Naghain na ng kanilang Certificate of Candidacy sina Manila Mayor Isko Moreno at running mate nito na si Dr. Willie Ong sa pagka-pangulo at bise presidente sa 2022 national elections.
Sabay na naghain ang dalawa sa Harbor Garden Tent sa Sofitel Hotel sa Pasay City sina Moreno at Ong.
Nauna nang sinabi ni Moreno na pinili nitong running mate si Ong dahil isa ring doktor ang kaniyang bise alkalde at nakita niyang naging epektibo rin siya bilang punong ehekutibo lalo ngayong panahon ng pandemya.
Marami umanong kandidato ang may mali sa ipinasang Certificate of Candidacy (COC) ayon sa Commission on Elections (COMELEC).
Sinabi ni COMELEC Spokesperson James Jimenez, ang form na ipinapasa ng mga kandidato ay nada-download sa COMELEC website at kailangan nila itong i-print ng back-to-back.
Ngunit sa halip aniya ang ginawa ng mga kandidato ay pinag-hiwa-hiwalay ang print ng naturang form.
Dahil umano rito ay napapatagal ang kanilang pag proseso.
Ayon kay Jimenez, nasa dalawa o tatlo ng kahalintulad na problema ang kanilang naobserbahan at malaking bilang umano ito kung ang pag-uusapan ay ang kabuuan ng kanilang sistema.
Kinundena ng Estados Unidos ang mapag-hamong aksyon ng China matapos itong magpadala ng halos 100 military aircraft malapit sa Taiwan, sa loob ng tatlong araw.
Ayon kay US State Department Spokesperson Ned Price, nababahala ang Amerika sa aktibidad ng Tsina na tila naghahamon na ng gulo.
Sa oras anyang magkaroon ng “mis-calculation” ay mamemeligrong maapektuhan ang kapayapaan sa Indo-Pacific Region.
Hinimok naman ng US ang China na itigil ang military activity, diplomatic at economic pressure nito laban sa Taiwan sa halip ay bumalik sa mapayapang negosasyon. —sa panulat ni Drew Nacino
Kinubra ng Magnolia Hotshots ang unang panalo sa best-of-seven series ng semi-finals ng Philippine Cup, kontra Meralco Bolts.
Pinataob ng Hotshots ang Bolts sa score na 88 – 79 sa kanilang paghaharap sa game 1 sa Don Honorio Ventura State University Gym sa Bacolor, Pampanga, kahapon.
Nagpakawala ng 17 points si Paul Lee habang nag-ambag ng 13 points si Calvin Abueva para sa Magnolia.
Kumamada naman ng double-double 14 points at 10 rebounds si Bong Quinto para sa Meralco. —sa panulat ni Drew Nacino
Isa nang ganap na bagyo ang Low Pressure Area na namataan sa Silangang bahagi ng Caraga at Davao Region.
Ayon sa PAGASA weather forecast, namataan ang Bagyong Lannie sa bahagi ng Silangang Surigao City, Surigao del Norte alas 3 kaninang madaling araw na may lakas ng hanging aabot sa 45 kilometers per hour at pagbugsong aabot sa 55 kilometers per hour.
Kumikilos ang bagyo pa hilagang-kanluran ng Surigao City sa bilis na 20 kilometro kada oras.
Makakaranas ng pag-ulan na may kasamang hangin ang bahagi ng Visayas, MIMAROPA at Caraga Region.
Habang kalat-kalat na pag-ulan naman ang mararanasan sa bahagi ng Metro Manila, Calabarzon, Bicol Region, Bulacan, Aurora, Bataan at iba pang bahagi ng Mindanao habang katamtamang pag-ulan naman sa natitirang bahagi ng Luzon.
Samantala, naitala naman ang signal no. 1 sa bahagi ng:
Dahil dito, pinag-iingat ng pagasa ang publiko sa posibleng pagbaha at pagguho ng lupa dahil sa malalakas na pag-ulan dulot ng bagyo.
– – sa panulat ni Angelica Doctolero
Sisimulan sa anim na ospital sa NCR ang pagbabakunahan sa mga batang edad 12 hanggang 17.
Ayon kay Health Undersecretary Myrna Cabotaje, Chairperson ng national COVID-19 Vaccination Operations Center, kabilang sa ang mga nakumpirmang lalahok sa pagbabakuna ang National Children’s Hospital, Philippine Heart Center, at Philippine General Hospital.
Target ng Philippine Heart Center na unang mabakunahan ang mga batang edad 15 hanggang 17 anyos na may heart disease.
Isusunod naman ang bakunahan sa mga kabataan sa vaccination sites ng mga lokal na pamahalaan. —sa panulat ni Hya Ludivico
Iminungkahi ni Turismo Nominee Marco Bautista na gawing 5 araw na lamang ang quarantine period ng mga biyaherong papasok sa bansa.
Una rito, nagpasalamat si Bautista kay Pangulong Rodrigo Duterte sa plano nitong gawing 7 araw na lamang ang quarantine ng mga biyahero.
Giit ni Bautista, kung may 2 linggong leave ang isang OFW ay halos kalahati ng kanilang bakasyon ay gugugulin lamang nila sa quarantine facility.
Aniya, kung babawasan ang quarantine period ay tiyak na aangat muli ang turismo.
Sa ngayon, kinakailangang manatili ng 10 araw sa quarantine facility ang mga biyahero ngunit kailangan pa ring tapusin ang 14-day quarantine sa bahay. —sa panulat ni Hya Ludivico
Isinailalim sa 2 linggong granular lockdown ang isang residential compound sa Antipolo City matapos magpositibo sa COVID-19 ang isang residente nito.
Bukod sa isang nagpositibo, pitong iba pa ang nakitaan ng sintomas ng naturang sakit.
Kaugnay nito, hindi papayagang makalabas ang mga residente ng Sitio Pasong Palanas sa barangay San Juan.
Nabatid ng mga otoridad na 19 na mga residente ang dumalo sa libing ng isang nasawing COVID-19 positive.
Tiniyak naman ni City Government Spokesperson Dr. Casimiro “Junjun” Ynares, III na mabibigyan ng food packs ang mga apektadong residente. —sa panulat ni Hya Ludivico
Inihayag ng Department of Health (DOH) na hindi naman nagiging malala ang ‘side effects’ ng COVID-19 vaccines sa mga edad 12-17 taong gulang.
Sinabi ni Health Undersecretary Myrna Cabotaje na kabilang sa mga ‘side effects’ ay ang karaniwang ‘allergy’, sakit ng ulo, at sakit ng katawan.
May ilan naman aniyang nakaranas ng ‘myocarditis’ o pananakit ng masel ng puso ngunit hindi naman malala.
Sa ngayon, tanging Moderna at Pfizer ang nabibigyan ng ‘Emergency Use Authorization’ (EUA) para magamit sa mga menor de edad. —sa panulat ni Hya Ludivico
Posibleng hindi na lumagpas pa sa 10,000 kada araw ang mga bagong kaso ng COVID-19 sa buong bansa sa katapusan ng Oktubre.
Ayon kay Dr. Guido David ng OCTA Research Group, nasa 0.91 ang reproduction number o bilis ng hawaan ng COVID-19 sa buong bansa habang nasa 0.85 naman ang reproduction number sa NCR.
Sinabi pa ni David na mas mapapabilis ang pagbaba ng mga kaso ng COVID-19 sa bansa kung mako-kontrol ng ibang rehiyon ang pagtaas ng mga kaso sa kani-kanilang lugar. —sa panulat ni Hya Ludivico