya aniya siya ang ni-nominate ng gobyerno sa International Law Commission ay para isulong ang isang kasunduan na kikilala sa ligal na obligasyon ng lahat ng bansa para magkaroon ng pantay na access sa COVID-19 vaccines.