HEADLINES

Ipinanawagan ng mga pamilya na matulungan ng gobyernong mapauwi sa bansa ang 6,000 mga Pilipinong naka-detain sa Sandakan Immigration Holding Center sa Sabah, Malaysia.

Ayon sa nakababatang kapatid ng isa sa mga detainee na si Warda Majun- Straub, nanawagan aniya siya kay DFA secretary Teodoro Locsin Jr. na pabilisin ng Embahada ng Pilipinas sa Kuala Lumpur ang pag-ayos ng kanilang mga dokumento.

Aniya, karamihan sa mga naroon ay naiulat na nagkakasakit umano at nagugutom dahil sa marami ring detainees ang nasa naturang opisina.

Samantala, naglabas ng pahayag ang embahada ng Pilipinas sa Malaysia na kaya tumatagal ang proseso ng mga dokumento ay dahil walang konsulado sa Sabah at dinagdagan pa ng mga health protocol at restriksyon dulot ng COVID-19.—sa panulat ni Airiam Sancho

Dinagsa ang pagpapatuloy ng voters registration sa mga nais humabol na aplikante sa para sa eleksyon 2022.

Ayon sa report, madaling araw pa lang ay mahaba na ang pila ng mga nais magparehistro sa opisina ng Commission on Elections sa barangay Sto. Cristo lungsod ng Quezon gayundin sa lungsod ng Pasig na mayroon lamang tatlong daan islot para sa mga aplikanteng magpaparehistro.

Samantala, nagpaalala ang mga opisyal ng barangay na patuloy pa ring sundin ang physical distancing.—mula sa ulat ni Aya Yupanco (Patrol 5) sa panulat ni Airiam Sancho

Ikinansela ng alkade ng Marikina na si Marcy Teodoro ang paniningil ng multa at tubo sa mga market stall owners na hindi makapagbayad ng renta sa kabila ng pandemya nitong linggo.

Aniya, lumapit sa kanya ang mga stall owners noong Oktubre 8 upang kanselahin ang mga multa sa kadahilan na hindi nila kaya ang halaga ng renta bunsod ng kakaunting kustomer at mababang kita.

Dahil dito, ipinag-utos ng alkalde sa konseho ng lungsod na magpatupad ng ordinansang alisin ang paniningil sa multa at tubo hinggil sa dinaranas na pandemya.–-sa panulat ni Airiam Sancho

Pinagbabaril ang isang lider ng fraternity group ng riding in tandem sa Barangay Calamba, Cebu.

Ayon sa inisyal na report ng Sawang Calero Police Station, kinilala ang biktima na si Richard Buscaino presidente ng Alpha Kappa Rho Fraternity (AKHRO) na nagtamo ng apat na bala sa katawan na naging dahilan ng agaran nitong pagkamatay.

Sinabi naman ni Police Staff Sergeant Vincent Gonzalve na sakay din ng motorsiklo ang biktima nang harangin ito ng hindi pa nakikilalang mga salarin.

Samantala, ipinag-utos ni PNP Chief General Guillermo Eleazar ang patuloy na imbestigasyon sa motibo ng krimen.—sa panulat ni Airiam Sancho

Bumaba na sa ikinokonsiderang ‘safe levels’ ang hospital bed occupancy rate para sa pasyente ng COVID-19 sa buong bansa.

Ayon sa Department Of Health o DOH, ang healthcare usage sa bansa ay bumaba sa 57% na itinuturing na safe level mula sa moderate risk na 64%  noong nakaraang linggo.

Bukod dito, bumaba din sa 70.39 % ang occupancy rate ng Intensive Care Unit (ICU) beds  mula sa moderate risk level na 73 porsyento noong nakaraang linggo.

Samantala, nananatili naman sa high risk ang hospital bed occupancy sa apat na rehiyon, partikular sa Cordillera Administrative Region, Cagayan Valley, Zamboanga Peninsula at Bicol.—sa panulat ni Airiam Sancho

Nagsagawa na ng pre-emptive evacuation ang Lokal na Pamahalaan ng Baggao sa Cagayan dahil sa epekto ng Bagyong Maring.

Batay sa datos ng National Disaster Risk Reduction and Management Council o NDDRMC, 72 pamilya o katumbas ng 224 indibidwal ang inilikas na hanggang ngayong araw sa lugar na nasa ilalim ng signal no. 2.

Patuloy naman ang evacuation o paglilikas sa iba pang munisipalidad at nangangalap pa ng datos ang NDRRMC hinggil dito.

Samantala, wala nang suplay ng kuryente sa lahat ng barangay sa Sta Ana, Cagayan dahil sa sama ng panahon na dala ng bagyo.

Suspendido na rin ngayon ang mga klase mula sa Pre-school hanggang High School sa pampubliko at pribadong paaralan sa lalawigan.—ulat mula kay Jaymark Dagala (Patrol 9)

Ipinagmalaki ng Philippine National Police o PNP ang pagkakasabat sa humigit kumulang  P34 milyong halaga ng shabu sa Parañaque City nitong weekend.

Ayon kay PNP Chief P/Gen. Guillermo Eleazar, patunay aniya ito na nagbubunga na ang nilagdaang kasaunduan sa pagitan ng PNP at PDEA para paigtingin ang kanilang kampaniya kontra iligal na droga.

Nangyari ang operasyon sa Sucat, Parañaque City kung saan ay naaresto ang suspek na kinilalang si Kenneth Vito Cruz na nahaharap sa kasong paglabag sa RA 9165 o ang Comprehensive Dangerous Drugs Act of 2002.

Giit pa ni Eleazar, bagaman nakatutok ang mga pulis sa pagpapatupad ng minimum health standards ngayong panahon ng pandemiya ay hindi rin nila pinababayaan ang adhikaing linisin sa sumpa ng iligal na droga ang bansa.

Patuloy ang panawagan ng PNP Chief sa publiko na huwag magatubiling lumapit sa mga awtoridad sakaling mayruon silang hawak na impormasyon hinggil sa operayon ng iligal na droga sa kanilang lugar.—ulat mula kay Jaymark Dagala ( Patrol 19)

Ipagpapatuloy nang muli ng Commission on Elections COMELEC ang voter registration ngayong araw, oktubre 11.

Ayon kay COMELEC Spokesman James Jimenez, muling tatanggap ang poll body ng mga aplikasyon para makaboto sa 2022 national and local elections.

Maliban sa mga satellite registration sites, bukas ang mga tanggapan ng COMELEC para sa mga nais magpatala mula lunes hanggang biyernes, bandang 8 ng umaga hanggang 5 ng hapon, gayundin sa oktubre 30.

Kasabay nito, inihayag ni COMELEC Chairman Sheriff Abas na gagawin nila ang lahat ng kanilang makakaya upang maging malinis at tapat ang halalan sa susunod na taon.—sa panulat ni Hya Ludivico